Pran swen avek bann aze
Pran swen avek bann aze
“Mon bann pti zanfan fodre pa ki nou montre lanmour zis par bann zoli parol, e zoli diskour, me vreman par nou laksyon.”—1 ZAN 3:18.
KI OU POUR REPONN?
Ki mannyer bann paran ek zanfan ki’n vin adilt i kapab prepar zot pour “bann zour difisil”?
Ki sityasyon ki kapab montre ki bezwen bann paran in sanze?
Ki ou kapab fer pour ed en dimoun ki pe pran swen avek ou paran aze?
1, 2. (a) Ki bann defi ek desizyon bokou fanmir i fer fas avek? (b) Ki mannyer bann paran ek zanfan i kapab fer fas avek bann defi ki vin avek lavyeyes?
OU LEKER i kapab fer mal kan ou realize ki ou bann paran ki ti for e depan lo zot prop lekor, aprezan pa kapab pran swen avek zot menm. Petet zot manman oubyen papa in tonbe e kas laans, oubyen i’n konfize e konmans perdi memwar ouswa dokter in vwar ki i’n ganny en maladi grav. De lot kote, bann aze i kapab vwar li difisil pour aksepte ki zot nepli zenn oubyen ki zot sirkonstans i aprezan limit zot lendepandans. (Zob 14:1) Kwa ki kapab ganny fer? Ki mannyer nou kapab pran swen avek bann aze?
2 En lartik lo pran swen avek bann aze i dir: “Kantmenm i difisil pour diskit lo tou sa ki relye avek lavyeyes, en fanmir ki’n diskit lo zot bann opsyon e tonm dakor lo en plan, pou pli byen kapab fer fas avek sa ki pou arive.” Pour nou kapab vwar valer sa diskisyon nou bezwen aksepte avan tou, ki nou pa kapab evit bann leprev ki vin avek lavyeyes. Toudmenm, nou kapab fer serten preparasyon ek desizyon davans. Annou vwar ki mannyer bann fanmir i kapab avek lanmour korpere pour fer plan lo konman pour fer fas avek serten defi.
FER PLAN POUR “BANN ZOUR DIFISIL”
3. Ki bann fanmir i bezwen fer kan bann paran aze i bezwen plis led? (Vwar portre.)
3 I ariv en letan kot la pli par dimoun aze i nepli kapab konpletman pran swen avek zot lekor e alor zot bezwen serten led. (Lir Eklezyast 12:1-7. *) Kan bann paran aze pa kapab debourye lo zot menm, ansanm avek zot zanfan ki’n vin adilt zot devret rod sa pli bon led e fer bann laranzman ki zot mwayen i permet. Ordinerman, i saz pour bann manm fanmir zwenn ansanm pour diskit lo bann led ki bezwen, ki mannyer sakenn i kapab korpere e ki mannyer pou ede. Tou dimoun, espesyalman bann paran, i devret koz dan en fason fran e egzamin bann fe dan en fason ki fer sans. Petet zot kapab diskite e vwar si bann paran i kapab reste dan zot prop lakour si zot ganny serten led. * Zot kapab osi vwar ki mannyer sak manm fanmir i kapab desarz bann diferan responsabilite dapre zot abilite. (Prov. 24:6) Par egzanp, serten i kapab disponib pour al ede kot lakour zot paran tou le zour tandis ki lezot i kapab donn led finansyel. Tou manm fanmir i devret realize ki sakenn i annan en rol pour zwe e ki sa rol i kapab sanze avek letan, alor zot pou bezwen pare pour desarz diferan responsabilite sakenn son tour.
4. Kote bann manm fanmir i kapab rod led?
4 Kan ou konmans pran swen avek ou paran, otan ki posib aprann pour konn plis lo kondisyon son lasante. Si ou paran i annan en maladi ki fer son lasante gradyelman deteryore, rod lenformasyon pour konnen ki ou ekspekte i arive. (Prov. 1:5) Kontakte bann lazans gouvernman ki pran swen avek bann aze. Rode ki led ou kapab gannyen dan ou kominote ki pour fer ou travay pli fasil e amelyor swen ki ou donnen. Bann sanzman ki pou arive dan sirkonstans ou fanmir i kapab fer ou eksperyans bann santiman ki fatig ou, tel parey en gran sagrinasyon, soke oubyen konfize. Partaz ou bann panse avek en zanmi ki ou annan konfyans ladan. Pli enportan ankor, devid ou leker avek Zeova. I kapab donn ou sa lape lespri ki ou bezwen pour fer fas avek nenport sityasyon.—Ps. 55:22; Prov. 24:10; Fili. 4:6, 7.
5. Akoz i saz pour rod lenformasyon byen davans lo bann opsyon ki egziste lo pran swen avek bann aze?
5 Serten dimoun aze ek zot fanmir in vwar li saz pour rod lenformasyon davans lo bann opsyon ki egziste konsernan pran swen avek bann aze. Par egzanp, zot in egzamin sa opsyon kot sa paran aze i kapab reste avek son fiy oubyen garson, si i neseser met li dan en landrwa kot i pran swen avek bann aze oubyen konsider lezot fasilite ki egziste lokalman. Zot in prepar zot davans pour fer fas avek bann ‘problenm ek sagrinasyon’ ki vin avek lavyeyes. (Ps. 90:10) Tre souvan, bokou fanmir pa fer okenn plan e sa i fer ki zot bezwen fer bann desizyon difisil vitman kan problenm i arive. En eksper i dir: “Kan problenm i arive, normalman i sa pli move moman pour fer en tel desizyon.” Ler tou dimoun pe fer keksoz an tayan sa i kre en latmosfer kot zot anba presyon e dispit i kapab leve. De lot kote, kan en plan in ganny fer byen davans i pou pli fasil adapte avek bann azisteman.—Prov. 20:18.
6. Ki mannyer bann paran e osi bann zanfan i kapab benefisye kan zot diskit lo laranzman kote zot pour reste?
6 Ou kapab anbarase pour koz avek ou paran lo kote zot pou reste ek bann sanzman neseser ki zot pou bezwen fer. Kantmenm sa, bokou in dir ki pli tar zot ti vwar valer sa bann konversasyon. Akoz? Sa bann konversasyon ti kre loportinite pour fer bann plan pratik dan linite e bon konprenezon. Zot ti vwar ki ler tou dimoun i eksprim son pwennvi avek lanmour ek labonte byen davans, i fer li pli fasil pour fer bann desizyon kan i annan sa bezwen. Menm kan bann aze i anvi viv zot tousel e fer zot prop desizyon otan ki posib, zot pou ganny bokou byenfe si zot diskit davans avek zot zanfan lo ki kalite swen ki zot ti a kontan si okenn keksoz i arive.
7, 8. Ki topik ti a byen bann fanmir i diskit lo la e akoz?
7 Paran i devret enform zot bann swe avek zot fanmir kan zot pe fer sa bann laranzman konsernan sityasyon finansyel ek kalite swen zot ti a kontan. Sa pou ed ou fanmir fer bann desizyon apropriye si i arive ki ou pa kapab fer li ou menm. Ou fanmir pou anvi aksepte ou bann swa e permet ou pour reste lib pour fer ou prop swa otan ki posib. (Efe. 6:2-4) Par egzanp, eski ou ekspekte enn ou zanfan i fer ou vin reste kot li ek son fanmir oubyen ou pe ekspekte en lot keksoz? Fodre ou realistik e admet ki pa tou dimoun ki kapab vwar keksoz parey ou e i pran letan pour ou oubyen ou zanfan aziste zot fason panse.
8 Nou tou nou devret realize ki nou kapab evit bann problenm si nou planifye e diskite davans. (Prov. 15:22) Sa i enkli diskit lo bann swen medikal ki sa dimoun ti a kontan. Bann pwen ki ganny adrese lo sa kart Advance Decision to Refuse Specified Medical Treatment (DPA) ki bann Temwen Zeova i servi i san dout bann topik ki nou devret koz lo la dan nou bann diskisyon. Tou dimoun i annan drwa pour ganny lenformasyon, aksepte ouswa refize bann tretman ki kapab ganny ofer. Sa bann tretman ki sak Temwen in swazir i dan zot kart DPA. Ler ou swazir en dimoun ki ou annan konfyans ladan ki kapab koz dan ou plas (kot sa i posib legalman e i ganny aksepte), sa pou permet ki bann desizyon apropriye i ganny pran. I ti a byen ki bann ki enplike ladan i annan bann kopi dokiman enportan an ka zot bezwen. Serten i met en kopi sa bann dokiman ansanm avek lezot dokiman enportan tel parey zot testaman, dokiman lasirans ek finans e nenport let sorti kot gouvernman.
FER FAS AVEK SIRKONSTANS KI SANZE
9, 10. Ki mannyer bann sanzman dan abilite en dimoun aze i relye avek led ki i gannyen?
9 Dan bokou ka, sa fanmir i deside ki sa paran i reste endepandan otan ki zot abilite ek kondisyon i permet. Zot ankor kapab kwi manze, netwaye, pran zot medikaman e kominike san okenn problenm. Alor, zot asir zot zanfan ki zot pa bezwen toultan la deryer zot. Avek letan, si sa paran nepli kapab al fer konmisyon oubyen zot konmans perdi memwar, bann zanfan i devret pare pour adapte avek sa bann sanzman.
10 Bann difikilte ki vin avek lavyeyes i enkli konfizyon, depresyon, pa kapab kontrol pas lirin ek lasel, vin sourd, pa vwar byen kler e perdi memwar. Kantmenm sa, i egziste bann solisyon pour sa bann problenm. Dek ki sa bann problenm i konmanse, rod led medikal. Petet, se bann zanfan ki devret pran linisyativ pour fer sa. Zot pou osi bezwen deside a ki pwen zot devret pran serten responsabilite ki paran ti annan. Pour ki bann zanfan i vin pli efikas kan zot pe pran swen avek zot paran, zot pou bezwen zwe rol konman zot avoka, sekreter ek drayver e fer lezot keksoz ankor.—Prov. 3:27.
11. Kwa ki kapab ganny fer pour redwir move lefe ki sanzman i anmennen?
11 Si problenm ou paran pa kapab ganny rezourd ou pou bezwen fer bann sanzman dan lafason ki ou pran swen avek li oubyen landrwa kot i reste. Pli bann sanzman i ptigin, pli i pou fasil pour fer bann azisteman. Si ou reste lwen avek ou paran, petet i pou sifi ki en lot Temwen oubyen en vwazen i pas kot ou paran regilyerman apre fer konnen enn bann zanfan ki mannyer ou paran i ete. Eski zot bezwen led pour kwi manze ek netwayaz? Eski bann pti modifikasyon i kapab ganny fer pour evit okenn danze e fer li pli fasil pour sirkile, bennyen, ensidswit? Petet tou sa ki bann aze i bezwen pour gard en pe zot lendepandans i led en home carer. Me si zot pa pou sen e sof lo zot menm, zot pou bezwen en led permanan. Dan nenport ki sityasyon, rode ki led ki disponib lokalman. *—Lir Proverb 21:5. *
KONMAN FER FAS AVEK SA DEFI
12, 13. Ki mannyer bann adilt ki reste lwen avek zot paran in kontinyen onor e pran swen avek zot paran?
12 En zanfan ki kontan son paran i anvi ki son paran i santi li konfortab. Sa zanfan pou annan lape lespri kan i konnen ki son paran pe ganny pran swen avek. Akoz serten rezon an deor zot kontrol, serten zanfan ki’n vin adilt pa reste pre avek zot paran. Dan sa ka, serten i pran zot vakans pour vizit e pran swen avek zot paran e fer bann keksoz ki zot paran pa kapab fer. En pti kout telefonn tanzantan e menm tou le zour si i posib, ekri let, oubyen imel i reasir zot paran ki zot kontan zot.—Prov. 23:24, 25.
13 Dan nenport ki sityasyon, ou bezwen egzaminen pour vwar swen ki ou paran i bezwen sak zour. Si ou pa reste o bor ou paran ki Temwen, ou kapab koz avek bann ansyen dan zot kongregasyon e demann zot serten konsey. Dan ou lapriyer pa oubliye pour enkli sa size. (Lir Proverb 11:14. *) Menm si ou paran pa Temwen, ou anvi “respekte ou papa ek ou manman.” (Egz. 20:12; Prov. 23:22) I vre ki pa tou fanmir ki pou fer menm desizyon. Serten i fer laranzman pour ki zot paran aze i vin reste avek zot oubyen pli pre o bor zot. Par kont, sa pa toultan posib. Serten paran pa kontan viv avek zot zanfan ki’n vin adilt ek zot fanmir akoz zot kontan zot liberte e zot pa anvi vin en fardo pour lezot. Serten i kapab annan sa mwayen e i prefere pou pey en dimoun pour pran swen avek zot se zot.—Ekle. 7:12.
14. Ki problenm ki kapab arive avek sa enn ki sipoze responsab pour pran swen avek son paran aze?
14 Dan bokou fanmir, sa responsabilite pour pran swen en paran i tonm lo sa garson oubyen sa fiy ki reste pli pros avek sa paran. Me bann ki pe pran swen avek zot paran i bezwen annan en bon balans ant bezwen zot paran avek bezwen zot fanmir. Sak dimoun i annan en limit dan kantite letan ek lenerzi ki i kapab depanse pour okip son paran. Sityasyon sa enn ki pe okip son paran i kapab sanze, alor i pou neseser fer lezot laranzman. Eski tou sa bann responsabilite pour pran swen avek paran aze i tonm lo en sel manm fanmir? Eski petet lezot zanfan i kapab fer en pe plis, par egzanp par fer li sakenn son tour?
15. Ki mannyer i posib pour evite ki sa enn ki pe pran swen avek sa paran i pa finalman konpletman epwize?
15 Kan en paran aze i konstaman bezwen led i kapab arive ki sa enn ki pe pran swen avek li i epwize. (Ekle. 4:6) Bann zanfan ki kontan zot paran i anvi fer tou sa ki zot kapab pour zot, me ler paran i demann tro bokou sa i kapab vin en lour pour sa enn ki pe okip son paran. Bann ki vwar zot dan sa sityasyon i bezwen realistik e petet zot bezwen demann led avek lezot. En led detanzaot i kapab sifi pour anpes sa paran ganny anvoye dan en lenstitisyon pour bann dimoun aze tro boner.
16, 17. Ki defi bann zanfan i kapab rankontre ler zot pe pran swen avek paran aze, e ki mannyer zot kapab fer fas avek sa? (Vwar osi bwat “Apresye swen ki ou gannyen.”)
16 I fermal pour vwar tou sa douler ki lavyeyes i anmennen lo nou paran aze. Bokou ki pran swen avek zot paran i eksperyans sagrinasyon, lenkyetid, fristrasyon, lakoler, santi zot koupab e menm gard rankin. Par ler, en paran aze i kapab dir bann move keksoz oubyen menm pa demontre rekonesans. Si sa i arive, pa bezwen ofans vitman. En eksper lasante mantal i dir: “Sa pli bon fason pour fer fas avek okenn santiman, espesyalman enn ki ou pa konfortab avek, se pour aksepte. Pa rezet sa santiman oubyen ziz ou lekor severman pour lafason ki ou santi ou.” Koz avek ou konzwen, en lot manm fanmir, oubyen en zanmi ki ou annan konfyans pour eksprim ou bann santiman avek. Sa bann konversasyon i kapab ed ou pour reazir dan en fason pli pozitif emosyonnelman.
17 I kapab arive ki en fanmir napa sa resours ni sa abilite pour kontinyen pran swen avek zot paran kot lakour. Petet dan sa sityasyon, nou paran aze pou bezwen ners pour pran swen avek li. En ser ki vizit son manman preski tou le zour dan en lenstitisyon ki pran swen avek dimoun aze i dir sa lo son fanmir: “Nou pa ti kapab pran swen avek nou manman 24 lo 24 tou le zour. I pa ti en desizyon fasil pour aksepte pour met li dan en lenstitisyon. I ti vreman difisil emosyonnelman, me i ti sa pli bon solisyon pour li pandan bann dernyen mwan son lavi, e i ti aksepte sa.”
18. Ki bann ki pran swen avek zot paran i kapab asire?
18 Sa responsabilite pour pran swen avek ou paran i kapab konplike e afekte ou emosyonnelman. Napa en sel fason pour pran swen avek bann dimoun aze. Pourtan, en bon plan, korporasyon, bon kominikasyon e pli enportan ankor, lapriyer senser, pou ed ou desarz ou responsabilite pour onor bann ki ou kontan. An fezan sa, ou pou trouv satisfaksyon kan zot konnen ki zot pe ganny swen ek latansyon ki zot bezwen. (Lir 1 Korentyen 13:4-8.) Si ou onor ou paran ou kapab asire ki Zeova pou beni ou avek lape lespri.—Fili. 4:7.
[Not anba lo paz]
^ par. 3 Eklezyast 12:1-7: “Alor, mazin ou Gran Kreater letan ou ankor zenn, avan ki bann zour difisil i konmanse e bann lannen i arive kot ou pou dir: ‘Mon napa gou pour viv,’ 2 avan ki soley, lalimyer, lalin ek zetwal i vin fernwanr e bann nyaz i retournen, apre en gro lapli, 3 sa zour kan bann gardyen lakaz pou tranble, bann zonm for pou kourbe, bann madanm in aret travay lo moulen akoz napa bokou zot e bann madanm ki pe get par lafnet i vwar ki i fernwanr, 4 e bann laport dan semen in fermen, kan apenn si ou tann tapaz moulen e kan en dimoun i sote dan son sonmey akoz tapaz zwazo e lavwa tou bann fiy ki sante i dousman. 5 Deplis, sa dimoun i konmans annan lafreyer dan bann landrwa o e i annan bann keksoz efreyan lo semen. Pye almonn pe fleri e bann sotrel pe trenn trennen e bann fri pye kap i pete, akoz zonm pe al dan son lakaz permanan e bann ki dan dey pe marse dan semen, 6 avan ki sa lakord an larzan i ganny retire e bol annor i ganny kraze e avan ki seo avek lakord o bor sours delo i ganny kase e avan ki bann larou ki vir avek lafors delo sorti kot pwi i ganny kraze. 7 Apre lapousyer i retourn dan later parey i ti ete avan e lespri i retourn kot sa vre Bondye ki ti donn li.”
^ par. 3 Petet bann swa ki paran ek zanfan i fer i depan lo koutim lokal. Dan serten pei, i normal e menm preferab ki plizyer zenerasyon dan en fanmir i viv ansanm oubyen annan kontak avek kanmarad regilyerman.
^ par. 11 Si ou paran i ankor reste kot li, fer sir ki bann ki pran swen avek ou paran i annan lakle lakaz pour fer zot ganny akse avek sa dimoun aze an ka i arive okenn danze.
^ par. 11 Proverb 21:5: “Bann plan sa enn ki devoue i sirman annan en lavantaz, me dimoun ki azir tro vit i sirman tonm dan lapovrete.
^ par. 13 Proverb 11:14: “Kot napa en bon gidans, lepep i soufer, me lepep i reisi ler i annan bokou konseye.”
[Kestyon]
[Bwat lo paz 29]
APRESYE SWEN KI OU GANNYEN
En ser i dray en zistans apepre kat erdtan dan loto pour ariv kot son paran. Ansanm avek son trwa ser, i ede pran swen avek son paran ki aze, enn ant zot i ganny sa maladi ki apel Alzheimer. I dir: “Mon’n ganny touse par sa parol saz Zezi: ‘Pa trakas pour demen; demen pou anmenn ase traka par limenm. Traka en zour i sifi.’ Napa nanryen ki nou kapab fer pour aret sa maladi. Me nou bi i pour fer sa ki nou kapab sak zour pour fer manman ek papa santi zot pli an sekirite posib. Zot i’n fer sitan bokou pour nou e mon kontan pour pran swen avek zot ozordi.” Sirman Zeova i apresye bann tel santiman.—Mat. 6:34; Ps. 68:19.
[Portre lo paz 27]
En fanmir i kapab zwenn pour diskit bezwen zot paran (Vwar paragraf 6-8)
