Lekel Ki Pou Sirviv Zour Zeova?
Lekel Ki Pou Sirviv Zour Zeova?
“Sa zour ki pe brile parey four pe vini.”—MALAKI 4:1.
1. Konman ki Malaki i dekrir lafen sa sistenm?
PROFET Malaki ti ganny enspire par Zeova pour raport bann profesi lo serten levennman efreyan ki ti pou arive tre byento. Sa bann levennman pou afekte tou dimoun lo later. Malaki 4:1 i predir: “ ‘Gete! sa zour ki pe brile parey four pe vini, e tou bann ki annan lodas e tou bann ki pe fer mesanste i bezwen vin parey lapay. E sa zour ki pe vini pou sirman devor zot,’ Zeova bann larme in dir, ‘ki fer ki i pa pou kit ni rasin ni brans pour zot.’ ” Ziska ki degre sa sistenm mesan pou ganny detrir? I pou parey rasin en pye dibwa ki’n ganny konpletman detrir ki fer ki sa pye dibwa pa pou zanmen pous ankor.
2. Konman ki serten lekritir i dekrir zour Zeova?
2 Petet ou pe demande, ‘Ki “zour” ki profet Malaki pe anonse?’ I sanmenm sa zour ki Izai 13:9 i koz lo la, kot i deklare: “Gete! Zour Zeova pe vini, kriyel avek firer ensi ki lakoler brilan, pour fer sa pei vin en lobze sezisman, e pour ki i detrir bann peser dan sa pei.” Tsefanya 1:15 i donn sa deskripsyon: “Sa zour i en zour firer, en zour ladetres ek langwas, en zour tanpet ek dezolasyon, en zour fernwanr ek teneb, en zour nyaz ek teneb epe.”
“Gran Ladetres”
3. Kisisa “zour Zeova”?
3 Dan lakonplisman mazer profesi Malaki, “zour Zeova” i sa peryod letan ki Zezi ti apel ‘gran ladetres.’ Zezi ti predir: “[Alor, i pou annan en gran ladetres, NW ] pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.” (Matye 24:21) Mazinen ki kantite ladetres sa monn in deza eksperyanse, sirtou depi 1914. (Matye 24:7-12) Zis Dezyenm Lager Mondyal tousel in pran plis ki 50 milyon lavi! Pourtan, sa bann problenm i nanryen ditou konpare avek bann maler ki sa gran ladetres pou anmennen. Sa gran ladetres, ki menm peryod letan avek zour Zeova, i termin avek Armagedon, e sa pou anmenn en lafen avek bann dernyen zour sa sistenm mesan.—2 Timote 3:1-5, 13; Revelasyon 7:14; 16:14, 16.
4. Letan zour Zeova pou’n terminen, ki pou’n arive?
4 Alafen sa zour Zeova, lemonn Satan ek bann ki siport li pou’n ganny detrir. Premye pour ganny detrir pou bann fo larelizyon. Apre sa, Zeova pou pas son zizman lo bann sistenm politik e ekonomik Satan. (Revelasyon 17:12-14; 19:17, 18) Ezekyel i predir: “Zot pou zet zot larzan dan semen, e zot lor pou vin en keksoz degoutan. Ni zot larzan ni zot lor pa pou kapab delivre zot zour lakoler Zeova.” (Ezekyel 7:19) Konsernan sa zour, Tsefanya 1:14 i dir: “Sa gran zour Zeova i pros. I pros, e i pe depes bokou.” Sa ki Labib i dir nou konsernan zour Zeova, i devret fer nou determinen pour azir an armoni avek bann lalwa ek prensip drwat Bondye.
5. Ki bann ki annan lakrent pour non Zeova i eksperyanse?
5 Apre ki i ti’n anons sa ki zour Zeova pou fer avek lemonn Satan, Malaki 4:2 i sit Zeova pe dir: “Zot ki annan lakrent pour mon non, soley ladrwatir pou sirman lev lo zot avek gerizon dan son lezel; e zot pou vreman sorti e pil lo later parey bann pti bef angrese.” “Soley ladrwatir” i Zezi Kri. I ‘lalimyer spirityel lemonn.’ (Zan 8:12) Zezi i leve avek gerizon, premyerman avek gerizon spirityel, ki nou pe eksperyanse konmela, e apre avek gerizon fizik total, ki pou dan nouvo lemonn. Parey Zeova i dir, bann ki pou’n ganny geri pou “sorti e pil lo later parey bann pti bef angrese” ki eksite e kontan zot in ganny large.
6. Ki selebrasyon laviktwar bann serviter Zeova pou partisip ladan?
6 Ki pou arive avek bann dimoun ki inyor sa ki Zeova i demann zot pour fer? Malaki 4:3 i dir: “ ‘Zot lepep [bann serviter Bondye] zot pou sirman pyetin bann mesan, parski zot pou vin parey lapoud anba zot plak lipye sa zour ki mon pou azir,’ Zeova bann larme in dir.” Bann imen ki ador Zeova pa pou partisip dan destriksyon lemonn Satan. Zot pou plito “pyetin lo bann mesan” dan en sans senbolik par selebre sa gran laviktwar apre zour Zeova. Ti annan en selebrasyon apre ki Faraon ek son bann larme ti ganny detrir dan Lanmer Rouz. (Egzod 15:1-21) Demenm, apre ki Satan ek son lemonn pou ganny retire, sa pou swiv par en selebrasyon laviktwar. Bann sirvivan fidel zour Zeova pou kriye: “Annou zwaye e rezwir dan delivrans par li.” (Izai 25:9) Pa i pou en lazwa kan souvrennte Zeova i ganny zistifye e later i ganny netwaye pour kapab viv anpe lo la!
Kretyente pe imit Izrael
7, 8. Dekrir kondisyon spirityel nasyon Izrael dan letan Malaki.
7 Bann ki annan laprouvasyon Zeova i sa bann ki servi li, kontrerman avek bann ki pa fer li. Ti menm parey kan Malaki ti ekrir son liv. An 537 A.N.L, en restan nasyon Izrael ti ganny reetablir apre 70 lannen an egzil an Babilonn. Toudmenm, dan en lespas 100 an, sa nasyon ki ti’n ganny reetablir ti konmans ganny antrennen ankor dan lapostazi ek mesanste. Laplipar dimoun ti pe dezonnor non Zeova; inyor son bann lalwa drwat; sali son tanp par anmenn bann zannimo ki pa vwar kler, ki bwate e malad pour sakrifis; e divorse avek zot madanm ki zot ti annan depi zot zenes.
8 Alor, Zeova ti dir zot: “Mon pou vin obor zot pour zizman, e mon pou vin en temwen vit kont bann sorsye, e kont bann adilter, e kont bann ki pe fer bann fo serman, e kont bann ki pe azir dan en fason malonnet avek saler en travayer ki ganny en saler, avek en vev e avek en pti garson ki napa papa, e bann ki pe pous rezidan etranze, zot pa’n annan lakrent pour mwan . . . parski mwan mon Zeova; mon pa’n sanze.” (Malaki 3:5, 6) Toudmenm, Zeova ti lans en lenvitasyon pour tou sa ki ti anvi detourn kont zot move semen: “Retourn kot mwan, e mon pou retourn kot zot.”—Malaki 3:7.
9. Konman ki profesi Malaki ti ganny en premye lakonplisman?
9 Sa bann parol ti osi annan en lakonplisman dan premye syek N.L. En restan Zwif ti servi Zeova e zot ti form parti sa nouvo “nasyon” ki konpri bann Kretyen ki’n ganny swazir par lespri, ki avek letan ti pou enkli bann non Zwif. Me lamazorite Izrael par nesans ti rezet Zezi. Alor Zezi ti dir avek nasyon Izrael: “Lala! ou lakaz aprezan in ganny abandonnen.” (Matye 23:38; 1 Korentyen 16:22) Parey Malaki 4:1 ti anonse, an 70 N.L. en “zour . . . brile parey four” ti ariv lo Izrael. Zerizalenm ek son tanp ti ganny detrir, e i ganny raporte ki plis ki en milyon dimoun ti mor akoz lafamin, lager pouvwar, ek latak par bann larme Romen. Me tou bann ki ti servi Zeova ti sov sa ladetres.—Mark 13:14-20.
10. Konman bann dimoun an zeneral ek bann lider relizye pe imit nasyon Izrael dan premye syek?
10 Bann dimoun, sirtou Kretyente, in imit nasyon Izrael ki ti viv dan premye syek. Bann lider Kretyente ek son bann dimoun an zeneral i prefer zot prop fo krwayans relizye olye laverite Bondye ki Zezi ti ansennyen. Se sirtou bann lider relizye ki koupab. Zot refize pour servi non Zeova, e menm tir sa non dan zot versyon Labib. Zot dezonnor Zeova avek zot bann lansennyman ki pa baze lo Labib, tel konman bann doktrin payen parey tourman eternel dan lanfer dife, Trinite, nanm imortel, ek evolisyon. Dan sa fason, zot priv Zeova louanz ki i merite, zis parey bann pret dan letan Malaki ti fer.
11. Konman ki bann larelizyon sa monn i montre lekel ki zot pe vreman servi?
11 An 1914, letan bann dernyen zour ti konmanse, bann larelizyon sa lemonn, sirtou bann ki dir ki zot Kretyen, ti montre klerman lekel ki zot pe vreman servi. Pandan tou le de lager mondyal, zot ti ankouraz zot bann manm pour al lager akoz bann diferans nasyonal, menm si zot ti bezwen touy bann dimoun ki ti dan zot prop larelizyon. Parol Bondye i klerman idantifye bann ki obeir Zeova ek bann ki pa obeir li: “Dan sa fason, nou kapab disteng zanfan Bondye ek zanfan dyab: tou dimoun ki pa pratik sa ki zis, oubyen ki pa kontan son frer i pa en zanfan Bondye. Lala mesaz ki zot in tande depi okonmansman: Ki nou devre kontan kanmarad. Nou pa devre fer konman Kaen. I ti apartenir a dyab e i ti touy son frer.”—1 Zan 3:10-12.
Profesi pe akonpli
12, 13. Ki bann profesi ki serviter Bondye in akonpli dan nou letan?
12 Alafen Premye Lager Mondyal an 1918, bann serviter Zeova ti kapab vwar ki Bondye ti’n kondann Kretyente, ansanm avek lezot fo larelizyon. Apartir sa letan, en lapel ti ganny lanse pour tou dimoun ki drwat: “Sorti dan sa lavil, mon pep, pour ou pa partisip dan son bann pese e ki ou pa resevwar en par son bann fleo. Parski son bann pese in akimile ziska oter lesyel, e Bondye in mazin son bann move laksyon.” (Revelasyon 18:4, 5) Bann ki ti vreman anvi servi Zeova ti konmans ganny pirifye e zot ti kit deryer tou sa ki ti pour fo larelizyon e konmans pres sa bon nouvel lo sa Rwayonm ki ti’n deza ganny etabli partou dan lemonn, en travay ki bezwen ganny konplete avan lafen sa sistenm mesan.—Matye 24:14.
13 Sa ti pou akonpli sa profesi dan Malaki 4:5, kot Zeova i dir: “Gete! Mon pe anvoy kot zot profet Eliya avan ki gran zour efreyan Zeova i vini.” Sa profesi ti ganny en premye lakonplisman dan sa travay ki Zan-Batis ti fer, ki ti ganny anonse par Eliya. Zan ti fer en travay parey pour Eliya kan i ti batiz bann Zwif ki ti repantir pour zot pese kont lalyans Lalwa. Pli enportan ankor, Zan ti anons larive Mesi. Me travay Zan ti akonpli profesi Malaki selman lo en pti lesel. Menm si Zezi ti idantifye Zan konman en dezyenm Eliya, i ti endike ki pou annan ankor en lot travay parey pour “Eliya” ki ti pou ganny fer dan lavenir.—Matye 17:11, 12.
14. Ki travay enportan ki bezwen ganny fer avan sa sistenm i trouv son lafen?
14 Profesi Malaki ti montre ki sa travay enportan parey pour Eliya ti pou ganny fer avan “ki gran zour efreyan Zeova i vini.” Sa zour pou konklir avek lager gran zour Bondye Tou Pwisan ki pe aprose rapidman, Armagedon. Savedir ti pou annan en travay ki ti pou koresponn avek aktivite ki Eliya ti fer, avan lafen sa sistenm mesan ek Renny Milener Rwayonm seles Bondye anba direksyon Zezi Kri ki’n ganny kouronnen. E zis parey profesi ti dir, avan ki Zeova i detrir sa sistenm mesan, sa group ki reprezant Eliya dan nou letan, ki pe ganny soutenir par plizyer milyon lezot konpanyon Kretyen ki annan lesperans teres, pe avek lantouzyasm kontinyen reetablir ladorasyon pir, glorifye non Zeova, e ansenny laverite biblik bann dimoun ki parey mouton.
Zeova i beni son bann Serviter
15. Konman ki Zeova i mazin son bann serviter?
15 Zeova i beni bann ki servi li. Malaki 3:16 i dir: “Sa letan, bann ki ti annan lakrent pour Zeova ti koz avek kanmarad, sakenn avek son konpanyon, e Zeova ti kontinyen port latansyon e ekoute. E en liv souvenir ti konmans ganny ekrir devan li pour bann ki ti annan lakrent pour Zeova e pour bann ki ti pans lo son non.” Depi letan Abel, Bondye in pran not, konmsi i pe ekrir dan en liv, non tou bann imen ki i pou mazinen pour donn lavi eternel. Zeova i dir avek sa bann endividi: “Anmenn tou dizyenm parti dan stor, pour ki i ava annan manze dan mon lakaz; e teste mwan, silvouple, dan sa domenn, . . . gete si mon pa ava ouver baro lapli dan lesyel avek zot e si mon pa ava vers en benediksyon lo zot ziska ki i ava nepli annan ankor bezwen.”—Malaki 3:10.
16, 17. Konman ki Zeova in beni son pep ek zot travay?
16 Zeova in vreman beni bann ki servi li. Konman? En fason se par donn zot en pli bon konprenezon lo son plan. (Proverb 4:18; Danyel 12:10) En lot fason se par fer zot ganny en rezilta enkrwayab dan zot travay predikasyon. Bokou dimoun senser in zwenn ansanm avek zot dan vre ladorasyon, e zot form “en gran lafoul, . . . sorti dan tou nasyon, tribi, pep ek lalang. . . . Zot ti kriye avek en lavwa for: ‘Nou delivrans i sorti kot nou Bondye ki asize lo tronn ek kot Lanyo!’ ” (Revelasyon 7:9, 10) Sa gran lafoul in ganny manifeste dan en fason merveye e bann ki pe aktivman servi Zeova in aprezan ariv plis ki sis milyon e zot asosye dan 93,000 kongregasyon partou dan lemonn!
17 Bann piblikasyon baze lo Labib ki Temwen Zeova i pibliye i osi montre benediksyon Zeova, parski zot sa bann piblikasyon ki’n ganny pli distribye dan listwar. Aktyelman, 90 milyon kopi magazin Latour Veyer ek Réveillez-vous! i ganny prodwir tou le mwan; Latour Veyer dan 141 langaz e Réveillez-vous! dan 87 langaz. Liv La vérité qui conduit à la vie éternelle, pibliye an 1968, in ganny pibliye dan 117 langaz e plis ki 107 milyon kopi in ganny distribye. En total 81 milyon kopi liv Vous pouvez vivre éternellement sur une terre qui deviendra un paradis, ki ti sorti an 1982, in ganny distribye dan 131 langaz. E liv Konnesans Ki Anmenn ver Lavi Eternel, ki ti sorti an 1995, in ariv en total 85 milyon dan apepre 154 langaz. En total 150 milyon kopi brosir Sa ki Bondye i ekspekte nou fer, pibliye an 1996, in deza ganny distribye dan apepre 244 langaz.
18. Akoz nou rezwir prosperite spirityel malgre lopozisyon?
18 Nou’n rezwir prosperite spirityel malgre ki nou’n ganny lopozisyon pli sever e pli persistan avek lemonn Satan. Sa i montre ki sa parol dan Izai 54:17 i vre: “ ‘Nenport ki zarm ki pou ganny formen kont ou pa pou reisi, e nenport ki lalang ki pou lev kont ou dan zizman ou pou kondannen. Sa i posesyon erediter bann serviter Zeova, e zot ladrwatir i sorti kot mwan,’ se sa ki Zeova i deklare.” Konman i rekonfortan pour serviter Zeova konnen ki Malaki 3:17 pe akonpli prensipalman lo zot: “ ‘Sirman zot pou vin pour mwan,’ Zeova bann larme in dir, ‘sa zour ler mon pe prodwir en posesyon spesyal.’ ”
Servi Zeova dan Lazwa
19. Konman ki nou kapab disteng bann ki servi Zeova ek bann ki pa fer li?
19 Diferans ant bann serviter fidel Zeova ek bann ki dan lemonn mesan Satan, pe vin pli kler zour apre zour. Malaki 3:18 ti predir: “Sirman zot pou vwar ankor distenksyon ant enn ki drwat ek enn ki mesan, ant enn ki pe servi Bondye ek enn ki pa’n servi li.” Enn parmi sa kantite distenksyon se ki bann ki servi Zeova i fer li avek bokou lazwa. En rezon pour sa se akoz sa lesperans merveye ki zot annan. Zot annan konfyans total dan Zeova kan i dir: “Mon pe kree nouvo lesyel ek en nouvo later; bann keksoz ansyen pa pou ganny rapel, zot pa pou ni vin dan leker. Me rezwir, zot lepep, e annan lazwa pour touzour dan sa ki mon pe kree.”—Izai 65:17, 18; Psonm 37:10, 11, 29; Revelasyon 21:4, 5.
20. Akoz nou en pep zwaye?
20 Nou krwar dan promes Zeova ki son pep fidel pou sirviv son gran zour e antre dan nouvo lemonn. (Tsefanya 2:3; Revelasyon 7:13, 14) E menm si i arive ki serten parmi nou i dormi dan lanmor avan nouvo monn i vini akoz lavyeyes, maladi, oubyen aksidan, Zeova i promet nou ki i pou resisit nou pour viv pour touzour. (Zan 5:28, 29; Tit 1:2) Alor menm si nou annan nou problenm ek difikilte, nou annan tou rezon pour nou pli zwaye ki tou dimoun lo later anmezir ki nou pe apros zour Zeova.
Ki ou pou reponn?
• Kisisa “zour Zeova”?
• Konman ki bann larelizyon sa lemonn pe imit ansyen Izrael?
• Ki bann profesi ki serviter Zeova pe akonpli?
• Konman ki Zeova in beni son pep?
[Study Questions]
[Portre lo paz 29]
Dan premye syek, Zerizalenm ‘ti brile parey four’
[Portre lo paz 32]
Serviter Zeova i vreman ere akoz zot annan en lesperans merveye