Vey bann lentansyon ki dan ou leker

Labib i dir: “Leker i pli tret ki okenn keksoz e i tre move.” (Zer. 17:9) Ler nou leker i vreman anvi en keksoz, pa nou esey rod rezon pour akonplir son dezir?

Labib i averti nou: “Dan leker i sorti move panse ki fer dimoun touye, fer adilter, e fer bann move laksyon, vole, kalomni, e malparl dimoun.” (Mat. 15:19) Nou leker senbolik i kapab trai nou e fer nou zistifye nou lekor pour fer en keksoz ki kont lavolonte Bondye. Nou kapab menm pa realize sa ki’n arive ziska ler nou’n azir dan en move fason. Kwa ki kapab ed nou konn nou bann dezir oubyen lentansyon ki dan nou leker avan nou fer en keksoz mal?

KONMAN POUR IDANTIFYE OU LENTANSYON?

Lir Labib tou le zour e medit lo sa ki i dir. Zapot Pol ti ekrir: “Parol Bondye i vivan e i annan pisans. I pli koupe ki en lepe ki koup de kote. I kapab penetre ziska separasyon lam ek lespri.” Parol Bondye ki ganny trouve dan Labib “i arive desifre tou dezir ek sekre leker imen.” (Ebr. 4:12) Kan nou servi Labib pour egzamin nou lekor, sa i kapab ed nou pour idantifye nou bann dezir oubyen lentansyon dan nou leker. Pa i vreman enportan ki nou lir Parol Bondye tou le zour e medit lo sa ki i dir! Ler nou fer sa, nou adopte bann panse ek pwennvi Bondye.

Ler nou aksepte konsey Labib e aplik son bann prensip, sa pou annan en lefe lo nou konsyans, sa abilite ki nou annan anndan nou pour fer ladiferans ant sa ki byen ek sa ki mal. (Rom. 9:1) Nou  konsyans i kapab anpes nou pour rod leskiz pour fer en keksoz mal. Deplis, dan Labib, i annan bann legzanp ki’n ganny “ekrir konman en lavertisman pour nou.” (1 Kor. 10:11) Si nou tir leson avek sa bann legzanp, sa pou anpes nou al dan en move direksyon. Ki sakenn ant nou i devret fer?

Priy Bondye pour ed nou idantifye bann lentansyon nou leker. Zeova i “egzamin leker.” (1 Kron. 29:17) I “pli gran ki nou leker e i konn tou.” (1 Zan 3:20) Bondye pa kapab ganny anbete. Si dan nou lapriyer, nou senserman eksprim nou bann konsern, santiman ek dezir, Zeova i kapab ed nou pour disern bann lentansyon dan nou leker. Nou menm kapab demann Bondye pour ‘kre dan nou en leker pir.’ (Ps. 51:10) Pour konn nou bann dezir oubyen lentansyon, i vreman enportan ki nou pa negliz lapriyer.

Port byen latansyon pandan bann renyon Kretyen. Kan nou reste byen atantif pandan renyon, sa pou ed nou egzamin sa ki nou vreman ete anndan andotmo nou leker. Menm si nou pa ganny nouvo lenformasyon dan sak renyon, ler nou asiste renyon, nou pli byen konpran bann prensip Labib ensi ki bann rapel enportan ki ed nou pour analiz bann dezir nou leker. Komanter nou bann frer ek ser i osi enportan pour ed nou rafin sa ki nou ete anndan. (Prov. 27:17) Si nou izol nou lekor olye zwenn ansanm avek nou bann frer ek ser Kretyen dan renyon, sa i kapab annan en move lefe lo nou. I kapab fer nou ‘rod nou prop dezir egois.’ (Prov. 18:1) Alor i byen pour nou demann nou lekor sa kestyon, ‘Eski mon abitye asiste tou bann renyon e tir bann byenfe avek sa ki ganny dir?’​—Ebr. 10:24, 25.

KOTE NOU LEKER POU ANMENN NOU?

Nou leker i tret e i kapab fer nou drive dan bokou laspe nou lavi. Annou egzamin kat laspe: tay deryer keksoz materyel, lalkol, nou kalite zanmi e sa ki nou fer dan detant.

Tay deryer keksoz materyel. Sa dezir pour satisfer nou bann bezwen fizik i natirel. Par kont, Zezi ti averti nou konsernan atas tro bokou lenportans avek bann keksoz materyel. Dan enn son bann parabol, Zezi i envit nou pour reflesir lo legzanp en zonm ris ki son bann stor ti plen e ki i ti napa plas pour anmas lezot rekolt. Sa zonm ti anvi kas son bann stor e fer bann ki pli gran. I ti rezonnen: “La mon a ranmas tou mon lagrenn ek lezot rekolt. ‘Apre mon a dir dan mwanmenm, rekolt ki ou’n ranmase i ase pour plizyer lannen; alor repoz ou, manze, bwar e anmize!’” Me, sa zonm ris pa ti pran an konsiderasyon ki i ti kapab mor sa menm zour swar.​—Lik 12:16-20.

Anmezir ki nou vin pli aze, nou kapab konmans trakas tro bokou pour lavenir. Sa lanvi pour santi nou an sekirite lo plan materyel ler nou vye i kapab fer nou konmans rod leskiz pour fer overtaym zour renyon oubyen konmans negliz nou bann responsabilite Kretyen dan en fason ou  en lot. Pa nou devret vey byen ki nou pa devlop en latitid koumsa? Oubyen nou zenn e nou realize ki servis a plen tan i sa pli bon karyer. Kantmenm sa, eski nou refize fer pionye akoz nou mazinen ki i pli bon pour vin stab finansyerman avan? Pa nou devret fer nou mye la konmela pour vin ris devan Bondye? Lekel ki konnen si nou pou ankor vivan demen?

Lalkol. Proverb 23:20 i dir: “Pa frekant bann bwarer diven.” Si en dimoun i kontan bwar lalkol, i kapab tant pour zistifye son lekor si i bwar souvan. I kapab dir ki i bwar pour relaks me pa pour sou. Si nou bezwen lalkol pour relaks, petet i’n ler pour egzamin bann dezir nou leker onnetman.

Nou kalite zanmi. I vre ki nou pa kapab evite annan kontak avek bann dimoun ki pa Temwen, par egzanp kot lekol, kot travay e ler nou dan predikasyon. Me sa i diferan avek pas letan avek zot oubyen menm devlop en relasyon pros avek zot. Eski nou aksepte sa kalite frekantasyon akoz nou krwar ki zot annan bann bon kalite? Labib i averti nou: “Pa les zot ganny anbete: ‘Move frekantasyon, i gat repitasyon.’” (1 Kor. 15:33) Zis parey en ptigin pwazon i sifi pour kontamin delo prop, lanmitye avek bann ki pa pratik vre ladorasyon i kapab kontamin nou spirityelman e fer nou aksepte bann pwennvi sa lemonn, zot fason sanze, koze ek konportman.

Sa ki nou fer dan detant. Teknolozi modern i fer li fasil pour nou ganny akse avek diferan kalite divertisman. En bon pe sa bann divertisman i pa apropriye pour en Kretyen. Pol ti ekrir: “Zot devre alor veye ki tou form aktivite . . . imoral, . . . pa menm ganny mansyonnen parmi zot.” (Efe. 5:3) Me si nou leker i atire anver bann film oubyen lanmizik ki sal? Nou kapab mazinen ki tou dimoun i bezwen relaks oubyen detann zot e lafason ki sak dimoun i deside fer li i en keksoz personnel. Me annou pran konsey zapot Pol aker e pa les okenn keksoz sal antre dan nou lizye oubyen zorey.

NOU KAPAB FER SANZMAN

Si i’n arive ki nou’n les nou leker tronp nou e nou’n devlop labitid pour zistifye nou lekor ler nou fer sa ki mal, nou kapab sanze. (Efe. 4:22-24) Annou vwar de legzanp modern.

Miguel * ti bezwen aziste son fason panse konsernan bann keksoz materyel. I dir: “Mon madanm, mon garson ek mwan, nou sorti dan en pei kot i vreman enportan pour ganny pli bon e dernyen model teknolozi ek konfor. A en serten pwen, mon ti fer tou pour ganny tou sa ki mon ti kapab dan lemonn, an krwayan ki mon ti kapab fer sa san ki mon vin materyalis. Pa lontan apre, mon ti realize ki tay deryer bann keksoz materyel pa zanmen fini. Mon ti priy Zeova konsernan mon fason panse ek lentansyon mon leker. Mon ti dir li ki konman en fanmir, nou ti anvi servi li avek tou nou leker. Nou ti deside senplifye nou lavi e al kot i ti annan plis bezwen. Nou pa ti tarde pour konmans fer servis pionye. Nou’n aprann ki nou pa bezwen annan en kantite keksoz materyel pour nou annan en lavi satisfezan e ere.”

Leksperyans Lee i montre ki ler i ti egzamin son lekor onnetman, sa ti ed li pour rezet son move frekantasyon. Lee i dir: “Akoz mon travay, mon ti souvan asosye avek bann komersan etranze. I ti eksitan pour mwan asiste sa bann renyon travay menm si mon ti konnen ki i ti pou annan en kantite labwason. En kantite fwa, mon ti pros pour sou, me mon ti regrete apre. Mon ti bezwen egzamin mon leker onnetman. Konsey Parol Bondye ek sizesyon bann ansyen ti ed mwan pour realize ki mon ti pe rod lasosyasyon avek bann dimoun ki pa ti kontan Zeova. Konmela, tan ki i posib, mon servi plis telefonn dan mon biznes e mon esey minimiz mon kontak avek bann komersan.”

Nou bezwen onnet avek nou lekor e idantifye bann lentansyon nou leker. Anmezir nou fer sa, nou devret rod led Zeova dan lapriyer parski i “konn bann sekre leker.” (Ps. 44:21) Bondye in osi donn nou son Parol, ki nou kapab servi parey en laglas. (Zak 1:22-25) Bann rapel ek konsey ki nou gannyen atraver bann piblikasyon ki baze lo Labib ek nou bann renyon i osi vreman enportan. Avek sa bann kalite provizyon, nou kapab protez nou leker e kontinyen mars lo bann santye ladrwatir.

[Not anba lo paz]

[Portre lo paz 22]

[Portre lo paz 23]

Ki lefe lir Labib tou le zour i annan lo nou leker senbolik?

[Portre lo paz 23]

Nou lapriyer i ed nou pour konn sa ki nou vreman ete anndan

[Portre lo paz 23]

Bann renyon Kretyen i ed nou pour konn bann lentansyon nou leker