Rod sekirite ek proteksyon parmi pep Bondye
Rod sekirite ek proteksyon parmi pep Bondye
“Mon oule loue ou dan sa gran lasanble.”—PS. 35:18.
1-3. (a) Kwa ki kapab fer serten Kretyen tonm dan en sityasyon ki danzere spirityelman? (b) Kote pep Bondye i kapab trouv proteksyon?
PANDAN zot vakans dan en pei tropik, Joe ek son madanm ti pe fer snorkling dan en landrwa kot ti annan en gran resif koray avek en kantite pwason diferan kouler ek groser. Zot ti naz en pe pli lwen pour admir bann resif koray anba. Ler zot ti’n ariv dan kre, madanm Joe ti dir: “Mon krwar nou pe al tro lwen.” Joe ti reponn li: “Pa trakase. Mon konnen ki mon pe fer.” Joe i rapel ki apre i ti demann dan li menm: ‘Oli tou sa bann pwason ki ti la?’ Avek lafreyer i ti konpran akoz tou bann pwason ti’n ale ler i ti vwar en reken sorti dan fon lanmer pe vin dan son direksyon. I ti vreman san okenn defans. Ler sa reken ti apepre 1 met avek li, i ti sanz direksyon.
2 En Kretyen i kapab ganny distrer avek bann keksoz ki Satan i ofer dan sa lemonn, par egzanp divertisman, travay ek bann byen ki i annan, san realize ki i pe met son lekor dan en sityasyon danzere zis parey Joe ti fer ler i ti naz kot i pli kre. Joe ki en ansyen i dir: “Sa ki mon’n eksperyanse in fer mwan mazin konsernan bann dimoun ki nou frekante. Kongregasyon i sa landrwa ki gou pour naze e ou pou santi ou an sekirite. Pa bezwen naz kot i tro profon, setadir pa les distraksyon sa lemonn fer ou elwannyen avek kongregasyon akoz ou pou met ou spirityalite an danze. Si ou remarke ki ou’n al en pe tro lwen, retourn deswit. Sinon ou kapab ganny devore dan en sans spirityel.
3 Sa lemonn i en landrwa danzere pour bann Kretyen ozordi. (2 Tim. 3:1-5) Satan i konnen ki i pa reste li bokou letan, alor i pe rod bann ki pa reste vizilan pour devor zot. (1 Pyer 5:8; Rev. 12:12, 17) An tou leka, nou pa san okenn proteksyon. Zeova in donn son pep en landrwa refiz kot zot kapab an sekirite, sa i kongregasyon Kretyen.
4, 5. Ki mannyer bokou dimoun i santi konsernan zot lavenir e akoz?
4 Sekirite ki sa lemonn i ofer, ki swa lo kote fizik oubyen emosyonnel i vreman limite. En kantite dimoun pa santi zot an sekirite akoz krim, vyolans, lavi ser e menm akoz bann problenm lanvironnman. Tou dimoun i fer fas avek lavyeyes ek maladi en moman dan zot lavi. Lezot dimoun ki annan travay, lakaz, en bon lapey e en ase bon lasante i kapab demann zot lekor ki kantite letan tousala pou dire.
5 En kantite dimoun pa’n reisi santi zot stab emosyonnelman. I vreman tris pour dir ki bokou parmi bann dimoun ki ti annan sa lespwar pour trouv lape ek satisfaksyon dan maryaz e annan en fanmir, pa’n vwar zot rev vin vre. Dan domenn relizye, bokou i santi zot konfize e menm kestyonn valer lansennyman ki zot in gannyen. Nou konpran zot reaksyon sirtou ler nou obzerv move kondwit zot bann sef relizye ek zot lansennyman. I pour sa rezon alor ki en kantite dimoun i santi ki zot napa bokou swa apard ki met zot konfyans dan lasyans, dan bonn volonte oubyen bon zizman lezot imen. I pa drol alor ki bann dimoun ozordi i vreman per lavenir oubyen zot tou senpleman prefere pa tro mazin lo la.
6, 7. (a) Kwa ki fer pwennvi bann dimoun ki servi Bondye ek bann ki pa pe servi li diferan? (b) Ki nou pou egzaminen?
6 Pa bann dimoun ki form parti kongregasyon Kretyen i vreman annan en pwennvi diferan konsernan lavenir ki sa bann ki pa form parti kongregasyon! Me menm si konman pep Bondye nou rankontre menm defi ek problenm ki lezot i fer fas avek, nou reazir dan en fason totalman diferan. (Lir Izai 65:13, 14; * Malaki 3:18. *) Akoz? Akoz Labib i donn nou en leksplikasyon satisfezan lo kondisyon ki imen i ladan e osi ki mannyer pour fer fas avek bann defi ek problenm. A lafen di zour, nou pa tro enkyet konsernan lavenir. Vi ki nou bann adorater Zeova, nou ganny proteze kont bann move rezonnman, bann pratik imoral ek zot move konsekans. Konpare avek lezot dimoun, bann frer ek ser dan kongregasyon Kretyen i santi sa lape lespri.—Iza. 48:17, 18; Fili. 4:6, 7.
7 Atraver serten legzanp nou pou kapab pli byen konpran proteksyon ki bann serviter Zeova i gannyen konpare avek bann ki pa ganny sa proteksyon. Sa bann legzanp pou san dout motiv nou pour egzamin fason ki nou rezonnen e nou bann labitid, e osi pour vwar si nou kapab aplik pli byen konsey ki Bondye in donnen pour protez nou.—Iza. 30:21.
“Mon lipye ti pros pour sanz direksyon”
8. Ki bann serviter Zeova i bezwen toultan fer?
8 Depi konmansman listwar imen, bann dimoun ki ti swazir pour servi e obeir Zeova ti evite asosye avek lezot dimoun ki pa ti fer sa. I pour sa rezon ki Zeova ti endike ki i ti pou annan en laenn ant son bann serviter ek bann ki pou swiv Satan. (Zen. 3:15) Lefet ki pep Bondye i respekte bann prensip Labib, zot pa azir parey lezot dimoun. (Zan 17:15, 16; 1 Zan 2:15-17) I pa toultan fasil pour fer sa. Parfwa, serten serviter Zeova i demann zot lekor si i vreman vo lapenn viv en lavi sakrifis.
9. Ki difikilte sa ekriven Psonm 73 ti fer fas avek?
9 Sa ekriven Psonm 73, ki tre probableman ti en desandans Azaf, ti demann son lekor si i ti’n fer sa bon desizyon. Sa psalmis pa ti konpran akoz bann move dimoun i souvan reisi, zot ere e prospere dan lavi, tandis ki dimoun ki fer bokou zefor pour servi Bondye zot fer fas avek leprev ek difikilte.—Lir Psonm 73:1-13.
10. Akoz bann kestyon ki sa psalmis ti demande i enportan pour ou?
10 Eski ou’n deza demann ou lekor sa bann kestyon parey? Si wi pa bezwen santi ou tro koupab oubyen mazinen ki ou pe perdi lafwa. Anfet i annan en kantite serviter Zeova, menm serten parmi bann ki Zeova ti servi pour ekrir Labib, ki ti poz zot lekor sa bann kestyon. (Zob 21:7-13; Ps. 37:1; Zer. 12:1; Aba. 1:1-4, 13) Tou bann dimoun ki anvi servi Zeova i merit poz zot lekor sa kestyon e trouv son larepons osi: Eski servi Zeova e obeir li i sa pli meyer keksoz pour mwan fer? Sa kestyon i relye avek sa enn ki Satan ti souleve dan zarden Edenn. I sa kestyon pli enportan konsernan son drwa pour dirize. (Zen. 3:4, 5) Alor i ti pou byen si nou tou nou egzamin sa kestyon ki sa psalmis ti souleve. Eski nou devret zalou bann move dimoun ki paret pe viv zot lavi san okenn problenm? Eski nou devret “sanz direksyon” setadir abandonn nou servis pour Zeova e swiv zot? Sirman sanmenm ki Satan ti pou kontan nou fer.
11, 12. (a) Ki mannyer sa psalmis ti sirmont son bann dout e ki sa i ansenny nou? (b) Kwa ki ti ed ou pour ariv lo menm konklizyon ki sa psalmis?
11 Kwa ki ti ed sa psalmis pour sirmont son bann dout? Menm si i ti admet ki i ti pros pour aret fer sa ki drwat, i ti sanz son pwennvi ler i ti antre dan “gran sanktyer Bondye” setadir ler i ti asosye avek bann dimoun spirityel dan tabernak oubyen tanp Bondye e reflesir lo plan Bondye. Alor i ti vin evidan pour sa psalmis ki i pa ti anvi konn menm konsekans avek bann move dimoun. I ti vwar ki zot ti parey bann dimoun ki lo en ‘teren ki glise,’ akoz zot fason viv ek swa ki zot ti fer dan lavi. Sa psalmis ti rekonnet ki tou bann ki ti kit Zeova ti pou definitivman eksperyans maler en sel kou e mor, me Zeova ti pou siport bann ki servi li. (Lir Psonm 73:16-19, 27, 28. *) San dout ou’n vwar pour ou menm ki sa parol i vre. Bokou dimoun i vwar li atiran pour viv pour fer plezir zot lekor san fatig zot avek lalwa Bondye, me personn pa kapab evit bann move konsekans si i fer sa swa.—Gal. 6:7-9.
12 Ki nou aprann ankor atraver leksperyans sa psalmis? I ti trouv li an sekirite e ganny lasazes ler i ti asosye avek pep Bondye. I ti konmans rezonn dan en fason kler e lozik ler i ti al la kot Zeova ti ganny adore. Pareyman ozordi, nou kapab ganny bann bon konsey avek lezot e benefisye avek en bon nouritir spirityel dan bann renyon kongregasyon. Alor, Zeova i annan tou rezon pour demann son bann serviter pour asiste bann renyon Kretyen. Se la kot zot pou ganny lankourazman e sa pou motiv zot pour azir avek lasazes.—Iza. 32:1, 2; Ebr. 10:24, 25.
Vey byen lekel ki nou frekante
13-15. (a) Ki ti arive avek Dina e ki sa i montre? (b) Akoz i vin en proteksyon pour nou ler nou asosye avek bann frer ek ser Kretyen?
13 Bann problenm grav ki Dina, fiy Zakob, ti fer fas avek akoz move frekantasyon ki i ti annan avek bann dimoun ki pa ti serviter Zeova, i kit en legzanp pour nou. Sa resi dan Zenez ki koz lo li i dir nou ki i ti annan labitid frekant bann zenn fiy Kananeen dan sa rezyon kot son fanmir ti reste. Sa bann Kananeen ti napa sa menm standar moral o nivo parey bann adorater Zeova. De lot kote, sa ki bann arkeolog in dekouver i montre ki akoz move labitid bann Kananeen, pour fini kont sa landrwa ti ranpli avek pratik idolatri, limoralite seksyel, ladorasyon imoral ek vyolans. (Egz. 23:23; Lev. 18:2-25; Det. 18:9-12) Mazin konsekans ki Dina ti eksperyanse akoz i ti frekant sa bann dimoun.
14 Sekenm, en zonm dan sa landrwa ki ti ganny dekrir konman “sa enn pli onorab dan lakaz son papa,” ti remark Dina “e apre i ti pran li, dormi avek li e ti vyol li.” (Zen. 34:1, 2, 19) Pa sa i vreman tris! Eski ou krwar Dina ti’n mazinen ki en keksoz koumsa ti kapab ariv avek li? Petet i ti zis pe rod fer zanmi avek sa bann zenn dan sa landrwa, bann dimoun ki i pa ti konsider konman danzere. Me, Dina ti’n vreman tronpe.
15 Ki nou aprann atraver sa resi? Definitivman sa i montre ki nou pa kapab frekant bann dimoun ki pa Temwen san ekspekte sibir okenn move konsekans. Labib i dir ki “move frekantasyon, i gat repitasyon.” (1 Kor. 15:33) De lot kote, ler ou frekant bann dimoun ki partaz menm krwayans avek ou, ou standar moral o nivo e ou lanmour pour Zeova pou vin konman en proteksyon pour ou. Sa kalite frekantasyon pou ankouraz ou pour azir avek lasazes.—Prov. 13:20.
“Zot in ganny lave”
16. Ki zapot Pol ti dir konsernan serten Kretyen dan kongregasyon Korent?
16 Kongregasyon Kretyen in ed en kantite dimoun pour rezet bann pratik imoral. Kan zapot Pol ti ekrir son premye let kongregasyon Korent, i ti koz lo sanzman ki bann Kretyen laba ti’n fer pour viv an armoni avek bann standar Bondye. Serten ti pratik limoralite seksyel, ador zidol, komet adilter, zot ti bann omoseksyel, voler, soular e fer lezot keksoz ankor. Pol ti dir zot: “Me zot in ganny lave.”—Lir 1 Korentyen 6:9-11.
17. Ki mannyer en kantite dimoun ki viv dapre standar Labib in arive sanz zot lavi?
17 Bann dimoun ki napa lafwa dan Bondye napa okenn prensip pour gid zot. Zot ki deside sa ki zot pou fer dan lavi oubyen zot senpleman tonm dan menm kalite lavi imoral parey bann dimoun otour zot, zis parey bann Korentyen dan lepase ti fer avan ki zot ti vin Kretyen. (Efe. 4:14) Me konnesans egzakt lo Parol Bondye ek son plan i annan sa pouvwar pour fer bann dimoun ki aplik bann gidans ki dan Labib sanz zot lavi pour enn ki pli bon. (Kol. 3:5-10; Ebr. 4:12) En kantite dimoun ki form parti kongregasyon Kretyen ozordi i kapab dir ou ki avan ki zot ti aprann e aksepte bann standar drwat Zeova, zot ti viv en lavi vreman imoral. Zot ti napa okenn satisfaksyon dan lavi e zot ti malere. Me zot in trouv lape zis ler zot ti konmans asosye avek pep Bondye e viv an armoni avek bann prensip Labib.
18. Ki ti arive avek en zenn e ki sa i montre?
18 De lot kote, serten in swazir pour kit kongregasyon, sa landrwa kot zot ganny proteze, me aprezan zot vreman regrete ki zot ti pran sa desizyon. En ser, ki nou pou apel Tanya i rakonte ki i ti “preski grandi dan laverite,” me ler i ti annan 16 an i ti kit kongregasyon pour “swiv bann keksoz ki sa lemonn i ofer.” Pour fini kont i ti tonm ansent e vi ki i pa ti anvi sa zanfan i ti fer en lavortman. Aprezan i dir: “Sa trwa-z-an ki mon’n pase an deor kongregasyon in afekte mwan en kantite emosyonnelman e i touzour leka. En keksoz ki mon pa kapab arive oubliye i lefet ki mon’n touy mon pti baba ki pa ti ankor ne. . . . Mon anvi dir avek tou bann zenn ki ti a kontan vwar pour zot menm zis pour en pti moman sa ki sa lemonn i kapab ofer zot: ‘Pa ni menm eseye! I kapab paret gou o konmansman, me apre ki ou pou santi son douler. Sa lemonn napa nanryen pour ofer apard soufrans. Mon konn sa byen akoz mwan menm mon’n fer leksperyans. Reste dan lorganizasyon Zeova! I sa sel fason viv ki anmenn satisfaksyon.”
19, 20. Ki proteksyon kongregasyon Kretyen i ofer e konman i ofer sa led?
19 Zis mazinen ki ou pou devenir si ou kit kongregasyon, sa landrwa kot ou ganny proteze. En kantite dimoun i ganny repinyans ler zot mazin sa kalite lavi ki zot ti viv avan aksepte laverite. (Zan 6:68, 69) Si ou reste pros avek ou bann frer ek ser Kretyen ou pou ganny proteze kont bann maler ek soufrans ki dimoun i souvan eksperyanse dan lemonn Satan. Ler ou asosye avek bann frer ek ser dan kongregasyon, asiste renyon kongregasyon regilyerman, sa pou kontinyen ed ou pour rapel ki bann standar drwat Zeova i saz e ou pou anvi aplik zot dan ou lavi. Zis parey sa psalmis ti fer, ‘loue Zeova dan sa gran lasanble.’—Ps. 35:18.
20 I vre ki pour diferan rezon, tou Kretyen i pas dan difikilte kot zot vwar li difisil pour gard zot lentegrite. I kapab ki zot zis bezwen ki en dimoun i montre zot sa bon direksyon pour ale. Ki ou menm oubyen kongregasyon i kapab fer pour ed nou bann konpanyon Kretyen dan sa bann moman difisil? Sa lot lartik pou montre ki mannyer ou kapab ‘kontinyen ankouraz e fortifye’ ou bann frer ek ser.—1 Tesa. 5:11.
[Not anba lo paz]
^ par. 6 Izai 65:13, 14: “La sa ki Souvren Senyer Zeova in dir: ‘Gete! Mon prop serviter pou manze, me zot zot pou lafen. Gete! Mon prop serviter pou bwar, me zot zot pou swaf. Gete! Mon prop serviter pou dan lazwa, me zot zot pou onte. Gete! Mon prop serviter pou kriye avek lazwa akoz zot annan lakontantman dan zot leker, me zot zot pou kriye akoz douler dan zot leker e zot pou irle senpleman akoz depresyon.’”
^ par. 6 Malaki 3:18: “Ankor enn fwa zot pou vwar ladiferans ant en dimoun drwat ek enn mesan, ant enn ki pe servi Bondye ek enn ki pa’n servi li.”
^ par. 11 Psonm 73:27, 28: “Gete: Bann ki reste lwen avek ou pou mor. Ou pou sirman fer tou bann ki pe kit ou reste trankil. I bon pour mwan apros avek Bondye. Mon’n pran refiz dan Souvren Senyer Zeova, pour anons tou son travay.”
Ki ou pou reponn?
• Ki nou aprann atraver leksperyans ekriven Psonm 73?
• Ki nou aprann atraver leksperyans ki Dina ti pas ladan?
• Akoz ou kapab trouv proteksyon dan kongregasyon Kretyen?
[Kestyon]
[Portre lo paz 9]
Naz kot ou an sekirite; reste dan kongregasyon!