Ou kapab annan en Vre Lafwa

Sarah Jayne ti annan 19 an kan i ti aprann ki i ti annan kanser zover. Apre loperasyon, i ti santi li byen e i ti konfidan konsernan lavenir. Annefe, i ti sitan konfidan, ki letan i ti annan 20 an, i ti fiyanse e konmans fer plan pour son maryaz. Sa menm lannen sa kanser ti retournen, e i ti aprann ki i ti annan zis detrwa semenn pour viv. Sarah Jayne ti mor an Zen 2000, zis avan ki i ti ganny 21 an.

SA KI ti enpresyonn bann viziter ki ti vin kot Sarah Jayne dan lopital sete son konfyans kalm ki i ti annan konsernan lavenir, ansanm avek son lafwa profon dan Bondye e dan son Parol, Labib. Malgre sa trazedi terib ki i ti pe fer fas avek, i ti annan lasirans dan lespwar pour rezireksyon—kot i pou revwar tou son bann zanmi. (Zan 5:28, 29) I ti dir: “Mon pou war zot tou dan nouvo monn Bondye.”

Serten i senpleman konsider sa kalite lafwa konman en ilizyon. “Krwayans lo legzistans apre lanmor i zis en krwayans pour bann dimoun feb,” Ludovic Kennedy ti fer resorti, “lo dernyen son tronpet i pou annan gato ek labyer, menm kavyar ek lafanfar pour zot osi, kot kekpar dan en zarden Edenn zot pou partaz bann moman agreab avek sa bann ki’n mor avan zot e lezot ki’n kapab mor apre zot?” Nou devret soulev en kestyon pour eksprim nou dezakor vizavi sa deklarasyon. Kwa ki pli rezonnab—pour krwar ki “sa lavi i se tou ki nou annan, e alor nou bezwen profit plennman sa lavi,” parey Kennedy i sizere, oubyen pour krwar dan  Bondye ek son promes pour en rezireksyon? Sarah Jayne ti swazir sa dezyenm sizesyon. Konman i ti devlop en tel lafwa?

‘Rod Bondye . . . e vreman trouv Li’

Pour devlop lafwa ek konfyans dan en dimoun, ou bezwen konn li e aprann konman i panse e azir. Pour arive fer sa, leker osi byen ki lespri i enplike. I egzakteman parey ler ou pe kiltiv vre lafwa dan Bondye. Ou bezwen familyariz ou avek li, aprann konn son bann kalite ek son personnalite, dekouver konman ki i’n prouve ki i diny konfyans e ki ou kapab depan lo tou sa ki i’n dir e fer.—Psonm 9:10; 145:1-21.

Serten i krwar ki sa i enposib. Zot dir ki Bondye i tro lwen, i tro misterye—si i vreman egziste. Serten dimoun ki doute ti demande, “Si Bondye i reel parey i paret pour bann Kretyen parey Sarah Jayne, akoz i pa fer larestan nou konn li?” Me eski Bondye i vreman tro lwen ki nou pa kapab konn li? Dan en diskour ki i ti fer avek bann filozof ek bann entelektyel an Atenn, zapot Pol ti dir ki “Bondye ki’n fer lemonn ek tou sa ki ladan” in osi donn tou sa ki neseser afen ki zot ‘rod li . . . e vreman trouv li.’ Annefe, Pol ti dir: “I pa lwen avek sakenn parmi nou.”—Akt 17:24-27.

Alor, konman ou kapab ‘rod Bondye . . . e vreman trouv li’? Serten in fer sa par senpleman obzerv liniver otour zot. Pour bokou dimoun, liniver li menm in donn ase levidans pour konvenk zot ki i bezwen annan en Kreater. * (Psonm 19:1; Izai 40:26; Akt 14:16, 17) Zot santi parey zapot Pol, ki “bann kalite envizib [Bondye], setadir, son pisans eternel ek son natir konman Bondye in ganny revele par bann keksoz ki in fer.”—Romen 1:20; Psonm 104:24.

Ou bezwen Labib

Toutfwa, pour batir en vre lafwa dan ou Kreater, ou bezwen en lot keksoz ki i’n donnen. Ki sa keksoz? Labib—Parol enspire Bondye, dan ki i revel son lavolonte ek son plan. (2 Timote 3:16, 17) “Me espere,” serten i kapab dir, “konman ou kapab krwar tou sa ki Labib i dir kan ou vwar sa bann move keksoz ki sa bann ki dir zot swiv Labib in fer?” I vre ki Kretyente i annan en rikord lipokrizi, britalite ek imoralite ki sokan. Me nenport dimoun rezonnab i kapab war ki Kretyente i zis pretann ki i pe swiv prensip Labib. — Matye 15:8.

Labib li menm in averti ki bokou dimoun pou pretann ki zot ador Bondye me pourtan, “zot pou menm renye zot Met ki’n sov zot.” Zapot Pyer ti kontinyen: “E akoz zot, dimoun pou malkoz semen laverite.” (2 Pyer 2:1, 2) Zezi Kri ti dir ki sa bann dimoun ki “pratik lemal” pou klerman ganny idantifye par zot bann move aksyon. (Matye 7:15-23) Pour rezet Parol Bondye akoz kondwit Kretyente i konmsi ou pe zet en let ki sorti kot enn ou bon zanmi senpleman akoz sa dimoun ki’n delivre sa let napa en bon repitasyon.

San Parol Bondye i enposib pour batir en vre lafwa. Se selman dan bann paz Labib ki Zeova i devwal lafason ki li i vwar keksoz. I eklersi bann kestyon ki toultan ganny souleve tel parey akoz i’n permet soufrans ek douler e ki i pou fer konsernan sa sitiasyon. (Psonm 119:105; Romen 15:4) Sarah Jayne ti krwar ki Labib i Parol enspire Bondye. (1 Tesalonisyen 2:13; 2 Pyer 1:19-21) Konman i’n arive krwar sa? Pa senpleman akoz son paran ti dir li, me akoz i ti pran letan pour evalye avek fransiz tou bann levidans ki montre ki Labib i en revelasyon inik ki sorti kot Bondye. (Romen 12:2) Par egzanp, i ti obzerv lenfliyans pwisan ki Labib ti annan dan lavi bann dimoun ki atase avek son bann prensip. Avek led bann piblikasyon tel parey La Bible: Parole de Dieu ou des hommes?, * i ti atantivman egzamin sa kantite levidans entern ki prouv lenspirasyon divin.

 “Lafwa i vin par Mesaz ki nou tande”

Alor, i pa ase zis pour annan en Labib oubyen menm krwar ki i’n ganny enspire. Zapot Pol ti ekri: “Lafwa i vin par mesaz ki nou tande.” (Romen 10:17) Antann Labib, pa zis posed en Labib, i sa ki batir lafwa. Ou ‘antann’ sa ki Bondye i annan pour dir par lir e etidye son Parol. Menm bann zenn i kapab fer sa. Pol i dir ki ‘depi lanfans’ Timote ti ganny ansennyen “Lekritir sakre” avek son manman ek son granmanman. Eski sa i endike ki Timote ti ganny andoye? Non! Timote pa ti ganny manipile oubyen ganny tronpe dan okenn fason. I ti arive “vreman krwar” sa ki i ti tande e lir.—2 Timote 1:5; 3:14, 15.

Sarah Jayne ti arive krwar dan sa menm fason. Parey bann Bereen premye syek, i ti “resevwar Parol Bondye [avek son paran ek lezot ansennyan] avek bokou lentere.” Konman en pti zanfan, san dout i pa’n ezite pour met konfyans dan sa ki son paran ti dir li. Plitar, anmezir ki i ti grandi, i pa ti zis aksepte tou sa bann keksoz ki i ti’n ganny ansennyen san demann kestyon oubyen san fer nanryen. I ti ‘etidye Lekritir pour war si sa bann keksoz ti vre.’ —Akt 17:11.

Ou kapab batir vre Lafwa

Ou osi ou kapab batir vre lafwa—sa kalite lafwa ki ganny dekrir par zapot Pol dan son let pour bann Kretyen Ebre. I ti dir ki, en tel lafwa, i “lasirans dan keksoz ki ou pe espere, e sertitid keksoz ki ou pa’n war.” (Ebre 11:1) Kan ou annan en tel lafwa, ou pou annan en lasirans total ki tou ou lesperans ek sa ki ou pe espere, ki enkli promes Bondye pour en rezireksyon, pou ganny realize. Ou pou konvenki ki sa bann lesperans i baze lo bann garanti, non pa lo limazinasyon ki tel lespwar pou ganny akonpli. Ou pou konnen ki Zeova pa’n zanmen fel pour gard son promes. (Zozye 21:45; 23:14; Izai 55:10, 11; Ebre 6:18) Promes Bondye pour en nouvo monn pou vin reel pour ou konmsi i deza la. (2 Pyer 3:13) E ou pou vwar klerman avek ou lizye lafwa ki Zeova Bondye, Zezi Kri, ek Rwayonm Bondye i bann realite, non pa bann ilizyon.

Ou pa lo ou tousel pour batir vre lafwa. Apard ki fer son Parol disponib fasilman, Zeova in osi fourni bann kongregasyon Kretyen dan lemonn antye, ki devoue pour ed  bann dimoun ki annan leker senser pour batir lafwa dan Bondye. (Zan 17:20; Romen 10:14, 15) Aksepte tou led ki Zeova i donnen atraver son lorganizasyon. (Akt 8:30, 31) E vi ki lafwa i en fri lespri Bondye, priye sanses pour ki sa lespri i ed ou pour devlop vre lafwa. —Galat 5:22.

Pa les bann ki doute e ki monk bann dimoun ki afirm zot lafwa dan Bondye ek son Parol dekouraz ou. (1 Korentyen 1:18-21; 2 Pyer 3:3, 4) Annefe, vre lafwa i tre enportan pour fortifye ou determinasyon kont bann tel latak. (Efezyen 6:16) Sarah Jayne ti dekouver ki sa i vre, e i ti toultan ankouraz sa bann ki ti vizit li dan lopital pour batir zot prop lafwa. I ti dir: “Pran laverite aker.” “Etidye Parol Bondye. Reste pros avek lorganizasyon Bondye. Priye sanses. Reste aktif dan servis Zeova.”—Zak 2:17, 26.

Letan enn son bann ners ti remark lafwa ki i ti annan dan Bondye e dan rezireksyon, i ti dir: “Ou vreman krwar sa.” Kan i ti ganny demande ki sa ki ti fer li kapab annan en pwenn-vi sitan optimis malgre son bann leprev, i ti reponn: “Se akoz mon annan lafwa dan Zeova. I en vre zanmi pour mwan, e mon kontan li en kantite.”

[Not anba lo paz]

[Portre lo paz 6]

‘Depi lanfans’ Timote ti ganny ansennyen “Lekritir sakre” avek son manman ek son granmanman

[Portre lo paz 6]

Tire dan “Photo-Drame de la Création,” 1914

[Portre lo paz 6]

Bann Bereen ti ganny felisite pour etidye Lekritir toulezour

[Portre lo paz 7]

Se antann e port latansyon lo Labib ki batir lafwa, non pa zis posed enn

[Portre lo paz 7]

“Mon pou vwar zot tou dan nouvo monn Bondye”