“Trouv Lazwa avek Madanm ou Zenntan”

“Trouv lazwa avek madanm ou zenntan . . . Mon garson, akoz ou devret rod plezir dan en fanm etranze?”—PROVERB 5:18, 20.

1, 2. Akoz nou kapab dir ki lanmour romantik ant en msye ek son madanm i beni?

LABIB i koz fran lo relasyon seksyel. Dan Proverb 5:18, 19, nou lir: “Ki ou sours delo i beni, e ou trouv lazwa avek madanm ou zenntan, en serf adorab ek en kabri montanny sarman. Les son tete satisfer ou toultan. Pran plezir konstaman dan son lanmour.”

² Sa lekspresyon “sours delo” la pe refer avek sa ki satisfer dezir seksyel en dimoun. I beni akoz sa lanmour romantik ek sa plezir ki de dimoun marye i rezwir, i en kado sorti kot Bondye. Me sa lentimite parkont, i ganny rezerve zis pour de dimoun ki’n marye. Lerwa Salomon ki ti viv dan ansyen Izrael e ki ti ekrir liv Proverb, ti demande: “Mon garson, akoz ou devret pran plezir dan en fanm ki ou pa konnen oubyen may en fanm etranze?”—Proverb 5:20.

3. (a) Ki larealite konsernan bokou maryaz? (b) Ki mannyer Bondye i vwar adilter?

³ Zour ki zot marye, en msye ek son madanm i fer en ve solannel pour kontan e reste  fidel avek kanmarad. Me i annan en kantite maryaz ki ganny kase akoz adilter. Anfet, apre ki en serser ti analiz plis ki en ventenn letid, i ti konklir ki “25 poursan madanm ek 44 poursan msye in annan relasyon an deor zot maryaz.” Zapot Pol ti dir: “Pa les zot ganny anbete, ni bann ki pratik bann akt imoral, ni bann ladorater zidol, ni bann adilter, ni bann omoseksyel, . . . pa pou erit Rwayonm Bondye.” (1 Korentyen 6:9, 10) Sa i kler. Adilter i en pese grav devan Bondye, e son bann vre adorater i bezwen toultan reste fidel avek zot konzwen. Kwa ki pou ed nou ‘onor nou maryaz e reste fidel avek kanmarad’?—Ebre 13:4.

Vey byen sa Leker tret

4. Ki serten fason en Kretyen ki’n marye i kapab enplike dan en relasyon an deor son maryaz san menm realize?

⁴ Ozordi dan sa lemonn kot valer moral in degrad en kantite, bokou dimoun zot “regar i ranpli avek dezir pour fer adilter, zot pa zanmen ase fer pese.” (2 Pyer 2:14) Zot toultan pe rod bann lavantir romantik an deor zot maryaz. Dan serten pei, en kantite madanm in antre dan lemonn travay kot zot trouv zot ansanm avek lezot zonm. Sa i kree en lanvironnman ideal pour bann relasyon romantik ki pa apropriye devlope. I osi annan Internet ki’n fer li fasil pour bann ki pli timid devlop en lanmitye tre pros atraver chat rooms. Bokou dimoun marye i tonm dan sa bann latrap san realize ki pe arive avek zot.

5, 6. Ki mannyer en madanm Kretyen ti tonm dan en sitiasyon danzere, e ki nou aprann atraver sa?

⁵ Annou vwar ki mannyer en Kretyen, ki nou pou apel Mary, ti trouv li dan en sitiasyon kot i ti pros pour tonm dan imoralite seksyel. Son msye, ki pa en Temwen Zeova, pa ti tro tro montre lafeksyon anver son fanmiy. Mary i rapel detrwa lannen pase ler i ti rankontre koleg travay son msye. Sa zonm ti annan bann bon mannyer, e plitar i ti menm montre en lentere pour konn plis lo krwayans relizye Mary. Mary i dir: “I ti telman zantiy e telman diferan avek mon msye.” Pa bokou letan apre, Mary ek koleg travay son msye ti devlop santiman pour kanmarad. Mary ti rezonn dan li menm: “Mon pa’n fer adilter e sa zonm i enterese avek Labib. Petet mon kapab ed li.”

⁶ Mary ti retourn dan son bon sans avan ki son santiman pour sa zonm ti fer li tonm dan adilter. (Galat 5:19-21; Efezyen 4:19) Son konsyans ti konmans travay, e i ti remet tou keksoz drwat. Leksperyans Mary i montre ki “leker i pli tret ki okenn keksoz e i tre move.” (Zeremi 17:9) Labib i averti nou: “Plis ki tou lezot keksoz ki ou devret veye, protez ou leker.” (Proverb 4:23) Ki mannyer nou kapab fer sa?

‘En Dimoun pridan i al kasyet li’

7. Ki konsey dan Labib ki pou protez nou ler nou pe ed en dimoun ki pe rankontre problenm dan son maryaz?

⁷ Zapot Pol ti ekrir: “Sa ki krwar i pe debout, fer atansyon ki i pa tonbe.” (1 Korentyen 10:12) Dan Proverb 22:3 i dir: “En dimoun pridan i al kasyet li ler i’n vwar maler.” Olye annan tro bokou konfyans e mazinen nanryen pa pou arive, i pli saz si ou reflesir davans lo bann sitiasyon ki kapab  vin en danze. Par egzanp, si en dimoun lot sèks pe rankontre problenm dan son maryaz, evite vin sa sel dimoun ki i kapab konfye ladan. (Proverb 11:14) Dir sa dimoun i pli bon diskit bann problenm maryaz avek son konzwen, oubyen en Kretyen matir menm sèks ki anvi zot maryaz reisi, oubyen avek bann ansyen. (Tit 2:3, 4) Bann ansyen dan kongregasyon Temwen Zeova i donn en bon legzanp dan sa domenn. Ler en ansyen i bezwen koz avek en ser Kretyen personnelman, i fer li dan en landrwa kot i annan lezot dimoun, parey dan Lasal Rwayonm.

8. Ki prekosyon ki bon pran dan landrwa travay?

⁸ Fer atansyon bann sitiasyon dan landrwa travay oubyen lezot landrwa ki kapab fer nou devlop bann relasyon entim. Par egzanp, si nou travay byen pros avek en dimoun lot sèks apre ler travay, sa i kapab fer nou tonm dan tantasyon. Si ou’n marye, ou bezwen fer kler par ou parol e osi fason ki ou konport ou ki ou pa disponib pour annan okenn relasyon avek personn. En dimoun ki atase avek Bondye pa pou anvi atir tro bokou latansyon lo li, swa par sanz dan en fason provokan oubyen dan okenn lezot fason. (1 Timote 4:8; 6:11; 1 Pyer 3:3, 4) Si ou met portre ou konzwen ek ou zanfan dan ou landrwa travay, i kapab rapel ou ek lezot otour ou ki ou fanmiy i tre enportan pour ou. Determinen pour pa zanmen ankouraz oubyen menm les en lot dimoun fer bann lapros romantik avek ou.—Zob 31:1.

‘Viv ou Lavi avek sa Madanm ki ou kontan’

9. Ki letap ki anmenn anver en nouvo relasyon romantik ki atiran?

⁹ Protez nou leker i demann plis ki zis evit bann sitiasyon danzere. Letan en dimoun marye i ganny atire anver en lot dimoun an deor son maryaz, sa i kapab en lendikasyon ki son konzwen pa atantif anver son bezwen. Petet sa madanm pe kontinyen ganny neglize oubyen sa msye pe toultan ganny kritike. Apre en sel kou, zot remark en lot dimoun swa dan travay oubyen menm dan kongregasyon ki paret annan sa bann kalite ki zot konzwen napa. Pa mank bokou letan, en relasyon i formen e i vin preski enposib pour reziste. Sa bann letap i konfirmen ki sa ki Labib i dir i vre: “Tou dimoun i ganny tante ler i les li ganny antrennen e atire par son prop move dezir.”—Zak 1:14.

10. Ki mannyer bann msye ek madanm i kapab fer zot relasyon vin pli solid?

¹⁰ Olye rod pour satisfer zot dezir an deor zot maryaz, ki swa pour lafeksyon, lanmitye, oubyen sipor dan bann sitiasyon difisil, bann koup marye i devret fer zefor pour fer zot relasyon vin pli solid. Alor fer tou sa ki zot kapab pour pas letan avek kanmarad e vin pli pros avek kanmarad. Reflesir lo kwa ki ti fer ou tonm anmoure avek ou msye oubyen  ou madanm. Esey reviv sa santiman ki ou ti annan pour sa dimoun ki ou’n marye avek. Mazin sa bann bon moman ki zot in pase ansanm. Priy Bondye lo sa size. Psalmis David ti enplor Zeova: “Bondye, kree dan mwan en leker pir, e met dan mwan en nouvo lespri, enn ki ferm.” (Psonm 51:10) Determinen pour ‘viv ou lavi avek sa madanm ki ou kontan tou ou lavi ki Bondye in donn ou lo later.’—Eklezyast 9:9.

11. Ki rol konnesans, lasazes, ek disernman i zwe pour fer en relasyon maryaz vin pli for?

¹¹ Konnesans, lasazes, ek disernman, i bann keksoz ki nou pa devret neglize ler nou pe sey fer nou relasyon maryaz vin pli solid. Proverb 24:3, 4 i dir: “Par lasazes en fanmiy i ganny batir e par disernman i pou ganny etablir solidman. Par konnesans tou bann lasanm enteryer pou ranpli avek tou keksoz valer ki presye e agreab.” Parmi bann keksoz presye ki fer en fanmiy ere i bann kalite parey lanmour, fidelite, lakrent pour Bondye, ek lafwa. Pour ganny sa bann kalite, nou bezwen konnesans Bondye. Alor bann koup marye i devret etidye Labib seryezman. E ki kantite enportan lasazes ek disernman i enportan? Pour reisi fer fas avek bann problenm toulezour i demann lasazes, sa abilite pour aplik sa konnesans ki dan Labib. En dimoun ki annan disernman i kapab konpran panse ek santiman son konzwen. (Proverb 20:5) Zeova ti dir atraver Salomon: “Mon garson, port latansyon lo mon lasazes. Ouver ou zorey anver mon disernman.”—Proverb 5:1.

Kan i annan “Problenm”

12. Akoz i pa sirprann nou ki bann koup marye i rankontre problenm?

¹² Napa maryaz ki parfe. Labib i menm dir ki bann koup marye pou “ganny problenm dan [zot] lavi.” (1 Korentyen 7:28) Traka, maladi, persekisyon, ek lezot fakter i kapab met presyon lo en lavi maryaz. Me ler problenm i leve, ou bezwen rod solisyon ansanm avek ou konzwen, parey bann koup fidel ki anvi fer plezir Zeova.

13. Dan ki laspe en koup marye i kapab analiz zot lekor?

¹³ Be si sa maryaz i anba presyon akoz fason ki sa koup pe tret kanmarad? Pour rezourd sa problenm, bokou zefor i bezwen ganny mete. I kapab ki fason ki zot koz avek kanmarad in deteryore e aprezan i form par zot lavi maryaz. (Proverb 12:18) Parey nou ti vwar dan lartik avan, lefe bann parol blesant i for. En proverb dan Labib i dir: “Vomye ou reste dan dezer ki dan fristrasyon avek en madanm ki kontan dispit.” (Proverb 21:19) Si ou en madanm marye ki dan sa sitiasyon, demann ou lekor, ‘Eski fason ki mon fer, i dekouraz mon msye pour pas letan avek mwan?’ Labib i dir avek bann msye: “Kontan zot madanm e pa tret zot dir.” (Kolosyen 3:19) Si ou en msye, demann ou lekor, ‘Eski i kapab ki mon pa montre ase lafeksyon mon madanm, ki i bezwen rod rekonfor an deor?’ Byensir, napa okenn leskiz ki zistifye adilter. Me lefe ki i kapab arive malerezman, sa i en bon rezon pour diskit zot problenm dan en fason fran.

14, 15. Akoz rod rekonfor an deor ou maryaz i pa solisyon pour problenm maryaz?

¹⁴ Rod rekonfor an deor ou maryaz i pa solisyon pour problenm maryaz. Ki en nouvo relasyon pou donn ou? En nouvo maryaz ki pli meyer? Petet serten i kapab mazin sa. Zot kapab dir, ‘Be sa dimoun i annan sa bann kalite ki mon bezwen dan en konzwen.’ En tel rezonnman i fo akoz en dimoun ki kit son konzwen oubyen en dimoun ki ankouraz ou pour kite napa okenn respe pour maryaz, ki en keksoz sakre. I pa fer sans pour ou ekspekte ki en lot relasyon pou anmenn en pli bon maryaz.

¹⁵ Mary, ki nou’n koz lo la pli boner, ti  reflesir seryezman lo konsekans son aksyon, enkli posibilite pour li perdi faver Bondye oubyen fer en lot dimoun perdi faver Bondye. (Galat 6:7) I dir: “Mon ti egzamin mon santiman pour koleg travay mon msye. Mon ti realize ki si sa zonm i annan en posibilite pour vin dan laverite, be mwan mon pe anpes li. Fer sa ki mal i afekte tou dimoun ki enplike e i fer tonbe lezot!”—2 Korentyen 6:3.

Pli bon Rezon

16. Nonm serten lefe ki imoralite seksyel i kit deryer.

¹⁶ Labib i averti: “Lalev en madanm etranze i kontinyen koule parey dimyel, e son pale i pli lis ki delwil. Me son lefe ki i kit deryer i anmer parey labsent; i pli koupe ki en lepe ki koup de kote.” (Proverb 5:3, 4) Lefe limoralite seksyel i anmenn bokou douler e i kapab fatal. I enkli en konsyans trouble, bann maladi transmet par sèks, e bann move lefe emosyonnel ki sa enn inosan i sibir. Sa i donn nou sifizaman rezon pour reste fidel avek nou konzwen.

17. Ki pli bon rezon pour reste fidel avek ou konzwen?

¹⁷ Se Zeova ki’n enstitye laranzman maryaz e donn zonm ek fanm kapasite pour annan relasyon seksyel. Alors, rezon pli enportan akoz enfidelite dan maryaz i mal, i akoz Zeova i dir i mal. I dir atraver profet Malaki: ‘Mon pou vin kot zot pour ziz zot e mon pou vin en temwen kont zot ki komet adilter.’ (Malaki 3:5) Konsernan sa ki Zeova i vwar, Proverb 5:21 i dir: “Semen zonm i devan lizye Zeova e i egzamin tou son santye.” Wi, “napa nanryen ki kasyet devan Bondye. Tou lansanm kreasyon i ekspoze devan lizye sa enn avek ki nou bezwen rann kont.” (Ebre 4:13) Alors pli bon rezon pour reste fidel avek nou konzwen, i ki imoralite seksyel i afekte nou relasyon avek Zeova, kantmenm i kapab reste sekre oubyen napa gran konsekans fizik ou sosyal.

18, 19. Ki nou aprann atraver leksperyans Zozef avek madanm Potifar?

¹⁸ Legzanp Zozef, garson patrias Zakob, i montre ki sa dezir pour reste anpe avek Bondye i pli bon rezon. En zofisye lakour Faraon, Potifar, ti dakor avek Zozef e i ti donn li en pozisyon tre o dan son lakaz. Deplis Zozef ti zoli depi latet ziska lipye, en keksoz ki pa ti sap latansyon madanm Potifar. I ti sey fer tou pour Zozef dormi avek li, me son zefor ti anven. Kwa ki ti fer Zozef reziste tou son bann lapros? Labib i dir nou: “I ti refize e dir avek madanm son met: ‘Gete, mon met . . . pa’n refiz mwan nanryen eksepte ou, akoz ou son madanm. Alor ki mannyer mon kapab fer sa gran keksoz mal e vreman fer pese kont Bondye?’”—Zenez 39:1-12.

¹⁹ Zozef, ki pa ti marye, ti reste prop moralman par refize pour annan okenn relasyon avek madanm en lot zonm. Proverb 5:15 i dir bann zonm marye: “Bwar delo ki sorti dan ou sitern, e sa ki koule sorti dan milye ou pi.” Fer atansyon ki ou pa devlop santiman pour en lot dimoun an deor ou maryaz san ki ou menm realize. Fer bokou zefor pour reser sa lyen lanmour dan ou maryaz, e travay dir pour rezourd nenport difikilte ki ou kapab rankontre dan ou maryaz. Fer tou pour “trouv lazwa avek madanm ou zenntan.”—Proverb 5:18.

Ki ou’n aprann?

• Ki mannyer en Kretyen i kapab enplike dan en relasyon romantik san menm realize?

• Ki prekosyon ki kapab anpes en dimoun annan en santiman pour en lot dimoun an deor son maryaz?

• Ki en koup i devret fer ler zot rankontre problenm?

• Ki pli bon rezon pour reste fidel avek sa enn ki ou’n marye avek?

[Kestyon]

[Portre lo paz 12]

Malerezman, landrwa travay in vin en lanvironnman ideal pour bann relasyon romantik ki pa apropriye