Lakle pour en fanmir ere

Ed ou zanfan devlop bann bon prensip moral

Loida, * en manman Meksiko i dir: “Zot donn konndonm lekol, aprezan bann zenn i krwar ki i oke pour fer sèks. Si zis zot ‘protez’ zot lekor ase.”

Nobuko, en manman Zapon i dir: “Mon ti demann mon garson ki i ti pou fer si en zour i ti vwar li tousel avek en fiy, i ti dir mwan: ‘Mon pa konnen.’”

KAN ou fiy oubyen garson ti ankor ptipti, eski ou ti pran bann mezir neseser kot ou lakour pour protez li kont okenn danze? Petet ou ti kouver bann soket elektrik, kasyet bann lobze ki kapab koupe e barikad peron pour esey protez ou zanfan.

Si selman i ti sitan fasil pour protez ou adolesan! Aprezan ou annan plis traka, par egzanp: ‘Eski mon garson pe get pornografi?’ ‘Eski mon fiy pe anvoy bann portre endesan par telefonn?’ Me sa kestyon ki pli fer per: ‘Eski mon adolesan pe fer sèks?’

Eski i posib pour paran vreman kontrol zot zanfan?

Serten paran i esey vey zot zanfan vennkat lo vennkat par reste pros o bor zot pour fer sir ki zot konn tou sa ki zot zanfan pe fer. Me plitar, bokou zot i dekouver ki telman zot ti pe vey zot zanfan, sa ti plito fer zot fer keksoz an kasyet. Zot fiy oubyen garson ti’n vin eksper lo kasyet sa menm kondwit ki zot paran ti pe esey evite.

I kler ki kontrol tou sa ki ou zanfan i fer i pa en solisyon. Menm Zeova pa servi sa metod pour nou obeir li, alor ou osi konman en paran ou pa devret fer li. (Deterononm 30:19) Alor, ki mannyer ou kapab ed ou adolesan fer bann bon desizyon kot i konsern bann keksoz moral?​—Proverb 27:11.

En keksoz enportan se kontinyelman koz lo sa size avek ou zanfan e konmans depi ki zot ankor pti. * (Proverb 22:6) Pli tar kan zot antre dan staz adolesan, kontinyen koz avek zot. Konman en paran ou devret sa premye dimoun ki donn ou zanfan lenformasyon ki i kapab met konfyans ladan. Alicia, en fiy ki reste Langleter ti dir: “En kantite dimoun i dir ki i pli vomye koz avek nou bann zanmi lo sèks, me sa pa vre. Nou pli kontan ler nou paran i koz avek nou lo  sa size. Nou annan plis konfyans dan sa ki zot dir nou.”

Lenportans pour annan bann bon valer moral

Anmezir ki zot grandir, bann zanfan i bezwen konn plis lo sèks dan plas konn zis lafason ki pti baba i ganny konsevwar e ne. Zot bezwen devlop zot abilite pour “konn fer diferans ant sa ki byen ek sa ki mal.” (Ebre 5:14) An bref, zot bezwen bann valer moral, setadir annan en krwayans solid lo bann kondwit ki apropriye lo sèks e viv dapre sa krwayans. Ki mannyer ou pou kapab ed ou adolesan devlop bann bon valer moral?

Premyerman, ou kapab reflesir lo ou prop valer moral. Par egzanp, ou kapab vreman krwar ki limoralite seksyel, setadir sèks avan maryaz, i mal. (1 Tesalonisyen 4:3) Probableman ou zanfan i konn ou pwennvi lo sa size e petet zot menm kapab sit bann verse Labib ki siport ou krwayans. Kan ou demann zot, petet zot pou kapab reponn deswit ki sèks avan maryaz i mal.

Me ou zanfan i bezwen plis ki sa. Liv Sex Smart i dir ki serten zenn i kapab dir ki zot dakor avek pwennvi zot paran lo sèks. Me i osi dir: “Zot pa konn ase pour annan zot prop lopinyon. Kan zot tonm dan en sityasyon san ekspekte e vwar zot fas a fas avek en sityasyon difisil konsernan ki kondwit ki apropriye, zot konfize e zot vwar zot dan en gro problenm.” Sa i egzakteman akoz bann valer moral i enportan. Ki mannyer ou pou kapab ed ou adolesan devlop sa bann valer?

Dir ou zanfan klerman ou bann valer moral. Eski ou krwar ki sèks i devret ganny fer selman dan maryaz? Apre dir ou adolesan, fer li kler e souvan. Dapre liv Beyond the Big Talk, resers i montre ki “dan bann lakour kot paran i pas bann mesaz kler avek zot zanfan ki montre ki zot pa vwar li apropriye ki bann zenn i fer sèks, i annan plis sans ki sa bann adolesan i esper ankor en pe letan avan zot angaz zot dan relasyon seksyel.”

Byensir, parey nou’n mansyonnen pli boner, zis dir avek ou fiy oubyen garson ou bann valer moral pa en garanti ki zot pou viv dapre sa bann valer. Par kont, par dir bann valer moral ki ou ti a kontan ou fanmir i annan, sa pou form en baz solid ki ou zanfan pou kapab batir sa ki pour zot lo la. Serten resers in demontre ki i annan bokou zenn ki adopte valer moral zot paren menm si zot pa ti pratik sa bann valer kan zot ti adolesan.

ESEY SA: Servi en keksoz dan nouvel pour konmans en konversasyon e dir sa ki ou panse lo la. Par egzanp, si i annan en labi seksyel ki’n ganny raporte, ou kapab dir: “Mon soke lo lafason ki serten zonm i esey pran lavantaz lo bann madanm. Kote ou krwar zot ganny sa bann kalite lide?”

Ansenny ou zanfan tou laverite lo sèks. I neseser pour averti ou adolesan. (1 Korentyen 6:18; Zak 1:14, 15) Par kont, Labib i dekrir sèks prensipalman konman en kado ki sorti kot Bondye, pa en latrap ki Satan i servi. (Proverb 5:18, 19; Kantik Salomon 1:2) Si ou dir ou adolesan zis bann danze, sa pou fer li annan en fo konsep lo sa size, enn ki pa annakor avek sa ki Labib i dir. En zenn fiy Lafrans ki apel Corrina i dir: “Mon paran ti met en kantite lanfaz lo limoralite seksyel e sa in fer mwan annan en pwennvi negatif lo sèks.”

Fer sir ki ou zanfan i konn tou lo sèks. Nadia, en manman Meksiko i dir: “Sa ki mon’n toultan esey dir mon bann zanfan se ki sèks i en bon keksoz, i natirel e Zeova in donn avek bann imen pour zot pran plezir ladan. Me i annan son plas apropriye dan maryaz. I kapab donn nou lazwa e i osi kapab fer nou soufer depandan lo lafason nou servi li.”

ESEY SA: Laprosenn fwa ki ou koz avek ou adolesan lo sèks, fini sa konversasyon lo en not pozitif. Pa ezite pour montre li ki sèks i en zoli kado sorti kot Bondye e ki en zenn i kapab pran plezir ladan dan le fitir si en zour i deside pour marye. Dir li ki ou annan konfyans ki i pou kapab reste fidel avek bann standar Bondye ziska ler i marye.

 Ed ou adolesan reflesir lo bann konsekans. Pour zot kapab fer bann bon desizyon lo nenport ki laspe lavi, bann adolesan i bezwen konnen ki mannyer pour idantifye bann diferan opsyon e balans lavantaz ek dezavantaz sak sa bann opsyon. Pa bezwen krwar ki zis konn sa ki byen ek sa ki mal i sifi. Emma, en zenn madanm Kretyen Lostrali, i dir: “Letan mon reflesir lo bann fot ki mon’n fer dan mon zenes, mon kapab dir ki zis konn bann standar Bondye i pa vedir ki ou dakor avek zot. I vreman enportan pour konpran byenfe sa bann standar ek konsekans si nou dezobeir zot.”

Labib i kapab ed nou, akoz bokou son bann komannman i ganny siporte par en fraz ki dir konsekans en move aksyon. Par egzanp, Proverb 5:8, 9 i ankouraz bann zenn onm pour rezet limoralite seksyel pour “ki ou pa donn lezot ou dinyite.” Parey sa bann verse i fer resorti, bann ki fer sèks avan maryaz pe sakrifye zot lentegrite, en laspe zot idantite e perdi respe pour zot prop lekor. Sa i osi fer zot pa sitan atiran pour bann fitir konzwen ki annan sa bann kalite. Kan nou reflesir lo danze ki inyor lalwa Bondye i kapab anmennen lo nou fizikman, emosyonnelman e fizikman, sa pou kapab donn nou plis lafors pour viv dapre sa bann lalwa. *

ESEY SA: Servi bann legzanp pour ed ou adolesan pour vwar akoz bann standar Bondye i saz. Ou kapab dir, par egzanp: “En dife pour kwi manze i bon, me en dife brousay i danzere. Ki diferans i annan ant sa de e ki mannyer ou larepons i aplik avek sa limit ki Bondye in etablir konsernan sèks?” Servi sa resi dan Proverb 5:3-14 pour ed ou adolesan konpran move konsekans ki limoralite seksyel i anmennen.

Takao, en garson 18 an sorti Zapon, i dir: “Mon konnen ki mon devret fer sa ki byen, me mon toultan pe lalit kont mon prop dezir.” Bann zenn ki santi dan sa fason i kapab trouv rekonfor akoz zot pa tousel. Menm zapot Pol, en Kretyen for spirityelman ti admet: “Kan mon oule fer sa ki byen, mon zis kapab fer sa ki mal.”​—Romen 7:21.

I pou byen si bann adolesan i realize ki en tel lalit pa toultan mal. I kapab motiv zot pour reflesir lo ki kalite dimoun zot ti a kontan vini demen. I pou kapab ed zot pour reponn sa kestyon: ‘Eski mon anvi kontrol mon lavi e ki lezot i konn mwan konman en dimoun ki annan lentegrite e ki annan bann bon prensip moral? Oubyen mon ti pou pli kontan ganny rekonnet konman enn ki fer sa ki lezot i fer, enn ki les son dezir kontrol li?’ Bann bon valer moral pou ed ou adolesan reponn sa kestyon avek lasazes.

[Not anba lo paz]

DEMANN OU LEKOR . . .

▪ Kwa ki endike ki mon adolesan i annan bann bon valer moral?

▪ Kan mon koz avek mon adolesan lo sèks, eski mon dekrir li konman en kado ki sorti kot Bondye oubyen en latrap ki Satan i servi?

[Bwat lo paz 21]

Labib in touzour sa pli bon gidans

“Sa lenstriksyon dan Labib konsernan konman nou devret konport nou seksyelman in ganny prouve konman sa pli bon gidans. Dan sa lemonn ozordi kot bokou adolesan pe sibir konsekans ki sèks avan laz i anmennen, tel parey lansentman an deor maryaz ek bann maladi parey Sida, sa konsey dan Lekritir konsernan anmas sèks pour maryaz . . . i vreman apropriye, i sa sel fason ki ou pou kapab protez ou lekor e i efikas.”​—Parenting Teens With Love and Logic.