Eski Zeova i konn ou?
Eski Zeova i konn ou?
“[“Zeova,” NW] i konnen bann ki pour li.” —2 TIM. 2:19.
1, 2. (a) Kwa ki ti enportan pour Zezi? (b) Ki kestyon nou pou egzaminen?
EN ZOUR, en Farizyen ti apros Zezi e demann li: “Met, lekel pli gran konmannman dan Lalwa?” Zezi ti reponn li: “Kontan [“Zeova,” NW] ou Bondye avek tou ou leker, avek tou ou lam, e avek tou ou lespri.” (Mat. 22:35-37) Zezi ti kontan son Papa dan lesyel en kantite e i ti eksprim sa lanmour dan tou sa ki i ti fer. Pour Zezi, fer plezir son Papa ti sitan enportan ki i ti toultan reste fidel avek Bondye. Sanmenm sa ki zis avan son lanmor, i ti kapab dir ki Bondye ti konn li konman enn ki ti fidelman obeir Son bann komannman. Pour sa rezon, Zezi ti reste dan lanmour Bondye.—Zan 15:10.
2 Bokou dimoun ozordi i dir ki zot kontan Bondye. Nou osi parey, pa i vre! Toudmenm, i annan en keksoz enportan ki nou bezwen demann nou lekor: Eski Bondye i konn mwan? Ki mannyer Zeova i vwar mwan? Eski mwan osi mon pour Bondye? (2 Tim. 2:19) Pa i en zoli privilez pour mazin sa relasyon pros ki nou annan avek Souvren liniver!
3. Akoz serten i vwar li difisil pour krwar ki Zeova i kapab kontan zot e kwa ki kapab ed zot rezet sa move rezonnman?
3 Pourtan, serten ki annan bokou lanmour pour Bondye i vwar li difisil pour krwar ki Bondye i kapab annan en bon pwennvi lo zot. Serten i santi ki zot pa vo nanryen, alor zot vwar li difisil pour krwar ki zot kapab vin pour Zeova. Me, pa i ankourazan pour konnen ki Bondye pa vwar nou dan sa fason! (1 Sam. 16:7) Zapot Pol ti dir bann Kretyen: “Si en dimoun i kontan Bondye, Bondye i konn li.” (1 Kor. 8:3) Kontan Bondye i sa premye keksoz ou bezwen fer si ou oule ki Bondye i konn ou. Par egzanp, akoz ou pe lir sa magazin? Akoz ou esey ou mye pour servi Zeova avek tou ou leker, nanm, lespri ek lafors? Si ou’n dedye ou lavi avek Bondye e batize, kwa ki’n motiv ou pour fer sa? Labib i montre ki se Zeova ki egzamin leker bann dimoun e ki atir sa bann dimoun presye anver li. (Lir Agai 2:7 *; Zan 6:44.) Pour sa rezon, si ou pe servi Zeova, ou kapab ariv lo sa konklizyon ki li ki’n atir ou ver li. I pa pou zanmen abandonn bann ki i’n atir anver li si zot reste fidel. Zeova i vwar zot vreman presye e i kontan zot en kantite.—Ps. 94:14.
4. Akoz nou devret kontinyen reflesir lo si Bondye i konn nou?
4 Si Zeova in atir nou ver li, nou devret vwar li enportan pour nou reste dan son lanmour. (Lir Zid 20, 21.) Mazinen ki Labib i dir ki nou kapab ganny antrennen ouswa elwannyen avek Bondye. (Ebr. 2:1; 3:12, 13) Par egzanp, zis avan ki zapot Pol ti dir sa parol dan 2 Timote 2:19, i ti koz lo Imene ek Filet. Aparaman, sa de zonm ti pour Zeova pour en serten letan, me apre sa zot ti kit laverite. (2 Tim. 2:16-18) Rapel osi ki dan bann kongregasyon Galasi, serten ki Bondye ti’n konnen pa ti reste dan lalimyer spirityel ki zot ti’n kontan oparavan. (Gal. 4:9) Pa zanmen pran alalezer nou relasyon presye avek Bondye.
5. (a) Ki serten kalite ki Bondye i kontan? (b) Ki legzanp nou pou konsidere?
5 I annan serten kalite ki Zeova i vreman kontan. (Ps. 15:1-5; 1 Pyer 3:4) Par egzanp, Bondye i kontan bann dimoun ki annan lafwa ek limilite. Annou egzamin legzanp de zonm ki ti demontre sa bann zoli kalite ki ti fer Zeova kontan zot. Nou pou osi vwar legzanp en zonm ki ti krwar Bondye i konn li me ki akoz son lorgey i ti realize ki Zeova ti’n rezet li. Nou kapab aprann bann leson enportan atraver sa bann legzanp.
Papa tou bann ki annan lafwa
6. (a) Ki kalite lafwa Abraam ti demontre dan promes Bondye? (b) Dan ki sans Zeova ti konn Abraam?
6 Abraam ti en zonm ki ti “met lafwa dan Zeova.” Anfet, i ti ganny apele “papa tou sa ki kwar.” (Zen. 15:6; Rom. 4:11) Par lafwa, Abraam ti kit son lakour, son zanmi, son bann posesyon pour al reste dan en pei lwenten. (Zen. 12:1-4; Ebr. 11:8-10) Apre plizyer lannen, lafwa Abraam ti ankor byen for. Sa ti vin evidan ler i ti obeir lord Bondye pour “ofer Izaak an sakrifis.” (Ebr. 11:17-19) Abraam ti demontre lafwa dan promes Zeova, alor i ti spesyal pour Bondye e Bondye ti konn Abraam byen. (Lir Zenez 18:19. *) Zeova pa ti zis konnen ki Abraam ti egziste, i ti kontan li konman en zanmi.—Zak 2:22, 23.
7. Kwa ki remarkab avek lafason ki Zeova i akonplir son promes e ki lefe sa ti annan lo Abraam?
7 I enteresan pour note ki Abraam pa ti resevwar sa later ki i ti’n ganny promet ler i ti ankor vivan. I pa ti ni vwar son desandans vin “parey gren disab o bor lanmer.” (Zen. 22:17, 18) Menm si i pa ti vwar lakonplisman sa bann promes ler i ti ankor vivan, Abraam ti gard en lafwa for dan Zeova. I ti konnen ki Bondye ti’n donn li son parol, alor i ti konmsi i ti’n fini ganny realize. Wi, Abraam ti viv son lavi an armoni avek son lafwa. (Lir Ebre 11:13.) Eski Zeova i konn nou konman bann dimoun ki annan lafwa parey Abraam?
Kontinyen esper Zeova i en levidans nou lafwa
8. Ki serten keksoz dimoun ti a voudre gannyen?
8 I kapab ki nou ti a voudre marye, annan zanfan e en bon lasante. Sa i bann keksoz normal e i bann dezir apropriye. Me, pour bokou dimoun enn oubyen plizyer sa bann dezir i kapab pa ganny realize. Si i le ka dan ou lavi, lafason ki ou reazir pou demontre ki kantite lafwa ou annan.
9, 10. (a) Ki mannyer serten in esey satisfer zot bann dezir? (b) Ki ou santiman lo realizasyon bann promes Bondye?
9 Pa i ti pou bet pour esey satisfer sa bann dezir dan en fason ki pa annakor avek lasazes Bondye. Sa ti pou afekte nou spirityalite. Par egzanp, serten in swazir bann tretman medikal ki pa an armoni avek konsey Zeova. Lezot in swazir en lanplwa kot zot mank renyon ouswa zot lwen avek zot fanmir. Ki nou pou dir lo devlop en relasyon romantik avek en dimoun ki pa Temwen Zeova? Si en Kretyen i fer sa, eski nou kapab dir ki i pe vreman azir dan en fason kot Zeova i konn li? Ki mannyer Zeova ti pou santi si Abraam ti enpasyan konsernan lafason ki promes Bondye ti pou ganny akonplir? Ki ti pou’n arive si Abraam ti’n swiv son prop lide pour rekomans en lavi konfortab e rod en o pozisyon pour li menm olye esper Zeova? (Konpar Zenez 11:4.) Eski Zeova ti pou kontinyen konn li konman son zanmi?
10 Ki keksoz ki ou ti a kontan gannyen? Eski ou lafwa i ase for pour ou kontinyen esper Zeova ki pou satisfer tou ou bann bon dezir? (Ps. 145:16) Parey i ti le ka avek Abraam, bann promes Bondye pa pou touzour ganny realize osi vitman ki nou ti a kontan. Kantmenm sa, devlop en lafwa parey Abraam i annan valer dan lizye Zeova sirtou si nou azir an armoni avek sa lafwa. Napa pli gran byenfe ki nou pou gannyen si nou fer sa.—Ebr. 11:6.
Diferans ant lorgey ek limilite
11. Ki privilez Kora ti kapab annan, e ki sa i montre lo son latitid anver Bondye sa letan?
11 I annan en gran diferans ant Moiz ek Kora dan lafason ki zot ti demontre respe pour desizyon ek laranzman Zeova. Zot reaksyon ti annan en lefe lo lafason ki Zeova ti konsider zot. Kora ti en Levit sorti dan fanmir Koat e i ti annan en kantite privilez. Par egzanp, i ti vwar Bondye delivre pep Izrael atraver Lanmer Rouz, i ti siport Zeova ler i ti pas zizman lo bann Izraelit dezobeisan lo Montanny Sinai e i ti osi donn lanmen anmenn Lars Lalyans. (Egz. 32:26-29; Nom. 3:30, 31) I paret ki i ti fidel avek Zeova pandan tou sa bann lannen e bokou Izraelit ti respekte li.
12. Parey nou vwar lo portre lo paz 31, ki mannyer lorgey Kora ti afekte son relasyon avek Bondye?
12 Me kantmenm sa, ler nasyon Izrael ti pe al ver Later Promiz, Kora ti panse ki i ti annan serten problenm dan laranzman Zeova. Apre sa, 250 lezot sef sa nasyon ti pran kote avek Kora pour esey fer bann sanzman. I paret ki Kora ek sa 250 zonm ti krwar ki zot ti ankor annan en bon relasyon avek Zeova. Zot ti dir Moiz: “Nou’n ganny ase avek zot, akoz lasanble antye, zot tou zot sen e Zeova i parmi zot.” (Nom. 16:1-3) Pa sa ti en latitid orgeye ki ti demontre tro bokou konfyans dan zot lekor! Moiz ti dir zot: “Zeova pou montre lekel ki pour li.” (Lir Nonm 16:5. *) Son lannmen, Kora ek tou sa bann ki ti lo son kote dan son rebelyon ti mor.—Nom. 16:31-35.
13, 14. Dan ki fason Moiz ti demontre limilite?
13 Par kont, Moiz ti “en zonm ki ti annan plis limilite ki tou zonm ki ti lo sirfas later.” (Nom. 12:3) I ti determinen pour swiv gidans Zeova akoz i ti annan limilite. (Egz. 7:6; 40:16) Napa levidans ki montre ki Moiz ti abitye kestyonn sa ki Zeova ti fer oubyen ki i ti’n ganny ase avek swiv bann prosedir ki Zeova ti’n met an plas. Par egzanp, Zeova ti donn bann lenstriksyon konsernan konstriksyon tabernak ziska dan bann ptipti detay parey kouler difil, lakantite trou pour anmar latwal latant. (Egz. 26:1-6) Si ou annan en sirveyan dan lorganizasyon Bondye ki donn ou bann lenstriksyon vreman detaye, ou kapab santi ou fristre par ler. Par kont, Zeova i en sirveyan parfe ki kontan partaz son responsabilite avek lezot e i annan konfyans dan son serviter. Kan i donn bokou detay, i annan bon rezon pour fer li. Me remarke ki Moiz pa ti agase avek tou bann pti detay ki Zeova ti donn li, dan zar konmsi Zeova ti pe abes li oubyen anpes li servi son abilite ouswa son liberte. Plito, Moiz ti fer sir ki bann travayer ti fer egzakteman parey Zeova ti demande. (Egz. 39:32) Pa Moiz ti vreman demontre limilite! Moiz ti rekonnet ki sa ti travay Zeova e ki i ti pe zis ganny servi par li pour akonplir sa travay.
14 Limilite Moiz ti osi evidan ler i ti fer fas avek bann sirkonstans difisil ki ti afekte li personnelman. Par egzanp, i ti perdi kontrol lo son lekor e i pa ti glorifye Bondye kan lepep ti pe konplent. Finalman, Zeova ti dir Moiz ki i pa ti pou antre avek pep Izrael dan Later Promiz. (Nom. 20:2-12) Li ek son frer Aaron ti bezwen siport bann Izraelit ki ti pe konplent zanmen fini pour plizyer lannen. Moiz ti fer en fot zis en fwa e pour sa rezon i pa ti vwar lakonplisman en promes ki i ti’n espere pour tou sa letan! Ki mannyer Moiz ti reazir? Nou konpran ki i ti’n kapab dezapwente. Me avek limilite, i ti aksepte desizyon Zeova. I ti konnen Zeova i en Bondye drwat ki pa zanmen enzis. (Det. 3:25-27; 32:4) Kan ou mazin Moiz, eski ou vwar li konman en dimoun ki Zeova ti konnen?—Lir Egzod 33:12, 13. *
Soumet avek Zeova i demann limilite
15. Ki nou kapab aprann avek aksyon egois Kora?
15 Lafason ki nou reazir ler i annan bann sanzman ouswa desizyon ki ganny fer par bann frer responsab e ki afekte kongregasyon mondyal i annan en lefe lo lafason ki Zeova i vwar nou. Kora ek son bann konpanyon ti elwannyen avek Bondye akoz zot lorgey, mank lafwa e zot ti annan tro bokou konfyans dan zot lekor. Menm si pour Kora, Moiz ti sa zonm aze ki ti pe fer bann desizyon tou le zour, an realite se Zeova ki ti pe diriz sa nasyon e Kora ti’n oubliy sa. Finalman, i ti aret demontre fidelite anver bann ki Zeova ti servi. Pa i ti pou’n pli saz pour Kora espere ziska ki i ti pli byen konpran oubyen ki lezot azisteman ti ganny fer si i ti neseser. A lafen di zour, Kora ti vin enfidel e sa ti gat sa repitasyon fidel ki i ti annan dan servis Zeova akoz son aksyon egois.
16. Si nou swiv legzanp limilite Moiz, ki lefe sa i kapab annan lo nou relasyon avek Zeova?
16 Sa resi i en lavertisman pour bann ansyen ek bann manm dan kongregasyon ozordi. Esper Zeova e swiv gidans sa bann ki i’n swazir pour diriz kongregasyon i demann limilite. Eski nou annan menm limilite ek ladouser ki Moiz ti annan? Eski nou aksepte pozisyon bann ki diriz kongregasyon e aksepte gidans ki zot donnen? Ler nou dezapwente, eski nou kapab met nou santiman personnel dekote? Si i le ka, Zeova pou konn nou osi. Nou limilite ek soumisyon pou fer li kontan nou.
Zeova i konn sa bann ki pour li
17, 18. Pour ki nou reste pour Zeova, ki nou bezwen fer?
17 I vo lapenn pran letan pour reflesir lo sa bann ki Zeova in atir anver li e ki ganny son laprouvasyon. Abraam ek Moiz ti enparfe, zot ti annan defo parey nou menm. Pourtan, Zeova ti konn zot, zot ti pour li. Kora li, i montre ki i posib pour elwannyen avek Zeova e ki finalman Zeova i nepli konn nou e nou perdi son laprouvasyon. Nou tou nou devret demann nou lekor: ‘Ki mannyer Zeova i vwar mwan? Ki mon kapab aprann avek sa bann legzanp dan Labib?’
18 Pa i vreman rekonfortan pour konnen ki Zeova i vwar fidelite bann ki i’n atir anver li e i pran zot pour li! Reste determinen pour kontinyen devlop lafwa, limilite ek lezot kalite ki pou fer Bondye kontan ou. Vreman, napa en pli zoli privilez ki ler Zeova i konn nou akoz sa pou donn nou satisfaksyon la konmela e anmas bann benediksyon pour nou a lavenir.—Ps. 37:18.
[Not anba lo paz]
^ par. 3 Agai 2:7: “Zeova bann larme in dir: ‘Mon pou sekwe tou bann nasyon, e bann keksoz presye sorti dan tou nasyon pou vini; e mon pou ranpli sa lakaz avek laglwar.’”
^ par. 6 Zenez 18:19: “Parski mon’n aprann konn li pour li kapab demann son bann garson ek son fanmir apre li ki zot kontinyen swiv semen Zeova e fer sa ki drwat e zis; e ki finalman Zeova pou vreman fer sa ki i ti’n promet avek Abraam.”
^ par. 12 Nonm 16:5: “Apre sa, i ti koz avek Kora ek lasanble antye e i ti dir zot: ‘Bomaten Zeova pou fer zot konnen lekel ki pour li e lekel ki sen e lekel ki devret vin devan li e sa enn ki i pou swazir pou vin devan li.’”
^ par. 14 Egzod 33:12, 13: “12 Alor Moiz ti dir Zeova: ‘Gete, ou pe dir mwan: “Fer monte sa pep,” me mwan ou pa’n fer mwan konnen lekel ou pou anvoy avek mwan.’ Deplis, ou menm ou’n dir: ‘Wi, mon konn ou non e tou fason ou’n trouv faver dan mon lizye.’ 13 Aprezan, silvouple, si mon’n trouv faver dan ou lizye, fer mwan konn ou bann semen silvouple, pour ki mon ava konn ou, afen ki mon kapab trouv faver dan ou lizye, e konsider sa nasyon konman ou pep.”
Eski ou rapel?
• Ki mannyer Zeova i kapab konsider ou?
• Ki mannyer ou kapab imit lafwa Abraam?
• Ki leson nou kapab aprann avek Kora ek Moiz?
[Kestyon]
[Portre lo paz 29]
Parey Abraam, eski nou annan lafwa ki Zeova pou akonplir son bann promes?
[Portre lo paz 31]
Kora pa ti pare pour aksepte avek limilite gidans Bondye
[Portre lo paz 32]
Eski Bondye i konn ou konman en dimoun ki aksepte son gidans avek limilite?
