Eski ou ay sa ki mal?

“Ou [Zezi] ay sa ki mal.”​—Ps. 45:7.

1. Ki Zezi ti ansennyen konsernan lanmour?

POUR met lanfaz lo lenportans sa kalite lanmour ki fer pase lentere lezot avan sa ki pour nou, Zezi Kri ti dir avek son bann disip: “La mon donn zot en konmannman nouvo: kontan kanmarad. Zot devre kontan kanmarad parey mwan mon’n kontan zot. Dimoun pou war ki zot mon bann disip si zot kontan kanmarad.” (Zan 13:34, 35) Zezi ti demann son bann disip pour demontre sa kalite lanmour anver kanmarad. Sa lanmour ti pou vin sa mark ki idantifye son bann disip. Zezi ti osi ankouraz zot: “Kontan zot lennmi e priy pour bann ki persekit zot.”​—Mat. 5:44.

2. Bann disip Zezi i devret devlop laenn pour kwa?

² Apard ki ansenny son bann disip lo lanmour, Zezi ti ansenny zot pour ay serten keksoz. Sa parol ti ganny dir konsernan Zezi: “Ou’n kontan ladrwatir e ou ay sa ki mal.” (Ps. 45:7; Ebr. 1:9) Sa i montre ki nou devret devlop pa selman lanmour pour ladrwatir, me osi laenn pour pese oubyen pour sa ki mal. I enteresan pour remarke ki  zapot Zan ti dir spesifikman: “En dimoun ki fer pese i kas Lalwa [oubyen “fer sa ki mal,” NW], parski pese i dezobeisans Lalwa.”​—1 Zan 3:4.

3. Lo ki laspe lavi sa lartik pou egzaminen an konneksyon avek laenn pour sa ki mal?

³ Alor, i byen pour demann nou lekor sa kestyon konman bann Kretyen: ‘Eski mon ay sa ki mal?’ Annou egzaminen ki mannyer nou kapab demontre laenn pour sa ki mal dan sa kat laspe lavi: (1) nou latitid anver labi lalkol, (2) fason ki nou konsider bann pratik demonyak, (3) nou reaksyon anver limoralite seksyel e (4) fason ki nou konsider bann ki kontan sa ki mal.

En pwennvi apropriye lo lalkol

4. Akoz Zezi pa ti ezite pour donn konsey konsernan bwar an ekse?

⁴ Parfwa Zezi ti bwar diven; i ti vwar li konman en kado sorti kot Bondye. (Ps. 104:14, 15) Par kont, i pa ti zanmen abiz sa kado par bwar an ekse. (Prov. 23:29-33) Pour sa rezon, Zezi pa ti ezite pour donn konsey lo sa labitid. (Lir Lik 21:34.) Si nou mal servi lalkol, sa i kapab fer nou fer lezot pese grav. Zapot Pol ti ekrir: “Pa bezwen soul zot avek diven, akoz sa pou zis antrenn zot dan en lavi dezordonnen; okontrer, zot devre ranpli avek Lespri.”(Efe. 5:18) I ti osi konsey bann madanm a laz dan kongregasyon pour pa “vin lesklav labwason.”​—Tit 2:3.

5. Ki kestyon bann ki deside pour bwar lalkol i devret demann zot lekor?

⁵ Si ou deside pour bwar lalkol, i pou byen pour demann ou lekor: ‘Eski mon annan menm pwennvi avek Zezi lo bwar an ekse? Si en dimoun i bezwen konsey konsernan lalkol, eski mon ezite pour konsey li? Eski mon bwar pour sov problenm ek lenkyetid? Ki kantite lalkol mon bwar sak semenn? Ki mannyer mon reakte kan en dimoun i dir ki mon kapab pe bwar tro bokou? Eski mon ankoler oubyen menm defann mon lekor?’ Nou abilite pour rezonn byen e pour fer bann bon desizyon pou ganny afekte si nou les nou vin lesklav lalkol. Bann Kretyen i devret fer bokou zefor pour protez zot abilite pour reflesir.​—Prov. 3:21, 22.

Reste lwen avek bann pratik demonyak

6, 7. (a) Ki mannyer Zezi ti reazir anver Satan ek son bann demon? (b) Akoz bokou dimoun dan lemonn konmela i pratik bann keksoz demonyak?

⁶ Zezi ti toultan reziste Satan ek bann demon kan i ti lo later. I ti rezet latak direk ki Satan ti fer lo son fidelite. (Lik 4:1-13) I ti osi idantifye e reziste bann lesey Satan ki pa ti paret evidan pour enfliyans son panse ek aksyon. (Mat. 16:21-23) Zezi ti ed bann ki ti merite pour sorti anba kontrol kriyel bann demon.​—Mark 5:2, 8, 12-15; 9:20, 25-27.

⁷ Apre ki Zezi ti vin Lerwa an 1914, i ti netway lesyel par retir Satan ek son bann demon. Sa i fer ki Satan i pli determinen pour ”tronp lemonn antye.” (Rev. 12:9, 10) Nou pa devret vwar li drol alor, si bokou plis dimoun dan lemonn antye pe demontre en gran lentere dan bann pratik demonyak. Ki nou kapab fer pour protez nou lekor?

8. Ki nou devret demann nou lekor an rapor avek nou bann divertisman?

 ⁸ Labib i averti nou klerman konsernan bann danze ki asosye avek bann pratik demonyak. (Lir Deterononm 18:10-12. *) Konmela, Satan ek son bann demon i enfliyans lespri bann dimoun atraver bann film, liv ek zwe elektronik ki promot bann pratik demonyak. Alor kan nou swazir bann divertisman, sakenn ant nou i devret demann son lekor: ‘Dan sa bann dernyen mwan ki’n pase, eski mon’n get bann film, progranm televizyon, bann zwe elektronik, liv kartoun oubyen lezot liv ki montre bann pratik demonyak? Eski mon konpran lenportans pour rezet okenn keksoz ki annan pour fer avek bann demon, oubyen mon pa vwar li sitan danzere? Eski mon’n deza reflesir lo sa ki Zeova i panse lo mon swa divertisman? Si mon’n detann mwan avek sa bann kalite divertisman, eski mon lanmour pour Zeova ek son bann prensip drwat pou obliz mwan pour pran bann desizyon serye e ferm laport lo sa bann lenfliyans demonyak?’​—Akt 19:19, 20.

Ekout lavertisman Zezi lo limoralite

9. Ki mannyer en dimoun i kapab devlop lanmour pour sa ki mal?

⁹ Zezi ti defann standar Zeova lo limoralite seksyel. I ti dir: “Zot pa’n lir, ki depi okonmansman kreater ti fer zot mal ek femel, e ti dir: ‘Pour sa rezon, en zonm pou kit son papa ek son manman pour ini avek son madanm, e toulede zot vin en sel laser.’ Zot nepli de me en sel. Alor sa ki Bondye in ini ansanm zonm pa devre separe.” (Mat. 19:4-6) Zezi ti konnen ki sa ki nou gete i kapab annan en lefe lo nou leker. Pour sa rezon i ti dir sa dan son Sermon lo Montanny: “Zot in tande ki i’n ganny dir: ‘Pa komet adilter.’ Me mwan mon dir zot: en dimoun ki get madanm en lot zonm avek dezir in deza komet adilter avek li dan son leker.” (Mat. 5:27, 28) Bann ki inyor konsey Zezi pe an realite les lanmour pour sa ki mal devlope dan zot.

10. Rakont en leksperyans ki montre ki en dimoun i kapab aret get pornografi.

¹⁰ Satan i promot limoralite seksyel atraver pornografi. Sa lemonn ki nou pe viv ladan i ranpli avek sanmenm. Bann ki get pornografi i vwar li difisil apre pour retir sa bann portre imoral dan zot lespri. Zot menm kapab vin adikt avek pornografi. Annou vwar sa ki ti arive avek en Kretyen. I ti dir: “Mon ti get pornografi an sekre. Mon ti kree en lemonn dan mon lespri ki mon ti krwar ti separe avek sa enn ki mon ti pe servi Zeova ladan. Mon ti konnen ki sa labitid ki mon ti annan ti mal me mon ti dir dan mon menm ki Zeova ti ankor aksepte mon servis pour li.” Kwa ki ti fer sa frer sanz son fason panse? I ti dir: “Menm si i ti sa keksoz pli difisil ki mon’n deza fer, mon ti deside pour dir bann ansyen mon problenm.” Avek letan sa frer ti aret sa labitid sal ki i ti annan. I ti admet: “I ti apre ki mon ti’n  aret fer sa pese ki mon ti finalman santi ki mon konsyans ti vreman prop.” Bann ki ay sa ki mal i bezwen aprann ay pornografi.

11, 12. Ki mannyer nou kapab demontre ki nou ay sa ki mal lo kote nou swa lanmizik?

¹¹ Lanmizik ek son bann parol i kapab annan en gran lefe lo nou lemosyon e osi nou leker senbolik. Lanmizik li menm i en kado sorti kot Bondye e depi byen lontan i ganny servi dan vre ladorasyon. (Egz. 15:20, 21; Efe. 5:19) Me sa move lemonn Satan i ankouraz bann lanmizik ki promot limoralite. (1 Zan 5:19) Ki mannyer ou pou konnen si lanmizik ki ou ekoute pe sali ou oubyen non?

¹² Ou kapab konmans par demann ou lekor: ‘Eski sa bann sanson ki mon ekoute i promot touye, adilter, fornikasyon ek blasfenm? Si mon ti lir sa bann parol dan serten sa bann sanson avek en dimoun, eski sa dimoun ti pou ganny lenpresyon ki mon ay sa ki mal, oubyen sa bann parol ti pou endike ki mon leker i enpir?’ I pa posib pour zis dir ki nou ay sa ki mal me an menm tan kontan ekout bann sanson ki ankouraz sa ki mal. Zezi ti dir: “Sa ki sorti dan son labous i sorti dan son leker, e sa i fer en dimoun enpir.” I ti eksplike: “Akoz dan leker i sorti move panse ki fer dimoun touye, fer adilter, e fer bann move laksyon, vole, kalomni, e malparl dimoun.”​—Mat. 15:18, 19; konpar Zak 3:10, 11.

Annan menm pwennvi avek Zezi lo bann ki kontan sa ki mal

13. Ki mannyer Zezi ti konsider bann ki pa ti oule repantir?

¹³ Zezi ti dir ki i’n vin pour apel bann peser oubyen bann ki pe fer sa ki mal pour zot repantir. (Lik 5:30-32) Me konman i ti konsider bann ki pa ti oule repantir? Zezi ti donn bann lavertisman serye konsernan ganny enfliyanse par sa bann kalite dimoun. (Mat. 23:15, 23-26) I ti osi dir byen kler: “Pa tou sa ki apel mwan Senyer, Senyer ki pou antre dan Rwayonm lesyel, me zis bann ki fer lavolonte mon Papa ki dan lesyel. Kan sa zour pou arive [kan Bondye pou anmenn zizman], bokou pou dir mwan, ‘Senyer, Senyer! an ou non nou’n profetize, an ou non, nou’n sas en kantite demon e an ou non, nou’n fer en kantite mirak.’” Me i pou rezet sa bann ki pa oule repantir an dizan: “Sorti la, zot ki pratik lemal!” (Mat. 7:21-23) Akoz en tel zizman? Akoz sa bann dimoun i dezonor Bondye e zot fer ditor bann dimoun par zot bann move aksyon.

14. Akoz bann dimoun ki pa oule repantir i ganny tire dan kongregasyon?

¹⁴ Parol Bondye i dir ki bann ki pa repantir i merit ganny tire dan kongregasyon. (Lir 1 Korentyen 5:9-13.) I annan omwen trwa rezon akoz sa i neseser: (1) pour pa anmenn okenn repros lo non Zeova, (2) pour protez kongregasyon kont kontaminasyon e (3) pour ed sa dimoun ki’n fer pese repantir si i posib.

15. Si nou anvi reste fidel anver Zeova, ki kestyon serye ki nou devret demann nou lekor?

¹⁵ Eski nou annan menm pwennvi avek Zezi lo sa bann ki pa oule sanz zot move lavi? Nou bezwen reflesir lo sa bann kestyon: ‘Eski mon pou pas letan regilyerman avek en dimoun ki’n ganny ekskli oubyen ki’n dezasosye son lekor avek kongregasyon Kretyen? Me si sa dimoun i en fanmir pros ki nepli reste dan lakour?’ Sa bann sityasyon i kapab  vreman teste nou lanmour pour ladrwatir ek nou fidelite anver Bondye. *

16, 17. Ki difikilte en ser ti fer fas avek konsernan son garson, e kwa ki ti ed li pour siport laranzman pour ekskli bann ki pa repantir?

¹⁶ Annou vwar legzanp en ser ki son garson ti’n aret kontan Zeova. Son garson, ki ti en adilt ti konmans fer sa ki mal e i pa ti repantir. Alor, i ti ganny ekskli dan kongregasyon. Sa ser ti kontan Zeova, me i ti osi kontan son garson e i ti vwar li vreman difisil pour aplik sa konsey Labib pour evite asosye avek li.

¹⁷ Ki konsey ou ti pou donn sa ser? En ansyen ti ed li pour realize ki Zeova ti konpran sa douler ki i ti pe santi. Sa frer ti ankouraz li pour mazin lo sa douler ki Zeova ti’n bezwen santi kan serten son bann garson dan lesyel ti rebele. Sa ansyen ti rezonn avek li ki menm si Zeova i konnen ki kantite fermal sa kalite sityasyon i kapab ete, i ekspekte ki sa bann ki pa repantir i ganny ekskli. I ti pran sa bann rapel a ker, e i ti siport sa laranzman fidelman. * Sa kalite fidelite i fer leker Zeova rezouir.​—Prov. 27:11.

18, 19. (a) Kan nou aret frekant en dimoun ki pratik sa ki mal, nou pe demontre laenn pour kwa? (b) Ki kapab arive kan nou reste fidel anver Bondye ek son laranzman?

¹⁸ Si ou fer fas avek en tel sityasyon, silvouple mazinen ki Zeova i konpran ou santiman. Par aret frekant sa enn ki’n ganny ekskli oubyen ki’n dezasosye son lekor, ou pou montre ki ou ay sa latitid ek aksyon ki’n fer sityasyon ariv koumsa. Par kont, ou pou osi montre ki ou kontan sa enn ki’n fer sa ki mal par fer dibyen pour li. Ou fidelite anver Zeova pou kapab ed sa dimoun ki pe ganny disiplinen repantir e retourn ver Zeova.

¹⁹ En dimoun ki ti’n ganny ekskli e reentegre pli tar ti ekrir: “Mon apresye ki Zeova i telman kontan son pep ki i fer sir ki son lorganizasyon i reste pir. Sa ki petet dimoun an deor i konsider dir, i en aksyon neseser e i demontre bokou lanmour.” Eski ou krwar ki sa dimoun ti pou’n tonm lo sa konklizyon si bann manm dan kongregasyon enkli son fanmir ti kontinyelman frekant li kan i ti’n ganny ekskli? Par siport sa laranzman ki sorti dan Labib pour ekskli bann ki pa repantir, nou montre ki nou kontan ladrwatir e rekonnet ki Zeova ki annan sa drwa pour etabli bann standar lo lafason ki nou devret konport nou.

“Ay sa ki mal”

20, 21. Akoz i enportan pour aprann ay sa ki mal?

²⁰ Zapot Pyer ti averti nou: “Reste vizilan e vey byen.” Akoz? “Zot lennmi, dyab pe pas partou konman en lyon ki kriye, pe rode ki i pou devore.” (1 Pyer 5:8) Eski i pou ganny ou? Larepons i depan bokou lo ki kantite ou aprann ay sa ki mal.

²¹ Pour devlop en laenn pour sa ki mal, i pa fasil. Nou’n ne dan pese e pe viv dan en lemonn ki ankouraz nou pour viv dapre nou bann dezir. (1 Zan 2:15-17) Par kont, nou kapab arive devlop laenn pour sa ki mal par imit Zezi Kri e devlop en lanmour profon pour nou Bondye Zeova. Annou determinen pour “ay sa ki mal,” avek bokou konfyans ki Zeova “pe vey bann ki fidel avek li; e delivre zot dan lanmen bann mesan.”​—Ps. 97:10.

[Not anba lo paz]

Ki ou pou reponn?

• Kwa ki pou ed nou egzamin nou latitid anver lalkol?

• Ki bann mezir ki nou kapab pran pour protez nou kont bann pratik demonyak?

• Akoz pornografi i danzere?

• Ki mannyer nou demontre ki nou ay sa ki mal kan en dimoun ki nou kontan i ganny ekskli?

[Kestyon]

[Portre lo paz 29]

Si ou deside pour bwar lalkol, ki ou devret konsidere?

[Portre lo paz 30]

Fer atansyon konsernan lenfliyans Satan dan bann divertisman

[Portre lo paz 31]

En dimoun ki kontan get pornografi i devlop lanmour pour kwa?