Ki Pe Arive avek Lasarite?

APRE latak le 11 Septanm, 2001 dan lavil New York ek Washington, D.C., manm piblik ti donn en sipor remarkab bann viktim sa trazedi. Bann dimoun ti donn 2.7 bilyon dolar Ameriken avek bann lorganizasyon saritab pour ed fanmiy sa bann viktim. Dimoun partou ti anvi ede ler zot ti vwar sa kantite dega.

Me en pe letan apre, serten manm piblik ti ofanse ler zot ti aprann ki serten lorganizasyon saritab renonmen ti pe mal servi larzan ki ti’n ganny anmase. En rapor ti mansyonnen ki en gran lorganizasyon saritab ti deside kit lanmwatye sa 546 milyon dolar Ameriken ki i ti’n resevwar pour servi li pour fer lezot keksoz. Sa ti kree bokou mekontantman. Menm si plitar sa lorganizasyon ti sanz son desizyon e demann leskiz, en zournalis ti dir: “Bann kritik ti dir ki sa sanzman in ariv tro tar e i pa sifi pour reganny sa konfyans” ki dimoun ti mete dan bann lorganizasyon saritab avan sa latak. Me ou, eski ou’n perdi konfyans dan bann lorganizasyon saritab resaman?

Itil oubyen pa itil?

Normalman dimoun i konsider donn larzan avek bann lorganizasyon saritab konman en bon keksoz. Me pa tou dimoun ki dakor avek sa. Plis ki 200 an pase, en zournalis Angle apele Samuel Johnson, ti ekrir: “Ou annan plis lasirans ki ou pe fer en bon keksoz ler ou pey sa bann ki travay, konman lapey pour zot travay, olye ki zis donn larzan konman en kado.” Ozordi osi, serten dimoun i en pe ezite pour donn larzan bann lorganizasyon saritab. Deplis, dimoun pe perdi konfyans dan bann lorganizasyon saritab ler zot tann bann rapor ki zot pe mal servi bann donasyon. Annou konsider de legzanp ki’n arive resaman.

En direkter en lorganizasyon saritab relizye ti perdi son plas apre rapor konmkwa i ti’n depans larzan sa lorganizasyon pour fer en loperasyon pour fer son figir pli zoli e pour pey son bil restoran lavaler 500 dolar Ameriken par semenn pour plis ki 2 an. Bann organizater en gran levennman saritab lo televizyon Langleter ti anbarase ler zot ti dekouver ki dan sa 10 milyon dolar Ameriken, ki ti’n ganny anvoye pour konstri bann nouvo lakaz pour bann orfelen Laroumani, selman 12 lakaz ki’n ganny konstri. Deplis, sa  bann lakaz pa ti’n byen ganny konstri. Plizyer santenn mil dolar ti’n ganny depanse san okenn leksplikasyon kote sa larzan in ale. Ler bann ki fer donasyon i tann bann rapor parey, sa i fer serten pli veye ki kantite ki zot kontribye e avek ki sennla zot pe kontribye.

Eski ou pou kontinyen donnen?

Me pa i regretab pour les aksyon detrwa dimoun oubyen lorganizasyon afekte nou lentere senser ek nou konpasyon pour lezot. Labib i dir: “La sa ki Bondye nou Papa i konsider konman en larelizyon pir e san defo: Pran swen bann orflen ek bann vev dan zot soufrans, e pa les zot ganny sali par move lenflians sa monn.” (Zak 1:27) Wi, en vre Kretyen i devret fer serten keksoz pour bann ki pov ek bann ki dan bezwen.

Me petet ou pe demande, ‘Eski mon devret kontinyen donn bann lorganizasyon saritab, oubyen eski mon ava senpleman esey ede par fer kado sa bann dimoun zot menm?’ Ki kalite donnen ki Bondye i ekspekte avek nou? Sa lartik swivan pou diskit sa bann kestyon.