BIOGRAFI

Obeir Zeova in anmenn bokou benediksyon pour mwan

Rakonte par Elisa Piccioli

Papa ti dir: “Pa sa i en bon leson ki nou aprann avek Noe! Noe ti obeir Zeova e i ti kontan son fanmir, e zot tou zot ti sirviv Deliz akoz lafanmir antye ti antre dan lars.”

SA I enn bann premye souvenir ki mon mazinen lo mon papa, en zonm senp ki ti travay dir. I ti kontan lazistis, e kan i ti tann koz lo Labib an 1953, deswit i ti ganny atire par son mesaz. Depi sa, i ti fer son mye pour koz avek nou lo sa ki i ti pe aprann. O konmansman, mon manman pa ti anvi kit son bann koutim Katolik, me avek letan li osi i ti konmans pran aker sa ki Labib i dir.

I pa ti fasil pour mon paran etidye Labib avek nou akoz mon manman pa ti tro konn lir e mon papa ti bezwen travay dir dan plantasyon ziska tar. Parler, i ti sitan fatige ki i ti tonm dormi pandan letid. Me kantmenm sa, zefor ki i ti fer ti anmenn bon rezilta. Mon ti premye zanfan, alor mon ti ed mon ser ek mon de frer. Nou ti souvan koz konsernan lanmour ki Noe ti annan pour son fanmir ek son lobeisans anver Bondye. Mon vreman kontan sa resi dan Labib! I pa ti pran bokou letan pour nou tou al renyon dan Lasal Rwayonm Roseto degli Abruzzi, en lavil ki lo lakot Adriatic, Itali.

An 1955, kan mon ti’n fek ganny 11 an, mon manman ek mwan ti travers bann montanny ki ti dan was pour asiste nou premye lasanble distrik Ronm. Depi sa, mon’n toultan kontan bann gran lasanble.

Son lannen answit mon ti batize e deswit apre mon ti konmans servis a plen tan. Kan mon ti ganny 17 an, mon ti fer pionye spesyal dan lavil Latina ki dan rezyon sid avek Ronm e ki ti apepre 300 kilomet avek landrwa kot mon ti reste. Latina ti en nouvo lavil e dimoun laba pa ti fatig zot avek sa ki zot vwazen ti panse. Nou de sa ser ki ti pe travay avek mwan ti byen kontan pour plas bokou piblikasyon baze lo Labib, me vi ki mon ti ankor zenn, mon ti mank mon fanmir! Kantmenm sa, mon ti kontan pour obeir konsey ki mon ti’n gannyen.

An 1963 mon ti ganny anvoye Milan kot mon ti pou ede dan preparasyon en lasanble enternasyonal. Tenm sa lasanble ti “Everlasting Good News” (Levanzil Eternel). Pandan lasanble mon ti enn parmi bann ki ti fer  travay volonter. Paolo Piccioli, en zenn frer sorti Florence osi ti la. Dezyenm zour lasanble i ti fer en zoli diskour lo lavi selibater. Mon ti dir dan mwan menm: ‘Sa frer pa pou zanmen marye.’ Kantmenm sa, nou ti konmans ekrir kanmarad e nou ti realize ki nou ti annan bokou keksoz an komen tel ki menm lobzektif, lanmour pour Zeova e en gran dezir pour obeir li. Nou ti marye an 1965.

RANKONT AVEK BANN PRET

Pour di-z-an mon ti fer pionye ordiner Florence. I ti tre ankourazan pour vwar logmantasyon dan bann kongregasyon, espesyalman progre ki bann zenn ti pe fer. Nou de Paolo nou ti kontan pas letan ansanm avek zot pour fer bann konversasyon spirityel ensi ki detant, me pour Paolo sa ti vedir zwe foutbol. Menm si mon ti apresye letan ki mon ti pase avek mon msye, mon ti osi vwar ki sa bann zenn ek bann fanmir ti bezwen e benefisye bokou avek lentere ki Paolo ti demontre dan zot.

Mon touzour dan lazwa ler mon mazin bann letid ki nou ti fer. Enn sa letid ti apel Adriana, i ti koz avek de lezot fanmir lo sa ki i ti pe aprann. Zot ti fer laranzman pour zwenn avek en pret pour diskit lo serten fo lansennyman parey Trinite ek nanm imortel. Trwa levek osi ti vin sa rankont. Bann leksplikasyon ki sa bann levek ek pret ti donnen ti konplike, difisil pour konpran e pa ti konsistan. Nou bann etidyan ek zot fanmir ti fasilman vwar ki zot leksplikasyon pa ti annakor avek Labib. Sa rankont ti anmenn en sanzman enportan dan sa lavil. Avek letan, 15 manm sa bann fanmir ti vin Temwen Zeova.

Byensir, nou fason prese konmela i diferan. Sa letan, Paolo ti vin en eksper an sa ki konsern bann rankont avek bann pret e sa ti ariv souvan. Mon rapel enn sa rankont ki ti ganny fer avek en lodyans ki pa ti Temwen. I ti evidan ki sa bann opozan ti’n aranze davans pour ki serten dan lodyans i demann bann kestyon ki swadizan difisil pour reponn. Me direksyon ki sa diskisyon ti pe ale ti sanze. En dimoun dan lodyans ti demande si legliz i devret mel dan bann zafer politik, parey i ti’n le ka pour plizyer syek. A sa moman, i ti evidan ki sa bann pret ti dan problenm. En sel kou lalimyer ti tennyen e sa miting ti kennsel. Pli tar nou ti aprann ki zot ti’n plàn pour tenny lalimyer an ka sa diskisyon pa ti pe al an faver bann pret.

NOUVO PRIVILEZ

Apre ki nou ti’n marye pour di-z-an, nou ti ganny envite pour fer travay rezyonal. Vi ki Paolo  ti annan en travay ki ti pey byen, sa pa ti en desizyon fasil pour fer. Me apre ki nou ti’n reflesir dan lapriyer, nou ti aksepte sa nouvo privilez. Nou ti kontan bann moman ki nou ti pase avek bann fanmir ki ti aksepte nou kot zot. Dan tar apremidi, nou ti souvan etidye konman en group, e apre Paolo ti ed bann zanfan avek zot devwar lekol, sirtou bann leson matematik. An plis ki sa, Paolo ti kontan lir e i ti en plezir pour li koz avek lezot lo bann keksoz ki batir. Dan Lendi nou ti souvan al prese dan bann lavil kot ti napa Temwen, e nou ti envit bann dimoun pour vin ekout en diskour ki ti pou ganny donnen pli tar apremidi.

Apre ki Paolo ti’n fer travay rezyonal zis pour de-z-an, nou ti ganny envite pour servi Betel Ronm. Paolo ti pou travay dan departman zafer legal e mwan dan Departman Magazin. Malgre i pa ti fasil pour fer sa sanzman, nou ti determinen pour obeir. I ti vreman gou pour vwar biro brans ptitapti agrandi e lasosyasyon frer ek ser Itali vin pli gran. Pandan sa letan, Temwen Zeova ti osi ganny rekonnet legalman. Nou ti vreman kontan dan nou nouvo servis.

Kan nou ti pe servi Betel, nou krwayans konsernan transfizyon disan ti ganny teste. O konmansman bann lannen katreven, en ka ti ganny anmennen ankour kot en koup ki ti Temwen ti ganny akize konmkwa zot ti responsab pour lanmor zot fiy. Sa ti en fo lakizasyon parski zot fiy ti mor pa akoz i pa ti pran disan me akoz en maladi erediter ki ti komen dan rezyon Mediterane. Bann frer ek ser dan Betel ti ed bann avoka ki ti pe reprezant sa koup Kretyen. En brosir ek en edisyon spesyal Awake! ti ede pour fer dimoun konn laverite ek pwennvi Labib lo disan. Pandan sa bann mwan Paolo ti souvan travay 16 erdtan par zour san poze. Mon ti fer mon mye pour siport li dan sa travay enportan.

EN LOT SANZMAN

Nou ti’n marye pour 20-t-an kan en keksoz san ekspekte ti arive. Mon ti annan 41 an e Paolo ti annan 49 an kan mon ti dir li ki mon krwar mon ti ansent. Sa zour, i ti ekrir dan son dayri: “Lapriyer: Si i vre, ed nou pour reste dan servis a plen tan, devoue spirityelman e ed nou pour vin bann bon paran. Pli enportan ankor, ed mwan met an pratik omwen 1 poursan tou sa ki mon’n deza dir lo platform pandan sa 30 dernyen lannen.” Ler nou ti vwar sa ki ti arive pli tar, Zeova ti’n bezwen reponn son lapriyer ek sa ki pour mwan.

Nesans Ilaria ti anmenn bann gran sanzman dan nou lavi. I ti annan bann moman kot nou ti  dekouraze parey Proverb 24:10 i dir: “Eski ou’n montre ou dekouraze dan letan ladetres? Ou lafors pou ptigin.” Me nou ti touzour rapel ki i bon pour touzour siport kanmarad.

Ilaria i touzour dir ki i kontan ki son paran i de Temwen ki devoue dan servis a plen tan. I pa’n zanmen santi li ganny neglize e i’n grandi dan en fanmir toutafe normal. Pandan lazournen mon ti reste avek li. Menm si Paolo ti annan ankor travay pour fer kan i ti retourn kot lakour, i ti touzour fer letan pour zwe avek Ilaria e pour ed li avek son devwar lekol. I ti fer sa menm si parfwa i ti bezwen reste ziska de-z-er oubyen trwa-z-er bomaten pour fini son travay. Ilaria ti souvan dir: “Papa i mon pli bon zanmi.”

Nou ti bezwen byen servi disiplin e parfwa azir dan en fason ferm pour kapab ed Ilaria reste dan semen laverite. Mon rapel en fwa i ti mal azir anver enn son kanmarad ki i ti pe zwe avek. Nou ti servi Labib pour montre li akoz i pa ti devret azir dan sa fason. Nou ti osi fer li demann leskiz avek son zanmi devan nou.

Ilaria i dir fransman ki i apresye lanmour ki son paran i annan pour predikasyon. Aprezan ki i’n marye, i konpran pli byen lenportans pour obeir e swiv gidans Zeova.

OBEISAN MENM DAN BANN MOMAN TRIS

An 2008, Paolo ti aprann ki i ti annan kanser. O konmansman, i ti paret ki i ti pou kapab ganny geri e i ti ankouraz mwan bokou. An plis ki rod sa pli bon swen medikal, nou de Ilaria nou ti priy bokou e demann Zeova lafors pour andire. Kantmenm sa, i pa ti en keksoz fasil pour vwar en zonm ki ti annan sitan lafors ek lenerzi gradyelman deteryore. Son lanmor an 2010 ti sagrin mwan en kantite. Me, mon ganny rekonforte par mazin tou sa bann keksoz ki nou’n kapab akonplir ansanm pandan nou 45 an maryaz. Nou’n donn Zeova nou meyer e mon konnen ki i pa pou oubliy travay ki nou’n fer. Dapre parol Zezi dan Zan 5:28, 29, mon pe esper avek enpasyans sa zour ki Paolo pou resisite.

Dan mon leker, mon ankor sa pti fiy ki kontan zistwar Noe. Mon ankor annan sa menm determinasyon. Mon anvi obeir tou sa ki Zeova i demann mwan pour fer. Mon’n aprann ki tou problenm nou pas atraver, sakrifis ki nou fer oubyen menm si nou perdi en dimoun dan lanmor, tou sa i pa en gran keksoz ler nou konpar zot avek sa bann benediksyon ki nou Papa lanmour i donn nou. Personnelman mon’n eksperyans sa e mon asir ou ki i vo lapenn obeir Zeova.

[Portre lo paz 3]

[Portre lo paz 4]

Zour nou ti marye

[Portre lo paz 4]

Nou ti kontan pas letan avek bann zenn, e pour Paolo sa ti vedir zwe foutbol

[Portre lo paz 5]

Paolo ti kontan son travay dan Betel

[Portre lo paz 5]

Ilaria ti souvan dir, “Papa i mon pli bon zanmi”

[Ekstre lo paz 6]

“Dan mon leker, mon ankor sa pti fiy ki kontan zistwar Noe. Mon ankor annan sa menm determinasyon”

[Portre lo paz 6]