Zenn, pourswiv bann Lobzektif ki onor Bondye
Zenn, pourswiv bann Lobzektif ki onor Bondye
“Fer li ou bi pour antrenn ou lekor ziska ou devlop latasman pour Bondye.”—1 TIMOTE 4:7, NW.
1, 2. (a) Akoz Pol ti felisit Timote? (b) Ki mannyer bann zenn ozordi pe ‘fer li zot bi pour antrenn zot lekor ziska zot devlop latasman pour Bondye’?
“P ERSONN pa’n partaz mon gran preokipasyon parey li, e pran sousi vreman pour zot byennet. . . . In travay ansanm avek mwan konman en garson avek son papa dan servis levanzil.” (Filipyen 2:20, 22) Zapot Pol ti enkli sa felisitasyon ranpli avek lanmour dan son let pour bann Kretyen dan premye syek dan kongregasyon Filip. Lekel ki i ti pe felisite? I ti pe felisit Timote, en zenn ki ti vwayaz avek li dan son servis misyonner. Sirman sa lanmour ek konfyans ki Pol ti annan dan li, ti’n bezwen tous Timote en kantite!
2 Bann zenn ozordi ki spirityel parey Timote, zot in toultan ganny byen servi parmi pep Bondye e zot presye. (Psonm 110:3) Ozordi i annan en kantite zenn dan lorganizasyon Bondye ki pionye, misyonner, ki volonter pour konstriksyon e ki Betelit. I osi annan bann lezot zenn ki vreman merit ganny felisite, akoz avek devouman zot partisip dan bann aktivite kongregasyon anmenmtan ki zot bezwen desarz lezot responsabilite. Sa bann zenn i ganny sa vre satisfaksyon dan lavi, akoz zot pe pourswiv bann lobzektif ki onor nou Papa dan lesyel, Zeova. Zot pe vreman fer li ‘zot bi pour antrenn zot lekor ziska zot devlop latasman pour Bondye.’—1 Timote 4:7, NW, 8.
3. Ki kestyon nou pou reponn dan sa lartik?
3 Si ou en zenn, eski ou pe fer zefor pour akonpli bann lobzektif spirityel ki spesifik. Kote ou kapab ganny led ek lankourazman pour ed ou akonpli ou bann lobzektif? Ki mannyer ou kapab rezet sa presyon pour vin materyalis? Ki benediksyon ou kapab gannyen si ou pourswiv bann lobzektif ki onor Bondye? Pour reponn sa bann kestyon annou egzaminen ki kalite lavi ek karyer Timote ti swazir.
Lanfans Timote
4. An bref fer resorti ki Timote ti akonpli konman en Kretyen.
4 Timote ti grandi dan en pti lavil ki apel Lis dan provens Galat dan lanpir Romen. I kapab ki i ti tann koz lo lafwa Kretyen pour premye fwa kan i ti en adolesan, letan Pol ti vin prese Lis apepre lannen 47 N.L. Deswit i ti konmans ganny en tre bon repitasyon parmi bann frer ek ser dan son kongregasyon. De zan plitar, kan i ti retourn Lis, apre ki i ti’n tande ki mannyer Timote ti’n progrese, Pol ti swazir Timote pour akonpanny li dan son servis misyonner. (Akt 14:5-20; 16:1-3) Anmezir ki Timote ti vin pli matir, i ti ganny bann pli gro responsabilite, enkli sa latas tre tre enportan pour fortifye son bann frer ek ser. An lannen 65 N.L., kan Pol ti dan prizon Ronm, i ti ekrir Timote en let e sa letan Timote ti en ansyen dan kongregasyon Efez.
5. Dapre 2 Timote 3:14, 15, ki sa de keksoz ki ti ed Timote pour pourswiv bann lobzektif spirityel?
5 I kler ki Timote ti swazir pour pourswiv bann lobzektif spirityel. Me kwa ki ti pous li pour fer sa? Dan son dezyenm let ki i ti ekrir Timote, Pol ti fer resorti de keksoz ki ti pous Timote dan sa direksyon. I ti ekrir: “Reste ferm dan sa ki ou’n aprann, e dan sa ki ou’n vreman krwar: ou konnen oumenm avek ki ou’n ganny sa lansennyman. Depi ou lanfans ou konn Lekritir sakre.” (2 Timote 3:14, 15, nou ki’n met an italik) Premyerman, annou egzaminen ki rol lezot Kretyen ti zwe pour ed Timote fer sa bann swa.
Bon Lenfliyans i fer bon Lefe
6. Ki formasyon Timote ti gannyen e ki latitid i ti annan?
6 Timote ti grandi dan en fanmiy kot son paran pa ti annan menm krwayans. Son papa ti en Grek e son manman, Enis ek son granmanman, Lois, zot zot ti Zwif. (Akt 16:1) Depi ki i ti ankor pti pti, son manman ek granmanman ti etidye Lekritir Ebre avek li pour li konn laverite. Me apre ki Enis ek Lois ti’n konverti pour vin Kretyen, san dout zot ti persyad Timote pour aksepte bann lansennyman Kretyen. I kler ki Timote ti profit omaksimonm sa bon formasyon ki i ti pe gannyen. Zapot Pol ti dir: “Mon rapel ou lafwa senser, sa lafwa ki ou gran manman Lois ek ou manman Enis ti posede avan ou, e ki aprezan, mon sir, ou posede ou osi.”—2 Timote 1:5.
7. Kwa ki en benediksyon pour bokou zenn e ki byenfe sa i anmennen pour zot?
7 Ozordi bokou zenn ki zot paran oubyen gran paran i annan lakrent pour Bondye, i en benediksyon pour zot, akoz parey Lois ek Enis, pour zot i tre enportan pour bann zenn annan lobzektif spirityel. Par egzanp, Samira i ankor mazin sa bann gran konversasyon ki li ek son paran ti fer ler i ti ankor adolesan. I rakonte: “Mon manman ek papa ti ansenny mwan pour annan menm pwennvi avek Zeova, e pour met predikasyon premye dan mon lavi. Zot ti toultan ankouraz mwan pour pourswiv servis aplentan.” Samira ti aksepte sa lankourazman ki son paran ti donn li e ozordi i annan sa privilez pour form parti lafanmiy Betel dan son pei. Zenn, si ou paran i ankouraz ou pour toultan gard bann lobzektif spirityel antet, pran zot konsey aker. Zot anvi sa ki pli meyer pour ou.—Proverb 1:5.
8. Ki byenfe Timote ti gannyen kan i ti frekant bann Kretyen ki ti ankouraz li?
8 I osi enportan ki ou frekant bann frer ek ser Kretyen ki pou ankouraz ou. Bann ansyen dan son kongregasyon ek bann dan Ikonyonm, ki apepre 30 kilomet avek son kongregasyon, ti konn Timote tre byen. (Akt 16:1, 2) I ti vin pros avek zapot Pol, en zonm ki ti annan bokou lenerzi. (Filipyen 3:14) Dan bann let ki Pol ti ekrir, i montre ki Timote ti aksepte konsey e i pa ti tarde pour imit lafwa lezot. (1 Korentyen 4:17; 1 Timote 4:6, 12-16) Pol ti ekrir: “Ou’n swiv byen mon bann lansennyman, mon kondwit, mon bann laspirasyon, mon lafwa, mon pasyans, mon lanmour, mon perseverans.” (2 Timote 3:10) Wi, Timote ti pran sa menm semen ki zapot Pol ti pran. Pareyman zenn, si ou vin pros avek sa bann ki for spirityelman, ou pou ganny sa led pour annan bann bon lobzektif spirityel.—2 Timote 2:20–22.
Etidye “Lekritir sakre”
9. Apard annan bon frekantasyon, ki lot keksoz ou bezwen fer pour ‘antrenn ou lekor ziska ou devlop latasman pour Bondye’?
9 Eski bon frekantasyon i sifi pour akonpli bann lobzektif spirityel? Non. Zis parey Timote, ou pou bezwen egzamin seryezman “Lekritir sakre.” Petet ou pa en dimoun ki kontan etidye, me pa bliye ki Timote ti bezwen ‘fer li son bi pour antrenn son lekor ziska i ti devlop latasman pour Bondye.’ Souvan bann atlet i bezwen antrenn zot lekor vreman dir pour plizyer mwan pour zot kapab akonpli zot lobzektif. Pareyman, i demann sakrifis ek bokou zefor pour kapab akonpli bann lobzektif spirityel. (1 Timote 4:7, 8, 10, not anba lo paz dan NW) Petet ou kapab demande, ‘Ki mannyer ler mon etidye Labib sa pou ed mwan akonpli mon bann lobzektif?’ Annou egzamin trwa fason.
10, 11. Akoz Labib pou motiv ou pour akonpli ou bann lobzektif spirityel? Donn en legzanp.
10 Premyerman, Labib pou donn ou sa bon motivasyon. Labib i fer nou konn sa zoli personnalite ki nou Papa dan lesyel i annan, sa pli gran aksyon ki i’n fer pour demontre son lanmour anver nou, ek benediksyon eternel ki i’n rezerve pour son bann serviter fidel. (Amos 3:7; Zan 3:16; Romen 15:4) Anmezir ki ou konn plis lo Zeova, pli ou lanmour pour li ek sa lanvi pour dedye ou lavi avek li pou vin pli for.
11 Dapre bokou zenn Kretyen, zot dir ki en letid personnel ki regilye ti zwe en rol tre enportan pour ed zot viv laverite. Par egzanp, Adele, ki ti grandi dan en lakour kot son paran ti Temwen, pa ti zanmen annan okenn lobzektif spirityel. I dir: “Mon paran ti anmenn mwan kot Lasal Rwayonm avek zot, me mon ti napa en letid personnel e mon pa ti ekoute dan renyon.” Apre ki son ser ti batize, Adele ti konmans vin pli serye dan laverite. “Mon ti annan sa lobzektif pour lir Labib an antye. Mon ti lir zis en pti gin, e apre mon ti ekri en komanter lo sa ki mon’n fek lir. Mon ankor annan tou mon not. Mon ti lir Labib dan enn an.” E an rezilta, Adele ti ganny pouse pour dedye son lavi avek Zeova. Menm si i andikape, ozordi i en pionye oubyen en proklanmater aplentan.
12, 13. (a) Ki sanzman en letid Labib i kapab ed en zenn pour fer, e konman i kapab fer sa? (b) Donn legzanp pour montre ki Parol Bondye i annan lasazes pratik.
12 Dezyenmman, Labib pou ed ou fer bann sanzman ki neseser dan ou personnalite. Zapot Pol ti dir Timote ki “Lekritir . . . i itil pour ansennyen, pour koriz lerer, pour remet drwat, e pour formen pour viv byen selon Bondye, pour ki dimoun ki servi Bondye i byen prepare e byen ekipe pour fer tou aksyon ki bon.” (2 Timote 3:16, 17) Kan ou regilyerman reflesir lo bann keksoz ki annan pour fer avek Parol Bondye, e par aplik bann prensip Labib dan ou lavi, ou pe les lespri sen rafin ou personnalite. Lespri sen pou ed ou devlop bann kalite tre enportan parey limilite, perseverans, devouman ek lanmour senser pour ou bann frer ek ser Kretyen. (1 Timote 4:15) Timote ti annan sa bann kalite, e se pour sa rezon ki i ti byen itil pour zapot Pol ek bann kongregasyon ki i ti servi.—Filipyen 2:20-22.
13 Trwazyenmman, Parol Bondye i ranpli avek lasazes pratik. (Psonm 1:1-3; 19:7; 2 Timote 2:7; 3:15) I pou ed ou byen swazir ou bann zanmi, bann bon divertisman, e ed ou fer fas avek sa kantite sitiasyon difisil ki ou kapab rankontre dan lavi. (Zenez 34:1, 2; Psonm 119:37; 1 Korentyen 7:36) I tre enportan ki depi ozordi menm ou fer bann desizyon ki saz si ou anvi akonpli ou bann lobzektif spirityel.
“Konbat sa bon Konba”
14. Akoz i pa sa keksoz pli fasil pour pourswiv bann lobzektif spirityel?
14 Napa pli bon swa ki met bann lobzektif ki onor Zeova premye, me i pa sa keksoz pli fasil pour fer. Par egzanp, kan in ariv ler pour swazir en karyer, ou kapab ganny en kantite presyon avek ou bann fanmiy, zanmi, ek bann ansennyan ki annan bon lentansyon ki krwar ki en letid avanse ek en karyer kot ou ganny en bon lapey, se sa ki fer en dimoun ere e reisi dan lavi. (Romen 12:2) Parey Timote, ou pou bezwen “konbat sa bon konba dan lafwa” pour ki ou kapab “sezi [byen for] lavi eternel” ki Zeova pe ofer ou.—1 Timote 6:12; 2 Timote 3:12.
15. Ki kalite lopozisyon i kapab ki Timote ti bezwen fer fas avek?
15 Kan bann manm ou fanmiy ki pa Temwen i opoz ou swa, sa i kapab vreman difisil. I tre probab ki Timote osi ti bezwen fer fas avek sa kalite lopozisyon. Dapre en referans, i paret ki fanmiy Timote, “ti bann dimoun byen edike e ris.” I posib ki son papa ti ekspekte li pour fer letid avanse e pour kontinyen fer marse biznes ki lafanmiy ti annan. * Esey mazin reaksyon son papa kan i ti konnen ki Timote ti pli kontan met son lavi an risk pour fer travay misyonner avek Pol, kot zot pa ti asire ki mannyer zot ti pou devenir finansyerman!
16. Ki mannyer en zenn ti fer fas avek lopozisyon sorti kot son paran?
16 Bann zenn Kretyen ozordi i bezwen fer fas avek menm difikilte. Matthew, ki travay dan en biro brans Temwen Zeova i dir nou sa ki i mazinen: “Kan mon ti konmans fer pionye, mon papa ti vreman dezapwente. Pour li i ti konmsi mon’n ‘gat’ mon ledikasyon letan mon ti aksepte en louvraz konman en dimoun ki netway landrwa pour soutenir mon lekor pour kapab fer pionye. I ti sikann mwan, i ti toultan pe dir mwan konbyen larzan mon ti kapab gannyen si mon ti aksepte en louvraz aplentan.” Konman Matthew ti fer fas avek sa lopozisyon? “Toulezour mon ti fer sir ki mon swiv mon progranm pour lir Labib, e mon ti priye konstaman, sirtou kan i ti pou’n fasil pour mwan perdi mon tanperaman.” Matthew ti ganny rekonpanse pour son determinasyon. Avek letan, son relasyon avek son papa ti amelyore. Matthew in osi vin pli pros avek Zeova. I dir: “Zeova in pran swen avek mwan, ankouraz mwan, e anpes mwan fer bann move desizyon. Mon pa ti pou’n eksperyans ni enn sa bann keksoz si mon pa ti fer zefor pour akonpli mon bann lobzektif spirityel.”
Toultan gard antet bann Lobzektif spirityel
17. Ki mannyer san okenn lentansyon serten i kapab dekouraz sa bann ki anvizaze antre dan servis aplentan? (Matye 16:22)
17 Parfwa menm bann frer ek ser Kretyen san okenn move lentansyon zot kapab dekouraz ou pour pourswiv bann lobzektif spirityel. Serten i kapab demande, ‘Akoz ou bezwen vin en pionye? Ou kapab viv parey tou dimoun e anmenmtan partisip dan predikasyon. Akoz ou pa rod en bon travay e koumsa ou pou stab finansyerman.’ Petet i kapab paret en bon konsey, me si ou swiv sa konsey eski sa pou montre ki ou pe antrenn ou lekor avek bi pour devlop latasman pour Bondye?
18, 19. (a) Ki mannyer ou kapab reste konsantre lo bann lobzektif spirityel? (b) Rakonte ki sakrifis ou pe fer konman en zenn pour Rwayonm Bondye.
18 I paret ki serten Kretyen dan letan Timote ti annan sa menm leta lespri. (1 Timote 6:17) Pour ed Timote reste konsantre lo bann lobzektif spirityel, Pol ti ankouraz li: “Napa solda dan servis ki anbaras li avek bann zafer dan lavi ordiner, si i oule fer plezir sa enn ki ti angaz li.” (2 Timote 2:4) En solda ki lo son pos pe travay, pa kapab les li ganny distrer avek sa ki bann sivilyen pe fer dan zot lavi. I bezwen toultan pare pour azir kan son komandan i donn li lord, akoz son lavi ek lavi lezot i depan lo son reaksyon anver lenstriksyon son komandan. Konman en solda anba direksyon Kris, ou pou bezwen konsantre lo zis en keksoz, e evite tay deryer bann keksoz materyel ki pa neseser ki kapab anpes ou akonpli plennman sa travay pour sov lavi dimoun.—Matye 6:24; 1 Timote 4:16; 2 Timote 4:2, 5.
19 Olye pourswiv en lavi kot ou viv dan konfor, devlop en leta lespri sakrifis. “Met ou pare pour viv san sa bann konfor dan lavi, konman en solda Kris Zezi.” (2 Timote 2:3, The English Bible in Basic English) Kan i ti avek zapot Pol, Timote ti aprann kontant li avek sa ki i ti annan menm dan bann sitiasyon pli difisil. (Filipyen 4:11, 12; 1 Timote 6:6-8) Ou osi ou kapab fer parey. Eski ou pare pour fer sakrifis pour Rwayonm Bondye?
Benediksyon konmela e alavenir
20, 21. (a) Dekrir serten benediksyon ki nou gannyen ler nou pourswiv bann lobzektif spirityel. (b) Ki ou determinen pour fer?
20 Pour apepre 15 an, Timote ti reste pros avek Pol. Timote ti vwar pour li menm kan bann nouvo kongregasyon ti ganny formen anmezir ki sa bon nouvel ti ganny prese dan preski tou rezyon dan nor Lamediterane. Son lavi ti pli eksitan e satisfezan e i pa ti pou leka si i ti’n swazir pour viv en lavi ki swadizan “normal.” Si ou pourswiv bann lobzektif spirityel, ou osi ou pou ganny en kantite benediksyon spirityel ki vreman presye. Ou pou vin pros avek Zeova e ou bann frer ek ser Kretyen pou kontan e respe ou. Olye soufrans ek fristrasyon ki swiv apre ki ou’n pourswiv larises, ou pou eksperyans sa vre lazwa ki ou gannyen ler ou donnen san okenn dezir egois. Pli enportan ankor, ou pou “[sezi byen for, NW] vre lavi.” Savedir lavi eternel dan paradi lo later.—1 Timote 6:9, 10, 17-19; Akt 20:35.
21 Alors, si ou pa ankor fer li, avek lanmour nou ankouraz ou konmela menm, pour fer li ou bi pour antrenn ou lekor ziska ou devlop latasman pour Bondye. Vin pros avek sa bann dan kongregasyon ki kapab ed ou akonpli ou bann lobzektif spirityel, e rod zot gidans. Fer letid personnel ki regilye lo Parol Bondye vin ou priyorite. Determinen pour reziste sa leta lespri materyalis dan sa lemonn. E pa zanmen bliye ki Bondye ki “donn nou tou keksoz an labondans pour nou zouir” i promet ki ou kapab ganny en kantite benediksyon konmela menm e dan lavenir, si ou swazir bann lobzektif ki onor li.—1 Timote 6:17.
[Not anba lo paz]
^ par. 15 Bann Grek ti met bokou lanfaz lo ledikasyon. Plutarch, en kontanporen Timote ti ekrir: “Pour annan en bon ledikasyon, sa i sours ek rasin tou sa ki bon. . . . Sa ki kontribye pour annan en tre bon moral ek boner. . . . Tou lezot lavantaz dan lavi i febles imen e i pa enportan, zot pa merit nou profon latansyon.”—Moralia, I, “The Education of Children.”
Eski ou rapel?
• Ki bor bann zenn i kapab ganny led pour ed zot akonpli bann lobzektif spirityel?
• Akoz i enportan pour etidye Labib seryezman?
• Ki mannyer bann zenn i kapab reziste sa leta lespri materyalis dan sa lemonn?
• Ki benediksyon nou gannyen kan nou annan bann lobzektif spirityel?
[Kestyon]
[Portre lo paz 28]
Timote ti pourswiv bann bon lobzektif
[Portre lo paz 29]
Ki bann bon lenfliyans ki ti ed Timote?
[Portre lo paz 31]
Eski ou pe fer zefor pour akonpli ou bann lobzektif spirityel?