Reste eveye parey Zeremi

“Mwan [Zeova,] mon pe reste eveye konsernan mon parol pour akonplir li.”​—ZER. 1:12.

1, 2. Lefet ki Zeova i “reste eveye,” ki mannyer sa i relye avek en pye almonn?

PYE almonn i enn parmi bann premye pye dibwa pour fleri anler lo bann pti montanny Liban ek Izrael. Son bann zoli fler roz oubyen blan i kapab ganny trouve depi byen boner ver lafen Zanvye ouswa o konmansman Fevriye. Dan langaz Ebre, son non i vedir “sa enn ki pe leve.”

² Kan Zeova ti swazir Zeremi konman son profet, sa laspe spesifik avek en pye almonn ti en legzanp apropriye pour dekrir en realite vreman enportan. O konmansman son minister, sa profet ti ganny en vizyon kot i ti vwar en pti brans pe pouse avek sa pye dibwa. Ki i ti vedir? Zeova ti eksplike: “Mon pe reste eveye konsernan mon parol pour akonplir li.” (Zer. 1:11, 12) Zis parey sa pye almonn ‘ti leve’ byen boner, dan en sans senbolik, Zeova ti pe “leve byen boner” pour anvoy son profet averti son pep konsernan konsekans zot dezobeisans. (Zer. 7:25) I pa ti repoze, i ti merit “reste eveye” ziska ki son parol profetik ti ganny akonplir. Lannen 607 A.N.L., zis dan sa letan fikse, Zeova ti ziz pep Zida ki ti’n vin aposta.

3. Ki nou kapab asire konsernan Zeova?

³ Pareyman ozordi, Zeova i eveye, i pe esper sa letan pour akonplir son lavolonte. I enposib pour Zeova pa fer sa ki i’n dir. Lefet ki Zeova i reste eveye, ki lefe sa i annan lo ou? Eski ou krwar ki la lannen 2011 Zeova i “eveye” pour akonplir son bann promes? Si nou annan okenn doutans konsernan bann promes Zeova ki definitivman pou ganny akonplir, la i lemoman pour nou reveye si nou  pe tonm dormi spirityelman. (Rom. 13:11) Konman profet Zeova, Zeremi ti reste eveye. Si nou egzaminen konman e akoz Zeremi ti reste eveye pour desarz sa responsabilite ki Bondye ti’n donn li, sa pou ed nou vwar ki mannyer nou kapab persevere dan sa travay ki Zeova in donn nou.

En mesaz irzan

4. Ki difikilte Zeremi ti rankontre ler i ti pe anons son mesaz e akoz i ti irzan?

⁴ Petet Zeremi ti annan pros 25 an kan i ti ganny demande pour veye pour Zeova. (Zer. 1:1, 2) Me i ti santi li tro zenn e definitivman pa kalifye pour koz avek bann ansyen sa nasyon, andotmo, bann zonm a laz ki ti annan gran lotorite. (Zer. 1:6) I ti pou bezwen proklanm en kondannasyon serye ek en zizman efreyan, sirtou avek bann pret, fo profet ek dirizan, ensi ki avek sa bann ki ti pe “fer sa ki tou dimoun i fer” e ki ti pe devlop en “enfidelite dirab.” (Zer. 6:13; 8:5, 6) Sa zoli tanp Lerwa Salomon ki ti landrwa kot vre ladorasyon ti ganny fer pour pros kat syek ti pou ganny detrir. Zerizalenm ek Zida ti pou reste vid e son bann zabitan ti pou ganny pran konman lesklav. I kler ki sa mesaz ki Zeremi ti ganny demande pour anonse ti vreman irzan, pa i vre?

5, 6. (a) Ki mannyer Zeova pe servi en group Kretyen swazir ozordi? (b) Lo kwa nou pou koze dan sa letid?

⁵ Dan nou letan, avek bokou lanmour, Zeova in fer provizyon pour ki en group Kretyen swazir i reste eveye pour averti limanite konsernan son zizman lo lemonn. Pour plizyer dizenn lannen, parey Zeremi, sa group Kretyen swazir in ankouraz bann dimoun pour port byen latansyon lo sa letan ki nou pe viv ladan. (Zer. 6:17) Labib i montre klerman ki Zeova, sa Enn ki kontrol letan pa dousman. Son zour pou ariv zis aler, sa ler ki bann imen pa pe ekspekte.​—Tsef. 3:8; Mark 13:33; 2 Pyer 3:9, 10.

⁶ Si nou gard antet ki Zeova i eveye e i pou anmenn son nouvo lemonn zis aler, sa i devret motiv bann Kretyen swazir e ed zot bann konpanyon fidel pour reste eveye e rapel ki letan i deplizanpli kourt pour zot anons sa mesaz. Ki lefe i devret annan lo ou? Zezi ti endike ki nou tou nou devret siport Rwayonm Bondye. Annou egzamin trwa kalite ki ti ed Zeremi reste eveye pour akonplir son misyon e ki pou osi ed nou.

Lanmour pour bann dimoun

7. Eksplike ki mannyer lanmour ti pous Zeremi pour prese malgre difikilte.

⁷ Kwa ki ti pous Zeremi pour prese malgre bann sirkonstans difisil? I ti annan lanmour pour bann dimoun. Zeremi ti konnen ki bann fo berze ti responsab pour serten problenm ki bann dimoun ti pe fer fas avek. (Zer. 23:1, 2) Lefet ki i ti konn sa, sa ti ed li pour fer son travay avek lanmour ek konpasyon. I ti anvi ki son bann konpatriyot i tann parol Bondye e kontinyen viv. I ti osi sitan konsernen ki i ti plere akoz sa maler ki ti pe al ariv zot. (Lir Zeremi 8:21; 9:1.) Liv Lamantasyon i klerman montre gran lanmour ek lentere ki Zeremi ti annan pour non ek pep Zeova. (Lam. 4:6, 9) Kan ou vwar bann dimoun “fatige e dekouraze parey bann mouton ki napa berze,” eski pa ou annan sa dezir pour rekonfort zot avek sa bon nouvel lo Rwayonm Bondye?​—Mat. 9:36.

8. Kwa ki montre ki soufrans pa ti fer Zeremi ankoler?

⁸ Sa bann dimoun ki Zeremi ti vreman anvi ede ti sanmenm sa bann ki ti fer li soufer en kantite, me kantmenm sa i pa ti bes lebra ouswa ankoler. I ti pasyan e bon, menm anver Lerwa Tsidkya, sa lerwa dezonnet. Menm apre ki Tsidkya ti livre Zeremi pour ki i ganny met a mor, Zeremi ti kontinyen sipliy li pour obeir lavwa Zeova. (Zer. 38:4, 5, 19, 20) Eski nou lanmour pour bann dimoun i sitan for parey Zeremi?

 Kouraz ki Bondye i donnen

9. Ki mannyer nou konnen ki Bondye ki ti donn Zeremi kouraz?

⁹ Ler Zeova ti koz avek li pour premye fwa, Zeremi ti esey rod leskiz. Atraver son leksperyans, nou vwar ki Zeremi pa ti natirelman ferm e ardyese. Anfet, sa lafors ekstraordiner ki Zeremi ti annan ler i ti pe profetize ti akoz i ti depan antyerman lo Bondye. Alor, vreman Zeova ti avek sa profet “parey en zonm for ki fer per,” akoz i ti siport Zeremi e donn li kouraz pour akonplir son misyon. (Zer. 20:11) Zeremi ti sitan annan en repitasyon konman en dimoun ardyese e kouraze ki pandan minister Zezi lo later, bann dimoun ti krwar ki i ti Zeremi ki ti’n resisite!​—Mat. 16:13, 14.

10. Akoz i kapab ganny dir ki bann Kretyen swazir ki lo later i ‘par lao bann nasyon ek rwayonm’?

¹⁰ Konman “Lerwa bann nasyon,” Zeova ti donn Zeremi sa misyon pour anons en mesaz zizman avek bann nasyon ek rwayonm. (Zer. 10:6, 7) Me dan ki fason, bann Kretyen swazir ki ankor lo later i “par lao bann nasyon e par lao bann rwayonm”? (Zer. 1:10) Parey i ti leka pour profet Zeremi dan lepase, Souvren liniver in donn en group Kretyen swazir en misyon. Parey Zeremi, sa group Kretyen swazir i annan lotorizasyon pour anons zizman lo bann nasyon ek rwayonm dan lemonn antye. Zot in ganny lotorite avek Bondye Tre O e zot pe servi sa langaz kler sorti dan son Parol enspire pour anonse ki bann nasyon ek rwayonm ki egziste konmela pou ganny retire e detrir sa ler ki Bondye in fikse e dan sa fason ki li i oule. (Zer. 18:7-10; Rev. 11:18) Parey Zeremi, sa group Kretyen swazir i vreman determinen pour pran o serye sa travay ki zot annan pour anons bann mesaz zizman Zeova lo later antye.

11. Kwa ki pou ed nou kontinyen prese san okenn lanpesman kan nou fer fas avek bann sityasyon difisil?

¹¹ I pa drol ki parler nou dekouraze kan nou fer fas avek persekisyon, kan bann dimoun pa enterese avek larelizyon ouswa letan nou fer fas avek difikilte. (2 Kor. 1:8) Me parey Zeremi, annou kontinyen persevere. Pa dekouraze. Nou tou nou devret kontinyen sipliy Bondye, depan lo li e ‘pran kouraz’ anmezir nou rod led avek li. (1 Tesa. 2:2) Lefet ki nou bann vre adorater Bondye, nou devret kontinyen reste eveye an rapor avek nou responsabilite ki Bondye in donn nou. Nou pa devret les nanryen anpes nou reste determinen pour kontinyen prese san okenn lanpesman konsernan destriksyon bann ki pretann ki zot Kretyen, ki ti pe ganny reprezante par Zerizalenm ki ti enfidel. Parey Zeremi, sa group Kretyen swazir pa pou zis anons “lannen faver delapar Zeova,” me osi “zour vanzans nou Bondye.”​—Iza. 61:1, 2; 2 Kor. 6:2.

Lazwa sorti dan leker

12. Akoz nou kapab dir ki Zeremi ti gard son lazwa e kwa ki ti ed li fer sa?

¹² Zeremi ti ganny bokou lazwa dan son travay. I ti dir Zeova: “Mon ti trouv ou parol, e mon ti konmans manz zot. Ou parol i en lafyerte ek en lazwa dan mon leker; parski mon’n port ou non, O Zeova.” (Zer. 15:16) I ti en privilez pour Zeremi reprezant sa vre Bondye e pres son parol. I enteresan pour note ki kan Zeremi ti konsantre lo sikannri bann dimoun, i ti perdi son lazwa. Me, kan i ti port son latansyon lo labote ek lenportans son mesaz, i ti reganny son lazwa.​—Zer. 20:8, 9.

13. Akoz i bon nouri lo bann keksoz spirityel profon pour kapab gard nou lazwa?

¹³ Dan nou letan, pour nou gard nou lazwa dan predikasyon, fodre nou nouri nou lekor avek “nouritir solid,” andotmo avek bann laverite profon dan Parol Bondye. (Ebr. 5:14) En letid vreman profon i batir lafwa. (Kol. 2:6, 7) I annan en lenpak lo nou kan  nou konnen ki nou aksyon i kapab tous leker Zeova. Si nou vwar li difisil pour rod letan pour lir e etidye Labib, nou devret reegzamin nou progranm. Si nou etidye e medite zis pour detrwa minit sak zour, nou pou santi nou pli pros avek Zeova e nou osi nou pou ganny sa ‘lafyerte ek lazwa dan nou leker’ parey i ti leka pour Zeremi.

14, 15. (a) Ki rezilta i ti annan lefet ki Zeremi ti fidelman akonplir son misyon? (b) Ki pep Bondye ozordi pa devret oubliye konsernan travay predikasyon?

¹⁴ Zeremi pa ti les nanryen anpes li anons lavertisman Zeova ek son mesaz zizman, i ti osi touzour pran o serye son misyon pour “konstrir e plante.” (Zer. 1:10) Son travay pour konstrir e plante ti annan bon rezilta. Serten Zwif e osi bann ki pa ti Izraelit ti sirviv destriksyon Zerizalenm lannen 607 A.N.L. Nou konn konsernan bann Rekabit, Ebed-melek ek Barouk. (Zer. 35:19; 39:15-18; 43:5-7) Sa bann zanmi fidel Zeremi ki ti annan lakrent pour Bondye i en bon legzanp pour idantifye bann dimoun ozordi ki annan lespwar pour viv lo later e ki zanmi avek bann Kretyen swazir. Sa group Kretyen swazir i vreman kontan pour batir bann manm “gran lafoul” spirityelman. (Rev. 7:9) Pareyman, bann konpanyon fidel bann Kretyen swazir i ganny bokou lazwa pour ed bann ki annan  sa bon kondisyon leker pour ganny en konnesans lo laverite.

¹⁵ Pep Bondye i konpran ki predikasyon sa bon nouvel i pa zis en servis ki nou pe rann manm piblik ki anvi ekoute, me i form parti nou ladorasyon. Ki swa nou zwenn en dimoun ki aksepte sa mesaz oubyen non, nou ganny bokou lazwa kan nou servi Zeova dan predikasyon.​—Ps. 71:23; lir Romen 1:9.

“Reste eveye” konsernan nou misyon

16, 17. Ki mannyer Revelasyon 17:10 ek Abakouk 2:3 i montre ki sa letan ki nou pe viv ladan i kourt?

¹⁶ Sa letan irzan ki nou pe viv ladan i met lanfaz lo sa profesi enspire dan Revelasyon 17:10. Sa setyenm lerwa, setadir Pouvwar Mondyal Angle ek Ameriken in vin an egzistans dan nou letan. An rapor avek sa, nou lir: “Ler [setyenm pouvwar mondyal] pou vini i pou reste zis pour en pti pe letan.” Ziska la, i bezwen ki sa “pti pe letan” i pros pour terminen. Profet Abakouk i donn nou sa lasirans konsernan lafen sa move lemonn: “Sa vizyon i pour letan fikse . . . Kontinyen esper li, sirman i pou arive. I pa pou an retar.”​—Aba. 2:3.

¹⁷ Demann ou lekor: ‘Eski fason mon viv mon lavi i montre ki sa letan ki nou pe viv ladan i kourt? Eski mon fason viv i montre ki mon pe ekspekte ki lafen i pros? Ouswa, eski mon bann desizyon ek priyorite i montre ki mon pa pe ekspekte lafen nenport ler ouswa mon pa ni vreman asire si lafen pou vreman arive?’

18, 19. Akoz la i pa lemoman pour ralanti dan nou servis?

¹⁸ Travay ki Zeova in donn bann Kretyen swazir pour veye pa ankor fini. (Lir Zeremi 1:17-19.) Eski pa i en lazwa pour konnen ki bann Kretyen swazir ki ankor lo later pe reste ferm parey “en pilye feray” ek “en lavil for”! ‘Laverite i konman en sang otour zot leren’ dan sa sans ki zot les Parol Bondye donn zot lafors ziska ki zot fini zot travay ki zot in ganny konfye. (Efe. 6:14) Avek menm determinasyon, manm gran lafoul i aktivman siport bann Kretyen swazir anmezir zot akonplir zot travay ki Bondye in donn zot.

¹⁹ La i pa lemoman pour ralanti dan nou aktivite ki relye avek Rwayonm Bondye, me nou devret tir en leson avek sa ki Zeremi 12:5 i dir. (Lir.) Nou tou nou bezwen andir bann leprev. Sa bann leprev ki teste nou lafwa i kapab ganny konpare avek “bann tayer” ki nou devret tay avek. Kantmenm sa, anmezir “gran ladetres” i aprose, nou ekspekte ki difikilte i ogmante. (Mat. 24:21, NW) Bann problenm ki nou pou bezwen fer fas avek a lavenir pou pli difisil, i pou konmsi nou pe “fer paryaz avek seval.” Nou pou bezwen bokou lafors pour andire akoz i pa fasil pour en dimoun tay akote en seval. Alor, i vreman enportan ki nou andir bann leprev ki nou pe fer fas avek la konmela, parski i pou prepar nou pour fer fas avek sa bann ki nou pou gannyen a lavenir.

20. Ki ou determinen pour fer?

²⁰ Nou tou nou kapab imit Zeremi e reisi akonplir nou misyon pour prese! Bann kalite parey lanmour, kouraz ek lazwa ti pous Zeremi pour akonplir son minister fidelman pour 67 an. Bann zoli fler almonn i rapel nou ki Zeova pou “reste eveye” konsernan son parol pour akonplir li. Alor, nou annan bon rezon pour fer parey. Zeremi ti “reste eveye,” nou osi nou devret!

Eski ou rapel?

• Ki mannyer lanmour ti ed Zeremi pour “reste eveye” an rapor avek son misyon?

• Akoz nou bezwen kouraz sorti kot Bondye?

• Kwa ki ti ed Zeremi pour gard son lazwa?

• Akoz ou anvi “reste eveye”?

[Kestyon]

[Portre lo paz 31]

Eski ou pou kontinyen prese malgre lopozisyon?