Eski zanfan i devret aprann lo Bondye?

“Sa ptigin ki nou’n aprann lo larelizyon i zis ase pour fer nou annan laenn, me i pa ase pour nou kontan kanmarad.”​—JONATHAN SWIFT, EKRIVEN ANGLE.

JONATHAN SWIFT ti dir sa parol dan dizwityenm syek, me bokou i dakor avek li ozordi. An realite, serten i krwar ki paran pa sipoze ansenny zot zanfan lo Bondye. Zot santi ki i en dezavantaz pour bann zanfan ki’n ganny elve dan bann lakour kot dimoun i relizye.

Ki ou panse? Lekel parmi sa bann pwennvi ki paret pli rezonnab?

● Paran pa sipoze ansenny son zanfan lo Bondye.

● Paran i devret esper son zanfan gran pour kapab koz lo larelizyon avek li.

● Ler zanfan i ankor ptipti, paran i devret ansenny li son krwayans lo Bondye. Ler i pli gran, paran i devret ankouraz sa zanfan pour fer son prop refleksyon lo sa bann size.

● Zanfan i devret annan menm pwennvi ki son paran lo Bondye san demann kestyon.

Eski larelizyon i en danze pour bann zanfan?

Tou paran ki kontan son zanfan pa oule fer li ditor. Me eski i annan laprev pour montre ki i en danze pour paran ansenny zanfan lo Bondye? Pour plizyer lannen, en kantite resers in ganny fer lo lefe ki krwayans ek larelizyon bann paran i annan lo zot zanfan. Ki rezilta sa bann resers?

Sa bann resers in montre ki olye fer ditor, larelizyon i kapab annan en lefe pozitif lo devlopman en zanfan. Rezilta en rapor ki ti ganny pibliye 2008 dan en zournal Social Science Research * ti dir: “Levidans i montre ki larelizyon i amelyor relasyon ant paran ek zanfan, pour tou le de, papa ek manman.” Sa rapor ti azoute: “I paret ki larelizyon ek spirityalite i zwe en rol enportan dan lavi bokou zanfan e dan relasyon familyal.” Sa bann resers i ariv lo preski menm konklizyon avek sa ki Zezi Kri ti dir: “Byennere bann ki pov an-espri, [oubyen “ki konsyan zot bezwen spirityel,” NW] akoz Rwayonm Lesyel i pour zot.”​—Matye 5:3.

Me ki nou pou dir lo sa pwennvi ki zanfan i devret ase gran avan ki zot konmans aprann lo Bondye ek larelizyon? Sa pwennvi pa pe pran an konsiderasyon ki lespri en zanfan i parey en seo vid ki pou ganny ranpli avek lenformasyon. Prezan, paran i annan en swa, swa zot menm zot ranpli sa “seo” avek bann prensip moral ek krwayans ki zot santi i apropriye pour zot zanfan, ouswa zot les sa kantite lide ek pwennvi ki annan dan sa lemonn ranpli lespri ek leker zot zanfan.

Eski i annan en sekre?

Listwar in prouve ki larelizyon i kapab ankouraz dimoun pour devlop laenn e kre divizyon parmi zot. Alor, ki mannyer bann paran i kapab evite ki larelizyon i annan menm lefe ki sa ki Jonathan Swift ti dir pli boner? Konman ki paran i kapab ansenny zot zanfan bann krwayans relizye ki pou ed zot kontan lezot?

Nou pou reponn trwa kestyon pour trouv sa sekre: (1) Ki zanfan i devret aprann? (2) Lekel ki devret ansenny zot? (3) Ki metod ki pli efikas pour ansenny zanfan?

[Not anba lo paz]