“Ozordi i sa letan favorab”
“Ozordi i sa letan favorab”
“Ozordi i sa letan favorab, ozordi i sa zour delivrans.”—2 KOR. 6:2.
1. Akoz nou bezwen rekonnet ki travay pli enportan nou merit fer dan nenport sirkonstans?
“POUR tou keksoz i annan en letan fikse, menm en letan pour tou aktivite anba lesyel.” (Ekle. 3:1) Salomon ti pe fer resorti lenportans pour rekonnet sa pli bon moman pour fer okenn keksoz enportan ki demann bokou zefor, ki swa pour plante, fer biznes oubyen koz avek lezot. Toudmenm, nou bezwen osi arive rekonnet ki travay pli enportan nou merit fer dan nenport sirkonstans. Andotmo, nou devret konn byen nou priyorite.
2. Ki mannyer nou konnen ki ler Zezi ti pe prese, i ti konnen ki letan i ti pe viv ladan?
2 Ler i ti lo later, Zezi ti konn byen ki letan i ti pe viv ladan e sa ki i ti bezwen fer. Lefet ki i ti gard antet son priyorite, i ti konnen ki sa letan ki i ti pe espere depi lontan, kot bann profesi konsernan Mesi ti pou ganny akonplir ti pe aprose. (1 Pyer 1:11; Rev. 19:10) I ti annan travay pour fer, sa se fer dimoun konnen ki i ti sa Mesi ki ti pou vini. I ti bezwen rann temwannyaz konsernan laverite lo Rwayonm e rasanble sa bann ki ti pou vin bann zeritye ansanm avek li dan sa Rwayonm. I ti etablir kongregasyon Kretyen ki ti pou fer sa travay predikasyon e fer disip lo later antye.—Mark 1:15.
3. Lefet ki i ti konsyan ki letan i ti pe viv ladan, ki lefe sa ti annan lo son aksyon?
3 Vi ki Zezi ti konsyan ki letan i kourt, sa ti motiv li pour demontre devouman ler i ti pe akonplir lavolonte son Papa. I ti dir avek son bann disip: “Rekolt i an labondans, me napa bokou travayer. Alor sipliy Propriyeter rekolt pour li anvoy bann travayer pou ranmas son rekolt.” (Lik 10:2; Mal. 4:5, 6) O konmansman, Zezi ti swazir 12, apre 70 parmi son bann disip. I ti donn zot bann lenstriksyon spesifik e apre i ti anvoy zot pres sa mesaz ki dir: “Rwayonm lesyel i pros!” Konsernan Zezi, Labib i dir: “Kan [i] ti’n fini donn bann direktiv son douz disip i ti kit sa landrwa pour al ansennyen e prese dan bann lavil dan zalantour.”—Mat. 10:5-7; 11:1; Lik 10:1.
4. Dan ki fason Pol ti imit Kris?
4 Zezi ti kit en legzanp parfe pour son bann disip an rapor avek devouman ek devosyon. Sanmenm sa ki zapot Pol ti fer resorti ler i ti ankouraz son bann konpanyon Kretyen an dizan: “Imit mwan parey mwan mon imit Kris.” (1 Kor. 11:1) Dan ki fason Pol ti imit Kris? I ti sirtou fer tou sa ki i ti kapab pour pres sa bon nouvel. Dan let ki Pol ti ekrir bann kongregasyon, nou vwar bann lekspresyon parey, “pa fer pares,” “servi Senyer,” “montre touzour plis lentere dan travay Senyer,” e “dan tou sa ki zot fer, fer li avek tou zot leker, konmsi zot pe travay pour” Zeova. (Rom. 12:11; 1 Kor. 15:58; Kol. 3:23) Pol pa ti zanmen oubliy sa moman kot Zezi Kri ti aparet avek li lo semen Damas, ni sa parol ki Zezi ti demann Ananyas pour dir li: “Mon’n swazir sa zonm e mon pou servi li pour fer tou bann nasyon ek bann lerwa ek pep Izrael konn mwan.”—Akt 9:15; Rom. 1:1, 5; Gal. 1:16.
“Sa letan favorab”
5. Kwa ki ti motiv Pol pour akonplir son minister avek devouman?
5 Ler nou lir liv Akt, nou kapab vwar klerman sa kouraz ek devouman ki Pol ti demontre pour akonplir son minister. (Akt 13:9, 10; 17:16, 17; 18:5) Pol ti rekonnet ki i ti pe viv dan en letan enportan. I ti dir: “Ozordi i sa letan favorab, ozordi i sa zour delivrans.” (2 Kor. 6:2) Dan lannen 537 A.N.L., i ti en letan favorab pour bann egzile ki ti Babilonn pour retourn dan zot pei natal. (Iza. 49:8, 9) Me ki Pol ti pe refer avek isi? Konteks sa verse i ed nou pour vwar sa ki Pol ti pe mazinen.
6, 7. (a) Ki sa gran loner bann Kretyen swazir i annan ozordi? (b) Lekel ki pe travay ansanm avek bann Kretyen swazir?
6 Pli boner dan son let, Pol ti koz lo sa gran loner ki li ek bann Kretyen swazir ti’n gannyen. (Lir 2 Korentyen 5:18-20.) I ti eksplike ki zot ti’n ganny apele par Bondye pour akonplir en bi spesifik, sa “misyon” pour sipliy bann dimoun pour “rekonsilye avek Bondye.” Andotmo, pour zot revin zanmi oubyen fer lape avek Bondye.
7 Depi sa rebelyon dan zarden Edenn, tou imen in elwannyen avek Zeova. (Rom. 3:10, 23) Lefet ki imen in elwannyen avek Bondye, laplipar zot i dan en fernwanr spirityel ki anmenn soufrans ek lanmor. Zapot Pol ti ekrir: “Nou konnen, annefe, ki ziska aprezan tou lakreasyon Bondye pe soupire e soufer.” (Rom. 8:22) Me Bondye in pran bann pa pour ankouraz bann dimoun. I menm “sipliy” zot pour retourn ver li oubyen pour rekonsilye avek li. Sanmenm sa misyon ki Pol ek bann lezot Kretyen swazir ti ganny konfye dan sa letan. Sa “letan favorab” i kapab vin en “zour delivrans” pour bann dimoun ki annan lafwa dan Zezi. Tou bann Kretyen swazir ek zot konpanyon, “lezot mouton,” ki pe travay ansanm avek kanmarad pe kontinyen envit lezot pour benefisye avek sa “letan favorab.”—Zan 10:16, NW.
8. Kwa ki fer sa lapel pour rekonsilye avek Bondye remarkab?
8 Sa ki fer sa lapel pour rekonsilye avek Bondye pli remarkab ankor, se ki menm si imen ki antyerman responsab pour kas sa relasyon ki zot ti annan avek Bondye, par sa rebelyon ki ti arive dan zarden Edenn, Bondye ti pran linisyativ pour rezourd sa problenm. (1 Zan 4:10, 19) Ki i ti fer? Pol ti reponn: “Bondye, par Kris, in fer tou dimoun rekonsilye avek limenm, san tenir kont zot pese. E i’n konfye nou son Parol rekonsilyasyon.”—2 Kor. 5:19; Iza. 55:6.
9. Ki Pol ti fer pour demontre son lapresyasyon pour mizerikord Bondye?
9 Atraver ranson, Zeova in fer li posib pour bann dimoun ki annan lafwa dan sa ranson ganny pardonnen zot lofans e revin zanmi oubyen fer lape avek li. Deplis i ti anvoy son bann reprezantan pour ankouraz bann dimoun pour fer lape avek li pandan ki zot ankor annan sa posibilite pour fer li. (Lir 1 Timote 2:3-6.) Pol ti konpran lavolonte Bondye e i ti rekonnet ki letan i ti pe viv ladan. I pour sa rezon ki i ti depans son lenerzi dan sa “misyon” ki i ti’n gannyen pour fer bann dimoun rekonsilye avek Bondye. Lavolonte Bondye pa’n sanze. I touzour lavolonte Zeova menm dan nou letan pour bann imen rekonsilye avek li. Sa Parol ki Pol ti dir: “Ozordi i sa letan favorab” e “ozordi i sa zour delivrans,” i touzour aplikab dan nou letan. Pa Zeova i en Bondye ki annan mizerikord ek konpasyon!—Egz. 34:6, 7.
Pa ‘perdi sa ki zot in resevwar’
10. Ki sa “zour delivrans” i vedir pour bann Kretyen swazir dan lepase e ozordi?
10 Bann premye dimoun ki’n benefisye avek labonte ekstraordiner Bondye i bann ki “ini avek Kris.” (2 Kor. 5:17, 18) Pour zot, “sa zour delivrans” ti konmans Lapannkot lannen 33 N.L. I apartir sa moman ki zot ti ganny konfye sa responsabilite pour anons sa “Parol rekonsilyasyon.” Ozordi, bann Kretyen swazir ki ankor lo later pe touzour akonplir “sa misyon pour lezot rekonsilye” avek Bondye. Zot rekonnet ki sa kat lanz ki zapot Zan ti vwar dan en vizyon profetik ti pe “tenir sa kat divan pour ki okenn divan pa soufle lo later.” Alor, nou ankor pe viv pandan “sa zour delivrans” e dan “sa letan favorab.” (Rev. 7:1-3) I pour sa rezon alor, ki depi o konmansman ventyenm syek, bann Kretyen swazir ki ankor lo later pe akonplir avek devouman sa ‘misyon pour rekonsilye’ avek Bondye tou dimoun dan kat kwen later.
11, 12. Ki mannyer bann Kretyen swazir ti montre ki zot ti konsyan ki letan zot ti pe viv ladan o konmansman ventyenm syek. (Vwar portre lo paz 23.)
11 Par egzanp, sa liv Jehovah’s Witnesses—Proclaimers of God’s Kingdom i fer remarke ki ver konmansman ventyenm syek “Charles Russell ek son bann asosye ti vreman krwar ki zot ti dan letan larekolt e ki dimoun ti bezwen tann konsernan sa laverite ki pou fer zot lib.” Ki zot ti fer konsernan sa? Lefet ki zot ti realize ki zot dan letan larekolt, en “letan favorab” pour anmas rekolt, sa bann frer pa ti kontant zot zis pour envit dimoun pour vin asiste serten servis relizye. Sanmenm sa ki bann sef relizye ki pretann ki zot Kretyen ti pe fer depi en bon pe letan. O kontrer, sa bann Kretyen swazir ti konmans rode ki mannyer pour propaz sa bon nouvel dan lezot fason pratik. Parmi lezot keksoz ki zot ti fer, zot ti servi teknolozi modern dan en fason saz pour kontinyen fer avanse zot travay.
12 Pour propaz sa bon nouvel lo Rwayonm, sa pti group predikater byen devoue ti servi bann trak, brosir, magazin ek bann liv. Zot ti osi prepar bann sermon ek lartik ki zot ti distribye avek plizyer milye zournal pour ki zot enprimen. Zot ti pas bann progranm baze lo Labib lo radyo nasyonal ensi byen ki enternasyonal. Zot ti prodwir e montre bann pti film ki ti annan son parol, menm avan prodiksyon bann premye film avek parol pour piblik. Kwa ki ti fer zot annan en devouman parey? Ozordi i annan apepre set milyon dimoun ki pe aksepte e pe donn lanmen anons sa mesaz: “Les zot ganny rekonsilye avek Bondye.” I evidan ki sa bann premye Kretyen ti bann bon legzanp devouman menm si sirkonstans pa ti tro tro favorab.
13. Ki plan Bondye ki nou devret pran aker?
13 Sa parol ki Pol ti dir: “Ozordi i sa letan favorab” i touzour valab. Vi ki nou eksperyans labonte ekstraordiner Zeova, nou rekonesan ki i donn nou sa loportinite pour tande e aksepte sa mesaz rekonsilyasyon. Olye satisfe avek sa ki nou’n fer, nou pran aker sa ki Pol ti dir answit: “Alor ki nou pe travay ansanm avek Bondye, nou sipliy zot pour pa les perdi sa lagras ki zot in resevwar.” (2 Kor. 6:1) Bi labonte ekstraordiner Bondye i ki ‘tou dimoun i rekonsilye avek li menm’ par Kris.—2 Kor. 5:19.
14. Ki loportinite bann dimoun dan plizyer pei in ganny ofer?
14 Lamazorite imen, ki’n ganny avegle par Satan i touzour elwannyen avek Bondye e zot pa konn bi labonte ekstraordiner Bondye. (2 Kor. 4:3, 4; 1 Zan 5:19) Me, kondisyon lemonn ki pe vin deplizanpli pir in fer bokou dimoun aksepte laverite ler zot ganny leksplikasyon ki dimoun i eksperyans soufrans ek lezot move keksoz akoz zot elwannyen avek Bondye. Menm dan bann pei kot laplipar dimoun pa’n demontre lentere pour sa travay predikasyon, en kantite dimoun pe aprezan aksepte sa bon nouvel e pe pran bann pa neseser pour rekonsilye avek Bondye. Alor, eski nou konpran ki nou pe viv dan sa letan kot i lemoman pour nou fer bokou plis zefor pour demontre devouman e fer dimoun tann sa mesaz enportan pour “les zot ganny rekonsilye avek Bondye?”
15. Olye pres en mesaz zis pour fer dimoun santi zot byen, ki nou anvi tou dimoun i konnen?
15 Nou travay i pa senpleman pour dir dimoun ki si zot vin ver Bondye i pou ed zot avek zot bann problenm e zot pou santi zot pli byen. Sanmenm ki en kantite dimoun pe rode ler zot al legliz e sa bann legliz i pare pour satisfer sa kalite dezir. (2 Tim. 4:3, 4) Sa pa nou lobzektif ler nou pe akonplir nou minister. Sa bon nouvel ki nou prese i pour fer dimoun konnen ki dan son lanmour Zeova i pare pour pardonn nou nou lofans par Kris. Alor, bann endividi i kapab fer sa zefor pour vin pros avek Bondye e ganny rekonsilye avek li. (Rom. 5:10; 8:32) Par kont, “sa letan favorab” i pros pour ariv ver son lafen.
“Pouse par Lespri”
16. Kwa ki ti ed Pol pour annan kouraz e demontre devouman?
16 Alor, ki mannyer nou kapab devlop e gard nou devouman pour vre ladorasyon? Petet serten i timid oubyen pa kontan koze e zot kapab vwar li difisil pour demontre lafeksyon oubyen vin amikal. Me, i byen pour rapel ki devouman i pa zis sa santiman oubyen leksitasyon ki nou demontre e i pa depan lo personnalite en dimoun. Pol ti fer vwar konman pour devlop e gard devouman ler i ti ankouraz son bann konpanyon Kretyen pour les zot ganny “pouse par Lespri.” (Rom. 12:11) I gras a lespri sen Zeova ki zapot Pol ti ganny kouraz ek lafors pour persevere dan sa travay predikasyon. Plis ki trant an ti’n pase depi ki Pol ti ganny swazir par Zezi ziska dernyen fwa ki i ti ganny met dan prizon Ronm e mor konman en matir, e pandan tou sa letan Pol pa ti zanmen perdi son devouman. I ti touzour rod gidans Bondye, e Bondye ti donn li lafors neseser par mwayen son lespri sen. I ti dir: “Mon kapab fer fas avek tou par Kris ki donn mwan lafors.” (Fili. 4:13) Pa nou kapab retir en gran byenfe si nou aprann atraver son legzanp!
17. Ki mannyer nou kapab les nou ganny “pouse par Lespri”?
17 Dan Romen 12:11, zapot Pol ti servi en mo Grek, “pouse,” ki orizinalman vedir “pe bwi.” (Kingdom Interlinear) Pour ki en boulwar delo i kontinyen bwi, i bezwen kontinyen ganny lasaler. Pareyman, pour nou ganny “pouse par Lespri,” nou bezwen kontinyen ganny lespri sen sorti kot Bondye. Pour arive ganny lespri sen Zeova nou bezwen servi tou bann provizyon ki Zeova in met a nou dispozisyon pour fortifye nou spirityalite. Sa i vedir pran o serye nou ladorasyon an fanmir ek kongregasyon. Nou bezwen regilye dan nou letid an fanmir ek nou letid personnel, priye e asiste renyon avek nou bann frer ek ser Kretyen. Sa bann provizyon pou permet ki nou ganny “pouse par Lespri” zis parey “dife” i fer en boulwar delo kontinyen “bwi.”—Lir Akt 4:20; 18:5.
18. Konman Kretyen batize, ki lobzektif nou devret konsantre lo la?
18 En dimoun ki’n batize i reste totalman konsantre lo en lobzektif e i pa fasil pour li ganny distrer oubyen dekouraze pour pourswiv sa lobzektif. Konman bann Kretyen batize, nou annan sa lobzektif pour fer tou sa ki Zeova i oule nou fer, zis parey Zezi ti fer. (Ebr. 10:7) Lavolonte Zeova ozordi i ki otan dimoun ki posib i ganny rekonsilye avek li. Alor, annou demontre devouman par imit Zezi ek Pol dan sa travay pli enportan. Wi, i irzan ki sa travay i ganny fer konmela menm!
Eski ou rapel?
• Ki sa “misyon pour fer lezot rekonsilye” avek Bondye Pol ek lezot Kretyen swazir ti ganny konfye?
• Ki mannyer bann Kretyen swazir in byen servi sa “letan favorab”?
• Ki mannyer bann Kretyen i kapab les zot ganny “pouse par Lespri”?
[Kestyon]
[Portre lo paz 20]
Pol pa’n zanmen oubliye ler Zezi ti koz avek li lo semen Damas