Profesi ki baze lo Kris

“Rann temwannyaz konsernan Zezi, se sa ki’n fer annan profesi.” —REVELASYON 19:10, NW.

1, 2. (a) Ki desizyon bann Izraelit ti bezwen pran konmansman lannen 29 N.L.? (b) Ki nou pou egzaminen dan sa lartik?

TI LANNEN 29 N.L., tou dimoun Izrael ti pe koz avek leksitasyon lo sa Mesi promiz. Minister Zan Batis ti’n fer dimoun vin pli eksite konsernan laparisyon sa Mesi. (Lik 3:15) Zan pa ti dir ki li menm li Kris. Okontrer, gete ki i ti dir lo Zezi ki ti sorti Nazaret: “Mon temwanye, ki limenm Garson Bondye.” (Zan 1:20, 34) Pa bokou letan apre, dimoun ti konmans swiv Zezi pour ekout son lansennyman e pour zot ganny geri.

² Zeova ti kontinyen donn en kantite levidans konsernan son Garson. Bann ki ti’n etidye Lekritir e egzamin travay Zezi, ti annan en baz solid pour zot lafwa dan li. An zeneral, sa pep ki Bondye ti’n fer lalyans avek pa ti annan lafwa. Zis enn pti gin ki ti aksepte ki Zezi ti Kris, Garson Bondye. (Zan 6:60-69) Ki ou ti pou fer si ou ti pe viv sa letan? Eski ou ti pou’n aksepte Zezi konman Mesi e vin enn son disip fidel? Annou egzamin levidans ki Zezi ti donnen lo son lidantite ler i ti ganny akize konmkwa i ti vyol Saba, osi byen laprev ki plitar i ti donnen pour fortifye lafwa son bann disip fidel.

Zezi i donn Levidans

3. Ki sitiasyon ki ti fer Zezi donn levidans pour prouve ki i ti vreman ete?

³ Ti lannen 31 N.L., e lafet Lapak ti’n arive. Zezi ti Zerizalenm e i ti’n fek fini geri en zonm ki ti malad pour 38 an. Me bann Zwif  ti persekit li akoz i ti’n fer sa zour Saba. Zot ti osi akiz li konmkwa i pe blasfenm, e zot ti oule touy li akoz i ti dir ki Bondye i son Papa. (Zan 5:1-9, 16-18) Zezi ti donn trwa rezon solid pour defann son lekor, e si okenn dimoun senser ti ekout li, zot ti pou’n aksepte sa ki Zezi ti vreman ete.

4, 5. Ki rol minister Zan ti zwe, e ki mannyer i ti byen akonpli son minister?

⁴ Premyerman, Zezi ti refer avek Zan Batis ki ti ouver semen pour li. I ti dir: “Zot in anvoy bann mesaze kot Zan e i’n koz konman en temwen laverite. Zan ti parey en lalanp alimen ki klere, e zot ti ere pour viv dan son lalimyer pour en serten letan.”—Zan 5:33, 35.

⁵ Zan Batis ti en “lalanp alimen ki klere” dan le sans ki i ti akonpli sa travay ki Bondye ti donn li pour prepar semen pour Mesi, avan ki Erod ti met li dan prizon. Zan ti dir: “Mon’n vin pour batiz dimoun dan delo, pour fer pep Izrael konn [Mesi]. . . . Mon ti war Lespri-sen desann sorti dan lesyel parey en kolonm e apoz lo li. Mwanmenm mon pa ti konn li, me sa Enn ki ti anvoy mwan batiz dan delo ti dir mwan, ‘Sanmenm sa enn ki ou ava war Lespri desann lo li, limenm ki pou batiz dan Lespri-sen.’ E mwan mon’n war sa, e la mon temwanye, ki limenm Garson Bondye.” * (Zan 1:26-37) Zan ti rekonnet ki Zezi ti Garson Bondye—sa Mesi promiz. Sa ki Zan ti dir ti’n tous bokou dimoun, parski wit mwan apre ki Zan ti’n mor, en kantite dimoun senser ti dir: “Tou sa ki Zan in dir lo sa zonm i vre.”—Zan 10:41, 42.

6. Akoz bann travay Zezi ti’n devret konvenk dimoun ki i ti annan sipor Bondye?

⁶ Answit, Zezi ti fer en lot rezonnman pour konfirm son lidantite konman Mesi. I ti koz lo son prop travay pour montre ki i ti annan sipor Bondye. I ti dir: “Me mon annan en temwen dan mon faver ki dir keksoz pli enportan ki sa ki Zan in dir: sa bann travay ki mon pe fer se bann travay ki mon Papa in donn mwan pour fer, e se zotmenm ki koz an mon faver e montre ki mon Papa ki’n anvoy mwan.” (Zan 5:36) Sa bann mirak ki Zezi ti fer, ti form parti levidans ki son bann lennmi pa ti kapab rezete. Plitar serten ti demande, “Ki fodre nou fer? Get sa kantite mirak ki sa zonm pe fer.” (Zan 11:47) Me serten ti byen reazir e zot ti dir: “Kan Mesi pou vini, eski i pou fer bokou plis mirak ki sa zonm in fer?” (Zan 7:31) Bann ki ti ekout Zezi ti dan en bon pozisyon pour remark bann kalite ki Bondye i annan dan son Garson.—Zan 14:9.

7. Ki mannyer Lekritir Ebre i rann temwannyaz lo Zezi?

⁷ Finalman, Zezi ti diriz zot latansyon lo en levidans ki personn pa kapab kestyonnen. I ti dir: “Lekritir . . . ki servi temwen an mon faver. Si zot ti vreman krwar Moiz, zot ti a osi krwar mwan, akoz i’n ekri lo mwan.” (Zan 5:39, 46) Byensir, Moiz ti zis enn parmi sa kantite profet avan lepok Kretyen ki ti ekrir konsernan Kris. Sa ki bann profet ti ekrir, ti enkli plizyer santenn profesi ek bann detay ki ti montre kote Zezi ti pou sorti. (Lik 3:23-38; 24:44-46; Akt 10:43) Me konsernan Lalwa Moiz? Zapot Pol ti ekrir, “Lalwa ti nou gardyen ziska ler Kris ti arive.” (Galat 3:24) Wi, “temwannyaz konsernan Zezi, se sa ki’n fer [oubyen se sa rezon akoz i] annan profesi.”—Revelasyon 19:10, NW.

8. Akoz bokou Zwif pa ti krwar Mesi?

⁸ Temwannyaz Zan Batis, mirak Zezi e osi bann kalite Bondye ki i ti reflekte ek levidans dan Lekritir, eski pa tousala ti pou’n fer ou aksepte ki Zezi ti Mesi? Nenport dimoun ki senserman kontan Bondye ek son  Parol, ti pou kapab rekonnet sa e demontre lafwa dan Zezi, sa Mesi promiz. Me bann Zwif ti napa sa kalite lanmour. Zezi ti dir son bann lennmi: “Mon konnen ki lanmour Bondye pa dan zot leker.” (Zan 5:42) Olye rod “felisitasyon ki sorti kot sel Bondye,” zot ti oule ganny “felisitasyon avek kanmarad.” Zezi ki ti parey son Papa, ti kondann sa kalite latitid, alor sa ti fer zot pa tonm dakor avek li.—Zan 5:43, 44; Akt 12:21-23.

Ankouraze par en Vizyon profetik

9, 10. (a) Akoz sa siny ti vreman ed bann disip? (b) Ki Zezi ti promet son bann disip?

⁹ Enn an in pase depi ki Zezi ti’n prouve ki i ti Mesi. Lapak lannen 32 N.L. ti’n fini pase, e bokou dimoun ki ti krwar dan li ti’n aret swiv li. Sa ti’n arive petet akoz persekisyon, tay deryer keksoz materyel, oubyen lenkyetid lavi. Petet lezot ti konfize oubyen dezapwente akoz Zezi pa ti dakor ki bann dimoun ti fer li vin lerwa. Kan bann sef relizye Zwif ti pe kestyonn li, Zezi ti refize fer en siny dan lesyel pour atir latansyon lo li menm. (Matye 12:38, 39) Serten ti’n kapab konfize par sa. Anplis ki sa, Zezi ti’n konmans dir son bann disip keksoz ki ti difisil pour konpran. I ti dir: “Mon bezwen al Zerizalenm. Mon pou soufer en kantite par bann ansyen, sef pret ek bann profeser lalwa. Mon pou ganny met-a-mor.”—Matye 16:21-23.

¹⁰ Dan ankor nef a dis mwan, i pou’n ariv ler “pour [Zezi] kit later e al kot son Papa.” (Zan 13:1) Vi ki i ti konsernen avek son bann disip fidel en kantite, Zezi ti promet serten parmi zot sa keksoz ki i ti refize fer devan bann Zwif ki ti mank lafwa. Sa se en siny dan lesyel. Zezi ti dir: “Mon asir zot ki i annan parmi bann ki isi ki pa pou gout lanmor avan ki zot war Fis-de-Lonm vini dan son Rwayonm.” (Matye 16:28) An realite, Zezi pa ti pe dir ki serten son bann disip ti pou reste vivan ziska ki son Rwayonm Mesyanik i ganny etablir an 1914. Zezi ti pe mazin donn son trwa zanmi en vizyon, ki ti permet zot ganny en avangou lo sa laglwar ki i ti pou gannyen dan son Rwayonm. Sa vizyon i apel transfigirasyon.

11. Dekrir sa vizyon.

¹¹ Sis zour plitar, Zezi ti anmenn Pyer, Zak ek Zan lo en montanny ki byen o—i tre probab ki i ti en landrwa kekpar lo montanny Ermonn. Laba, “laparans Zezi ti sanze. Son figir ti klate parey soley e son lenz ti vin en blan klate konman lalimyer.” Profet Moiz ek Eliya ti aparet e konmans koz avek Zezi. Pour kapab fer li enpresyonan, i tre probab ki sa levennman ekstraordiner ti ariv aswar. Annefe, sa ti sitan reel ki Pyer ti anvi fer trwa latant—enn pour Zezi, Moiz ek Eliya. Anmenmtan ki Pyer ti pe koze, en nyaz ti kouver zot e en lavwa sorti dan sa nyaz ti dir: “Sa i mon garson byenneme dan ki mon met tou mon lazwa, ekout li!”—Matye 17:1-6.

12, 13. Ki lefe sa vizyon ti annan lo bann disip Zezi, e akoz?

 ¹² I vre ki Pyer ti’n fek dir ki Zezi i “Mesi, Garson Bondye vivan.” (Matye 16:16) Me pour antann Bondye li menm konfirm lidantite ek rol son Garson ki i’n swazir, sa ti vreman en gran keksoz! Sirman sa vizyon ti fortifye lafwa Pyer, Zak ek Zan! Aprezan ki zot lafwa ti’n vin pli for, zot ti pli pare pour fer fas avek sa ki ti pou arive e akonpli sa rol ki zot ti pou zwe dan kongregasyon plitar.

¹³ Sa vizyon ti annan en lefe dirab lo bann disip. Trant an plitar, Pyer ti ekrir: “[Zezi] ti resevwar loner ek laglwar sorti kot Bondye, son Papa, kan i ti tann sa lavwa sorti dan laglwar siprenm: ‘Sa i mon Garson byenneme, an ki mon’n met tou mon lazwa.’ Nou ti tann sa lavwa sorti dan lesyel ler nou ti la avek li lo sa montanny sent.” (2 Pyer 1:17, 18) Sa vizyon ti fer menm lefe lo Zan. Swasant an plitar, Zan ti refer avek sa vizyon ler i ti ekrir sa parol: “Nou’n war son laglwar, laglwar ki son Papa in donn li konman son sel Garson.” (Zan 1:14) Me sa pa ti dernyen vizyon ki bann disip Zezi ti pou gannyen.

Plis Leklersisman pour bann Serviter fidel

14, 15. Dan ki sans zapot Zan ti reste vivan ziska ki Zezi ti retournen?

¹⁴ Apre son rezireksyon, Zezi ti aparet avek son bann disip kot lanmer Galile. I ti dir Pyer: “Ki sa i fer ou si mon oule ki [Zan] i viv ziska ki mon retournen?” (Zan 21:1, 20-22, 24) Eski sa parol i vedir ki zapot Zan ti pou viv pli lontan ki lezot zapot? Aparaman, zapot Zan ti servi Zeova pour preski ankor 70 an. Parkont, sa ki Zezi ti dir i enplik plis ki sa.

¹⁵ Sa lekspresyon “ziska ki mon retournen,” i fer nou mazin sa ki Zezi ti dir pli boner ler i ti dir, “fis-de-Lonm vini dan son Rwayonm.” (Matye 16:28) Zan ti reste vivan ziska ki Zezi ti retournen, dan le sans ki plitar i ti ganny en vizyon profetik kot i ti vwar Zezi vini konman Lerwa dan son Rwayonm. Dan bann dernyen moman son lavi, kan i ti an egzil lo zil Patmos, Zan ti ganny en Revelasyon kot i ti vwar bann gran siny profetik ki ti montre li bann levennman ki ti pou arive dan “Zour Senyer.” Zan ti’n sitan ganny touse par sa vizyon ki ler Zezi ti dir: “Wi! Mon pe vini byento,” i ti reponn: “Amenn! Vini, Senyer Zezi!”—Revelasyon 1:1, 10; 22:20.

16. Akoz i enportan ki nou kontinyen fortifye nou lafwa?

¹⁶ Bann dimoun senser dan premye syek ti met lafwa dan Zezi e aksepte li konman Mesi. Me lefe ki zot ti antoure avek bann dimoun ki ti mank lafwa, e zot ti annan en travay pour fer e deplis zot ti pou bezwen ganny teste alor, bann ki ti’n vin krwayan ti bezwen ganny fortifye. Zezi ti’n donn otan levidans pour prouve ki i ti Mesi, e i ti’n osi donn leklersisman lo bann vizyon profetik pour ankouraz son bann disip. Ozordi nou vreman dan “Zour Senyer.” Byento, Kris pou detrir sa move sistenm Satan e i pou delivre pep Bondye. Nou osi nou devret fortifye nou lafwa par servi o maksimonm bann  provizyon ki Zeova in fourni pour nou byennet spirityel.

Ganny proteze dan Fernwanr ek Ladetres

17, 18. Ki sa gran diferans ki ti egziste dan premye syek ant bann disip Zezi ek bann ki ti opoz plan Bondye, e ki ti arive avek sa de group?

¹⁷ Apre lanmor Zezi, avek kouraz son bann disip ti obeir son komannman pour vin son bann temwen “dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8) Kantmenm zot ti konstaman ganny persekite severman, Zeova ti beni sa nouvo kongregasyon Kretyen avek leklersisman spirityel ek en kantite nouvo disip.—Akt 2:47; 4:1-31; 8:1-8.

¹⁸ De lot kote, pour bann ki ti opoz sa bon nouvel, zot lespwar ti vin pli sonm. Proverb 4:19 i dir: “Semen bann dimoun mesan i parey en landrwa fernwanr; zot pa konnen kwa ki pou fer zot tonbe.” Lannen 66 N.L., ti vin pli “fernwanr” kan larme Romen ti anserkle Zerizalenm. San okenn rezon zot pa ti kontiny zot latak, me lannen 70 N.L., zot ti retournen safwasi pour detrir sa lavil. Dapre en Istoryen Zwif ki apel Josephus, plis ki en milyon Zwif ti mor. Me bann Kretyen fidel ti ganny sans sove. Akoz? Parski kan bann larme Romen ti ale apre ki zot ti anserkle sa lavil premye fwa, zot ti obeir lord Zezi pour kit sa landrwa.—Lik 21:20-22.

19, 20. (a) Anmezir ki lafen sa sistenm i aprose, akoz pep Bondye pa devret per? (b) Ki konprenezon remarkab ki Zeova ti donn son pep avan 1914?

¹⁹ Nou sitiasyon i parey ozordi. Sa gran ladetres ki pe vini pou endik lafen sa sistenm Satan. Me pep Bondye pa devret per, parski Zezi ti fer sa promes: “Konnen ki mwan mon avek zot toulezour, ziska lafen.” (Matye 28:20) Pour fortifye zot lafwa e pour prepar zot pour sa ki ti pou arive, Zezi ti donn son bann disip en avangou konman i ti pou ete ler i vin lerwa dan son Rwayonm dan lesyel. Me ki nou pou dir konsernan nou letan? An 1914, sa avangou ki bann disip ti gannyen ti vin en realite. Lefe ki Zezi pe rennyen konman lerwa dan son Rwayonm, pa sa i vreman fortifye lafwa pep Bondye! Se sa Rwayonm ki pou anmenn en pli meyer lavenir, e bann serviter Zeova in ganny plis leklersisman lo sa Rwayonm. Dan sa lemonn ki dan fernwanr, “santye bann dimoun drwat i parey sa lalimyer briyan ki vin deplizanpli kler ziska ki sa zour i ganny etabli solidman.”—Proverb 4:18.

²⁰ Menm avan 1914, en pti group Kretyen swazir ti konmans konpran bann laverite enportan lo retour Senyer. Par egzanp, zot ti konpran ki son retour pou envizib, zis parey sa de lanz ki ti aparet avek bann disip lannen 33 N.L. ler Zezi ti pe mont dan lesyel. Apre ki en nyaz ti maske Zezi, bann disip pa ti kapab vwar li, answit lanz ti dir zot: “Sa Zezi ki’n ganny anleve osyel parmi zot, pou retournen dan menm mannyer ki zot in war li mont osyel.”—Nou ki’n met an italik; Akt 1:9-11.

21. Ki nou pou diskite dan nou lot lartik?

²¹ Kan Zezi ti pe retourn dan lesyel, zis son bann disip fidel ki ti vwar. Zis parey avek transfigirasyon, personn pa ti konnen ki ti pe pase e ti napa lezot dimoun apard sa  trwa disip. I ti pou menm parey kan Zezi ti pou retournen konman en lerwa pwisan. (Zan 14:19) Zis son bann disip fidel ki’n ganny swazir ki ti pou konnen ki Zezi i la prezan konman Lerwa. Dan nou lot lartik nou pou vwar ki mannyer sa konprenezon lo sa size ti pou fer en gran lefe lo zot, e osi ki mannyer zot in ralye plizyer milyon dimoun ki pou viv lo later anba dominasyon Kris.—Revelasyon 7:9, 14.

[not anba lo paz]

Eski ou rapel?

• Kan Zezi ti ganny akize konmkwa in vyol Saba e ki’n blasfenm, ki levidans i ti donnen pour montre ki i ti Mesi?

• Ki mannyer bann premye disip Zezi ti benefisye avek sa transfigirasyon?

• Ki Zezi ti oule dir ler i ti dir ki Zan ti pou viv ziska ki i vini?

• Ki promes ki ti vin vre an 1914?

[Kestyon]

[Portre lo paz 3]

Zezi ti prouve ki i ti Mesi

[Portre lo paz 5]

Sa vizyon ti fortifye lafwa bann disip

[Portre lo paz 6]

Zan ti pou reste vivan ziska ki Zezi i “vini”