“Vini e swiv mwan”
“Vini e swiv mwan”
“Si en dimoun i oule swiv mwan, fodre ki i aret mazin zis li[ ]menm e pran son [“poto martir,” NW] sak zour e swiv mwan.”—LIK 9:23.
1, 2. (a) Ki lenvitasyon Zezi ti ofer avek labonte? (b) Ki mannyer ou’n reazir anver lenvitasyon Zezi?
VER lafen son minister lo later, Zezi ti rann temwannyaz Pere, en rezyon lo lot kote larivyer Zourden, les avek Zide. En zennonm ti apros li e demann li ki i ti devret fer pour ganny lavi eternel. Apre ki i ti’n realize ki sa zennonm ti pe obeir fidelman sa ki Lalwa Moiz ti demande, i ti dir li en keksoz vreman spesyal: “Ale, vann tou sa ki ou annan e donn bann pov, e ou ava ganny en trezor dan lesyel; apre vini e swiv mwan.” (Mark 10:21) Zis mazinen, sa ti en lenvitasyon pour swiv Zezi, sa sel Garson Bondye Tre O!
2 Sa zennonm ti rezet sa lenvitasyon, me lezot ti aksepte. Pli boner, Zezi ti’n dir Filip: “Swiv mwan.” (Zan 1:43) Filip ti aksepte e plitar i ti vin en zapot. Zezi ti envit Matye osi e li osi i ti aksepte. (Mat. 9:9; 10:2-4) Sirman, Zezi ti ofer sa menm lenvitasyon avek tou bann ki kontan ladrwatir kan i ti dir: “Si en dimoun i oule swiv mwan, fodre ki i aret mazin zis li[ ]menm e pran son [“poto martir,” NW] sak zour e swiv mwan.” (Lik 9:23) Alor, nenport ki i kapab swiv Zezi si i vreman anvi. Eski ou annan sa dezir? Laplipar nou i’n fini aksepte sa lenvitasyon ki Zezi ti fer avek labonte e dan predikasyon nou envit lezot osi.
3. Ki mannyer nou kapab evite ganny antrennen pour aret swiv Zezi?
3 Me malerezman serten parmi bann ki montre en lentere dan laverite ki sorti dan Labib pa kontinyen etidye. O kontrer, zot ralanti e finalman zot les zot “ganny antrennen” e zot aret swiv Zezi. (Ebr. 2:1) Ki mannyer nou kapab evit sa latrap? Nou kapab demann nou lekor: ‘Pour ki rezon mon swazir pour swiv Zezi? Ki savedir swiv Zezi?’ Si nou gard larepons pour sa de kestyon antet, sa pou ed nou ogmant nou determinasyon pour kontinyen reste lo sa bon semen ki nou’n swazir. Ankouraz lezot pour swiv Zezi pou osi ed nou.
Akfer swiv Zezi?
4, 5. Akoz Zezi i kalifye pour dirize?
4 Profet Zeremi ti dir:“Mon konnen, O Zeova, ki semen en imen i pa pour li. I pa pour en imen ki pe marse pour diriz son lepa.” (Zer. 10:23) Listwar in prouve ki parol Zeremi i vre. I’n vin deplizanpli evidan ki bann imen enparfe pa pou reisi domin zot lekor. Nou’n aksepte sa lenvitasyon pour swiv Zezi parski napa okenn imen ki ti pou kapab pli kalifye ki li pour vin nou Lider. Egzamin serten bann kalifikasyon Zezi.
5 Premyerman, Zeova li menm ti swazir Zezi konman Mesi ki osi sa Lider. Lekel ki konn pli byen ki nou Kreater ki sennla i pou apwente konman Lider pour nou? Dezyenmman, Zezi i annan bann kalite ki nou kapab admire e imite. (Lir Izai 11:2, 3. *) I en legzanp parfe. (1 Pyer 2:21) Trwazyenmman, Zezi i senserman enterese avek bann dimoun ki swiv li, zis parey i ti montre kan i ti donn son lavi pour zot. (Lir Zan 10:14, 15.) I osi montre ki i en berze ki vreman enterese avek son mouton, anmezir ki i gid nou ver en lavi ki anmenn boner la konmela e ki anmenn ver en lavenir eternel e briyan. (Zan 10:10, 11; Rev. 7:16, 17) Pour bann tel rezon e plizyer lezot ankor, nou’n fer en desizyon saz kan nou’n swazir pour swiv Zezi. Me swiv Zezi i enplik kwa?
6. Swiv Zezi i enplik kwa?
6 Swiv Zezi i enplik plis ki zis apel nou lekor en Kretyen. Denozour apepre de bilyon dimoun i dir ki zot Kretyen, me zot aksyon i montre ki zot bann dimoun ki “pratik lemal.” (Lir Matye 7:21-23.) Kan bann dimoun i enterese avek sa lenvitasyon pour swiv Zezi, nou eksplik zot ki dan zot lavi tou le zour bann vre Kretyen i viv zot lavi antye an armoni avek lansennyman ek legzanp Zezi. Pour donn en legzanp lo ki sa i vedir, egzamin serten keksoz ki nou konnen lo Zezi.
Imit legzanp lasazes Zezi
7, 8. (a) Ki si sa lasazes e akoz Zezi ti annan en kantite sa kalite? (b) Ki mannyer Zezi ti demontre ki i ti annan lasazes e ki mannyer nou kapab imit li?
7 Zezi ti demontre plizyer kalite remarkab, me nou pou konsantre zis lo kat: son lasazes, son limilite, son devouman ek son lanmour. Premyerman, egzamin son lasazes, setadir son abilite pour aplik son konnesans ek konprenezon. Zapot Pol ti ekrir: “Dan [Zezi] in [ganny] kasyet tou bann trezor lasazes ek konnesans.” (Kol. 2:3) Kote Zezi ti ganny sa kalite lasazes? Li menm i ti dir: “Mon dir zis sa ki mon Papa in dir mwan dir.” (Zan 8:28) Zeova ki ti donn li lasazes, alor nou pa sirprann ki Zezi pou ziz dan en fason zis.
8 Par egzanp, Zezi ti servi bon zizman pour swazir sa ki i ti pou fer dan son lavi. I ti deside pour viv en lavi senp e konsantre lo zis en sel keksoz setadir fer lavolonte Bondye. Avek lasazes i ti depans son letan ek lenerzi pour promot lentere Rwayonm. Nou swiv legzanp Zezi par fer bokou zefor pour viv en lavi senp e evite trakas nou avek bann keksoz ki pa enportan, bann keksoz ki kapab pran tou nou latansyon ek lenerzi. (Mat. 6:22) Bokou Kretyen in fer bann pa pour senplifye zot lavi pour ki zot kapab pas plis letan dan minister Kretyen. Serten in menm kapab konmans fer servis pionye. Si ou enn parmi zot, nou felisit ou senserman. “Rod plito Rwayonm Bondye” i anmenn bokou lazwa ek satisfaksyon.—Mat. 6:33.
Demontre limilite parey Zezi
9, 10. Ki mannyer Zezi ti demontre ki i ti annan limilite?
9 Limilite i dezyenm laspe dan personnalite Zezi ki nou pou egzaminen. Kan bann imen enparfe i annan lotorite, souvandfwa zot devlop en latitid kot zot krwar ki zot ki pli siperyer. Pa sa i vreman diferan avek Zezi! Malgre i annan en pozisyon vreman enportan pour akonplir plan Zeova, Zezi pa ti demontre okenn latitid orgeye. Nou ganny ankouraze pour imit li dan sa domenn. Zapot Pol ti ekrir: “Posed sa menm santiman ki ti dan Kris-Zezi. Menm ki i ti posed natir Bondye i pa ti [“anvi,” NW] ran egal avek Bondye. Me, o[ ]kontrer, par son prop volonte, i ti renons tou sa ki i posede pour pran kondisyon lesklav. I ti pran natir imen.” (Fili. 2:5-7) Ki sa ti enplike?
10 Zezi ti kontan sa privilez merveye pour reste dan prezans son Papa dan lesyel, me i ti volonterman pare pour “renons tou sa ki i posede.” Son lavi ti ganny transfer dan matris en vyerz Zwif pour li devlope pandan nef mwan ziska ki i ne konman en zanfan san defans dan lakaz en senp sarpantye. Dan lakaz Zozef, ptitapti Zezi ti grandi sorti en pti baba, pour vin en pti garson e apre sa en adolesan. I pa ti fer okenn pese. Pourtan, pandan son zenes i ti soumet avek son paran enparfe ki ti fer pese. (Lik 2:51, 52) Pa sa i en legzanp ekstraordiner lo limilite!
11. Dan ki fason nou kapab imit limilite Zezi?
11 Nou imit limilite Zezi kan nou volonterman aksepte bann latas ki kapab paret enferyer. Konman en legzanp, egzamin sa travay pour pres sa bon nouvel. Sa travay i kapab paret enferyer, sirtou kan bann dimoun pa montre okenn lentere, sikann nou ouswa opoz nou. Parkont, si nou persiste dan sa travay, nou ed lezot pour reazir anver sa lenvitasyon pour swiv Zezi e dan sa fason, nou ede sov lavi. (Lir 2 Timote 4:1-5) En lot legzanp i konsernan travay mentenir Lasal Rwayonm. Sa i kapab enplik bann travay parey zet bin, pas mop ater e netway kabinen, tousala i bann latas ki demann limilite. Kantmenm sa, nou rekonnet ki mentenir nou Lasal Rwayonm setadir landrwa kot vre ladorasyon i ganny fer dan nou teritwar, i form parti nou servis sakre. Si nou volonterman konplet nou latas ki kapab paret enferyer, nou montre ki nou annan limilite e dan sa fason nou pe swiv lepa Kris.
Annou devoue, parey Zezi
12, 13. (a) Ki mannyer Zezi ti demontre son devouman e kwa ki ti motiv li? (b) Kwa ki pou motiv nou pour nou devoue dan nou minister?
12 Egzamin devouman Zezi dan son minister. Kan i ti lo later Zezi ti fer bokou keksoz. Ler i ti en zennonm, i posib ki i ti travay avek son papa sonnyen Zozef konman en sarpantye. Pandan son minister Zezi ti fer en kantite mirak, enkli geri bann malad e resisit bann mor. Me travay prensipal ki i ti fer ti pres sa bon nouvel e ansenny bann ki ti pare pour ekoute. (Mat. 4:23) Konman son bann disip, nou annan sa menm travay pour fer. Ki mannyer nou kapab swiv son legzanp? Par egzanp, nou kapab fer sa travay pour sa menm rezon ki Zezi ti fer li.
13 Pli enportan ankor, lanmour pour Bondye ti motiv Zezi pour prese e ansennyen. Me Zezi ti osi kontan sa laverite ki i ti ansennyen. Pour li sa bann laverite ti parey bann trezor presye e i ti vreman anvi partaz zot avek lezot. Konman bann ansennyan ki osi ansenny an piblik, nou santi parey. Zis mazin serten parmi sa bann laverite presye ki nou’n aprann dan Parol Bondye! Nou annan en konnesans lo sa kestyon konsernan drwa Bondye konman souvren e ki mannyer i pou ganny regle. Nou menm konpran sa ki Labib i ansennyen lo kondisyon bann dimoun mor ek benediksyon ki pou vini anba nouvo lemonn Bondye. Ki swa nou fek aprann sa bann laverite ouswa nou ti aprann zot depi byen lontan, zot pa zanmen perdi valer. Ki swa zot nef ouswa vye, sirman sa bann laverite i bann trezor presye. (Lir Matye 13:52.) Ler nou pres avek lantouzyasm nou ansenny lezot sa lanmour ki nou annan pour sa ki Zeova in ansenny nou.
14. Ki mannyer nou kapab imit lafason Zezi ti ansennyen?
14 Remarke osi, ki mannyer Zezi ti ansennyen. I ti toultan servi Lekritir avek bann ki ti pe ekout li. Souvan i ti entrodwir en pwen enportan par dir: “Dan Lekritir i’n dir,” ouswa “I’n ekri[r] dan Lekritir.” (Mat. 4:4; 21:13) Dan son bann parol ki’n ganny rikorde, i ti sit direkteman ouswa refer endirekteman avek plis ki lanmwatye parmi bann liv dan Lekritir Ebre. Parey Zezi, nou depan antyerman lo Labib dan nou minister e nou vreman anvi servi Labib kan i posib. Dan sa fason nou ed bann dimoun senser pour vwar pour zot menm ki nou pe ansenny bann panse Bondye e non pa sa ki pour nou. Pa nou vreman kontan kan en dimoun i dakor pour lir sa ki dan Labib e diskit valer ek sinifikasyon Parol Bondye! Nou annan plis lazwa ankor kan sa bann dimoun i aksepte sa lenvitasyon pour swiv Zezi.
Swiv Kris i vedir kontan lezot
15. Ki kalite remarkab Zezi i annan e ki lefe i kapab annan lo nou kan nou reflesir lo la?
15 Dernyen laspe dan personnalite Zezi ki nou pou diskite i pli tousan e sa i son lanmour pour lezot dimoun. Zapot Pol ti ekrir: “Lanmour Kris i kontrol nou.” (2 Kor. 5:14) Kan nou reflesir lo sa lanmour ki Zezi i annan pour limanite an zeneral e pour nou endividyelman, sa i tous nou leker e pous nou pour swiv son legzanp.
16, 17. Dan ki fason Zezi ti demontre son lanmour pour lezot?
16 Ki mannyer Zezi ti demontre lanmour pour lezot? Lefet ki i ti pare pour donn son lavi pour bann imen, sa i montre ki i ti vreman annan en gran lanmour. (Zan 15:13) Me pandan son minister, Zezi ti osi demontre son lanmour dan plizyer fason. Par egzanp, i ti annan konpasyon pour bann ki ti pe soufer. Kan i ti vwar Mari ek lezot dimoun ki ti pe plere akoz lanmor Lazar, i ti ganny touse par zot sagrinasyon. Menm si i ti pe al resisit Lazar, Zezi ti sitan ganny touse ki i ti “plere.”—Zan 11:32-35.
17 O konmansman son minister, en lepre ti apros Zezi e dir: “Si ou oule ou kapab pirifye mwan.” Ki ti reaksyon Zezi? Sa resi i dir: “Zezi ti pran pitye pour li.” Apre sa i ti fer en keksoz ekstraordiner. “I ti avans son lanmen e tous li an dizan, ‘Mon oule[,] ganny pirifye.’ Deswit lalep ti disparet lo sa zonm. I ti’n geri.” Anba Lalwa Moiz, bann lepre ti enpir e Zezi ti’n sirman kapab geri sa zonm san ki i ti tous li. Me pourtan, anmezir ki Zezi ti geri sa lepre i ti permet li resanti ki en lot dimoun ti pe tous li, petet pour premye fwa apre plizyer lannen. Pa sa i en zoli aksyon ki demontre konpasyon!—Mark 1:40-42.
18. Ki mannyer nou kapab demontre “menm santiman” anver lezot?
18 Konman bann ki swiv Kris, nou ganny demande pour demontre lanmour par annan “menm santiman” setadir montre ki nou konpran santiman lezot. (1 Pyer 3:8) I kapab pa fasil pour konpran santiman en frer ouswa ser Kretyen ki pe soufer avek en maladi kronik ouswa en gran depresyon, sirtou si nou menm nou pa’n zanmen eksperyans sa bann keksoz. Kantmenm sa, Zezi ti montre ki i ti konpran bann ki ti malad menm si li i pa ti zanmen malad. Ki mannyer nou osi nou kapab montre ki nou konpran lezot? Par ekout avek pasyans kan lezot i devid zot leker avek nou. Nou osi kapab demann nou lekor, ‘Si mon ti dan zot sityasyon, ki mannyer mon ti pou santi?’ Si nou devlop sansibilite anver santiman lezot nou pou pli kapab “koz dan en fason konsolan avek bann ki dan depresyon.” (1 Tesa. 5:14, NW) Dan sa fason nou pe swiv Kris.
19. Dan ki fason legzanp Zezi i annan lefe lo nou?
19 Pa i vreman enteresan pour etidye lo parol ek aksyon Zezi Kri! Pli nou aprann keksoz lo li, pli nou anvi vin parey li e pli nou pou anvi ed lezot pour fer parey. Alor, annou fer tou sa ki nou kapab pour trouv lazwa an swivan Mesi sa Lerwa, la konmela e pour touzour!
[Not anba lo paz 8]
^ par. 5 Izai 11:2, 3: “E lespri Zeova pou bezwen repoz lo li, lespri lasazes ek konprenezon, lespri konsey ek lafors, lespri konnesans ek lakrent pour Zeova. Son plezir pou dan lakrent pour Zeova. E i pa pou ziz selman dapre sa ki son lizye i vwar, e ni koriz zis dapre sa ki son zorey i tande.”
Eski ou kapab eksplike?
• Ki mannyer nou kapab demontre lasazes parey Zezi?
• Dan ki fason nou kapab demontre limilite?
• Ki mannyer nou kapab devlop devouman pour nou minister?
• Dan ki fason nou kapab imit lanmour ki Zezi ti annan pour lezot?
[Kestyon]
[Box/Picture on page 5]
EN LIV KI ED NOU IMIT KRIS
Pandan progranm lasanble distrik 2007, en liv 192 paz ki annan pour tit “Come Be My Follower” an Angle ti ganny lanse. Sa liv in ganny fer pour ed bann Kretyen pour konsantre lo Zezi, sirtou lo son bann kalite ek aksyon. Apre sa de sapit lentrodiksyon, premye seksyon i donn en apersi lo bann kalite remarkab ki Zezi i annan setadir son limilite, kouraz, lasazes, lobeisans ek landirans.
Apre sa, i annan bann seksyon lo bann aktivite Zezi konman en ansennyan e en predikater sa bon nouvel e osi lo diferan fason ki son lanmour ti ganny demontre. Dan sa liv, bann lenformasyon i ganny prezante dan en fason ki i pou ed en Kretyen pour imit Zezi.
Nou asire ki sa piblikasyon pou motiv nou tou pour egzamin nou lekor e demande: ‘Eski mon pe vreman swiv Zezi? Ki mannyer mon kapab swiv li pli byen?’ I pou osi ed ‘tou bann ki annan sa bon kondisyon leker pour lavi eternel’ pour vin bann dimoun ki swiv Zezi.—Akt 13:48, NW.