Zot ti volonterman servi—Meksiko

I EN lazwa pour vwar sa kantite zenn Temwen Zeova ki pe senplifye zot lavi pour kapab fer plis dan minister Kretyen. (Mat. 6:22) Ki sanzman zot bezwen fer? Ki difikilte zot fer fas avek? Pour konnen, annou fer konnesans avek serten ki pe aktyelman servi Meksiko.

“NOU TI POU BEZWEN FER EN SANZMAN”

Apre zot maryaz an Zanvye 2007, Dustin ek Jassa sorti Leta-z-ini, ti realiz zot rev pour ganny en bato lavwal ki zot ti kapab reste lo la. Zot ti mouy zot bato o bor lavil Astoria, Oregon, Leta-z-ini, pa lwen avek losean Pasifik. I en zoli landrwa antoure avek bann pti montanny ranpli avek pye dibwa ek bann gran montanny ki ti kouver avek lanez. Dustin i dir: “Partou kot ou ti gete, sa ki ou vwar ti enpresyonan.” Sa koup ti panse ki zot ti pe viv en lavi senp e ki zot ti pe depan lo Zeova. Zot ti panse, ‘Apre tou, nou ti pe viv lo en bato 7.9 met, nou ti travay amitan, asiste lasal dan en kongregasyon ki koz en lot langaz, e souvan nou ti fer pionye asistan.’ Me apre en pe letan zot ti realize ki zot ti pe anbet zot lekor. Dustin i dir: “Dan plas siport kongregasyon laplipar di tan nou ti pe repar nou bato. Nou ti santi ki si nou ti vreman anvi  met Zeova premye dan nou lavi, nou ti pou bezwen fer en sanzman.”

Jassa ti azoute: “Avan marye, mon ti reste Meksiko e mon ti dan en kongregasyon ki koz Angle. Mon ti kontan servi laba e mon ti vreman anvi retournen.” Pandan ladorasyon fanmir, pour ranforsi zot dezir pour servi dan en lot pei, Dustin ek Jassa ti lir leksperyans bann frer ek ser ki ti pres dan bann teritwar ki ti’n pare pour larekolt. (Zan 4:35) Dustin ti dir: “Sanmenm sa kalite lazwa ki nou anvi eksperyanse.” Alors kan zot bann zanmi Meksiko ti dir zot ki en nouvo group ti bezwen led, Dustin ek Jassa ti fer zot desizyon. Zot ti aret zot louvraz, vann zot bato e al Meksiko.

“SA PLI BON KEKSOZ KI’N DEZA ARIVE AVEK NOU”

Dustin ek Jassa ti etabli zot dan en lavil ki apel Tecomán dan bor losean Pasifik menm, me apepre 4,345 kilomet sid avek Astoria. Dustin i dir: “Dan plas santi en pti divan fre e vwar bann zoli montanny, i ti annan en lasaler enkrwayab e partou kot ou gete ou vwar zis pye limon.” O konmansman, zot pa ti ganny travay. Avek letan, zot larzan ti preski fini e zot ti zis kapab aste beans ek diri pour manze semenn apre semenn. Jassa i dir, “Zis konman nou ti santi ki nou ti nepli kapab avek sa kalite manze, nou bann etidyan ti donn nou mang, bannann, papay e byensir bann sak plen avek limon.” Avek letan, Dustin ek Jassa ti konmans travay avek en lekol ki ansenny langaz. Sa lekol i baze Taywann e i donn bann kour atraver Internet. Lapey ki zot gannyen i ase pour pran swen avek zot bezwen sak zour.

Ki mannyer Dustin ek Jassa i santi anver zot nouvo lavi? Zot dir: “Sa sanzman i sa pli bon keksoz ki’n deza arive avek nou. Nou relasyon avek Zeova e avek kanmarad in vin pli for ki nou ti pe ekspekte. Tou le zour nou fer bokou keksoz ansanm, par egzanp, al predikasyon, diskite ki mannyer pour ed nou bann etidyan Labib, e prepar nou bann renyon. Nou osi napa okenn presyon parey nou ti annan dan lepase.” Zot ti azoute: “La aprezan nou apresye pour konpran laverite sa promes dan Psonm 34:8 ki dir, ‘goute e vwar konman Zeova i bon.’”

KWA KI MOTIV PLIZYER MILYE VOLONTER?

Plis ki 2,900 frer ek ser marye ouswa selibater, bokou dan zot ventenn oubyen trantenn lannen in al servi dan bann rezyon Meksiko kot i annan en bezwen pour plis proklanmater. Akoz tou sa bann Temwen i deside fer sa travay ki annan bokou defi?  Kan en group zot ti ganny demande sa kestyon, zot ti donn trwa rezon prensipal. Ki sa trwa rezon?

Pour demontre lanmour pour Zeova e zot prosen. Leticia ki’n batize a laz 18 an i dir: “Kan mon ti dedye mon lavi avek Zeova, mon ti konpran ki sa ti vedir ki mon devret servi li avek tou mon leker ek lam. Alor pour demontre ki mon kontan li avek tou mon leker, mon ti anvi depans plis mon letan ek lenerzi dan son servis.” (Mark 12:30) Hermilo, ki aprezan in marye avek Leticia, ti dan son 20-t-an kan i ti al servi kot i ti annan bezwen pour plis proklanmater Rwayonm. I dir: “Mon ti realize ki konble bezwen spirityel lezot ti pou sa meyer fason pour demontre lanmour pour mon prosen.” (Mark 12:31) Alor, i ti kit Monterrey, en lavil prospere kot i ti travay dan en labank, e annan en lavi konfortab pour al reste dan en pti lavil.

Pour eksperyans vre lazwa ki dirab. Pa bokou letan apre son batenm, Leticia ti akonpanny en ser pionye byen eksperyanse dan en lavil izole kot zot ti pres pour en mwan. Leticia i rapel: “Mon ti enpresyonnen pour vwar ki dimoun ti byen azir anver sa bon nouvel ki nou ti pe partaz avek zot, e sa ti donn mwan bokou lazwa. A lafen sa mwan mon ti dir dan mwan menm, ‘Sanmenm ki mon anvi fer avek mon lavi!’” Pareyman, Essly, en ser selibater dan son 20-t-an ti dir ki i ti sa lazwa ki ou gannyen dan sa travay ki ti pous li pour antreprann sa servis. Kan i ti ankor lekol segonder, i ti ganny sans zwenn plizyer Temwen devoue ki’n servi kot i ti annan bezwen. I dir: “Kan mon ti vwar lazwa lo figir sa bann frer ek ser, sa ti fer mwan anvi sa kalite lavi ki zot ti pe viv.” Bokou ser in azir parey Essly. Anfet i annan plis ki 680 ser selibater ki servi kot i annan plis bezwen Meksiko. Pa sa i en bon legzanp pour nou tou, ki swa zenn oubyen aze!

Pour viv en lavi ki annan en bi e satisfezan. Kan i ti fini lekol segonder, Essly ti ganny ofer en labours pour al liniversite. Son bann zanmi ti ankouraz li pour aksepte sa labours, pourswiv en “lavi normal,” ganny en degre, en karyer, en loto, e pran letan pour vwayaze. Me i pa ti swiv zot konsey. Essly i dir: “Plizyer mon bann zanmi Kretyen in tay deryer sa bann keksoz, me mon ti remarke ki bann lobzektif spirityel pa ti en priyorite dan zot lavi. Mon ti osi vwar ki zot ti vin fristre akoz sa bann problenm ki zot ti rankontre ler zot ti kontinyen enplik zot dan bann aktivite sa lemonn. Mwan, mon ti anvi profit mon zenes pour servi Zeova plennman.”

 Essly ti swazir en formasyon vokasyonnel ki ti ed li trouv en travay pour siport son lekor finansyerman an menm tan ki i ti fer pionye, e apre i ti al dan en landrwa kot i ti annan bezwen pour plis proklanmater. I ti menm deside pour aprann langaz Otomi ek Tlapaneco. Apre ki i ti’n pas trwa-z-an dan bann landrwa izole i dir: “Servi kot i annan plis bezwen in anmenn satisfaksyon e en vre bi dan mon lavi. Pli enportan ankor, mon relasyon avek Zeova in vin pli for.” Phillip ek Racquel, en koup dan zot 30 an ki sorti Leta-z-ini i dir: “Sa lemonn pe sanz vitman e bokou i santi ki zot lavi pa stab. Me kan nou servi kot i annan ankor bokou dimoun ki ekout mesaz Labib, sa i donn nou en vre bi dan lavi. Sa i vreman satisfezan!”

KI MANNYER POUR SIRMONT BANN DEFI

Byensir, i annan bann defi pour sirmonte dan teritwar kot i annan bezwen pour plis proklanmater. Enn parmi sa bann defi se ki mannyer pour pran swen avek ou fanmir finansyerman. Pour fer sa ou bezwen adapte avek sirkonstans lokal. Verónica en pionye byen eksperyanse i eksplike: “Dan en landrwa kot mon ti servi mon ti prepar e vann manze senp e bon marse. Dan en lot landrwa mon ti vann lenz e koup seve. Me konmela, mon netway lakaz, ansenny en laklas pour bann ki fek vin paran konman pour kominik avek zot zanfan.”

I kapab difisil pour adapte avek en group dimoun ki annan en lot kiltir ek koutim ki viv dan en landrwa izole. Sanmenm sa ki ti arive avek Phillip ek Racquel kan zot ti servi dan en rezyon kot dimoun i koz langaz Nahuatl. Phillip i dir: “I ti annan en gran diferans ant zot kiltir avek sa ki pour mwan.” Kwa ki ti ed zot pour adapte? Phillip i dir: “Nou ti konsantre lo bann keksoz pozitif ki nou ti vwar parmi bann Nahuatl, par egzanp, sa lyen pros parmi bann manm fanmir e sa senserite ek zenerozite ki zot ti demontre antre zot.” Racquel i azoute: “Nou ti aprann bokou keksoz avek nou bann frer ek ser ki ti pe servi ansanm avek nou dan sa kominote.”

PREPARASYON

Si ou anvi servi dan en landrwa izole kot i annan bezwen, ki ou kapab fer pour prepar ou? Bann frer ek ser byen eksperyanse dan sa servis i dir: “Avan ou deplase, konmans senplifye ou lavi e aprann kontant ou avek sa ki ou annan. (Fili. 4:11, 12) Kwa ankor ki ou kapab fer? Leticia i dir: “Mon evit bann travay ki ti pou obliz mwan reste dan menm landrwa tro lontan. Mon ti anvi kapab deplase nenport ki ler pour al nenport ki landrwa.” Hermilo i dir: “Mon’n aprann kwi manze, lave e drese.” Verónica li i dir: “Kan mon ti ankor kot mon paran avek mon bann frer ek ser, mon ti ede avek netwayaz lakour, prepar manze ki pa ser e nourisan. Mon’n osi aprann konman pour met larzan dekote.”

Levi ek Amelia ki sorti Leta-z-ini e ki annan wit an depi ki zot in marye i montre ki mannyer lapriyer in ed zot prepar zot avan al servi Meksiko. Levi i dir: “Nou ti kalkile ki kantite larzan nou ti pou bezwen pandan enn an dan sa pei, e apre nou ti demann Zeova dan lapriyer pour nou ganny sa sonm egzakt.” Dan zis detrwa mwan zot ti atenn zot lobzektif ki zot ti’n mansyonnen dan lapriyer e san tarde zot ti ale. Levi i dir: “Zeova in reponn nou demann spesifik, aprezan i nou tour pour fer nou par.” Amelia li i ti azoute: “Nou ti krwar ki nou ti pou kapab reste zis pour enn an, me nou’n laba pour set an e nou pa pe mazin retournen! Reste isi in permet nou vwar personnelman ki mannyer Zeova i ed son bann serviter. Tou le zour nou vwar laprev son labonte.”

Adam ek Jennifer en koup ki sorti Leta-z-ini ki pe servi dan en teritwar ki koz Angle, Meksiko, i dir ki lapriyer ti zwe en rol enportan pour zot. Zot ti sizere: “Nou pa devret esper sa sirkonstans parfe. Koz lo sa dezir ki ou annan dan lapriyer e azir an armoni avek ou lapriyer. Senplifye ou lavi, ekrir biro brans sa pei kot ou ti a kontan al servi, e apre ki ou’n kalkil ou bidze, azir deswit.” * Si ou fer sa, en lavi eksitan ek bann trezor spirityel pe esper ou.

[Not anba lo paz]

[Portre lo paz 3]

Dustin ek Jassa

[Portre lo paz 4]

Amelia ek Levi

[Portre lo paz 4]

Racquel ek Phillip

[Portre lo paz 4]

Essly

[Portre lo paz 5]

Leticia ek Hermilo

[Portre lo paz 5]

Verónica

[Portre lo paz 5]

Adam ek Jennifer