Eski Ou’n Resevwar “Lespri Laverite”?
Eski Ou’n Resevwar “Lespri Laverite”?
‘Mon Papa . . . pou donn zot en asistan ki pou reste avek zot pour touzour. Sa i Lespri laverite.’—ZAN 14:16, 17.
1. Ki lenformasyon enportan Zezi ti donn son bann disip dan bann dernyen moman ki i ti pase avek zot dan sa lasanm anler?
“SENYER, kote ou pe ale?” Sa ti enn bann kestyon ki bann zapot Zezi ti demann li dan bann dernyen moman ki i ti pase avek zot dan en lasanm anler an Zerizalenm. (Zan 13:36) Anmezir ki sa renyon ti progrese, Zezi ti enform zot ki aprezan ti’n ler pour li kit zot pour retourn kot son Papa. (Zan 14:28; 16:28) I ti pou nepli avek zot an personn pour enstri zot e reponn zot kestyon. Toudmenm, i ti reasir zot an dizan: ‘Mon pou demann mon Papa, e i pou donn zot en asistan ki pou reste avek zot pour touzour.’—Zan 14:16.
2. Ki Zezi ti promet pour anvoy pour son bann disip apre ki i ale?
2 Zezi ti idantifye sa asistan e eksplike konman ki i pou asiste zot. I ti dir zot: ‘Mon pa’n ti dir zot sa depi okonmansman akoz mon ti la avek zot. La mon pe al kot sa enn ki’n anvoy mwan . . . I dan zot lentere ki mon ale, akoz si mon pa ale asistan pa pou vin kot zot, me si mon ale, alor mon a anvoy li kot zot. Kan Lespri laverite i vini, i pou gid zot dan laverite an antye.’—Zan 16:4, 5, 7, 13.
3. (a) Kan ki “Lespri laverite” ti ganny anvoye pour bann premye Kretyen? (b) Nonm en fason enportan ki lespri ti pou en ‘asistan’ pour zot.
3 Sa promes ti ganny akonpli zour Lapannkot lannen 33 N.L., parey zapot Pyer ti konfirmen: “Bondye in resisit sa Zezi ki mon pe koz lo sa size, e nou tou, nou temwen. I’n ganny plase adrwat Bondye e in resevwar avek son Papa Sent-Espri parey son Papa ti’n promet li. Sa ki zot pe tande e war la, sanmenm sa kado ki i’n vers lo nou.” (Akt 2:32, 33) Parey nou pou vwar plitar, lespri sen ki ti ganny verse zour Lapannkot ti akonpli bokou keksoz pour bann premye Kretyen. Me Zezi ti promet ki “Lespri laverite” ti pou ‘fer zot rapel tou sa ki i ti’n dir zot.’ (Zan 14:26) I ti pou fer zot rapel minister ek lansennyman Zezi, e osi parol egzakt ki i ti dir, e met li an ekri. Sa ti pou itil sirtou pour zapot Zan ki ti aze kan i ti konmans ekrir son Levanzil alafen premye syek N.L. Dan sa resi ti annan sa konsey enportan ki Zezi ti donnen kan i ti entrodwir Memoryal son lanmor.—Zan, sapit 13-17.
4. Ki mannyer “Lespri laverite” ti ed bann premye Kretyen swazir?
4 Zezi ti osi promet bann premye disip ki lespri ti pou ‘ansenny zot tou keksoz’ e ‘gid zot dan laverite.’ Lespri ti pou ed zot pour konpran bann keksoz pli profon dan Labib e gard zot ini dan panse, konprenezon ek plan. (1 Korentyen 2:10; Efezyen 4:3) Alors, lespri sen ti fer sa bann premye Kretyen azir konman en group ‘lesklav fidel e pridan’ pour fourni lezot Kretyen swazir ‘manze spirityel kan i ler.’—Matye 24:45.
Lespri i konfirmen
5. (a) Ki nouvo keksoz ki Zezi ti revele avek son bann disip sa zour swar le 14 Nizan, lannen 33 N.L.? (b) Ki rol lespri sen ti pou zwe dan lakonplisman promes Zezi?
5 Sa zour swar le 14 Nizan lannen 33 N.L., Zezi ti donn en lendikasyon son bann disip ki plitar i ti pou resevwar zot e zot ti pou reste avek li ek son Papa dan lesyel. I ti dir zot: “I annan en kantite lasanm dan lakaz mon Papa. Si pa ti vre, eski mon ti ava dir zot, ki mon pe al prepar en plas pour zot? E apre ki mon al prepar en plas pour zot, mon pou retournen e pran zot avek mwan, pour ki zot a la kot mwan mon ete.” (Zan 13:36; 14:2, 3) Zot ti pou renny avek li dan son Rwayonm. (Lik 22:28-30) Pour zot ganny sa lespwar seles, zot ti pou bezwen “ne par Lespri-sen” konman bann garson spirityel Bondye e ganny swazir pour servi konman bann lerwa ek pret avek Kris dan lesyel.—Zan 3:5-8; 2 Korentyen 1:21, 22; Tit 3:5-7; 1 Pyer 1:3, 4; Revelasyon 20:6.
6. (a) Kan sa lapel pour viv dan lesyel ti konmanse e ki kantite dimoun ki ti resevwar sa lapel? (b) Sa bann ki ti ganny apele ti ganny batize dan kwa?
6 Sa ‘lapel par Bondye’ ti konmans zour Lapannkot lannen 33 N.L., e i paret ki an zeneral i ti’n terminen ver milye bann lannen 1930. (Ebre 3:1) Kantite ki’n ganny sele par lespri sen pour form parti Izrael spirityel i 144,000, ki’n “ganny sove lo later.” (Revelasyon 7:4; 14:1-4) Sa bann endividi ti ganny batize dan lekor spirityel Kris, dan son kongregasyon, e dan son lanmor. (Romen 6:3; 1 Korentyen 12:12, 13, 27; Efezyen 1:22, 23) Apre ki zot ti ganny batize avek delo e swazir par lespri sen, zot ti viv en lavi sakrifis, setadir en lavi lentegrite ziska zot lanmor.—Romen 6:4, 5.
7. Akoz zis bann Kretyen swazir ki kapab pran lanblenm zour Memoryal?
7 Konman bann Izraelit spirityel, sa bann Kretyen swazir ti dan en nouvo lalyans ki ti ganny fer ant Zeova ek “Izrael Bondye.” (Galat 6:16, NW; Zeremi 31:31-34) Sa nouvo lalyans ti ganny konfirmen par disan Zezi ki ti ganny verse. Zezi ti mansyonn sa kan i ti entrodwir Memoryal son lanmor. Lik i raporte: “I ti pran dipen, e apre ki i ti’n remersi Bondye i ti kas li an morso e i ti donn zot an dizan, ‘Sa i mon lekor ki’n ganny ofer pour zot. Fer sa an mon memwar.’ I ti osi pran lakoup apre repa an dizan, ‘Sa lakoup i nouvo lalyans ki’n ganny sele par mon disan, verse pour zot.’ ” (Lik 22:19, 20) Larestan manm sa 144,000 ki ankor lo later, i sa bann ki kapab pran sa dipen ek diven ki annan en sinifikasyon senbolik zour Memoryal lanmor Kris.
8. Konman ki bann Kretyen swazir i konnen ki zot in resevwar sa lapel pour al viv osyel?
8 Ki mannyer bann Kretyen swazir i konnen ki zot in resevwar sa lapel pour al viv dan lesyel? Lespri sen in konfirm sa pour zot. Zapot Pol ti ekrir sa bann dimoun: “Tou sa ki les li ganny gide par Lespri Bondye, i bann garson Bondye. . . . Lespri limenm i konfirm sa ki dan nou lespri, ki nou zanfan Bondye. E si nou son bann zanfan, alor nou osi son bann zeritye: zeritye Bondye, e zeritye ansanm avek Kris, parski si nou soufer avek li, avek li, nou osi ganny glorifye.” (Romen 8:14-17) Sa konfirmasyon ki lespri i donnen i sitan pwisan ki bann ki annan okenn pti doutans konsernan resevwar sa lapel seles i kapab konklir lozikman ki zot pa’n ganny apele, e zot pa pou pran lanblenm pandan Memoryal.
Lespri ek lezot Mouton
9. Lekel sa de group diferan ki ganny mansyonnen dan bann Levanzil e dan liv Revelasyon?
9 Zezi ti pe mazin sa pti group Kretyen ki’n ganny apele pour form parti Izrael spirityel, kan i ti mansyonn “pti troupo.” Zot in ganny resevwar dan “berkay” nouvo lalyans, kontrerman avek sa gran kantite ‘lezot mouton,’ ki Zezi ti dir i bezwen ganny rasanble osi. (Lik 12:32; Zan 10:16) Bann lezot mouton ki pe ganny rasanble dan letan lafen pou form sa “gran lafoul” ki pou sirviv ‘gran ladetres,’ avek lespwar pour viv eternelman dan paradi lo later. Sa ki enteresan se ki sa vizyon ki Zan ti gannyen alafen premye syek N.L. i fer diferans ant sa gran lafoul ek sa 144,000 manm Izrael spirityel. (Revelasyon 7:4, 9, 14) Eski lezot mouton i resevwar lespri sen zot osi? Si wi, ki lefe sa i annan lo zot lavi?
10. Konman ki lezot mouton i ganny batize “o non di-Per, di-Fis e di-Sent-Espri”?
10 Anfet, lespri sen i zwe en rol enportan dan lavi lezot mouton. Zot senboliz zot dedikasyon avek Zeova par ganny batize “o non di-Per, di-Fis e di-Sent-Espri.” (Matye 28:19) Zot rekonnet souvrennte Zeova, soumet avek Kris konman zot Lerwa ek Liberater, e soumet avek aksyon lespri Bondye, oubyen son lafors aktif, dan zot lavi. Sak zour, zot esey kiltiv “fri Lespri,” ki enkli “lanmour, lazwa, lape, pasyans, labonte, fidelite, ladouser, kontrol lo son prop lekor.”—Galat 5:22, 23.
11, 12. (a) Konman ki bann Kretyen swazir in ganny sangtifye dan en fason tre spesyal? (b) Dan ki fason lezot mouton in ganny sangtifye e vin sen?
11 Lezot mouton i bezwen osi les Parol Bondye ek son lespri sen pirifye oubyen sangtifye zot. Bann Kretyen swazir in deza ganny sangtifye dan en fason tre spesyal, zot in ganny deklare drwat e sen konman nouvel marye Kris. (Zan 17:17; 1 Korentyen 6:11; Efezyen 5:23-27) Profet Danyel i refer avek zot konman “bann sen sa Enn Siprenm,” ki resevwar Rwayonm “fis de lonm,” Zezi Kri. (Danyel 7:13, 14, 18, 27) Pli boner, atraver Moiz ek Aaron, Zeova ti deklar avek nasyon Izrael: “Mwan, mon Zeova zot Bondye; e zot bezwen sangtifye zot lekor e zot bezwen montre zot sen, akoz mon sen.”—Levitik 11:44.
12 Sa mo “sangtifikasyon” i zeneralman vedir “lakt oubyen prosesis pour fer en keksoz vin sen, separ oubyen met li apar pour servis oubyen servi Zeova Bondye; en kondisyon sen, sangtifye, oubyen pirifye.” Depi 1938, Latour Veyer ti deklare ki bann Yonadab, oubyen lezot mouton, “i bezwen aprann ki konsekrasyon [dedikasyon] ek sangtifikasyon i neseser delapar sak dimoun ki pou form parti sa gran nonm e viv lo later.” Dan vizyon sa gran lafoul, ki’n ganny rikorde dan liv Revelasyon, i mansyonnen ki zot in “lav zot rob e blansi li dan disan Lanyo” e ki zot pe ofer Zeova “ladorasyon lizour konman aswar dan son tanp.” (Revelasyon 7:9, 14, 15) Avek led lespri sen, lezot mouton i fer zot mye pour satisfer legzizans Zeova an rapor avek sentete.—2 Korentyen 7:1.
Fer Dibyen anver bann Frer Kris
13, 14. (a) Dapre parabol Zezi konsernan mouton ek kabri, delivrans mouton i depan lo kwa? (b) Dan sa letan lafen, konman ki lezot mouton in siport bann frer Kris?
13 Zezi ti atir latansyon lo sa relasyon pros ki egziste ant lezot mouton ek pti troupo dan son parabol mouton ek kabri, ki trouve dan son profesi lo “lafen sa sistenm.” Dan sa parabol, Kris ti montre klerman ki delivrans lezot mouton i relye etrwatman avek zot kondwit anver bann Kretyen swazir, ki i ti apel “mon bann frer.” I ti dir: “Lerwa pou dir avek sa bann lo son kote drwat, ‘Vini, zot ki mon Papa in beni! Vin erit Rwayonm ki’n ganny prepare pour zot depi kreasyon lemonn. . . . An verite mon dir zot, sak fwa ki zot ti fer sa pour enn bann pli pti parmi mon bann frer, anver mwan ki zot in fer li!’ ”—Matye 24:3; 25:31-34, 40.
14 Sa lekspresyon “sak fwa ki zot ti fer sa” i refer avek sipor ranpli avek lanmour ki zot in donn bann frer Kris anzandre avek lespri, ki lemonn Satan in tret zot konman bann etranze, menm met serten dan prizon. Zot ti bezwen manze, sifizaman lenz ek swen medikal. (Matye 25:35, 36) Dan sa letan lafen, depi 1914, plizyer Kretyen swazir in trouv zot lekor dan sa bann sitiasyon. Listwar modern bann Temwen Zeova i demontre ki zot in ganny soutenir par zot bann konpanyon fidel, lezot mouton, ki’n ganny motive par lespri.
15, 16. (a) Dan ki aktivite lezot mouton in sirtou ed bann frer swazir Kris lo later? (b) Konman ki bann Kretyen swazir in eksprim zot lapresyasyon pour lezot mouton?
15 Dan sa letan lafen, bann frer swazir Kris lo later in sirtou ganny sipor aktif lezot mouton dan sa travay pour ‘anons sa Bonn Nouvel Rwayonm partou dan lemonn pour tou dimoun konnen.’ (Matye 24:14; Zan 14:12) Anmezir ki lakantite Kretyen swazir lo later pe diminyen avek letan, lakantite lezot mouton in ogmante e i konpri plizyer milyon. Plizyer milye parmi zot in servi konman bann evanzelizater aplentan—bann pionye ek bann misyonner—pour propaz sa bon nouvel Rwayonm “ziska tou bann landrwa pli elwannyen lo later.” (Akt 1:8) Lezot i partisip dan sa travay temwannyaz otan ki zot kapab e avek lazwa zot soutenir sa travay enportan lo plan finansyel.
16 Bann frer swazir Kris i vreman apresye sa soutyen ki zot konpanyon, lezot mouton, i donn zot! Zot santiman in ganny byen eksprimen dan liv Sécurité universelle sous le Règne du “Prince de paix” fourni par group lesklav an 1986. I dir: “Depi Dezyenm Lager Mondyal, profesi Zezi konsernan ‘lafen sa sistenm’ pe ganny realize prensipalman akoz rol ki ‘sa gran lafoul’ konpoze avek ‘lezot mouton’ pe zwe. . . . Alor, en gran mersi i al pour sa ‘gran lafoul’ diferan nasyon ek langaz pour zot partisipasyon aktif dan lakonplisman profesi [Zezi] dan Matye 24:14!”
“Pa ariv dan Perfeksyon san nou”
17. Dan ki fason bann serviter fidel ki ti viv dan lepase e ki pou ganny resisite lo later “pa ariv dan perfeksyon san” bann Kretyen swazir?
17 Konman en Kretyen swazir li menm, letan i ti pe refer avek bann zonm ek fanm fidel ki ti viv avan Kris, zapot Pol ti ekrir: “Tou sa bann dimoun in ganny aprouve par Bondye akoz zot lafwa, pourtan zot pa’n resevwar sa ki zot ti’n ganny promet. Annefe, Bondye ti annan en meyer plan pour nou [bann Kretyen swazir], pour ki zot pa ariv dan perfeksyon san nou.” (Ebre 11:35, 39, 40) Pandan sa Milener, Kris ek son 144,000 frer swazir dan lesyel pou azir konman bann lerwa ek bann pret e pou administre bann benefis sakrifis ranson Kris lo later. An rezilta, lezot mouton pou “ariv dan perfeksyon” fizik e mantal.—Revelasyon 22:1, 2.
18. (a) Ki bann laverite dan Labib i devret ed lezot mouton pour konpran? (b) Avek ki lespwar lezot mouton i esper “sa moman kan Bondye pou revel son bann garson”?
18 Tousala i devret fer lezot mouton byen konpran akoz Lekritir Grek Kretyen i port sitan bokou latansyon lo Kris ek son bann frer swazir e lo zot rol santral dan lakonplisman plan Zeova. Alors, lezot mouton i konsider li en privilez pour siport dan tou fason ki zot kapab group lesklav ki’n ganny swazir pandan ki zot esper “sa moman kan Bondye pou revel son bann garson” zour Armagedon e pandan renny Milener. Zot kapab esper avek enpasyans pour “ganny libere en zour avek pouvwar destrikter ki pe gard li dan lesklavaz, pour partisip dan laliberte ek laglwar bann zanfan Bondye.”—Romen 8:19-21.
Ini dan Lespri alokazyon Memoryal
19. Ki “Lespri laverite” in fer pour bann Kretyen swazir ek zot konpanyon, e konman ki zot pou ini sirtou le 28 Mars?
19 Dan son lapriyer final ki i ti fer sa zour swar le 14 Nizan lannen 33 N.L., Zezi ti dir: ‘Mon priy . . . pour ki zot tou, zot ava vin en sel. Parey ou mon Papa ou dan mwan e mwan mon dan ou, ki zot osi zot ava dan nou, pour ki lemonn i a krwar ki ou, ki’n anvoy mwan.’ (Zan 17:20, 21) Parski son gran lanmour, Bondye ti anvoy son Garson pour donn son lavi pour delivre bann Kretyen swazir ek bann imen obeisan. (1 Zan 2:2) “Lespri laverite” in ini bann frer Kris ek zot bann konpanyon. Le 28 Mars apre soley kouse, tou le de group pou zwenn ansanm pour komemor lanmor Kris e pour mazin tou sa ki Zeova in fer pour zot atraver sakrifis son Garson byenneme, Zezi Kri. Fotespere ki zot prezans pour sa lokazyon enportan i ranforsi zot linite e renouvle zot determinasyon pour kontinyen fer lavolonte Bondye, e alor demontre ki zot zwaye pour parmi bann ki Zeova i kontan.
Revizyon
• Kan ki “Lespri laverite” ti ganny anvoye kot bann premye Kretyen, e konman i ti demontre ki i en ‘asistan’?
• Konman ki Kretyen swazir i konnen ki zot in ganny apele pour al viv osyel?
• Dan ki bann fason lespri Bondye i travay lo lezot mouton?
• Konman ki lezot mouton in fer dibyen anver bann frer Kris, e akoz zot pa “ariv dan perfeksyon san” bann Kretyen swazir?
[Study Questions]
[Portre lo paz 29]
“Lespri laverite” ti ganny verse lo bann disip zour Lapannkot lannen 33 N.L.
[Portre lo paz 31]
Lezot mouton in fer dibyen anver bann frer Kris par siport zot pour akonpli sa latas divin pour prese