Prese Avek Bi Pour Fer Disip
Prese Avek Bi Pour Fer Disip
“Kan Prisil ek Akilas ti tann son mesaz, zot ti anmenn [Apolos] kot zot e eksplik li pli byen Semen Bondye.”—AKT 18:26.
1. Kantmenm i ti “plen avek lantouzyas,” ki Apolos ti bezwen?
PRISIL ek Akilas, en koup Kretyen dan premye syek, ti obzerv Apolos pe donn en diskour dan en sinagog dan lavil Efez. Apolos ti’n kapte latansyon son lodyans vi ki i ti annan en abilite remarkab pour koz byen e persyad lezot. I ti “plen avek lantouzyas” e i ti pe “ansenny egzakteman bann fe konsernan Zezi.” Parkont, i ti kler ki Apolos ti “konn zis batenm Zan.” Sa ki Apolos ti pe prese konsernan Kris ti vre me i ti limite. Problenm se ki son konnesans konsernan Kris pa ti konplet. Apolos ti bezwen ogmant son konnesans lo rol Zezi Kri dan lakonplisman plan Zeova.—Akt 18:24-26.
2. Ki latas difisil Prisil ek Akilas ti aksepte?
2 San ezitasyon, Prisil ek Akilas ti ofer pour ed Apolos kapab obei “tou sa ki” Kris ti’n komande. (Matye 28:19, 20) Resi i montre ki zot ti anmenn Apolos “kot zot e eksplik li pli byen Semen Bondye.” Parkont, ti annan serten keksoz lo Apolos ki ti a kapab fer serten Kretyen ezite pour ansenny li. Kwa sa? Ki nou kapab aprann atraver zefor ki Prisil ek Akilas ti fer pour diskit Lekritir avek Apolos? Konman ki revwar sa resi i ed nou pour fer zefor pour konmans bann letid Labib?
Konsantre lo Bezwen bann Dimoun
3. Akoz ledikasyon Apolos pa ti anpes Prisil ek Akilas ansenny li?
3 Vi ki Apolos ti en desandans Zwif, i kapab ki i ti’n grandi dan lavil Alekzandri. Sa letan Alekzandri ti kapital Lezip e en sant pour bann letid avanse. I ti renonmen pour son gran bibliotek. Dan sa lavil ti annan en gran popilasyon Zwif, enkli bann dimoun byen edike. Se pour sa ki tradiksyon Lekritir Ebre dan langaz Grek ki’n ganny apele Septuagint ti ganny prodwir laba. I pa sirprenan alor ki Apolos ti annan “en gran konnesans dan Lekritir”! Akilas ek Prisil ti fer latant. Eski lefe ki Apolos ti annan en abilite remarkab pour koz devan lezot, sa ti fer zot per pour ofer li led? Non. Parski zot ti annan lanmour pour li, zot ti mazin konsernan li, son bezwen e konman zot ti pou kapab ed li.
4. Kote e konman Apolos ti ganny led ki i ti bezwen?
4 Kantmenm Apolos ti kapab koz byen devan piblik, i ti bezwen ganny ansennyen. Sa kalite led ki i ti bezwen, pa ti kapab ganny trouve dan okenn liniversite, me parmi bann konpanyon Kretyen dan kongregasyon. Apolos ti pe al benefisye avek serten pwen ki ti pou fer li ganny en konprenezon pli egzakt konsernan laranzman Bondye pour sov nou. Prisil ek Akilas ti “anmenn li kot zot e eksplik li pli byen Semen Bondye.”
5. Ki ou kapab dir konsernan spirityalite Prisil ek Akilas?
5 Prisil ek Akilas ti for spirityelman e zot ti byen anrasinen dan lafwa. I tre probab ki zot ti “touzour pare pour donn en repons bann ki demann zot leksplikasyon konsernan lesperans ki dan zot,” menm si sa dimoun ti kapab ris, mizer, byen edike, oubyen en lesklav. (1 Pyer 3:15) Akilas ek son madanm ti kapab “anons byen mesaz laverite.” (2 Timote 2:15) I kler ki zot ti etidye Lekritir seryezman. Apolos ti ganny touse oprofon par sa lenstriksyon baze lo ‘Parol Bondye, ki vivan e annan pisans,’ ki enfliyans leker.—Ebre 4:12.
6. Ki mannyer nou konnen ki Apolos ti apresye sa led ki i ti gannyen?
6 Apolos ti apresye legzanp son bann ansennyan e i ti vin pli kalipa pour fer disip. I ti byen servi son konnesans letan i ti pres sa bon nouvel, sirtou parmi bann Zwif. Apolos ti tre tre itil pour persyad bann Zwif konsernan Kris. Vi ki i ti annan “en gran konnesans dan Lekritir,” i ti kapab prouve avek zot ki tou profet dan lepase ti esper larive Kris avek enpasyans. (Akt 18:24, Kingdom Interlinear Translation) Sa resi i azoute ki apre sa, Apolos ti al Akai kot “i ti vin byen itil pour bann ki par lagras Bondye ti krwar. Parski avek son bann largiman solid, i ti montre bann Zwif piblikman ki zot ti dan lerer, i ti prouve par Lekritir ki Zezi ti Kris.”—Akt 18:27, 28.
Aprann atraver Legzanp lezot Ansennyan
7. Konman Akilas ek Prisil ti vin bann bon ansennyan?
7 Ki mannyer Akilas ek Prisil ti vin bann bon ansennyan Parol Bondye? Apard ki etidye Labib seryezman e asiste renyon, zot frekantasyon avek Pol ti’n bezwen ed zot en kantite. Pol ti reste pour 18 mwan kot Prisil ek Akilas an Korent. Zot ti travay ansanm pour fer e repar latant. (Akt 18:2, 3) Mazin sa bann konversasyon spirityel vreman profon ki ti’n kapab deroule antre zot. Sirman en tel frekantasyon avek Pol ti’n ranforsi zot spirityalite! Proverb 13:20 i dir: “Sa ki mars avek bann dimoun saz pou vin saz.” Bon frekantasyon ti fer en bon lefe lo zot lavi spirityel.—1 Korentyen 15:33.
8. Ki Prisil ek Akilas ti aprann letan zot ti obzerv Pol dan predikasyon?
8 Kan Prisil ek Akilas ti obzerv Pol pe prese, zot ti vwar en bon ansennyan an aksyon. Liv Akt i montre ki Pol “ti koze dan Sinagog [Korent] e i ti esey persiad Zwif konman Grek pour krwar.” Plitar, letan Silas ek Timote ti zwenn ansanm avek li, Pol “ti konsakre tou son letan prese, e sertifye avek bann Zwif ki Zezi ti limenm Kris.” Kan bann manm sinagog pa ti montre lentere, Prisil ek Akilas ti remarke ki Pol ti al pres dan en landrwa pli favorab, kot en lakaz akote sinagog. Laba Pol ti kapab ed Krispis, ki ti “sef sinagog,” pour vin en disip. Petet Prisil ek Akilas ti realize ki letan Krispis ti vin disip sa ti annan en lefe profon e prodiktif lo teritwar. Resi i rakonte: “Krispis, . . . avek son fanmir antye ti krwar dan Senyer. Bokou Korentyen ki ti tann Pol ti osi krwar e ti ganny batize.”—Akt 18:4-8.
9. Konman Prisil ek Akilas ti reazir anver legzanp Pol?
9 Lezot proklanmater Rwayonm, parey Prisil ek Akilas, ti imit legzanp Pol dan predikasyon. Sa zapot ti sipliy lezot Kretyen: “Imit mwan parey mwan mon imit Kris.” (1 Korentyen 11:1) An swivan legzanp Pol, Prisil ek Akilas ti ed Apolos pour konpran pli byen lansennyman Kretyen. An retour, Apolos ti ed lezot dimoun ankor. San dout, Prisil ek Akilas ti ede fer disip an Ronm, Korent, ek Efez.—Akt 18:1, 2, 18, 19; Romen 16:3-5.
10. Ki ou’n aprann dan Akt sapit 18 ki pou ed ou dan travay pour fer disip?
10 Ki nou kapab aprann par egzamin Akt sapit 18? Zis parey Akilas ek Prisil ti aprann keksoz avek Pol, nou kapab amelyor nou abilite pour fer disip par swiv legzanp bann bon ansennyan Parol Bondye. Nou kapab frekant bann ki ‘konsakre tou zot letan prese’ e ki pe temwanny oprofon avek lezot. (Akt 18:5, Kingdom Interlinear Translation) Nou kapab obzerve konman ki zot tous leker dimoun par servi diferan fason pour persyad lezot dan zot lansennyman. Sa bann metod i kapab ed nou pour fer disip. Kan en dimoun pe etidye Labib avek nou, nou kapab sizere ki i envit lezot manm son fanmiy oubyen son vwazen pour asiste letid. Oubyen nou kapab dir li fer nou konnen si i annan okenn lezot dimoun ki nou ti a kapab ofer en letid Labib.—Akt 18:6-8.
Kree Loportinite pour fer Disip
11. Kote nou kapab trouv bann nouvo disip?
11 Pol ek son bann konpanyon Kretyen ti sey fer disip par pres port an port, dan laplas piblik, letan zot ti pe vwayaze—anfet partou. Konman en zouvriye Rwayonm devoue ki pe sey fer disip, eski ou kapab elarzi ou aktivite predikasyon? Eski ou kapab servi byen bann loportinite ki ou gannyen pour rod bann ki diny e pres avek zot? Konman ki serten nou bann konpanyon ki pres sa bon nouvel in trouv bann disip? Premyerman, annou get en kou bann temwannyaz par telefonn.
12-14. Pour montre lavantaz temwanny lo telefonn, rakont ou prop leksperyans oubyen en leksperyans dan paragraf.
12 En Kretyen ki nou pou apel Maria ti pe pres port an port Brezil, e i ti donn en trak en zenn madanm ki ti pe kit son lapartman. An servan tit sa trak konman son lentrodiksyon, Maria ti demande, “Eski ou ti a kontan konn plis lo Labib?” Sa madanm ti reponn: “Mon ti a kontan. Me problenm se ki mon en ansennyan, e sa travay i pran tou mon letan.” Maria ti eksplike ki zot ti kapab diskit bann topik Labib lo telefonn. Sa madanm ti donn Maria son nimero telefonn, e son apremidi menm, i ti konmans en letid lo telefonn an servi brosir Sa ki Bondye i ekspekte nou fer. *
13 En serviter aplentan an Etyopi ti pe donn temwannyaz lo telefonn. I ti sirprann pour tann en nespes tapaz par deryer letan i ti pe koz avek en zonm. Sa zonm ti demann li pour telefonn plitar. Plitar letan i ti telefonnen, sa zonm ti demann leskiz e dir ki kan i ti telefonnen pli boner, li ek son madanm ti pe dispit. Sa ser ti servi sa remark konman en loportinite pour fer vwar ki Labib i donn bann bon gidans pour rezourd problenm fanmiy. I ti dir li ki bokou fanmiy in ganny led dan sa liv Sekre pour en Fanmiy ere, en liv pibliye par Temwen Zeova. Detrwa zour apre ki sa zonm ti’n ganny sa liv, sa ser ti telefonn li ankor. I ti dir: “Sa liv in sov mon maryaz!” Anfet, i ti’n reini lafanmiy pour partaz bann bon pwen ki i ti’n lir dan sa liv avek zot. En letid Labib ti konmanse e pa bokou letan apre, sa zonm ti konmans asiste renyon Kretyen regilyerman.
14 En proklanmater an Dennmark ki ti konmans en letid Labib par temwanny lo telefonn i dir: “Sirveyan servis ti ankouraz mwan pour partisip dan temwannyaz lo telefonn. Okonmansman mon ti ezite, an dizan: ‘Sa pa pour mwan sa.’ Me en zour, mon ti pran kouraz e fer mon premye temwannyaz lo telefonn. Sonja ti reponn e apre en pti konversasyon, i ti aksepte en piblikasyon baze lo Labib. En zour swar nou ti pe diskit lo kreasyon, e i ti anvi lir sa liv La vie: comment est-elle apparue? Évolution ou création? * Mon ti dir li ki i ti a byen si nou ti zwenn an personn e diskit sa size. I ti dakor. Ler mon ti arive, Sonja ti’n pare pour etidye. Depi sa, nou’n fer letid tou le semenn.” Nou ser Kretyen i konklir: “Pour bokou lannen mon’n priye pour ganny en letid Labib, me mon pa ti pe ekspekte ganny enn par temwannyaz lo telefonn.”
15, 16. Ki leksperyans ou kapab rakonte pour montre akoz i byen ki nou sey diferan fason pour konmans letid Labib?
15 Bokou proklanmater pe ganny bon rezilta akoz zot pe aplik sizesyon pour temwanny avek dimoun partou kot zot ete. En ser Letazini ti park son loto akote en kanmyon komers dan en landrwa parking. Kan sa madanm dan sa kanmyon ti vwar li, sa ser ti konmans eksplik li en pe lo nou travay edikasyonnel lo Labib. Sa madanm ti ekoute, apre i ti sorti dan kanmyon e vin kot loto sa ser. I ti dir: “Mon kontan ki ou’n arete pour koz avek mwan. I fer lontan ki mon pa’n ganny enn zot piblikasyon. Deplis, mon anvi etidye Labib ankor. Eski ou pou kapab fer mon letid?” Nou ser ti alor kree en sitiasyon favorab pour partaz sa bon nouvel.
16 En ser Letazini ti vizit bann sant reabilitasyon e i ti ganny en bon leksperyans. I ti apros direkter en serten aktivite dan sa landrwa e dir li ki i ti a kontan volonter pour ede pran swen avek bezwen spirityel bann rezidan sa landrwa. Nou ser ti azoute ki i ti a kontan fer en letid Labib sak semenn avek tou sa ki anvi asiste. Sa direkter ti donn li permisyon pour vizit diferan lasanm rezidans. En pti pe letan apre, i ti pe fer letid trwa fwa par semenn avek en total 26 rezidan. Enn parmi zot i kapab asiste nou renyon regilyerman.
17. Ki lapros ki souvan efikas pour konmans letid Labib?
17 Serten proklanmater in ganny bon rezilta letan zot in ofer en letid Labib direkteman. En zour bomaten, en kongregasyon ki annan 105 proklanmater ti fer en zefor spesyal pour ofer en letid Labib avek sak dimoun ki zot zwenn kot lakour. Katreven sis proklanmater ti partisip dan predikasyon sa zour. Apre ki zot ti’n pas 2 er-d-tan dan predikasyon, zot ti vwar ki omwen 15 nouvo letid Labib ti’n konmanse.
Kontinyen rod bann ki diny
18, 19. Ki lenstriksyon enportan Zezi ti donnen ki nou bezwen gard antet? Pour arive fer sa, ki nou devret determinen pour fer?
18 Petet konman en proklanmater Rwayonm, ou ti a swete esey sa bann sizesyon dan sa lartik. Byensir, i ti a byen pran an konsiderasyon koutim lokal kan ou pe mazin pour servi en serten metod temwannyaz. Sirtou, annou gard antet lenstriksyon ki Zezi ti donnen pour rod bann ki diny e ed zot pour vin disip.—Matye 10:11; 28:19.
19 Pour arive fer sa, annou “anons byen mesaz laverite.” Nou kapab fer sa par persyad lezot an servan Labib. Sa pou ed nou pour tous leker bann ki anvi ekoute e pous zot pour fer keksoz an retour. Ler nou priy Zeova e depan lo li, nou kapab ede fer lezot vin disip Zezi Kri. Sa i en travay vreman satisfezan! Alors, annou ‘fer tou pour ganny laprouvasyon Bondye,’ touzour onor li konman en proklanmater devoue ki pres avek bi pour fer disip.—2 Timote 2:15.
[Not anba lo paz]
^ par. 12 Pibliye par Temwen Zeova.
^ par. 14 Pibliye par Temwen Zeova.
Eski ou rapel?
• Akoz Apolos ti bezwen ganny en pli bon leksplikasyon lo semen Bondye?
• Dan ki fason Prisil ek Akilas ti aprann avek zapot Pol?
• Ki ou’n aprann konsernan fer disip dan Akt sapit 18?
• Ki mannyer ou kapab kree loportinite pour fer disip?
[Kestyon]
[Portre lo paz 18]
Prisil ek Akilas ti ‘eksplik Apolos pli byen Semen Bondye’
[Portre lo paz 20]
Apolos ti vin pli kalipa pour fer disip
[Portre lo paz 21]
Pol ti pres partou kot i ti ale