Imit Zezi, ansenny avek lanmour

“Personn pa’n zanmen deza koz parey sa zonm.”—ZAN 7:46.

1. Ki mannyer bann dimoun ti reazir anver lafason ki Zezi ti ansennyen?

ZIS mazinen ki degre eksitan i ti dwatet ete pour tann Zezi ansennyen! Labib i donn nou en lide lo lefe ki sa ti annan lo bann dimoun ki ti zwenn li. Par egzanp, Lik, en ekriven Levanzil, ti dir ki bann dimoun Nazaret ti “dan ladmirasyon devan bann parol ekstraordiner ki ti sorti dan son labous.” Matye i montre ki bann dimoun ki ti pe ekout Zezi ler i ti pe ansennyen dan son Sermon lo Montanny, “ti etonnen par mannyer ki i ti ansennyen.” Zan osi ti remarke ki bann zofisye ki ti’n ganny anvoye pour aret Zezi ti retourn lanmen vid, an dizan: “Personn pa’n zanmen deza koz parey sa zonm.”—Lik 4:22; Mat. 7:28; Zan 7:46.

2. Ki metod lansennyman Zezi ti servi?

² Sa bann zofisye pa ti’n tronpe. San okenn dout, Zezi ti vreman sa pli gran Ansenyan ki’n deza egziste. Son lansennyman ti presi, senp e fer sans. I ti byen servi bann legzanp ek kestyon. I ti adapte son lansennyman avek bann dimoun ki i ti koz avek, ki swa zot ti annan bann o pozisyon ouswa zot ti bann dimoun ordiner. Laverite ki i ti ansennyen ti vreman profon, me i ti fasil pour konpran. Me kantmenm sa, pa zis sa bann keksoz ki ti fer Zezi vin sa pli gran Ansenyan.

Lanmour, en kalite vreman enportan

3. Konman en ansenyan, ki mannyer Zezi ti diferan avek bann sef relizye dan son letan?

³ I tre probab ki parmi bann profeser lalwa ek Farizyen, i ti annan bann zonm entelizan ki ti annan sa konnesans ek sa abilite pour ansennyen. Me kwa ki ti fer lafason ki Zezi ti ansennyen vreman diferan avek pour zot? Bann sef relizye dan son letan ti napa lanmour pour bann dimoun ordiner. O kontrer, zot ti mepriz zot e konsider zot konman “bann dimoun modi.” (Zan 7:49) Me Zezi li ti pran pitye pour zot akoz zot ti “fatige e dekouraze parey bann mouton ki ti napa berze.” (Mat. 9:36) I ti dous, annan konpasyon e zantiy. Deplis, bann sef relizye ti napa sa vre lanmour pour Bondye. (Zan 5:42) Me Zezi li ti kontan son Papa e i ti en plezir pour li fer Son lavolonte. Bann sef relizye ti detourn parol Bondye dan zot lavantaz, me Zezi li ti kontan “parol Bondye,” i ti ansenny li, eksplik li, defann li e viv son lavi an armoni avek son prensip. (Lik 11:28) Wi, Kris ti vreman demontre lanmour senser dan tou son aksyon,  dan son lansennyman, lafason i ti tret bann dimoun e enstrir zot.

4, 5. (a) Akoz i enportan pour ansenny avek lanmour? (b) Dan lansennyman, akoz konnesans ek abilite osi i enportan?

⁴ Me nou? Konman bann ki swiv Kris, nou vreman anvi imit li dan nou minister e dan nou lavi. (1 Pyer 2:21) Alor, nou lobzektif i pa zis pour partaz konnesans lo Labib, me osi pour imit bann kalite ki Zeova i annan, sirtou son lanmour. Ki swa nou konn en kantite keksoz oubyen en ptigin ouswa nou annan sa bon abilite pour ansennyen oubyen nou pa tro kalipa, lanmour ki nou demontre pou sirman ed nou pour tous leker bann ki nou pres avek. Nou devret imit Zezi ki ti ansenny avek lanmour si nou vreman anvi vin efikas dan sa travay pour fer disip.

⁵ Byensir, pour vin bann bon ansenyan, nou bezwen konn byen nou size e nou bezwen annan sa abilite pour partaz sa konnesans. Zezi ti ed son bann disip pour devlop tou le de e ozordi Zeova pe ed nou fer sa atraver son lorganizasyon. (Lir Izai 54:13 *; Lik 12:42.) Kantmenm sa, nou devret annan sa bi pour pa zis ansenny avek nou lespri, me osi avek nou leker. Ler konnesans, abilite ek lanmour i travay ansanm, rezilta i kapab vreman satisfezan. Alor, dan ki fason nou kapab demontre lanmour ler nou pe ansennyen? Ki mannyer Zezi ek son bann disip ti fer sa? Annou vwar.

Nou devret kontan Zeova

6. Ki mannyer nou koz lo en dimoun ki nou kontan?

⁶ Nou vreman kontan pour koz lo bann keksoz ki nou kontan. Kan nou koz lo en keksoz ki annan gran valer pour nou, nou eksite e koz lo li avek lantouzyasm ek lazwa. Sa i sirtou vre kan nou koz lo en dimoun ki nou kontan. Labitid nou eksite pour partaz sa ki nou konnen lo sa dimoun avek lezot. Nou loue li, onor li e defann li. Nou fer sa akoz nou anvi ki lezot i apresye sa dimoun ek son bann kalite, parey nou.

7. Lanmour pour Bondye ti pous Zezi pour fer kwa?

⁷ Avan ki nou kapab fer lezot devlop lanmour pour Zeova, nou menm nou devret konn li e kontan li. Apre tou, vre ladorasyon i fonde lo lanmour pour Bondye. (Mat. 22:36-38) Zezi in kit en legzanp parfe. I ti kontan Zeova avek tou son leker, lespri, nanm ek lafors. Zezi ti konn son Papa ki dan lesyel tre byen vi ki i ti’n pas petet plizyer bilyon lannen avek li dan lesyel. Ki lefe sa ti annan? Zezi ti dir: “Mon kontan mon Papa.” (Zan 14:31) Sa lanmour ki Zezi ti annan ti ganny demontre dan tou sa ki i ti dir e fer. Lanmour ti motiv li pour touzour fer bann keksoz ki fer plezir Bondye. (Zan 8:29) Lanmour ti pous li pour denons bann sef relizye ki dan en fason ipokrit ti pe dir ki zot ti reprezant Bondye. Lanmour ti osi pous li pour koz lo Zeova e ed lezot pour aprann konn Bondye e kontan li.

8. Lanmour pour Bondye ti motiv son bann disip pour fer kwa?

⁸ Parey Zezi, son bann disip dan premye syek ti kontan Zeova e sa lanmour ti pous zot pour pres sa bon nouvel avek kouraz ek devouman. Zerizalenm ti ranpli avek zot lansennyman, menm si bann sef relizye ki ti annan gran lotorite ti opoz zot. Sa bann disip ti senpleman pa kapab aret koz lo bann keksoz ki zot ti’n vwar e tande. (Akt 4:20; 5:28) Zot ti konnen ki Zeova ti avek zot e ki i ti pou beni zot. Sanmenm ki i ti fer! Anfet, mwens ki 30 an apre lanmor Zezi, zapot Pol ti kapab ekrir ki sa bon nouvel ti’n ganny prese “dan lemonn antye.”—Kol. 1:23.

9. Ki mannyer nou kapab ogmant nou lanmour pour Bondye?

⁹ Si nou anvi vin bann ansenyan vreman efikas, nou osi nou bezwen fer sir ki nou pe kontinyen ogmant nou lanmour pour Bondye. Ki mannyer nou kapab fer sa? Souvan nou fer sa par kominik avek Bondye dan lapriyer. Nou osi ranforsi nou lanmour pour Bondye par etidye son Parol, lir bann piblikasyon baze lo Labib e asiste renyon. Anmezir nou konn plis lo li, nou  leker pou ranpli avek lanmour pour li. Apre sa, anmezir nou eksprim nou lanmour pour li an parol ek aksyon, lezot dimoun pou remarke e zot kapab ganny atire ver Zeova.—Lir Psonm 104:33, 34. *

Nou devret kontan sa ki nou ansennyen

10. Kwa ki idantifye en bon ansenyan?

¹⁰ Sa ki fer en dimoun en bon ansenyan i ki i kontan sa ki i ansennyen. I bezwen krwar ki i vre, enportan e annan valer. Si en ansenyan i vreman enterese avek sa ki i ansennyen, son lantouzyasm pou evidan e i pou annan en gran lefe lo bann ki i ansennyen. De lot kote, si en ansenyan pa vreman apresye sa ki i ansennyen, ki mannyer i ekspekte son etidyan apresye sa ki i pe tande? Pa zanmen souzestim ou legzanp konman en ansenyan Parol Bondye. Zezi ti dir: “Sak etidyan ki’n ganny byen antrennen pou parey son ansenyan.”—Lik 6:40, The New Berkeley Version in Modern English.

11. Akoz Zezi ti kontan sa ki i ti ansennyen?

¹¹ Zezi ti kontan sa ki i ti ansennyen. I ti konnen ki i ti annan en keksoz presye pour li partaze e sa ti laverite lo son Papa ki dan lesyel, i ti ansenny “parol Bondye” e osi “parol lavi eternel.” (Zan 3:34; 6:68) Parey en lalimyer briyan, laverite ki Zezi ti ansennyen ti ekspoz bann move keksoz e met lanfaz lo sa ki bon. Laverite ti donn lespwar ek rekonfor bann dimoun ki ti annan limilite e ki ti’n ganny tronpe par bann fo sef relizye e osi lo bann ki Dyab ti annan pouvwar lo zot. (Akt 10:38) Lanmour ki Zezi ti annan pour laverite ti ganny demontre dan tou sa ki i ti fer e non pa zis dan son lansennyman.

12. Ki mannyer zapot Pol ti santi konsernan sa bon nouvel?

¹² Parey Zezi, laverite lo Zeova ek Kris ti vreman presye pour son bann disip ki menm bann opozan pa ti kapab dekouraz zot oubyen anpes zot partaz li avek lezot. Pol ti ekrir bann Kretyen Ronm: “Mon annan sa gran dezir pour vin anons zot osi Levanzil . . . Mon pa onte pour anons Levanzil, i en pisans Bondye pour sov tou sa ki kwar.” (Rom. 1:15, 16) Pol ti konsider li en loner pour anons laverite. I ti ekrir: “Bondye in donn mwan sa privilez [“ekstraordiner,” NW] pour anons bann non-Zwif Levanzil larises san limit Kris.” (Efe. 3:8) I pa difisil pour mazin lantouzyasm ki Pol ti annan o firamezir ki i ti ansenny lezot dimoun lo Zeova ek Son bann plan.

13. Ki rezon nou annan pour kontan sa bon nouvel?

¹³ Sa bon nouvel ki ganny trouve dan Parol Bondye i permet nou konn nou Kreater e kontan li bokou. Sa bon nouvel i donn larepons satisfezan pour bann kestyon enportan dan lavi e i annan pouvwar pour transform nou lavi, donn nou lespwar e fortifye nou dan bann moman difisil. Deplis, i donn nou gidans lo konman nou kapab ganny en lavi ki fer sans ki pa pou zanmen fini. Napa okenn konnesans ki pli presye ouswa pli enportan ki sa bon nouvel. I en kado ki annan gran valer ki nou’n gannyen e i donn nou en kantite lazwa. Nou ganny plis lazwa ankor kan nou partaz sa kado avek lezot.—Akt 20:35.

14. Ki mannyer nou kapab ogmant nou lanmour pour sa ki nou ansennyen?

¹⁴ Ki ou kapab fer pour ogmant plis ou lanmour pour sa bon nouvel? Ler ou lir Parol Bondye, arete de tanzantan pour reflesir lo sa ki ou lir. Par egzanp, dan ou lespri, fer krwar ou pe akonpanny Zezi dan son minister lo later ouswa ou pe vwayaz ansanm avek zapot Pol. Fer konmsi ou dan sa nouvo lemonn e imazinen konman lavi pou diferan sa letan. Reflesir lo bann benediksyon ki ou’n gannyen lefet ki ou’n obeir sa bon nouvel. Si ou gard for ou lanmour pour sa bon nouvel, sa bann ki ou ansennyen pou santi sa lanmour. Alor, se pour sa rezon ki nou devret pran byen aker e reflesir o profon lo bann keksoz ki nou’n aprann e fer byen atansyon sa ki nou ansennyen.—Lir 1 Timote 4:15, 16.

 Nou devret kontan lezot

15. Akoz en ansenyan i devret kontan son etidyan?

¹⁵ En bon ansenyan i fer son bann etidyan santi zot alez pour ki zot pou anvi aprann plis e kontan pour eksprim zot lekor. En ansenyan ki annan lanmour i partaz son konnesans akoz i senserman enterese avek son bann etidyan. I adapte son lansennyman dapre zot bezwen ek konprenezon. I pran an konsiderasyon abilite ek sirkonstans son bann etidyan. Kan bann ansenyan i annan sa kalite lanmour, bann etidyan pou remarke, zot pou kontan pour ganny ansennyen e i pou gou pour zot aprann plis.

16. Dan ki fason Zezi ti demontre lanmour pour bann dimoun?

¹⁶ Zezi ti demontre sa kalite lanmour. Lanmour pli for ki i ti demontre ti kan i ti donn son lavi parfe konman en sakrifis pour ki lezot ti pou kapab ganny sove. (Zan 15:13) Pandan son minister, Zezi ti touzour pare pour ed bann dimoun fizikman, me sirtou spirityelman. Olye ekspekte bann dimoun vin kot li, i ti vwayaz plizyer santenn kilomet apye pour partaz sa bon nouvel avek zot. (Mat. 4:23-25; Lik 8:1) I ti annan pasyans e i ti konpran zot. Kan son bann disip ti merit ganny disiplinen, i ti koriz zot avek lanmour. (Mark 9:33-37) I ti ankouraz zot par eksprim son konfyans ki zot ti pou vin bann predikater efikas sa bon nouvel. Napa personn apard Zezi ki’n annan plis lanmour konman en ansenyan. Sa lanmour ki i ti demontre anver son bann disip ti pous zot pour kontan li an retour e obeir son bann komannman.—Lir Zan 14:15.

17. Ki mannyer bann disip Zezi ti demontre lanmour pour lezot?

¹⁷ Parey Zezi, son bann disip ti demontre en profon lanmour ek lafeksyon pour bann dimoun ki zot ti pres avek. Zot ti rann temwannyaz avek lezot dimoun e reisi pres sa bon nouvel, menm si zot ti ganny persekite e menm riske zot lavi. Pa zot ti vreman annan en gran lafeksyon pour bann dimoun ki zot ti ede spirityelman! Parol zapot Pol i vreman tousan, i ti dir: “Nou’n montre labonte parmi zot. Nou ti montre nou konman en manman, ki pran swen son zanfan. Akoz nou lafeksyon pour zot nou ti pare pour anons zot non selman Levanzil Bondye me osi donn menm nou prop lavi pour zot akoz nou lanmour pour zot ti gran.”—1 Tesa. 2:7, 8.

18, 19. (a) Akoz nou volonterman pare pour fer sakrifis pour akonplir sa travay predikasyon? (b) Donn en legzanp pour montre ki lezot dimoun i remark lanmour ki nou demontre.

¹⁸ Pareyman, dan nou letan, Temwen Zeova pe prese dan lemonn antye pour rod bann dimoun ki vreman anvi konn Bondye e servi li. Anfet, pandan sa 17 lannen konsekitif, nou’n pas plis ki en bilyon erdtan tou le-z-an dan sa travay predikasyon e fer disip e nou ankor pe kontinyen fer li. Nou fer li volonterman,  menm si nou bezwen sakrifye nou letan, lenerzi ek resours materyel pour fer sa travay predikasyon. Parey Zezi, nou konpran ki nou Papa lanmour ki dan lesyel i anvi ki tou dimoun i ganny sa konnesans ki anmenn ver lavi eternel. (Zan 17:2, 3; 1 Tim. 2:3, 4) Lanmour i pous nou pour ed bann ki annan leker senser pour aprann konn Zeova e kontan li parey nou.

¹⁹ Lezot dimoun i remarke sa lanmour ki nou demontre. Par egzanp, en ser pionye Leta-z-ini i ekrir let pour rekonfort bann dimoun ki’n perdi en dimoun ki zot kontan dan lanmor. Pour reponn li, en msye ti ekrir: “Mon ti vreman sirprann o konmansman ki en dimoun ti’n met sitan zefor pour ekrir en enkoni en let, pour ed li siport sa bann moman difisil. Pour konklir, mon zis kapab dir ki ou annan lanmour pour ou prosen e lanmour pour sa Bondye ki gid dimoun lo semen lavi.”

20. Ki degre enportan i enportan pour ansenny avek lanmour?

²⁰ I’n ganny dir ki kan lanmour ek abilite i mars ansanm, ou kapab ekspekte en keksoz ekstraordiner. Dan nou lansennyman, nou anvi ed nou bann etidyan pour devlop en lespri ki konn Zeova ek en leker ki kontan li. Wi, pour vin bann ansenyan efikas, nou bezwen annan lanmour pour trwa keksoz, lanmour pour Bondye, lanmour pour laverite ek lanmour pour lezot. Anmezir nou devlop sa kalite lanmour e demontre li dan nou minister, nou pa pou zis eksperyans sa lazwa pour donnen, me nou pou osi trouv satisfaksyon pour konnen ki nou pe imit Zezi e fer plezir Zeova.

[Not anba lo paz]

Ki ou pou reponn?

• Anmezir nou ansenny lezot dimoun sa bon nouvel, akoz i enportan pour annan . . .

lanmour pour Bondye?

lanmour pour sa ki nou ansennyen?

lanmour pour bann dimoun ki nou ansennyen?

[Kestyon]

[Portre lo paz 17]

Kwa ki ti fer fason ansennyen Zezi diferan avek pour bann profeser lalwa ek Farizyen?

[Portre lo paz 20]

Bon lansennyman i demann konnesans, abilite e sirtou lanmour