Zot ti volonterman servi​—Micronesia

KATHERINE ti grandi Leta-z-ini e i ti batize konman en Temwen Zeova a laz 16 an. I ti byen devoue dan predikasyon me kantmenm sa, dan sa teritwar kot i ti prese i pa ti zwenn bokou dimoun ki ti enterese avek mesaz Rwayonm. I dir: “Mon ti lir bann leksperyans konsernan bann dimoun ki ti priy Bondye pour anvoy en dimoun ki ti pou ed zot pour konn li. Souvandfwa, mon ti swete ki mon kapab zwenn en dimoun parey, me zanmen sa ti arive.”

Apre ki Katherine ti’n pres pour plizyer lannen dan sa menm teritwar, i ti konmans mazin pour al reste en lot landrwa kot dimoun ti pou pli pare pour ekout sa mesaz Rwayonm. Me i ti pe mazinen si i ti pou kapab fer li. Zis en fwa dan son lavi ki i ti’n deza kit son fanmir e sa ti zis pour de semenn e i ti mank zot tou le zour. Me kantmenm sa, sa dezir pour ganny sa lazwa pour ed bann ki pe rod Zeova ti pous li pour fer sa. Apre ki i ti’n vwar detrwa landrwa kot i ti kapab ale, i ti ekrir biro brans Guam pour ganny bann lenformasyon ki i ti bezwen. An Zilyet 2007, a laz 26 an, Katherine ti al Saipan, en zil dan Losean Pasifik, ki apepre 10,000 kilomet avek kot i reste. Ki mannyer i ti pase laba?

LAREPONS POUR DE LAPRIYER

Pa bokou letan apre ki Katherine ti’n ariv dan son nouvo kongregasyon, i ti zwenn Doris, en madanm dan son 45 an an montan, ki ti aksepte en letid Labib. Apre ki zot ti’n etidye sa trwa premye sapit dan sa liv Ki Labib Katherine ti konmans trakase. I dir: “Doris ti en bon etidyan e mon pa ti anvi gat tou keksoz. Mon pa ti’n zanmen kondwir en letid Labib regilyerman e mon ti santi ki Doris ti bezwen en ser pli eksperyanse pour etidye avek li, petet en dimoun son laz.” Dan lapriyer Katherine ti demann Zeova pour ed li trouv sa bon ser ki i ti kapab konfye sa letid avek. Apre sa i ti deside pour dir Doris ki en lot dimoun ti pou etidye avek li.

Katherine i dir: “Avan ki mon ti kapab koz avek li lo la, Doris ti dir mwan ki i ti anvi koz avek mwan lo en problenm. Apre ki mon ti’n ekout li, mon ti dir li ki mannyer Zeova ti ed mwan pour fer fas avek en sityasyon parey dan lavi. I ti remersye mwan.” Apre, Doris ti dir Katherine: “Zeova i servi ou pour ed mwan. Premye fwa ki ou ti vin kot mwan, mon ti pe lir mon Labib pour plizyer erdtan.  Mon ti pe plere e demann Bondye pour anvoy en dimoun pour ed mwan konpran Labib. Apre sa, ou ti tap mon laport. Zeova ti’n reponn mon lapriyer!” Larm ti marse dan lizye Katherine anmezir ki i ti rakont son zistwar tousan. I dir: “Sa ki Doris ti dir ti larepons mon lapriyer. Zeova ti montre mwan ki mon ti kapab kontinyen fer sa letid.”

Doris ti batize an 2010 e aprezan i kondwir plizyer letid Labib. Katherine i dir: “Pa mon kontan ki swe ki mon ti annan pour bokou letan pour ed en dimoun senser vin serviter Zeova in vin vre!” Ozordi, Katherine i ere pour servi konman en pionye spesyal lo sa zil Pasifik ki apel Kosrae.

TRWA DEFI ​—KI MANNYER POUR FER FAS AVEK

Plis ki en santenn frer ek ser sorti dan lezot pei (a laz 19 a 79 an) in servi kot i annan en pli gran bezwen Micronesia. Santiman sa bann serviter devoue i ganny byen eksprimen par Erica ki’n al Guam an 2006 a laz 19 an. I dir: “Fer pionye dan en teritwar kot dimoun i swaf laverite i gou. Mon vreman apresye ki Zeova in ed mwan pour pran sa servis. I sa meyer fason viv!” Ozordi, Erica i annan sa lazwa pour servi konman en pionye spesyal lo en zil ki form parti bann zil Marshall ki apel Ebeye. Byensir, i annan bann defi pour servi dan en lot pei. Annou vwar trwa defi e vwar ki mannyer bann ki’n al servi Micronesia i fer fas avek zot.

Fason viv. Apre ki Simon, ki ti annan 22 an, ti’n ariv lo zil Palau lannen 2007 deswit i ti vwar ki i ti pou ganny zis en kar sa kantite larzan ki i ti gannyen dan son pei, Langleter. “Mon ti bezwen aprann pour pa aste tou sa ki mon anvi. Aprezan, mon vey byen ki kalite manze mon aste e mon esey rod keksoz pli bon marse. Ler en keksoz i kase, mon rod bann pyes dezyenmmen e esey rod en dimoun pour ed mwan repar li.” Ki lefe sa bezwen pour annan en lavi senp ti annan lo li? Simon i dir: “I ti ed mwan pour aprann kwa ki vreman neseser dan lavi e ki mannyer mon kapab viv avek mwens. Plizyer fwa mon’n vwar lanmen Zeova dan mon lavi. Pandan sa set an ki mon’n servi isi, mon’n toultan annan en keksoz pour manze ek en landrwa pour dormi.” I vre, Zeova i siport bann ki viv en lavi senp akoz zot anvi rod plito son Rwayonm.​—Mat. 6:32, 33.

Lanvi pour retourn se mwan. Erica i dir: “Mon vreman pros avek mon fanmir e mon ti enkyet ki sa lanvi pour retourn se mwan ti pou annan en move lefe lo mon predikasyon.” Ki i ti fer pour prepar son lekor? “Avan ki mon ti al servi en lot landrwa, mon ti lir bann lartik dan Latour Veyer ki diskit lo sa lanvi pour retourn se mwan. Sa ti vreman prepar mon leker pour fer fas avek sa defi. Dan en lartik, en manman ti asir son fiy ki Zeova i pran swen avek son bann serviter par dir, ‘Zeova i kapab pli byen pran swen avek ou ki mwan.’ Sa  parol ti vreman fortifye mwan.” Hannah ek son myse Patrick, pe servi Majuro, bann zil Marshall. Hannah i fer fas avek sa lanvi pour retourn se li par konsantre lo bann frer ek ser dan kongregasyon. I dir: “Mon toultan remersye Zeova pour nou bann frer ek ser dan lemonn antye akoz zot osi zot mon fanmir. San zot led, mon pa ti pou zanmen kapab servi kot i annan en pli gran bezwen.”

Fer zanmi. Simon i dir: “Kan ou ariv dan en lot pei, preski tou keksoz i diferan. Mon pa kapab rakont bann dyok e lezot pa vreman konpran mwan.” Erica i dir: “O konmansman, mon ti santi mon tousel, me sa ti ed mwan pour egzamin kwa ki ti’n motiv mwan pour vin servi isi. Mon pa ti’n vin pour ganny okenn byenfe personnel me pour fer plis pour Zeova.” I azoute: “Avek letan, mon ti ganny bann bon zanmi, ki mon apresye.” Simon ti fer bokou zefor pour aprann langaz Palauan, ki ti permet li ‘ouver gran son leker’ avek bann frer ek ser dan sa landrwa. (2 Kor. 6:13) Son zefor pour aprann sa langaz ti fer li vin pli pros avek bann frer ek ser. Wi, ler bann frer ki’n vin ede ek bann frer ki reste dan sa landrwa i travay ansanm kot a kot, tou le de i ganny bann lanmitye pros dan kongregasyon. Ki lezot byenfe bann ki volonterman servi kot i annan en pli gran bezwen i gannyen?

“REKOLTE BOKOU”

Zapot Pol ti dir: “Sa ki senm bokou, i pou rekolte bokou.” (2 Kor. 9:6) Sa prensip ki ganny dekrir dan sa parol i sertennman aplik pour bann ki fer plis dan zot minister. Ki fri zot “rekolte bokou” Micronesia?

I ankor annan bokou loportinite Micronesia pour konmans bann letid Labib e pour vwar ki mannyer bann dimoun ki aprann e aplik laverite Parol Bondye i fer progre spirityel. Patrick ek Hannah ti osi pres Angaur, en ptipti zil ki annan 320 zabitan. Apre ki zot ti’n pres laba pour de mwan, zot ti zwenn en manman tousel. Deswit i ti aksepte en letid Labib, aksepte laverite e fer bann gran sanzman dan son lavi. Hannah i dir: “Apre sak letid, ler nou ti pe mont nou bisiklet pour al dan lakour, nou ti get kanmarad e dir: ‘Mersi Zeova!’” Hannah i azoute: “Mon konnen ki Zeova ti pou’n atir sa madanm ver li dan en fason oubyen en lot, me akoz nou’n servi li kot i annan en pli gran bezwen, nou ti kapab rod e ed sa enn ki annan latitid parey en mouton pour konn Zeova. Sa i parmi bann leksperyans ki’n anmenn bokou byenfe dan nou lavi!” Parey Erica i dir: “Kan ou ed en dimoun konn Zeova, ou ganny en lazwa ekstraordiner!”

ESKI OU KAPAB PARTISIPE?

Dan bokou pei, i annan sa bezwen pour plis proklanmater. Eski ou kapab parmi sa bann ki al dan en lot landrwa kot i annan bezwen? Demann Zeova dan lapriyer pour fortifye ou dezir pour fer plis dan ou minister. Diskit sa size avek bann ansyen dan kongregasyon, avek sirveyan rezyonal oubyen avek bann ki annan sa privilez pour servi dan en pei kot i annan bezwen. Ler ou konmans fer plan, ekrir biro brans ki okip sa bann teritwar kot ou ti pou kontan al servi e demann pour plis lenformasyon. * Petet ou osi ou kapab zwenn sa plizyer milye frer ek ser, zenn ek vye, selibater oubyen marye ki volonterman servi e ganny sa lazwa ki ou gannyen kan ou “rekolte bokou.”

[Not anba lo paz]

 [Bwat lo paz 6]

Ki mannyer pour form lezot

PARMI bann ki’n al reste dan en lot pei i bann ansyen ki annan bokou lannen leksperyans lo konman pour pran swen avek troupo. Ki mannyer sa bann frer i kapab form lezot dan kongregasyon?

Richard ki annan 65 an, ti sorti Leta-z-ini pour al reste Guam lannen 2010. I dir ki felisit lezot senserman i enn parmi bann keksoz pli enportan dan sa formasyon. Richard i osi dir: “En bon fason pour form lezot i par travay avek zot dan predikasyon. Bann frer i kapab vwar e tann fason ki ou ansenny lezot lo Zeova. An plis, ler nou travay ansanm sa i fer nou devlop lanmour ek linite.”

Greg ki annan 60 an, pe reste Saipan depi lannen 2010. I dir: “Bann ansyen ki’n vin isi i donn bokou latansyon bann frer dan sa landrwa, sakenn dapre zot bezwen. Nou’n devlop bann lanmitye pros avek zot e nou annan konfyans ek respe pour kanmarad.” I azoute: “Pa zis zot ki ganny formen. Nou annan bokou pour aprann avek bann frer dan sa landrwa.”

Mike ki annan 60 an avek son madanm Alice, ti servi dan rezyon Pasifik pour plis ki 20 an. Ki mannyer i ti form lezot? “Par kit en bon legzanp an swivan direksyon ki nou gannyen sorti kot lorganizasyon Zeova. Mon ti fer sir ki bann ki mon ti formen i konpran sa. Mon ti fer zefor pour met an pratik sa ki mon ti ansennyen, pour annan pasyans e pour toultan felisit lezot.” Mike i osi dir: “Si ou al reste en lot rezyon, i ti a byen ki ou rekonnet ki i annan plizyer fason pour fer en keksoz.”

Ki mannyer bann frer ki’n grandi Micronesia i santi anver sa formasyon ki zot pe gannyen? Joel ki annan 21 an, ki reste Guam, i dir: “Bann ansyen i montre ki zot annan konfyans dan mwan par donn mwan bann responsabilite. Sa in ed mwan pour vwar ki mon annan en keksoz ki annan valer pour ofer dan servis Zeova.” Byron ki annan 31 an, ki reste Saipan, i dir: “Par zot devouman dan predikasyon e zot lanmour pour bann mouton, bann ansyen in ed mwan pour konsantre lo bann keksoz spirityel dan plas tay deryer larises.” I azoute: “I en benediksyon pour annan sa bann frer eksperyanse parmi nou.”

[Portre lo paz 3]

Katherine (drwat) ek Doris (gos)

[Portre lo paz 4]

Erica

[Portre lo paz 4]

Simon

[Portre lo paz 5]

Patrick ek Hannah

[Portre lo paz 6]

Richard ek Joel

[Portre lo paz 6]

Byron ek Greg

[Portre lo paz 6]

Mike ek Alice