Ki si sa repo Bondye?
Ki si sa repo Bondye?
“I ankor reste en repo saba pour pep Bondye.”—EBR. 4:9.
1, 2. Ki nou kapab aprann dan sa ki Zenez 2:3 i dir e ki kestyon nou pou reponn?
DAN bann premye sapit liv Zenez, nou aprann ki pandan en peryod sis zour senbolik Bondye ti prepar later pour imen reste lo la. A lafen sak sa bann peryod, Labib i dir: “Aswar ti fer e bomaten ti swiv.” (Zen. 1:5, 8, 13, 19, 23, 31) Toudmenm, konsernan sa setyenm zour, Labib i dir: “Bondye ti beni sa setyenm zour e fer li vin sakre, akoz pandan sa zour i pe repoze akoz tou travay kreasyon ki Bondye ti fer.”—Zen. 2:3.
2 I enteresan pour remarke ki Labib i dir “i pe repoze.” Sa i montre ki lannen 1513 A.N.L., ler Moiz ti ekrir liv Zenez, “zour” repo Bondye ouswa sa setyenm zour ti ankor pe kontinyen. Eski nou ankor dan zour repo Bondye la konmela? Si i le ka, ki mannyer nou kapab antre dan repo Bondye ozordi? Larepons sa bann kestyon i annan bokou lenportans pour nou ozordi.
Eski Zeova i ankor “pe repoze”?
3. Ki mannyer parol Zezi dan Zan 5:16, 17 i montre ki setyenm zour pa ti ankor fini dan premye syek?
3 I annan de kalite laprev ki montre ki sa setyenm zour ti ankor pe kontinyen dan premye syek N.L. Premyerman, get sa ki Zezi ti dir son bann lennmi ki ti kritik li ler i ti geri en dimoun zour Saba akoz zot ti dir i ti pe travay sa zour. Zezi ti dir zot: “Mon Papa i touzour pe travay, e mwan osi mon travay.” (Zan 5:16, 17, nou ki’n met an italik.) Ki Zezi ti pe esey dir? Zot ti akiz Zezi konmkwa i ti pe travay zour Saba. Son larepons: “Mon Papa i touzour pe travay” ti reponn sa lakizasyon. Anfet, Zezi ti pe dir son bann lennmi: ‘Mon Papa ek mwan nou pe fer menm travay. Vi ki mon Papa pe travay pandan sa zour Saba ki’n dire pour plizyer milener, i napa nanryen mal pour mwan kontinyen travay, menm pandan zour Saba.’ Parol Zezi i montre ki sa setyenm zour, setadir zour ki Bondye ti repoze apre ki i ti’n kree tou keksoz lo later ti ankor pe kontinyen dan lepok Zezi. Me, Bondye ti ankor pe travay pour akonplir son plan konsernan later ek bann imen. *
4. Ki lot laprev Pol ti donnen pour montre ki zot ti ankor dan setyenm zour dan son letan?
4 Zapot Pol i donn en dezyenm laprev. Ler i ti sit Zenez 2:2 konsernan repo Bondye, anba lenspirasyon i ti ekrir: “Pour nou ki krwar, nou pou antre dan sa repo.” (Ebr. 4:3, 4, 6, 9, nou ki’n met an italik.) Savedir dan lepok Pol, zot ti ankor dan sa setyenm zour. Konbyen letan ankor sa zour ti pou kontinyen?
5. Ki ti bi sa setyenm zour, e kan ki sa plan pou konpletman ganny realize?
5 Pour reponn sa kestyon, nou bezwen rapel bi sa setyenm zour. Zenez 2:3 i eksplike: “Bondye ti beni sa setyenm zour e fer li vin sakre.” Sa zour ti “vin sakre,” sanktifye ouswa met apar par Zeova pour li konplet realizasyon son plan. I ti dan son plan ki bann zonm ek fanm obeisan i reste lo later e pran swen avek li ek tou sa ki viv lo la. (Zen. 1:28) I pour sa rezon ki Zeova ek Zezi, “Met Saba,” in “touzour pe travay” ziska prezan pour ki plan Zeova i realize. (Mat. 12:8) Zour repo Bondye pou kontinyen ziska ki son plan konsernan later pou konpletman ganny realize a lafen Renny Mil An Kris.
Pa “tonbe par sa menm dezobeisans”
6. Ki legzanp ki kapab vin en lavertisman pour nou e ki leson nou kapab tire avek zot?
6 Pour Adan ek Ev, plan Bondye ti byen kler me zot pa ti azir an armoni avek sa plan. Byensir, pa zis Adan ek Ev ki ti dezobeir Bondye, plizyer milyon lezot imen ti fer parey. Menm, nasyon Izrael, pep ki Bondye ti swazir, ti toultan retonm dan menm dezobeisans. I enteresan pour note ki Pol ti averti bann Kretyen dan premye syek pour pa tonm dan menm latrap ki bann Izraelit. I ti ekrir zot: “Annou fer tou zefor posib pour antre dan sa repo, pour ki personn pa tonbe par sa menm dezobeisans.” (Ebr. 4:11) Pol i relye dezobeisans avek lefet ki en dimoun pa pou antre dan repo Bondye. Ki sa i vedir pour nou? Si nou ti rebel kont plan Bondye dan en serten fason, eski nou ti pou pe pran sa risk pour pa antre dan repo Bondye? Vreman, larepons sa kestyon i tre enportan e nou pou egzamin li pli an detay dan sa lartik. Pour lemoman, annou gete ki nou kapab aprann konsernan antre dan repo Zeova par egzamin move legzanp bann Izraelit.
“Zot pa pou antre dan mon repo”
7. Ki Zeova ti annan antet ler i ti delivre bann Izraelit dan lesklavaz Lezip e ki i ti pe ekspekte avek zot?
7 Lannen 1513 A.N.L., Zeova ti revel son plan konsernan bann Izraelit avek son serviter Moiz. Bondye ti dir: “Mon pe desann pour al sov zot dan lanmen bann Ezipsyen e mon pou tir zot [Lezip] e anmenn zot dan en bon pei ki gran. En pei kot i koul dile ek dimyel.” (Egz. 3:8) Parey Zeova ti’n promet zot zanset Abraam, i ti pou delivre bann Izraelit “dan lanmen bann Ezipsyen” pour akonplir son plan pour fer zot vin son pep. (Zen. 22:17) Bondye ti donn bann Izraelit bann lalwa ki ti pou permet zot annan en bon relasyon avek li. (Iza. 48:17, 18) I ti dir bann Izraelit: “Si zot pou egzakteman obeir mon lavwa e pou vreman gard mon lalyans [parey i ete dan Lalwa], alor zot pou sirman vin mon propriyete spesyal parmi tou lezot pep, akoz later antye i pour mwan.” (Egz. 19:5, 6) Alor, pour bann Izraelit kapab annan sa privilez pour annan en relasyon spesyal avek Bondye zot ti pou bezwen obeir parol Bondye.
8. Ki kalite lavi bann Izraelit ti pou annan si zot ti obeir Bondye?
8 Zis mazinen ki mannyer lavi ti pou’n ete si selman bann Izraelit ti obeir Bondye! Zeova ti pou beni zot plantasyon, zot plantasyon rezen ek zot kantite zannimo. Zot lennmi pa ti pou kapab fer zot nanryen. (Lir 1 Lerwa 10:23-27. *) Kan Mesi ti pou vini, i ti pou vwar ki tou keksoz ti pe al byen e ki nasyon Izrael pa ti anba dominasyon lezot nasyon parey Ronm ki ti o pouvwar sa letan. Nasyon Izrael ti pou en legzanp pour bann nasyon dan zalantour, zot ti pou donn levidans ki sa bann ki obeir Bondye pou ganny son benediksyon spirityelman e dan domenn materyel.
9, 10. (a) Akoz i ti vreman grav pour bann Izraelit anvi retourn Lezip? (b) Ki mannyer sa desizyon ti’n kapab afekte ladorasyon bann Izraelit?
9 Pa i ti pou vreman en gran privilez pour bann Izraelit si zot ti’n azir an armoni avek plan Zeova ki ti pou’n anmenn bann benediksyon pa zis pour zot menm me finalman pour tou bann fanmir lo later! (Zen. 22:18) Toudmenm, an zeneral sa zenerasyon rebel pa ti enterese pour swiv sa rwayonm model anba dominasyon Bondye. Zis mazinen, zot ti menm anvi retourn Lezip! (Lir Nonm 14:2-4. *) Si zot ti retourn Lezip, eski sa ti pou akonplir plan Bondye pour fer Izrael en rwayonm model? I pa ti pou le ka. Anfet, si bann Izraelit ti’n retourn anba dominasyon bann Ezipsyen ki ti bann payen, zot pa ti pou’n zanmen kapab swiv Lalwa Moiz e benefisye avek laranzman Zeova pour pardonn zot pese. Zot ti mazin zis zot prop lekor e zot pa ti pe pran an konsiderasyon plan Bondye dan zot lavi. I pa drol alor ki Bondye ti dir sa bann rebel: “Pour sa rezon mon ti ankoler avek sa pep. Mon ti dir: ‘Zot leker i touzour elwannyen avek mwan, zot pa’n konpran sa ki mon ti pe atann zot fer.’ Dan mon lakoler mon ti fer sa serman: ‘Zot pa pou zanmen antre dan mon repo.’”—Ebr. 3:10, 11; Ps. 95:10, 11.
10 Lefet ki zot ti anvi retourn Lezip, sa nasyon rebel ti demontre ki zot ti napa bokou lentere dan sa bann benediksyon spirityel ki zot ti’n gannyen. O kontrer zot ti pli kontan pwaro, zonnyon ek lay ki zot ti gannyen Lezip. (Nom. 11:5) Parey Ezai, sa bann rebel pa ti rekonesan e zot ti pare pour abandonn sa leritaz spirityel presye zis pour zot ganny en bon manze.—Zen. 25:30-32; Ebr. 12:16.
11. Ki mannyer enfidelite bann Izraelit dan letan Moiz ti afekte plan Bondye?
11 Menm si sa zenerasyon Izraelit ki ti’n kit Lezip ti napa lafwa, avek pasyans Zeova ti “touzour pe travay” pour realiz son plan avek sa zenerasyon ki ti pou vini apre. Bann dimoun dan sa lot zenerasyon ti pli obeisan ki zot paran. An armoni avek komannman Zeova, zot ti antre dan Later Promiz e konmans konkerir sa pei. Nou lir dan Zozye 24:31: “Izrael ti kontinyen servi Zeova pandan tou bann zour Zozye, e bann zour bann ansyen ki ti kontinyen viv apre Zozye e ki ti’n konn tou sa ki Zeova ti fer pour Izrael.”
12. Ki mannyer nou konnen i posib pour antre dan repo Bondye ozordi?
12 Toudmenm, sa zenerasyon obeisan ti mor avek letan e ganny ranplase par en lot zenerasyon ankor ki “pa ti konn ni Zeova ni travay ki i ti’n fer pour Izrael.” Finalman, “bann garson Izrael ti konmans fer sa ki mal dan lizye Zeova e konmans servi bann Baal.” (Ziz 2:10, 11) Later Promiz pa ti vreman vin en landrwa “repo” pour zot. Akoz zot dezobeisans, zot pa ti anpe avek Bondye. Ler i ti pe koz lo sa bann Izraelit, zapot Pol ti ekrir: “Annefe, si Zozye ti’n donn pep Izrael repo, Bondye pa ti pou koz lo en lot zour apre.” Apre i ti dir: “Ensi, i ankor reste en repo saba pour pep Bondye.” (Ebr. 4:8, 9) Sa “pep Bondye” ki Pol ti pe koz lo la ti bann Kretyen. Eski sa i vedir ki bann Kretyen ti pou kapab antre dan repo Bondye? Definitivman, tou le de Kretyen Zwif konman non Zwif.
Serten pa antre dan repo Bondye
13, 14. (a) Dan letan Moiz, ki bann Izraelit ti bezwen fer pour antre dan repo Bondye? (b) Dan letan Pol, ki bann Kretyen ti bezwen fer pour antre dan repo Bondye?
13 Ler Pol ti ekrir bann Kretyen Ebre, i ti konsernen akoz serten pa ti pe viv an armoni avek plan Bondye. (Lir Ebre 4:1.) Dan ki sans? Sa ki drol, se ki sa ti annan pour fer avek si zot ti devret swiv Lalwa Moiz. Pour plis ki 1,500-z-an, bann Izraelit ki ti oule viv an armoni avek plan Bondye ti bezwen obzerv Lalwa. Me, ler Zezi ti mor, Lalwa ti ganny aboli. Serten Kretyen pa ti reisi aksepte sa e zot ti ensiste pour kontinyen obzerv serten laspe sa Lalwa. *
14 Pol ti dir bann Kretyen ki ti’n vreman atase avek Lalwa ki Zezi konman gran pret, nouvo lalyans ek tanp spirityel ti bann laranzman pli siperyer ki sa bann menm laranzman dan Lalwa Moiz. (Ebr. 7:26-28; 8:7-10; 9:11, 12) Tre probab, zapot Pol ti pe mazin Saba ki ti ganny obzerve dapre Lalwa ler i ti koz lo privilez ki i annan pour antre dan repo Bondye. I ti dir: “I ankor reste en repo saba pour pep Bondye. Parski sa ki antre dan sa repo Bondye, i repoze avek son travay, parey Bondye ti repoze avek sa ki pour li.” (Ebr. 4:8-10) Sa bann Kretyen Ebre ti bezwen aret krwar ki pour ganny laprouvasyon Zeova zot ti bezwen swiv Lalwa Moiz. Depi Lapannkot lannen 33 N.L., bann ki annan lafwa dan sakrifis Zezi Kri i annan laprouvasyon Bondye.
15. Akoz lobeisans i esansyel pour nou antre dan repo Bondye?
15 Kwa ki ti anpes bann Izraelit dan letan Moiz pour antre dan Later Promiz? Dezobeisans. Kwa ki ti anpes serten Kretyen dan letan Pol pour antre dan repo Bondye? Menm zafer, dezobeisans. Zot pa ti kapab aksepte ki Lalwa ti’n fini atenn son bi e ki Zeova ti pe anmenn son pep dan en lot direksyon.
Ki mannyer pour antre dan repo Bondye ozordi?
16, 17. (a) Ki savedir antre dan repo Bondye ozordi? (b) Ki nou pou diskite dan sa lot lartik?
16 Napa bokou Kretyen ki ti pou ensiste ki fodre swiv serten laspe Lalwa Moiz ozordi pour ganny sove. Sa ki Pol ti dir avek bann Efezyen i ase kler: “Parski par lagras zot in ganny sove, par lafwa dan li. E sa se pa par zot prop zefor, me i en kado Bondye, pa rezilta travay, pour ki personn pa vant son lekor.” (Efe. 2:8, 9) Alor, pour en Kretyen, ki savedir antre dan repo Bondye la konmela? Zeova in met dekote sa setyenm zour, son zour repo, pour akonplir son plan ekstraordiner pour later. Nou pou kapab antre dan repo Zeova, repoz avek li, si nou obeisan e travay an armoni avek realizasyon son plan ki ganny revele atraver son lorganizasyon.
17 De lot kote, si nou pa pran o serye bann konsey baze lo Labib ki lesklav fidel e pridan i donn nou e nou deside pour nou vin endepandan, se konmsi nou pe refize azir an armoni avek realizasyon plan Bondye. Sa ti kapab gat sa bon relasyon ki nou annan avek Zeova. Dan sa lot lartik, nou pou vwar serten sityasyon ki afekte pep Bondye e vwar ki mannyer bann desizyon ki nou fer, pour nou endepandan oubyen pour obeir Bondye, i kapab determinen si nou pou antre dan repo Bondye.
[Not anba lo paz]
^ par. 3 Bann pret ek Levit ti travay zour Saba dan tanp e zot pa ti “koupab.” Konman gran pret dan gran tanp spirityel Bondye, Zezi ti osi kapab akonplir son travay spirityel tou le zour, san ki i kas lalwa Saba.—Mat. 12:5, 6.
^ par. 8 1 Lerwa 10:23-27: “Alor Lerwa Salomon ti pli gran ki tou lezot lerwa lo later an sa ki konsern larises ek lasazes. 24 E tou bann dimoun lo later ti anvi vwar Salomon pour antann konsernan lasazes ki Bondye ti’n met dan son leker. 25 E sakenn ti anmenn son kado, bann keksoz an arzan, annor, bann lenz, zarm, delwil bomye, seval ek bourik tou le-z-an, san leksepsyon. 26 E Salomon ti rasanble ankor plis saret ek kavalye; i ti annan mil kat san saret ek douz mil kavalye; e i ti fer zot reste dan bann lavil kot sa bann saret ti ete, pros avek lerwa, Zerizalenm. 27 E lerwa ti fer larzan vin parey ros, Zerizalenm e dibwa sed i ti fer vin parey pye sikomor dan Sefela akoz son kantite.”
^ par. 9 Nonm 14:2-4: “E tou bann garson Izrael ti konmans mirmire kont Moiz ek Aaron, e lasanble antye ti dir sa parol kont zot: ‘Si zis nou ti’n mor Lezip, oubyen si zis nou ti’n mor dan sa dezer! 3 Akoz Zeova pe anmenn nou dan sa pei pour nou mor par lepe? Nou madanm ek nou zanfan pou ganny pran pardfors. Pa plito nou retourn Lezip?’ 4 Zot ti menm dir avek kanmarad: ‘Annou swazir en sef e retourn Lezip.’”
^ par. 13 Nou pa konnen si bann Kretyen Zwif ti al ziska sa degre pour selebre Zour Propisyasyon apre Lapannkot lannen 33 N.L. An tou ka, si zot ti fer li, zot ti pou demontre en mank respe anver sakrifis Zezi. Kantmenm sa, serten Kretyen Zwif pa ti kapab aret swiv serten tradisyon dan Lalwa.—Gal. 4:9-11.
Medit lo sa bann kestyon
• Ki ti bi sa setyenm zour oubyen zour repo Bondye?
• Ki mannyer nou konnen nou ankor dan setyenm zour ozordi?
• Kwa ki ti anpes bann Izraelit dan letan Moiz ek bann Kretyen dan premye syek pour antre dan repo Bondye?
• Ki savedir antre dan repo Bondye ozordi?
[Kestyon]
[Ekstre lo paz 27]
Nou pou kapab antre dan repo Zeova si nou obeisan e travay an armoni avek realizasyon son plan ki ganny revele atraver son lorganizasyon
[Portre lo paz 26]
Ki pep Bondye i bezwen kontinyen fer konmela pour antre dan repo Bondye?
