Lafason ki Zeova i dirize i ganny zistifye!

“Sa enn Tre O i Sef dan rwayonm limanite.”—DAN. 4:17.

1, 2. Nonm serten rezon akoz dominasyon imen pa’n reisi.

DOMINASYON imen pa’n reisi! Napa okenn dout konsernan sa. Rezon prensipal akoz imen pa’n reisi se akoz zot mank lasazes. Sirtou dan nou letan i evidan ki dominasyon bann zonm pa’n reisi lefet ki en kantite dirizan i ‘egois, kontan larzan, vantar, arogan, mank respe pour keksoz sen, zot annan leker dir, san pitye, kalomni zot prosen, vyolan, kriyel, lennmi sa ki fer dibyen; zot tret, annan karakter vif, anfle avek lorgey.’—2 Tim. 3:2-4.

² Depi byen lontan nou premye paran in rezet dominasyon Bondye. Par fer sa, petet zot ti krwar ki zot ti pe swazir zot lendepandans. Me an realite zot ti pe soumet avek dominasyon Satan. Pandan sa sis mil an ki imen in domin later dan en fason deplorab anba lenfliyans “sef [sa] lemonn,” Satan in anmenn nou dan sa sityasyon ki nou ladan konmela, ki pli pir dan listwar. (Zan 12:31) Pour eksplik sityasyon ki imen i ladan ozordi, The Oxford History of the Twentieth Century i dir ki i pa servi dan nanryen pour “rod en lemonn parfe.” I eksplike: “I pa zis akoz i enposib pour trouv en lemonn parfe , me zefor pour kree li i anmenn maler, en sistenm  diktatir e bann lager pli pir ki’n deza egziste.” Pa sa i en fason fran pour admet ki dominasyon imen pa’n reisi!

3. Ki nou kapab dir konsernan lafason ki Bondye ti pou dirize si Adan ek Ev pa ti’n fer pese?

³ Alor pa i tris ki nou premye paran in rezet dominasyon Bondye, sa sel dominasyon ki marse! Byensir, nou pa vreman konnen ki fason Zeova ti pou’n organiz son gouvernman pour diriz later si Adan ek Ev ti’n reste fidel avek li. Me nou kapab annan lasirans ki dominasyon Bondye ki ti pou ganny aksepte par tou bann imen ti pou baze lo lanmour e ti pou napa lapliferans. (Akt 10:34; 1 Zan 4:8) Lefet ki zis Bondye ki annan sa pli gran lasazes, nou kapab asire ki si limanite ti reste anba dominasyon Zeova, tou bann lerer ki bann dirizan imen in fer ti pou’n ganny evite. Dominasyon Bondye ti pou reisi “satisfer dezir tou sa ki vivan.” (Ps. 145:16) An bref, dominasyon Bondye ti pou parfe. (Det. 32:4) Pa i tris ki bann imen in rezet Son dominasyon!

4. Ziska ki degre Satan in ganny permet pour dirize?

⁴ Kantmenm sa, i byen pour mazinen ki menm si Zeova in les imen domin zot lekor, i pa’n zanmen abandonn drwa ki i annan pour diriz bann lanz ek imen. Menm lerwa pwisan Babilonn ti forse rekonnet finalman ki, “Sa enn Tre O i Sef dan rwayonm limanite.” (Dan. 4:17) Finalman, Bondye pou akonplir son lavolonte atraver son Rwayonm. (Mat. 6:10) I vre, Zeova in permet Satan pour azir tanporerman konman “bondye . . . sa syek” pour li kapab reponn dan en fason konvenkan sa kestyon ki ti ganny souleve par sa opozan. (2 Kor. 4:4; 1 Zan 5:19) Malgre sa, Satan pa’n zanmen kapab fer plis ki sa ki Zeova i permet li fer. (2 Kron. 20:6; konpar Zob 1:11, 12; 2:3-6.) I’n toultan annan serten endividi ki’n swazir pour soumet avek Bondye, menm si zot ti pe viv dan en lemonn ki ganny dominen par pli gran Adverser Bondye.

Dominasyon Bondye lo Izrael

5. Ki langazman Izrael ti fer avek Bondye?

⁵ Depi letan Abel ziska dan letan bann patrias, plizyer serviter fidel in ador Zeova e obeir son bann komannman. (Ebr. 11:4-22) Dan letan Moiz, Zeova ti fer en lalyans avek desandans patrias Zakob e se sa desandans ki ti vin nasyon Izrael. An 1513 A.N.L., bann Izraelit ti tonm dakor avek sa lalyans e zot desandans osi ti aksepte Zeova konman zot Dirizan. Zot ti dir: “Tou sa ki Zeova in dir nou pare pour fer.”—Egz. 19:8.

6, 7. Dan ki fason Bondye ti diriz nasyon Izrael?

 ⁶ Zeova ti annan en rezon pour swazir bann Izraelit pour vin son pep. (Lir Deterononm 7:7, 8. *) Sa swa ti annan pour fer pa zis avek byennet bann Izraelit me osi avek non ek souvrennte Bondye ki ti annan en pli gran lenportans. Nasyon Izrael ti pou ganny servi konman temwen ki Zeova i sa sel vre Bondye. (Iza. 43:10; 44:6-8) Alor, Zeova ti dir avek sa nasyon: “Parski ou en pep sen pour Zeova ou Bondye, e Zeova in swazir ou pour vin son pep, en propriyete spesyal, parmi tou sa pep ki lo later.”—Det. 14:2

⁷ Lafason ki Bondye ti egzers son dominasyon lo bann Izraelit i montre ki i ti pran an konsiderasyon ki zot ti enparfe. Me kantmenm sa, son bann lalwa ti parfe e reflekte kalite sa Enn ki ti donn zot sa lalwa. Komannman ki Zeova ti donn avek Moiz ti klerman montre sentete Bondye, son lanmour, lazistis, pasyans e ki i pare pour pardonnen. Plitar, dan letan Zozye ek son zenerasyon, sa nasyon ti obeir komannman Zeova e zot ti viv anpe e ganny bann benediksyon spirityel. (Zoz. 24:21, 22, 31) Sa letan dan listwar bann Izraelit, i montre ki dominasyon Zeova i en sikse.

Dominasyon imen i anmenn move konsekans

8, 9. Kwa ki pa ti saz pour bann Izraelit demande, e ki rezilta sa ti anmennen?

⁸ Me avek letan, bann Izraelit ti souvan rezet dominasyon Bondye e zot ti perdi son proteksyon. Finalman atraver profet Samyel zot ti demann en lerwa imen ki zot kapab vwar. Zeova ti dir Samyel akord zot zot demann. Me, Zeova ti azoute: “I pa ou ki zot in rezete, me se mwan ki zot in rezete, pour ki mon nepli vin zot lerwa.” (1 Sam. 8:7) Menm si Zeova ti permet ki bann Izraelit i annan en lerwa ki zot vwar, i ti averti zot ki dominasyon en lerwa imen ti pou anmenn bann move konsekans.—Lir 1 Samyel 8:9-18.

⁹ Listwar in demontre ki lavertisman Zeova ti vre. Dominasyon par lerwa imen ti anmenn bann problenm grav pour Izrael, sirtou kan sa lerwa pa ti fidel. Avek legzanp Izrael antet, i pa etonan ki pandan bann letan ki’n pase bann gouvernman imen ki pa konn Zeova pa’n reisi anmenn bann bon rezilta dirab. I vre ki serten politisyen in demann Bondye son benediksyon dan zot zefor pour anmenn lape ek sekirite, me ki mannyer Bondye i kapab beni bann ki pa soumet avek fason ki li i dirize?—Ps. 2:10-12.

En nouvo nasyon anba dominasyon Bondye

10. Akoz Izrael ti ganny ranplase konman nasyon ki Bondye ti swazir?

¹⁰ Nasyon Izrael ti montre ki zot pa ti anvi servi Zeova fidelman. Finalman, zot ti rezet sa Mesi ki ti ganny apwente par Bondye e Zeova ti rezet zot e deside pour ranplas zot par en group dimoun ki ti form en nouvo nasyon. An rezilta sa, kongregasyon bann Kretyen swazir, ki ti pe ador Zeova ti vin an egzistans dan lannen 33 N.L. Sa kongregasyon ti annefe en nouvo nasyon anba lotorite dominasyon Zeova. Pol ti koz konsernan sa kongregasyon konman ‘Izrael Bondye.’—Gal. 6:16.

11, 12. Ki similarite i annan ant lafason ki nasyon Izrael ti ganny gide ek ‘Izrael Bondye’?

¹¹ I annan bann diferans ek similarite ant nasyon Izrael ek ‘Izrael Bondye.’ Kontrerman avek ansyen nasyon Izrael, kongregasyon Kretyen napa okenn lerwa imen e i pa bezwen ofer sakrifis zannimo pour bann ki fer pese. En similarite ant nasyon Izrael ek kongregasyon Kretyen i sa laranzman pour  apwent bann ansyen. (Egz. 19:3-8) Sa bann ansyen pa domin troupo. Zot plito vey lo kongregasyon e desarz bann responsabilite. Zot okip sak dimoun dan kongregasyon avek lanmour e demontre loner ek respe anver zot tou.—2 Kor. 1:24; 1 Pyer 5:2, 3.

¹² Par medit lo fason ki Bondye ti azir avek Izrael, bann ki form parti ‘Izrael Bondye’ e zot konpanyon ‘lezot mouton’ i devlop en pli gran lapresyasyon pour Zeova ek son fason dirize. (Zan 10:16) Par egzanp, listwar in prouve ki bann dirizan imen dan ansyen Izrael ti enfliyans en kantite zot pep, swa an byen ouswa an mal. Sa realite i fer sa bann ki okip kongregasyon konsyan ki menm si zot pa bann dirizan parey bann lerwa dan ansyen Izrael, zot bezwen toultan donn en bon legzanp lafwa.—Ebr. 13:7.

Ki mannyer Zeova i dirize ozordi

13. Ki levennman enportan ti arive an 1914?

¹³ Bann Kretyen ozordi pe anonse dan lemonn antye ki byento dominasyon imen pou ariv ver son lafen. An 1914, Zeova ti etablir son Rwayonm dan lesyel ki i ti konfye avek Zezi Kri, sa enn ki i’n swazir konman Lerwa. Sa moman i ti donn Zezi lotorite pour ale “konman en venker e pour ganny laviktwar.” (Rev. 6:2) Sa nouvo lerwa ki ti vin lo tronn ti ganny demande pour: “Al diriz o milye [son] bann lennmi.” (Ps. 110:2) Malerezman, souvan sa bann nasyon in refize soumet avek dominasyon Zeova. Zot kontinyen azir konmsi “Zeova pa egziste.”—Ps. 14:1.

14, 15. (a) Ki mannyer nou ganny dirize par Rwayonm Bondye ozordi, e ki kestyon sa i devret fer nou demann nou lekor? (b) Ki mannyer nou kapab vwar ozordi ki dominasyon Bondye i pli siperyer?

¹⁴ I reste ankor en ptigin Kretyen swazir lo later ki form parti ‘Izrael Bondye’ e konman bann frer Zezi zot kontinyen azir konman “bann lanbasader Kris.” (2 Kor. 5:20) Zot in ganny apwente konman sa lesklav fidel e pridan pour pran swen e donn nouritir spirityel bann serviter ki’n ganny swazir enkli sa gran lafoul Kretyen ki pe ogmante kot aprezan, i annan plizyer milyon zot ki annan sa lespwar pour viv lo later pour touzour. (Mat. 24:45-47; Rev. 7:9-15) Benediksyon Zeova an rapor avek sa laranzman i evidan akoz bann vre adorater pe prospere spirityelman ozordi.

¹⁵ Sak Kretyen i devret demann son lekor: ‘Eski mon vreman rekonnet responsabilite ki mon devret desarze dan kongregasyon? Eski mon siport dan en fason apropriye  lafason ki Zeova i gouvernen? Eski mon fyer pour vin en sitwayen sa Rwayonm ki Zeova pe dirize? Eski mon determinen pour kontinyen koz konsernan Rwayonm Bondye depandan lo mon posibilite?’ Konman en group, nou devret soumet volonterman avek gidans ki Konsey Direkter i donnen e korpere avek bann ansyen dan kongregasyon. Dan sa fason nou demontre ki nou aksepte lafason ki Bondye i dirize. (Lir Ebre 13:17.) Ler nou soumet volonterman sa i fer ki nou tou dan lemonn antye nou ini, en keksoz inik dan sa lemonn divize. I osi anmenn lape ek ladrwatir e i glorifye Zeova, par demontre ki son fason dirize i sa enn ki pli meyer.

Dominasyon Zeova i ganny laviktwar

16. Ki desizyon nou tou nou fer fas avek ozordi?

¹⁶ Letan pour reponn sa bann kestyon ki ti ganny souleve dan Edenn pe apros byen vit. Alor ozordi i lemoman pour bann dimoun fer en desizyon. Sak dimoun i bezwen deside si i pou aksepte lafason ki Zeova i dirize oubyen si i pou reste atase avek dominasyon imen. I en privilez pour ed bann dimoun ki annan limilite fer sa bon desizyon. Byento, ler Armagedon pour arive, lafason ki Zeova i dirize pou ranplas bann gouvernman imen ki anba dominasyon Satan. (Dan. 2:44; Rev. 16:16) Dominasyon bann imen pou nepli egziste, e Rwayonm Bondye ki pou diriz later antye. Dan en sans konplet, lafason ki Zeova i dirize pou ganny zistifye.—Lir Revelasyon 21:3-5.

17. Kwa ki kapab ed bann dimoun ki annan limilite fer en bon desizyon an rapor avek dominasyon?

¹⁷ Sa bann ki pa ankor fer en desizyon final an faver Zeova zot devret konsider dan lapriyer bann byenfe ki pou egziste ler Bondye pou dirize. Dominasyon bann imen pa’n kapab rezourd bann problenm parey krim, enkli terorism. Dominasyon Bondye pou retir tou mesanste lo later. (Ps. 37:1, 2, 9) Dominasyon zonm in anmenn bann lager ki pa zanmen fini, me dominasyon Bondye pou “fer lager arete ziska dan bann landrwa pli lwen lo later.” (Ps. 46:9) Dominasyon Bondye pou menm fer imen ek zannimo anpe avek kanmarad. (Iza. 11:6-9) I’n souvan annan lapovrete ek lafanmin anba dominasyon imen, me Bondye pou fer zot disparet. (Iza. 65:21) Menm dirizan imen ki annan pli bon lentansyon pa’n kapab retir maladi ek lanmor, me anba dominasyon Bondye, bann dimoun ki vye e malad pou vreman kontan pou revin zenn ankor. (Zob 33:25; Iza. 35:5, 6) Sirman, later pou vin en paradi, menm bann mor pou ganny resisite.—Lik 23:43; Akt 24:15.

18. Ki mannyer nou kapab demontre ki nou krwar ki lafason ki Bondye i dirize i sa enn ki pli meyer?

¹⁸ Wi dominasyon Bondye pou retir tou ditor ki Satan in koze ler i ti enfliyans nou premye paran pour rezet zot Kreater. Zis mazinen, Satan in koz ditor pandan apepre 6000 an, me Bondye pour servi Kris pour elimin tou sa bann maler dan 1000 an! Pa sa i donn plis levidans ki lafason ki Zeova i dirize i pli siperyer! Konman Temwen pour nou Bondye, nou aksepte li konman nou Dirizan. Alors, annou demontre sak zour, sak enstan dan nou lavi ki nou bann adorater Zeova, bann sitwayen son Rwayonm ki fyer pour vin son Temwen. Annou servi tou loportinite pour dir avek nenport dimoun ki pou ekout nou ki lafason dirize Zeova i sa enn ki pli meyer.

[Not anba lo paz]

An rapor avek dominasyon Bondye, ki nou’n aprann ler nou’n lir . . .

• Deterononm 7:7, 8?

• 1 Samyel 8:9-18?

• Ebre 13:17?

• Revelasyon 21:3-5?

[Kestyon]

[Portre lo paz 29]

Zeova in touzour sa enn ki dominen

[Portre lo paz 31]

Soumet volonterman avek fason dirize Bondye i fer ki nou tou dan lemonn antye nou ini