Annan “konpasyon pour kanmarad”

ZANMEN oparavan in deza annan en gran bezwen pour ed lezot ki pe fer fas avek lafamin, maladi, lapovrete, krim, lager sivil ek dezas natirel par demontre konpasyon. Konpasyon i vedir ki nou konsyan soufrans oubyen difikilte ki en dimoun pe pas ladan e nou anvi ed sa dimoun. Zis parey en ver delo fre ki rafresir ou apre ki ou’n mars dan sa gro ker soley, en dimoun ki annan konpasyon i kapab rekonfort en lot ki deprimen, kalme douler e lev moral en dimoun ki aflize.

Nou kapab demontre konpasyon par nou parol ek aksyon setadir pran swen avek lezot e touzour pare pour ed zot ler zot bezwen nou. Nou pa devret demontre konpasyon zis anver nou fanmir, zanmi ek lezot dimoun ki nou konnen. I byen pour nou demontre konpasyon anver bann dimoun ki nou pa ni menm konnen. Dan son Sermon lo Montanny Zezi ti demande: “Si zot kontan zis bann ki kontan zot, ki rekonpans zot pou gannyen?” Zezi ki ti annan konpasyon ti osi dir: “Alor fer pour lezot sa ki ou oule lezot i fer pour ou.”—Matye 5:46, 47; 7:12.

Ou kapab lir sa bann parol ki renonmen konman Lareg-d-or dan Lekritir Sen. Bokou ­dimoun i dakor ki Labib i donn nou pli bon ­gidans lo konman pour montre konpasyon. Labib in plizyer fwa montre nou ki i en lobligasyon pour nou ed bann ki pa kapab ed zot lekor pour en rezon ou en lot. Labib i prezant son Loter ek nou Kreater, Zeova, konman sa enn ki donn pli bon legzanp pour demontre konpasyon.

Par egzanp, nou lir: “[Bondye] i defann drwa bann orfelen ek vev. I pran swen avek bann etranze e i donn zot manze ek lenz.” (Deterononm 10:18, Contemporary English Version) Zeova i ganny dekrir konman sa enn ki pe “egzekit zizman pour sa bann ki’n ganny trike, sa Enn ki pe donn dipen bann ki lafen.” (Psonm 146:7) Konsernan bann imigran Zeova ti donn sa lord: “En rezidan etranze . . . i bezwen ganny konsidere konman en sitwayen parey zot menm, e zot bezwen kontan li parey zot kontan zot prop lekor.”—Levitik 19:34.

Parkont, i pa toultan fasil pour demontre konpasyon. Zapot Pol ti ekrir bann Kretyen dan lavil Kolos: “Abandonn zot vye natir avek son bann move labitid. Zot in pran natir nouvo: natir zonm nouvo ki tou letan son kre ater, Bondye, pe renouvle dan vre konnesans pour nou resanble li parfetman. Alor konman pep ki Bondye in swazir, en pep sen ki Bondye i kontan, zot devre ranpli avek konpasyon.”—Kolosyen 3:9, 10, 12.

Alor i demann zefor pour devlop konpasyon. Konpasyon i form par sa “natir nouvo” ki bann Kretyen i bezwen annan. Pol ti reste Ronm e sa lepok dimoun ti kriyel. I ti ankouraz son bann frer ek ser Kretyen pour fer bann gran sanzman dan zot personnalite pour ki zot vin pli konpreansif anver santiman lezot, e annan plis konpasyon.

Pwisans ki konpasyon i annan

Pour serten si en dimoun i demontre konpasyon, sa i en febles e lezot pou fasilman profit lo li. Eski sa i vre?

Definitivman non! Sa lafors ki motiv nou pour demontre vre konpasyon i lanmour, e Bondye ki sours sa kalite, i sa pli gran legzanp ki demontre lanmour parfetman. ‘Bondye i lanmour.’ (1 Zan 4:16) Se pour sa rezon Zeova i ganny apele “Papa ki ranpli avek labonte, Bondye ki touzour donn konsolasyon.” (2 Korentyen 1:3) Sa lekspresyon “ranpli avek labonte” i vedir “pitye, konpasyon pour bann problenm oubyen difikilte lezot.” Zeova i menm “bon anver bann dimoun engra e move”!—Lik 6:35.

Nou Kreater i ekspekte nou osi pour demontre bann bon kalite, parey konpasyon. Nou lir dan Mika 6:8: “I’n dir ou, O zonm, sa ki bon. Ki Zeova pe demann ou an retour apard ki demontre lazistis, e kontan labonte?” Dan Proverb 19:22, nou lir: “Keksoz atiran dan imen i son labonte leker.” Pareyman Garson Bondye, Zezi Kri, ki ti reflekte personnalite son Papa parfetman, ti konsey son bann disip pour kontinyen “montre konpasyon [oubyen “mizerikord,” NW] parey Bondye, ou Papa, i annan konpasyon [oubyen “mizerikord,” NW].”—Lik 6:36.

I annan en bon rezon pour nou annan sa kalite, vi ki nou kapab ganny rekonpanse annabondans apre ki nou’n demontre konpasyon. Souvan nou vwar sa parol dan Proverb 11:17 vin vre: ‘En zonm ki annan labonte leker pe fer dibyen son prop lekor.’ Ler nou demontre konpasyon anver en dimoun ki dan bezwen, Bondye i konsider sa konman en faver ki ou’n fer pour Li. An retour i pran sa responsabilite pour demontre labonte anver son bann adorater pour nenport ki konpasyon zot in montre  anver lezot. Lerwa Salomon ti ganny enspire pour ekrir: “Sa ki rann faver bann dernyen dimoun pe pret Zeova, e I pou rekonpans li pour son aksyon.” (Proverb 19:17) E Pol ti ekrir: “Rapel zot ki Senyer pou rekonpans tou dimoun, . . . pour sa bon travay ki zot fer.”—Efezyen 6:8.

En dimoun ki annan konpasyon i kapab gard lape e i ede rezourd bann konfli ek friksyon. Konpasyon pou osi kapab ed en dimoun pour rezourd bann mal konprenezon, e i fer li fasil pour pardonnen. Bann mal konprenezon i kapab arive akoz nou pa toultan eksprim nou santiman oubyen panse parey nou ti a voudre, oubyen nou aksyon i kapab ganny mal enterprete. Dan en tel sitiasyon konpasyon i ede pour rezourd sa problenm e i ede pour prezerv lape. I fasil pour pardonn en dimoun ki abitye demontre konpasyon. Konpasyon i ed nou pour viv annakor avek konsey Pol pour bann Kretyen: “Siport kanmarad, pardonn kanmarad sak fwa ki enn ant zot i ofans en lot.”—Kolosyen 3:13.

Konpasyon an aksyon

Deplis en dimoun ki annan konpasyon i kapab soulaz enn ki dan soufrans. Parey nou’n vwar, en dimoun ki annan konpasyon i senpatiz avek bann ki dan detres e i soufer avek sa bann ki pe soufer. Konpasyon i enplik demontre konsern pour bann ki pe soufer e fer en keksoz pour ed bann tel dimoun.

Bann Kretyen i imit Zezi ler zot senpatiz avek lezot. Zezi pa ti zanmen tro okipe pour ed lezot swa dan domenn spirityel oubyen materyel. Ler i ti remarke ki lezot ti dan bezwen, avek konpasyon i ti trouv en fason pour ed zot.

Reflesir lo lafason ki Zezi ti reazir ler i ti vwar bann lafoul dimoun ki ti’n ganny neglize par sa bann ki ti devret pe pran swen avek zot spirityelman: “Son leker ti ranpli avek konpasyon [oubyen “annan pitye,” NW] pour lafoul ki i ti war, akoz zot ti fatige e dekouraze parey bann mouton ki napa berze.” (Matye 9:36) Konsernan sa mo ki’n ganny tradwir “annan pitye” en spesyalis Labib i dir ki i vedir “en santiman ki’n tous en dimoun o profon.” Anfet, sa mo an Grek in ganny vwar konman pli tousan pour sa santiman konpasyon.

Pareyman, bann Kretyen ki annan konpasyon i deswit fer zefor pour ed bann ki dan bezwen lo plan materyel ek spirityel. Zapot Pyer ti ekrir: “Zot devre, zot tou annan menm panse ek menm santiman; kontan kanmarad konman frer, annan konpasyon pour kanmarad.” (1 Pyer 3:8) Par egzanp, kan en fanmir Kretyen ki ti dan bezwen ti bezwen al reste en lot landrwa pour rezon lasante, bann frer ek ser laba ti les zot servi en lakaz pour nanryen pandan sis mwan. Sa msye i rakonte: “Zot ti vin vwar ki mannyer nou ete tou le zour, e zot bann remark ankourazan ti fer nou santi alez.”

Bann vre Kretyen i konsernen avek bezwen bann dimoun ki zot pa konnen osi. Avek plezir zot donn zot letan, lenerzi, ek resours pour ed dimoun ki zot pa konnen. Sa group volonter ki ti ed sa bann dimoun ki zot pa ti konnen dan sa premye lartik ti bann Temwen Zeova.

Kongregasyon Kretyen i alor ranpli avek en latmosfer kot konpasyon ek labonte leker i rennyen. Motive par lanmour, bann manm dan kongregasyon i determinen pour trouv fason pour ed lezot. Petet bann orfelen ek vev dan kongregasyon i bezwen ou pour ekout e konpran bann diferan problenm personnel ki zot pe fer fas avek. Eski ou kapab ed bann tel dimoun pour fer fas avek lapovrete, mankman swen medikal ek landrwa reste ki apropriye oubyen lezot difikilte personnel?

Se sa ki en koup Lagres ti eksperyanse. Sa msye ti ganny en latak. Li ek son madanm ti ganny anmennen kot en lopital plizyer santenn kilomet avek zot lakour. Zot ti depan lo sa pti larzan ki zot ti gannyen apre ki zot ti’n rekolte zoranz dan zot plantasyon. Me la, lekel ki ti pou rekolte zot zoranz vi ki zot ti lopital? Sa kongregasyon kot zot ti ete ti volonter. Zot ti rekolte e vann sa bann zoranz, e sa ti fer ki sa koup ki ti dan bezwen ti nobou ganny en reveni ek lape lespri.

Konpasyon i kapab ganny demontre dan  en kantite fason. Par egzanp, bann Kretyen ki annan konpasyon i realize ki parfwa en keksoz enportan ki bann ki dan difikilte i bezwen se bann vizit avek dimoun ki pou ekout zot avek konpasyon, konpran zot, e rekonfort zot par servi Labib.—Romen 12:15.

En latmosfer kot i annan konpasyon

Kongregasyon Kretyen partou dan lemonn i en landrwa an sekirite kot i annan lape ek rekonfor, kot konpasyon ek labonte i ganny demontre. Bann vre Kretyen i realize ki ler nou demontre konpasyon sa i atir dimoun anver nou, parkont ler nou brit e kriyel i fer ki dimoun i reste lwen avek nou. Alors, anmezir ki zot imit zot Papa ki dan lesyel, zot fer en kantite zefor pour demontre “konpasyon pour kanmarad” dan en fason pratik.

Bann Temwen Zeova i kordyalman envit ou pour vin eksperyans sa konpasyon, lentere dan lezot ek lanmour ki rennyen parmi zot. Zot asire ki ou pou trouv sa lanbyans atiran e akeyan.—Romen 15:7.

[Portre lo paz 5]

Pol ti ankouraz bann Kretyen dan lavil Kolos pour demontre konpasyon

[Portre lo paz 7]

Ler Zezi ti vwar ki i annan en bezwen, avek konpasyon i ti trouv en fason pour ede