Linite i en mark ki idantifye vre ladorasyon

“Mon pou rasanble zot dan linite, parey en troupo dan berkay.”—MIK. 2:12.

1. Ki mannyer kreasyon i donn levidans lasazes Zeova?

EN PSALMIS ti dir: “Pa ou bann travay i bokou, O Zeova! Ou’n fer zot tou avek lasazes. Later i ranpli avek tou sa ki ou’n fer.” (Ps. 104:24) Lasazes Bondye i evidan dan relasyon ki sa plizyer varyete plant, zensek, zannimo ek bakteri i annan ansanm, zot tou zot depan lo kanmarad dan en fason vreman konplike. Dan ou lekor, i osi annan plizyer milye mekanism, depi ou bann pli gro lorgann ziska bann pli ptipti parti dan ou bann selil ki travay ansanm pour ki ou annan en bon lasante ek en lekor antye.

2. Parey nou vwar dan sa portre lo paz 16, akoz linite parmi bann Kretyen dan premye syek ti paret en mirak?

² Zeova in kree imen pour zot osi depan lo kanmarad. Sak dimoun i annan son personnalite, laparans ek abilite ki kapab konpletman diferan avek lezot. Deplis, Bondye ti kree sa premye koup imen avek bann kalite ki i annan ki ti pou permet zot korpere avek kanmarad e depan lo kanmarad. (Zen. 1:27; 2:18) Me, limanite an zeneral i elwannyen avek Bondye aprezan e zanmen zot tou zot in kapab ini ansanm dan lemonn antye. (1 Zan 5:19) Se pour sa rezon ki i ti paret en mirak pour vwar sa linite ki ti egziste parmi manm kongregasyon Kretyen dan premye syek, akoz dan kongregasyon i ti annan bann lesklav Efezyen, bann madanm Grek tre enportan, bann zonm Zwif byen edike ek bann ki ti ador zidol oparavan.—Akt 13:1; 17:4; 1 Tesa. 1:9; 1 Tim. 6:1.

3. Ki mannyer Labib i dekrir linite bann Kretyen e ki nou pou egzaminen dan sa lartik?

³ Vre ladorasyon i donn loportinite bann dimoun pour korpere ansanm dan larmoni zis parey bann manm nou prop lekor. (Lir 1 Korentyen 12:12, 13.) Nou pou egzamin serten sa bann laspe dan sa lartik: Ki mannyer vre ladorasyon i ini bann dimoun? Akoz, zis Zeova ki kapab fer plizyer milyon dimoun sorti dan diferan nasyon ini avek kanmarad? Ki lobstak ki afekte nou linite ki Zeova i ed nou sirmonte? An rapor avek linite, ki mannyer bann vre Kretyen i diferan avek bann swadizan Kretyen?

Ki mannyer vre ladorasyon i ini bann dimoun?

4. Ki mannyer vre ladorasyon i ini bann dimoun?

⁴ Bann dimoun ki pratik vre ladorasyon i rekonnet ki Zeova i annan drwa pour vin Souvren liniver akoz li ki’n kree tou keksoz. (Rev. 4:11) Alor, menm si bann vre Kretyen i viv dan diferan kominote e dan diferan sirkonstans, zot tou zot obeir menm lalwa sorti kot Bondye e zot viv annakor avek menm prensip Labib. Tou vre adorater i kapab adres Zeova dan en fason apropriye konman “Papa.” (Iza. 64:8; Mat. 6:9) Sa i fer alor ki zot tou zot bann frer ek ser spirityel e zot kapab apresye sa linite merveye ki ganny dekrir par sa psalmis: “Gete! Ki mannyer i bon e ki mannyer i agreab pour bann frer reste ansanm dan linite!”—Ps. 133:1.

5. Ki kalite ki kontribye ver linite parmi bann vre Kretyen?

⁵ Menm si bann vre Kretyen i enparfe, zot  ador Bondye ansanm dan linite akoz zot in aprann pour kontan kanmarad. Zeova in kit sa pli bon legzanp an sa ki konsern ansenny son pep konman pour demontre lanmour. (Lir 1 Zan 4:7, 8.) Son Parol i dir: “Ranpli avek konpasyon, labonte, limilite, ladouser ek pasyans. Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad. E par lao tousala, annan lanmour ki soud tou keksoz parfetman ansanm dan larmoni.” (Kol. 3:12-14) Lanmour, i sa keksoz ki soud tou keksoz parfetman dan larmoni e i sa kalite ki prensipalman idantifye bann vre Kretyen. Ou menm, eski pa ou’n vwar ki sa kalite linite i en mark vreman remarkab ki idantifye vre ladorasyon?—Zan 13:35.

6. Dan ki fason lespwar dan Rwayonm i ed nou pour annan linite?

⁶ Bann vre adorater i osi ini akoz zot konsider Rwayonm Bondye konman sa sel lespwar pour limanite. Zot konnen ki tre byento Rwayonm Bondye pou ranplas bann gouvernman imen e bann imen obeisan pou trouv vre lape pour touzour. (Iza. 11:4-9; Dan. 2:44) Se pour sa rezon ki bann vre Kretyen i swiv sa parol ki Zezi ti dir lo son bann disip: “Zot pa fer parti lemonn parey mwan mon pa fer parti lemonn.” (Zan 17:16) Bann vre Kretyen pa pran okenn kote dan bann konfli ki arive dan lemonn e dan sa fason, zot reste ini ansanm menm kan sa bann ki otour zot pe lager.

Sa sel sours lenstriksyon spirityel

7, 8. Dan ki fason lenstriksyon sorti dan Labib i ede pour promot linite parmi nou?

⁷ Bann Kretyen dan premye syek ti ini ansanm akoz zot tou zot ti ganny lankourazman sorti kot menm sours. Zot ti konnen ki Zezi ti pe ansenny e gid kongregasyon atraver bann zapot ek ansyen ki ti lo konsey direkter Zerizalenm. Desizyon ki sa bann zonm devoue ti fer ti baze lo Parol Bondye e bann sirveyan ti pas sa bann lenstriksyon avek bann kongregasyon dan plizyer pei kot zot ti ale. Konsernan serten sa bann sirveyan, Labib i dir: “Dan bann lavil kot zot ti pase, zot ti kominik desizyon ki bann zapot ek bann ansyen dan Zerizalenm ti pran.”—Akt 15:6, 19-22; 16:4.

⁸ Pareyman ozordi, bann Kretyen swazir ki lo Konsey Direkter i kontribye pour ki i annan linite dan tou bann kongregasyon dan lemonn antye. Konsey Direkter i pibliy bann piblikasyon ankourazan dan plizyer langaz. Sa nouritir spirityel ki ladan i baze lo Parol Bondye. Alor, sa ki ganny ansennyen pa sorti kot zonm, me i sorti kot Zeova.—Iza. 54:13.

9. Ki mannyer sa travay ki Bondye in donn nou i ed nou pour reste ini?

⁹ Bann sirveyan osi i promot linite kan zot kit sa bon legzanp dan predikasyon. Sa bon relasyon ki ini sa bann ki travay ansanm dan servis pour Bondye i pli for ki sa linyon ki ini bann dimoun dan lemonn ki zis pas letan ansanm. Kongregasyon Kretyen pa zis en group dimoun ki zwenn tanzantan, me zot zwenn  pour onor Zeova e fer sa travay ki nou’n ganny demande pour fer, setadir, pour pres sa bon nouvel, fer disip e batir kongregasyon. (Rom. 1:11, 12; 1 Tesa. 5:11; Ebr. 10:24, 25) Zapot Pol ti annan tou rezon pour dir sa lo bann Kretyen: “Zot pe reste ferm, ini dan menm lentansyon, e avek en menm lespri konbat ansanm pour lafwa dan levanzil.”—Fili. 1:27.

10. Dan ki fason nou ini konman pep Bondye?

¹⁰ I fer sans alor ki konman pep Zeova, nou ini akoz nou aksepte souvrennte Zeova, nou kontan nou bann frer ek ser, nou annan lespwar dan Rwayonm Bondye e nou respekte sa bann ki Bondye i servi pour desarz bann responsabilite parmi nou. Zeova i ed nou sirmont serten mantalite ki kapab gat nou linite akoz nou lenperfeksyon.—Rom. 12:2.

Sirmont lorgey ek zalouzi

11. Akoz lorgey i kree divizyon e ki mannyer Zeova i ed nou sirmont sa move tre?

¹¹ Lorgey i koz divizyon. En dimoun ki orgeye i toultan konsider li pli enportan ouswa pli siperyer ki son kanmarad e souvan i kontan ponp son lekor. Me sa kalite latitid i souvan afekte linite akoz sa bann ki tann sa dimoun pe fer son vantar i kapab tant pour zalou. Disip Zak i dir nou fransman: “Sa kalite vantar i move.” (Zak 4:16) Si nou tret lezot konmsi zot pli enferyer ki nou, sa i montre ki nou napa lanmour pour zot. Zeova i en bon legzanp limilite par lafason ki i tret bann imen enparfe parey nou. David ti dir Bondye: “Se ou limilite ki fer mwan gran.” (2 Sam. 22:36) Parol Bondye i ed nou pour rezet lorgey par ed nou pour rezonn byen. Pol ti ganny enspire pour demande: “Lekel ki fer ou diferan avek lezot? Ki ou posede ki ou pa ti resevwar? Si ou’n resevwar, alor, akoz ou vant ou lekor konmsi [ou] pa’n resevwar?”—1 Kor. 4:7.

12, 13. (a) Akoz i fasil pour devlop zalouzi? (b) Ki pou arive si nou annan menm pwennvi avek Zeova konsernan lezot?

¹² Zalouzi i en lot move tre ki afekte linite. Lefet ki nou enparfe, nou annan “zalouzi” dan nou, e menm sa bann ki depi byen lontan i en Kretyen i souvan kapab santi zot zalou sirkonstans, posesyon, privilez ouswa abilite ki lezot i annan. (Zak 4:5) Par egzanp, en frer ki annan en fanmir pour okipe i kapab santi li pe zalou bann privilez ki en serviter a plen tan i annan, san realize ki sa serviter a plen tan i kapab santi li en pti pe zalou sa zonm ki annan en fanmir, enkli zanfan. Ki nou kapab fer pour anpese ki sa kalite zalouzi i afekte nou linite?

¹³ Si nou rapel byen ki Labib i konpar bann Kretyen swazir dan kongregasyon avek manm en sel lekor, sa i kapab ed nou pour evite annan zalouzi. (Lir 1 Korentyen 12:14-18.) Par egzanp, menm si nou kapab vwar lizye en dimoun me pa son leker, eski pa zot tou le de zot enportan pour li? Pareyman, tou manm dan kongregasyon i annan valer pour Zeova, menm si pour en pe letan i kapab annan serten ki pli remarkab ki lezot. Alor, annou annan menm pwennvi avek Zeova dan lafason ki nou vwar nou bann frer ek ser. Olye zalou lezot, nou kapab demontre ki nou konsernen pour zot e nou senserman enterese avek zot. Si nou fer sa, nou pou ede pour prouv sa diferans ki i annan ant bann vre Kretyen ek bann swadizan Kretyen.

Divizyon parmi bann swadizan Kretyen

14, 15. Ki mannyer bann swadizan Kretyen in perdi zot linite?

¹⁴ Linite parmi bann vre Kretyen i diferan  avek sa konfli ki egziste dan bann diferan legliz swadizan Kretyen. Ver katriyenm syek, fo lansennyman bann Kretyen aposta ti’n telman propaze ki en lanperer payen sorti Ronm ti menm kapab pran kontrol legliz, e sa ti ede pour ki legliz swadizan Kretyen i devlope. Apre sa, plizyer rwayonm ti separe avek lotorite Ronm e form en larelizyon pour zot prop nasyon.

¹⁵ Pour plizyer syek, bokou parmi sa bann rwayonm ti lager avek kanmarad. Pandan disetyenm ek dizwityenm syek, bann dimoun Langleter, Lafrans ek Leta-z-ini ti promouvwar nasyonalizm, setadir, devosyon pour zot Leta, pour ki finalman ­nasyonalizm ti vin parey en larelizyon. Pandan diznevyenm ek ventyenm syek, lamazorite dimoun ti devlop deplizanpli sa leta lespri nasyonalizm. Pour fini kont, i ti annan divizyon parmi bann legliz swadizan Kretyen e finalman zot ti form plizyer ptipti larelizyon e ­laplipar parmi i toler nasyonalizm. Bann parwasyen in menm lager avek lezot parwasyen ki annan menm krwayans avek zot sorti dan en lot nasyon. Denozour bann larelizyon swadizan Kretyen i divize, akoz zot napa menm krwayans relizye e akoz nasyonalizm.

16. Ki kalite size ki diviz bann swadizan Kretyen?

¹⁶ Dan ventyenm syek, serten ptipti larelizyon parmi bann swadizan Kretyen ti konmans fer bokou zefor pour promot linite. Me apre zefor ki zot in fer pour plizyer lannen, zis en ptigin legliz ki’n ini ansanm e bann parwasyen i ankor divize akoz bann kestyon parey evolisyon, lavortman, omoseksyalite ek lordinasyon bann madanm konman pret. Dan serten larelizyon swadizan Kretyen, bann sef relizye in anvi rasanble plizyer ptipti group larelizyon ansanm par esey aziste serten fo lansennyman ki oparavan ti diviz zot. Par kont, ler sa in ganny fer, lafwa bann dimoun in tant pour afeblir e definitivman sa pa’n anmenn linite parmi zot.

Vre ladorasyon i pli for ki nasyonalizm

17. I ti ganny predir ki “dan peryod final bann zour” vre ladorasyon ti pou ini bann dimoun. Dan ki fason?

¹⁷ Menm si la konmela limanite an zeneral i pli divize ki zanmen, linite i kontinyen reste en mark ki fer bann vre Kretyen diferan. Profet Bondye ki ti apel Mika ti predir: “Mon pou rasanble zot dan linite, parey en troupo dan berkay.” (Mik. 2:12) Mika ti predir ki vre ladorasyon ti pou ganny met parlao lezot form ladorasyon, ki swa parlao bann fo bondye ouswa en Leta ki ganny konsidere konman en bondye. I ti ekrir: “I pou arive dan peryod final bann zour ki montanny lakaz Zeova pou ganny etablir solidman parlao latet bann montanny, e i pou sirman ganny met parlao bann pti montanny, e bann pep i devret al laba. Parski tou bann pep zot, zot pou mars sakenn o non zot bondye, me  nou, nou pou mars o non Zeova nou Bondye.”—Mik. 4:1, 5.

18. Ki sanzman vre ladorasyon in ed nou fer?

¹⁸ Mika ti osi dekrir lafason ki vre ladorasyon ti pou ini sa bann ki oparavan ti lennmi avek kanmarad. “[Dimoun sorti dan] bokou nasyon pou sertennman ale e dir: ‘Vini, zot bann pep, e annou mont lo montanny Zeova e kot lakaz Bondye Zakob; e i pou ansenny nou konsernan son semen.’ . . . Zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager.” (Mik. 4:2, 3) Sa bann ki kit ladorasyon bann bondye ki zonm in fer ouswa ladorasyon zot nasyon e aksepte pour ador Zeova, pou rezwir en linite mondyal. Bondye i enstrir zot dan semen lanmour.

19. Linite parmi sa plizyer milyon vre adorater pe klerman endik kwa?

¹⁹ Sa linite ki i annan parmi bann vre Kretyen dan lemonn antye ozordi i inik e i evidan ki Zeova pe ankor kontinyen gid son pep atraver son lespri sen. Dimoun sorti dan tou nasyon pe ganny rasanble plis ki zanmen oparavan dan listwar imen. Sa i prouv lakonplisman remarkab sa ki ganny dir dan Revelasyon 7:9, 14 e i osi pe endike ki byento lanz Zeova pou larg sa bann “divan” ki pou detrir sa move lemonn ki nou pe viv ladan. (Lir Revelasyon 7:1-4, 9, 10, 14.) Eski pa i en gran loner pour ini ansanm avek nou bann frer ek ser dan lemonn antye? Ki mannyer sakenn ant nou i kapab kontribye anver sa kalite linite? Sa pou ganny egzaminen dan prosen lartik.

Ki ou pou reponn?

• Ki mannyer vre ladorasyon i ini bann dimoun?

• Konman nou kapab anpese ki zalouzi i detrir nou linite?

• Akoz nasyonalizm pa diviz bann vre adorater?

[Kestyon]

[Portre lo paz 16]

Bann Kretyen dan premye syek ti sorti dan bann lanvironnman konpletman diferan

[Portre lo paz 18]

Ki mannyer, ler ou ede kot Lasal Rwayonm, sa i promot linite?