Ou pa konnen kote i pou reisi!
Ou pa konnen kote i pou reisi!
“Dan bomaten senm ou lagrenn e ziska aswar pa les ou lanmen repoze; parski ou pa konnen kote i pou reisi.”—EKLE. 11:6.
1. Akoz ler en plant i grandi, i vreman ekstraordiner e akoz en fermye i bezwen annan limilite?
EN FERMYE i bezwen pasyan. (Zak 5:7) Letan i’n fini senm son lagrenn, i bezwen espere ziska i zermen e grandi. Avek letan ler bann kondisyon i favorab, sa lagrenn pou zermen e sorti dan later. I pou vin en plant ki pou raport bann lagrenn li osi. Finalman, sa fermye pou bezwen rekolte dan son plantasyon. I vreman ekstraordiner pour vwar ki mannyer en plant i devlope koumsa! Avek limilite osi, nou realize lekel ki fer pouse. Nou kapab pran swen avek sa plant par donn langre ek delo. Me selman Bondye ki kapab fer pouse.—Konpar 1 Korentyen 3:6.
2. Ki Zezi ti ansennyen lo devlopman en dimoun ki vin en disip dan sa de parabol ki nou ti etidye dan lartik avan?
2 Parey nou ti vwar dan sa lartik avan, Zezi ti konpar predikasyon lo Rwayonm avek en fermye ki senm lagrenn. Dan parabol lo sa diferan kalite later, Zezi ti met lanfaz lo lefet ki menm si sa fermye i senm bann bon lagrenn, me se kondisyon leker sa dimoun ki pou fer sa lagrenn arive mir oubyen non. (Mark 4:3-9) Dan parabol sa senmer ki pe dormi, Zezi ti montre ki sa fermye pa konpran konpletman ki mannyer en dimoun i arive vin en disip. Sa i akoz se pwisans Bondye ki fer pouse, pa zefor bann imen. (Mark 4:26-29) Aprezan annou konsider trwa lezot parabol Zezi, sa i parabol lagrenn moutard, lelven ek lasenn pwason. *
Parabol lagrenn moutard
3, 4. Parabol lagrenn moutard i met lanfaz lo ki laspe predikasyon Rwayonm?
3 Parabol lagrenn moutard ki’n ganny rikorde dan Mark sapit 4 i met lanfaz lo de keksoz: premyerman, sa ogmantasyon ekstraordiner lo lakantite dimoun ki byen resevwar sa mesaz Rwayonm e dezyenmman, ki mannyer bann ki aksepte sa mesaz i ganny proteze. Zezi ti dir: “Avek kwa nou pou kapab konpar Rwayonm Bondye, e par lekel parabol nou pou reprezant li? I parey en lagrenn moutard ki pli pti lagrenn dan lemonn, me kan en dimoun i plant li dan later i grandi e i vin pli gran ki tou bann plant dan zarden. I donn bann gran brans kot bann zwazo dan lesyel i kapab fer zot nik anba son lonbraz.”—Mark 4:30-32.
4 Sa parabol i montre ki mannyer “Rwayonm Bondye” i progrese e sa i evidan atraver lafason ki predikasyon in propaze e ki mannyer kongregasyon Kretyen in devlope apartir Lapannkot lannen 33 N.L. En lagrenn moutard i vreman ptipti e sa i kapab reprezant en keksoz ki vreman pti. (Konpar Lik 17:6.) Me finalman, en pye moutard i kapab ariv en oter 3 a 5 met avek bann gro brans ki nou kapab dir i preski menm groser avek en pye dibwa.—Mat. 13:31, 32.
5. Ki progre kongregasyon Kretyen dan premye syek ti eksperyanse?
5 Devlopman kongregasyon Kretyen ti konmanse avek en pti group 120 disip ki ti resevwar lespri sen dan lannen 33 N.L. Selman, i pa ti pran bokou letan pour sa pti kongregasyon annan plizyer milye disip. (Lir Akt 2:41; 4:4; 5:28; 6:7; 12:24; 19:20.) Lakantite dimoun ki ti pran par dan travay rekolt ti’n telman ogmante ki apepre 30 an pli tar zapot Pol ti kapab dir kongregasyon Kolos ki sa bon nouvel ti’n ganny “anonse avek tou dimoun dan lemonn antye.” (Kol. 1:23) Pa sa ti en gran progre!
6, 7. (a) Ki progre in annan depi 1914? (b) Ki progre pou annan alavenir?
6 Depi ler Rwayonm Bondye in ganny etabli dan lesyel an 1914, bann brans sa pye moutard in devlop dan en fason ki nou pa ti ekspekte. Pep Bondye in vwar profesi Izai pe ganny realize kot i ti dir: “Sa enn ki pti pou vin en milye, e sa enn ptipti en nasyon pwisan.” (Iza. 60:22) Sa pti group Kretyen swazir ki ti partisip dan travay predikasyon o konmansman 20 tyenm syek pa ti mazinen ki an 2008 ti pou annan apepre 7 milyon Temwen ki ti pou partisip dan sa travay dan plis ki 230 pei. Sa progre ekstraordiner i konparab avek sa ki parabol Zezi i dir konsernan lagrenn moutard.
7 Me eski sa progre pou aret lanmenm? Non. Bann ki anvi viv anba dominasyon Rwayonm Bondye pou finalman ranpli later. Tou bann lennmi pou’n ganny detrir. Sa pa pou arive gras a bann zefor imen me plito akoz Souvren Senyer Zeova pou entervenir dan bann zafer imen. (Lir Danyel 2:34, 35.) Alor nou pou vwar realizasyon final en lot profesi Izai: “Later pou vreman ranpli avek konnesans Zeova zis parey delo i kouver lanmer.”—Iza. 11:9.
8. (a) Ki bann zwazo dan parabol Zezi i reprezante? (b) Kont kwa nou ganny proteze konmela menm?
8 Zezi ti dir ki bann zwazo i kapab kasyet anba lonbraz sa Rwayonm. Sa bann zwazo pa reprezant bann lennmi Rwayonm ki esey manz bann bon lagrenn, parey ti leka avek sa bann zwazo dan parabol sa zonm ki senm lo diferan kalite later. (Mark 4:4) O kontrer dan sa parabol, sa bann zwazo i reprezant bann dimoun drwat ki rod proteksyon dan kongregasyon Kretyen. Menm konmela, sa bann dimoun i ganny proteze avek bann move labitid ki kapab andomaz zot spirityalite e osi avek bann pratik koronpi sa lemonn mesan. (Konpar Izai 32:1, 2.) Lo menm laliny, Zeova ti konpar Rwayonm Bondye dan lanmen Kris avek en pye dibwa e i ti profetize: “Lo sa gro montanny Izrael mon pou replant li, e vreman son bann brans pou pouse e raport fri e vin en pye sed enpresyonan. Tou sort kalite zwazo pou vreman reste anba li; zot pou reste anba lonbraz son bann fey.”—Ezek. 17:23.
Parabol lelven
9, 10. (a) Ki sa pwen ki Zezi ti met lanfaz lo la dan sa parabol lo lelven? (b) Dan Labib, ki lelven i souvan reprezante e ki kestyon konsernan lelven nou pou konsidere?
9 Devlopman en keksoz pa touzour vizib pour bann imen. Dan sa parabol, Zezi ti met lanfaz lo sa pwen. I ti dir: “Rwayonm lesyel i parey lelven ki en madanm i pran e melanz avek 25 kilo lafarin e fer lapat antye monte.” (Mat. 13:33) Ki sa lelven i reprezante e ki mannyer i relye avek progre predikasyon Rwayonm?
10 Dan Labib, lelven i souvan reprezant pese. Zapot Pol ti mansyonn lelven dan sa fason ler i ti pe koz lo move lenfliyans ki en peser ti annan dan kongregasyon Korent. (1 Kor. 5:6-8) Eski Zezi ti pe servi lelven pour montre ki en keksoz negatif ti pe devlope?
11. Ki mannyer lelven ti ganny servi dan lepok Izrael?
11 Avan nou reponn sa kestyon, nou bezwen pran an konsiderasyon trwa keksoz debaz. Premyerman, menm si Zeova pa ti permet ki zot servi lelven dan lepok Lapak, dan lezot moman, i ti aksepte bann sakrifis ki ti annan lelven ladan. Lelven ti ganny servi dan bann sakrifis konminyon, kot sa dimoun ti ofer volonterman sa lofrann pour remersye Zeova pour son benediksyon. Zot ti manz sa repa dan lazwa.—Lev. 7:11-15.
12. Ki nou kapab aprann atraver lafason ki Labib i servi bann senbol?
12 Dezyenmman, menm si en keksoz i ganny prezante dan en fason negatif dan Labib, i kapab ganny servi dan en fason pozitif dan en lot verse. Par egzanp, dan 1 Pyer 5:8, Satan i ganny konpare avek en lyon akoz i danzere e visye. Me dan Revelasyon 5:5, Zezi i ganny konpare avek en lyon, sa “Lyon Tribi Zida.” Dan sa ka, lyon i reprezant kouraz ek lazistis.
13. Ki parabol Zezi lo lelven i montre lo progre spirityel?
13 Trwazyenmman, dan parabol Zezi, i pa ti dir ki lelven ti gat tou sa lapat ki finalman zot pa ti kapab servi li. I ti pe senpleman refer avek lafason normal ki dimoun i fer dipen. Se sa madanm ki ti met lelven ekspre dan son lapat e son rezilta ti bon. Sa lelven ti kasyet dan tou sa lapat. Alors, sa madanm pa ti kapab vwar ki mannyer sa lelven ti travay pour fer sa lapat monte. Sa i fer nou mazin sa zonm ki senm lagrenn e ki dormi aswar. Zezi ti dir ki “bann lagrenn i zermen e grandi tousel,” sa zonm pa konnen konman sa i arive. (Mark 4:27) Pa sa i en fason senp pour montre ki mannyer progre spirityel i arive! Petet o konmansman, nou pa vwar sa progre, me finalman son rezilta i vin evidan. (Mark 4:27)
14. Ki laspe predikasyon ki ganny met lanfaz lo la par lefet ki lelven i fer monte tou sa lapat?
14 Sa progre pa vizib dan lizye imen, me i osi annan en lefe partou dan lemonn. Sa i en lot laspe sa parabol lo lelven. Sa lelven i fer monte tou sa lapat ki “trwa mezir lafarin.” (Lik 13:21) Parey lelven, gras a predikasyon Rwayonm, i’n annan bokou nouvo disip ki’n konmans anons sa bon nouvel Rwayonm, finalman predikasyon in ganny prese dan “bann landrwa pli elwannyen lo later.” (Akt 1:8; Mat. 24:14) Pa i en zoli privilez pour nou partisip dan sa progre eksepsyonnel sa predikasyon lo Rwayonm.
Lasenn pwason
15, 16. (a) Rakont an bref parabol lasenn pwason. (b) Ki sa lasenn i reprezante e ki laspe devlopman predikasyon Rwayonm sa parabol i koz lo la?
15 Pli enportan ki lakantite ki pretann ki zot bann disip Zezi Kri se ki kalite disip zot ete. Zezi ti koz lo sa laspe sa progre dan predikasyon Rwayonm letan i ti donn en lot parabol lo en lasenn pwason. I ti dir: “Rwayonm lesyel i parey en lasenn ki’n ganny zete dan lanmer kot tou kalite pwason i pri ladan.”—Mat. 13:47.
16 Sa lasenn i reprezant travay predikasyon ki anmas tou sort kalite pwason. Zezi ti osi dir: “Kan lasenn i plen, peser i redi li ater e i asize pour triy pwason. Bann ki bon i met dan en pannyen e bann ki pa bon i zete. [“Konklizyon sa sistenm,” NW] pou parey. Bann lanz pou vini e separ bann ki move avek bann ki bon. Bann ki move i ganny zete dan fourno dife. La kot pou annan plere e grensman ledan.”—Mat. 13:48-50.
17. Kan ki sa separasyon ki’n ganny mansyonnen dan parabol lasenn pwason i arive?
17 Eski sa travay separasyon pe refer avek zizman final bann mouton ek kabri ki Zezi ti dir pou arive ler i vini dan son laglwar? (Mat. 25:31-33) Non. Sa zizman final pou arive pandan gran ladetres ler Zezi pou vini. Parkont, sa separasyon ki ganny mansyonnen dan parabol lasenn pwason i arive pandan “konklizyon sa sistenm.” * Sa i sa letan ki nou pe viv ladan ki zis avan sa gran ladetres. Alor ki mannyer sa travay separasyon pe deroule?
18, 19. (a) Ki mannyer sa travay separasyon pe ganny fer ozordi? (b) Ki bann dimoun senser i bezwen fer? (Vwar osi sa not anba lo paz 21.)
18 Plizyer milyon pwason senbolik in sorti dan lanmer setadir limanite e zot in ganny atire ver kongregasyon Zeova dan nou letan. Serten i asiste Memoryal, lezot i vin nou bann renyon e lezot ankor i kontan etidye Labib avek nou. Me eski sa i vedir ki zot bann vre Kretyen? Peser in “redi zot ater,” me Zezi i dir nou ki selman “bann ki bon” ki ganny mete dan bann pannyen ki reprezant bann kongregasyon Kretyen. Bann ki pa bon i ganny zete e pli tar zot pou ganny mete dan fourno dife senbolik ki reprezant destriksyon fitir.
19 Parey sa bann move pwason, bokou ki ti etidye Labib dan lepase avek pep Zeova in aret etidye. Serten ki zot paran i Kretyen pa’n zanmen annan sa dezir pour vin bann disip Zezi. Zot pa’n anvi fer sa desizyon pour servi Zeova ouswa zot in aret servi Zeova apre en serten letan. * (Ezek. 33:32, 33) Selman, i neseser ki tou bann ki annan leker senser i les zot ganny rasanble ansanm dan sa bann pannyen oubyen kongregasyon avan zizman final e ki zot reste an sekirite.
20, 21. (a) Ki nou’n aprann par revwar bann parabol Zezi? (b) Ki ou determinasyon?
20 Alors, ki nou’n aprann atraver sa pti revizyon konsernan bann parabol Zezi? Premyerman, parey lagrenn moutard, i’n annan en tre gran progre dan predikasyon Rwayonm lo later. Napa nanryen ki kapab anpes travay Zeova propaze! (Iza. 54:17) Deplis, i annan en proteksyon spirityel pour bann ki’n rod landrwa kasyet ‘anba lonbraz’ sa pye. Dezyenmman, se Bondye ki fer pouse. Zis parey lelven i kasyet dan tou sa lapat, progre travay predikasyon pa’n toultan evidan ouswa remarkab o konmansman, me i annan rezilta toudmenm. Trwazyenmman, pa tou sa ki’n ekoute ki vin en vre disip Zezi. Serten in vin parey bann move pwason dan parabol Zezi.
21 Pa i ankourazan selman pour vwar sa kantite bon pwason ki’n ganny atire par Zeova! (Zan 6:44) Rezilta i vreman ekstraordiner dan tou pei. Se Zeova ki bezwen ganny glorifye pour sa progre. Vi ki nou vwar sa progre, nou tou nou devret ganny motive pour obeir sa lankourazman ki ti ganny donnen byen lontan: “Dan bomaten senm ou lagrenn . . . , parski ou pa konnen kote i pou reisi, si isi oubyen laba, ouswa si tou le de pou bon menm.”—Ekle. 11:6.
[Not anba lo paz]
^ par. 2 Sa leksplikasyon ki nou pou vwar i diferan avek sa ki Latour Veyer le 15 Zen 1992 paz 17-22 (Angle oubyen Franse) ek le 1 Oktob 1975 paz 589-608 an Angle oubyen le 15 Zanvye 1976 paz 45-64 an Franse ti eksplike.
^ par. 17 Menm si Matye 13:39-43 pe refer avek en lot laspe predikasyon Rwayonm, son realizasyon i dan menm lepok ki sa parabol lo lasenn pwason, setadir “konklizyon sa sistenm.” Travay separasyon sa bann pwason pe kontinyen dan nou letan zis parey senm lagrenn e rekolte i kontinyen pandan letan lafen.—Latour Veyer le 15 Oktob 2000 paz 25-26 an Angle oubyen Franse; Ador sa sel vre Bondye paz 178-181, paragraf 8-11.
^ par. 19 Eski sa i vedir ki si en dimoun in aret etidye oubyen asosye avek Temwen Zeova i’n ganny zete zis parey en move pwason par bann lanz? Non! Si en dimoun i vreman anvi retourn ver Zeova, Zeova pou aksepte li.—Mal. 3:7.
Ki ou pou reponn?
• Ki parabol Zezi lo lagrenn moutard i montre nou lo progre predikasyon Rwayonm ek proteksyon spirityel?
• Dan parabol Zezi ki lelven i reprezante, e ki sa i montre nou lo lafason ki progre predikasyon Rwayonm i devlope?
• Sa parabol lo lasenn pwason i met lanfaz lo kwa?
• Ki mannyer nou kapab fer sir ki nou reste parmi bann ki’n ganny rasanble dan bann ‘pannyen’?
[Kestyon]
[Portre lo paz 26]
Ki parabol lo lagrenn moutard i montre nou lo progre predikasyon Rwayonm?
[Portre lo paz 27]
Ki nou aprann avek parabol lelven?
[Portre lo paz 29]
Ki separasyon bann bon e move pwason i montre nou?