Apros avek Bondye

“Zeova i mon Berze”

GET sa portre lo sa paz. Eski ou kapab santi ou an sekirite parey sa mouton dan lebra son berze? Dan Psonm 23, Labib i servi legzanp en berze ek son mouton pour montre sa swen ranpli avek tandres ki Zeova i donn son bann adorater. I oule ki nou santi nou an sekirite parey sa psalmis ek lezot ki ti dir avek konfyans: “Zeova i mon Berze.” *​—Verse 1.

David, ekriven sa psonm ti en berze depi son zenn tan. I ti konnen kwa ki en mouton i bezwen e responsabilite ki en berze ti annan. David ti’n eksperyans pour li menm led Bondye dan son lavi, se pour sa ki serten i dir ki sa psonm i donn zot lasirans ek konfyans. Non Bondye, Zeova, i aparet o konmansman e a lafen sa psonm. (Verse 1, 6) Bann parol ant sa de verse i dekrir trwa fason ki Zeova i pran swen avek son pep zis parey en berze i pran swen avek son bann mouton.​—Psonm 100:3.

Zeova i gid son mouton. Bann mouton i tant pour perdi san zot berze. Pareyman, nou bezwen led pour trouv sa bon semen dan lavi. (Zeremi 10:23) David i dir ki Zeova i gid son pep dan “bann landrwa kouver avek zerb” e “dan bann landrwa repo kot i annan delo.” I gid zot “dan bann santye ladrwatir.” (Verse 2, 3) Legzanp sa berze i donn nou lasirans ki nou kapab annan konfyans dan Bondye. Par swiv gidans Bondye an armoni avek son Parol Labib, nou kapab viv en lavi ki anmenn kontantman, rekonfor, e kot nou santi nou an sekirite.

Zeova i protez son mouton. San son berze, en mouton i per e i san okenn defans. Zeova i dir avek son pep ki zot pa devret per, menm kan zot “mars dan en vale fernwanr,” setadir bann moman pli difisil dan lavi. (Verse 4) Zeova i vey zot e i touzour pare pour ed zot. I kapab donn son bann adorater lasazes ek lafors ki zot bezwen pour fer fas avek bann leprev.​—Filipyen 4:13; Zak 1:2-5.

Zeova i donn manze son mouton. Bann mouton i depan lo zot berze pour rod manze pour zot. Nou annan en bezwen spirityel ki kapab ganny konble zis avek led Bondye. (Matye 5:3) Gran mersi, Zeova, sa Enn ki donn avek zenerozite, i met en latab avek bokou manze lo la pour son bann serviter. (Verse 5) Labib ek bann piblikasyon baze lo Labib, parey sa magazin ki ou pe lir, i enn parmi bann mwayen pour benefisye avek sa manze spirityel ki satisfer nou bann bezwen pour nou konnen ki bi lavi ek plan Bondye pour nou.

David ti santi li an sekirite, i ti konnen ki si i reste pros avek son Berze ki dan lesyel, i ti pou benefisye avek swen ranpli avek lanmour ki Zeova ti pou donn li “tou le zour dan [son] lavi.” (Verse 6) Eski ou ti a kontan benefisye avek sa menm kalite sekirite? Si wi, aprann ki mannyer ou kapab apros avek Zeova. Alor, ou pou santi ou an sekirite dan lebra sa Gran Berze, ki pou gid, protez e nouri bann ki reste fidel avek li.​—Izai 40:11.

[Not anba lo paz]