Dan Prensip lekel ou pou met Konfyans?

Kiryozite en viziter ki ti pe vizit Lafrik pour premye fwa ti ganny eveye kan i ti war en zonm pe debout drwat obor semen. I ti remarke ki sak minit sa zonm ti trenn son lipye e bouz tre dousman lo en kote anmenmtan ki i ti ankor pe debout drwat. Se selman plitar ki sa viziter ti realize akoz ki sa zonm ti pe bouz koumsa. Annefe, i ti pe esey reste dan lonbraz en poto elektrik. Sa lonbraz ti pe bouz dousman anmezir ki soley ti pe sanz pozisyon.

PAREY sa lonbraz ki soley ti pe donnen, bann aktivite ek bann prensip imen pe touzour sanze. Diferaman avek sa, Zeova, “Papa tou lalimyer” i pa sanze. Disip Zak ti ekrir, avek li “ napa menm lonbraz en sanzman.” (Zak 1:17) Profet Ebre, Malaki, ti ekri deklarasyon Zeova: “Mwan Zeova; Mon pa’n sanze.” (Malaki 3:6) Avek nasyon Izrael dan lepok Izai, Bondye ti dir: “Ziska ou vyeyes mon ankor sa Enn; e ziska ou seve blan mwan mon kontinyen soutenir. Mwan mon pou sertennman azir.” (Izai 46:4) Toutfwa, letan ki pase pa zanmen sanz sa konfyans ki nou annan dan bann promes Bondye Tou Pwisan.

En Leson atraver Lalwa

Zis parey bann promes Zeova i diny konfyans e i pa sanze, i osi leka avek son bann prensip byen ek mal. Eski ou pou annan konfyans dan en marsan ki servi de balans, me selman zis enn ki egzakt? Sertennman non. Pareyman, “en fo balans i en keksoz detestab pour  Zeova, me en pwa konplet i fer li plezir.” (Proverb 11:1; 20:10) Dan Lalwa ki i ti donn bann Izraelit, Zeova ti enkli sa konmann: “Ou pa devret komet lenzistis dan zizman, an meziran, an pezan oubyen an pezan ou an meziran bann likid. Ou bezwen annan bann balans egzakt, bann pwa egzakt, en efa, en in egzakt. Mwan Zeova ou Bondye, ki’n fer ou sorti Lezip.”—Levitik 19:35, 36.

Obeir sa konmann in fer bann Izraelit ganny faver Bondye osi byen ki en kantite benefis materyel. Pareyman, obeir bann prensip Zeova ki pa sanze, pa zis dan peze e mezire me dan tou laspe lavi, i anmenn benediksyon pour sa adorater ki annan konfyans dan li. Bondye i dir: “Mwan, Zeova, mon ou Bondye, sa Enn ki pe ansenny ou pour ou prop profi, sa Enn ki pe fer ou mars lo sa semen lo ki ou devret marse.”—Izai 48:17.

Akoz ki bann Prensip pe deteryore ozordi?

Labib i fer resorti rezon akoz ki bann prensip pe deteryore ozordi. Dernyen liv Labib, Revelasyon, i dekrir en lager dan lesyel, son rezilta se ki i’n afekte tou dimoun ziska ozordi. Zapot Zan ti ekrir: “Alor ti annan lager dan lesyel, Misel avek son bann lanz ti lager kont dragon. Dragon avek son bann lanz ti lager, me dragon pa ti ganny laviktwar, e li avek son bann lanz pa ti kapab reste ankor dan lesyel. Sa gro dragon, ti ganny zet ater. Limenm li sa serpan lantikite, ki apel dyab ou satan, e ki tronp lemonn antye. I ti ganny zete lo later, e son bann lanz ansanm avek li.”—Revelasyon 12:7-9.

Ki lefe sa lager in annan? Zan ti kontinyen: ‘Pour sa rezon, alor, rezoui lesyel ek tou bann zabitan [“lesyel!” NW ] Me maler, later ek lanmer, parski dyab in desann kot zot avek en gran lakoler, akoz i konnen ki i reste li ankor zis en pti pe letan.’—Revelasyon 12:12.

‘Maler pour later’ ti arive kan premye Lager Mondyal ti konmanse an 1914 e anmenn lafen en lepok kot bann prensip ki ti tre diferan avek sa bann ozordi. “Sa Gran Lager 1914-18 i parey en laliny demarkasyon ki diviz sa letan avek sa ki pour nou,” istoryen Barbara Tuchman ti obzerve. “Par touy en kantite dimoun ki ti a’n kapab itil e prodiktif pandan bann lannen ki ti pou swiv, par detrir bann krwayans, sanz bann lide, e kit bann dezapwentman ki pa kapab geri, i ti kree en sanzman reel osi byen ki sanzman dan mantalite bann dimoun sa [de] lepok.” En lot istoryen Eric Hobsbawm ti eksprim menm lide: “Depi 1914, i’n annan en deteryorasyon remarkab dan bann prensip ki ti ganny konsidere konman normal dan bann pei devlope. . . I pa fasil pour realize ziska ki degre nou pe retourn an aryer, malerezman byen vitman, ver bann prensip ki nou bann zanset an diznevyenm syek ti pou konsider konman barbar.”

 Dan son liv Humanity—A Moral History of the Twentieth Century, ekriven Jonathan Glover ti dir: “En fakter dan nou letan se ki lalwa moral pe disparet.” Menm si i pa tro krwar dan lalwa moral sorti dan en sours eksteryer, akoz larelizyon dan bann rezyon oksidantal pe deklinen, i ti averti: “Bann parmi nou ki pa krwar dan lalwa moral larelizyon i bezwen toudmenm enkyet par lefe ki lalwa moral larelizyon pe disparet.”

Ozordi traizon konfyans—ki swa dan komers, politik, oubyen larelizyon oubyen menm dan relasyon personnel e familyal—ek bann konsekans terib i form parti bann move plan Dyab pour anmenn maler lo bann zabitan later. Satan i determinen pour anmenn son lager ziska finisyon e anmenn avek li dan destriksyon tou bann ki anvi viv dapre bann prensip Bondye.—Revelasyon 12:17.

Eski i annan en fason sorti, en solisyon pour sa traizon konfyans ki pe ogmante? Zapot Pol i dir: “Me nou, nou pe espere dapre son promes en nouvo lesyel ek en nouvo later kot pou annan lazistis.” (2 Pyer 3:13) Nou kapab annan konfyans dan sa promes akoz Bondye pa senpleman annan sa pwisans pour akonpli son plan me i osi garanti son lakonplisman. Konsernan okenn ‘parol ki sorti dan mon labous’ Zeova i dir: “Pa pou retourn ver mwan san rezilta, me i pou sertennman fer sa ki mon’n pran plezir, e i pou annan en sikse serten dan sa ki mon’n anvoy li.” Vreman en promes diny konfyans!—Izai 55:11; Revelasyon 21:4, 5.

Viv dapre bann Prensip Bondye

Dan en monn kot bann prensip pe toultan sanze e deteryore, bann Temwen Zeova i esey viv dapre bann prensip ki Labib i ofer. Rezilta se ki zot diferan avek lamazorite, e sa in souvan atrakte latansyon—ek sikannri—par lezot.

Kot en lasanble bann Temwen Zeova an Lonn, en zournalis ti demann en reprezantan si bann Temwen Zeova i vreman bann Kretyen. I ti reponn: “Wi, sirman, akoz Zezi i nou model. Dan sa monn en kantite dimoun i egois, e nou nou santre lo Zezi Kri konman sa semen, konman laverite, ek lavi. Nou krwar ki i Garson Bondye, i pa form par en Trinite, alor nou konpreansyon lo Labib i diferan avek bann larelizyon ki pli renonmen.”

Kan sa entervyou ti pe ganny transmet lo televizyon BBC, sa zournalis ti konklir sa progranm an dizan: “Mon’n aprann en kantite ankor lo akoz ki bann Temwen Zeova i vin tap nou laport. E mon pa krwar ki mon’n deza vwar 25,000 dimoun ki’n byen sanze e ki konport zot byen ansanm dan en landrwa menm moman.” En bon temwannyaz par en obzervater an deor pour montre ki i saz pour kontinyen viv dapre bann prensip Bondye ki pa sanze!

Menm si serten dimoun i kapab pa kontan sa lide viv dapre bann prensip ki zot pa’n etabli zot menm, nou ankouraz ou pour regard dan ou Labib e aprann kisisa bann prensip Bondye. Me pa senpleman fer en egzaminasyon alalezer. Swiv konsey zapot Pol: “Pa swiv bann koutim sa monn konmela me les Bondye transform zot par en sanzman konplet dan zot lentelizans. Pour ki zot a kapab konpran lavolonte Bondye: Sa ki bon, sa ki fer li plezir, sa ki parfe.” (Romen 12:2) Vizit Lasal Rwayonm kot ou pe reste, e esey konn bann Temwen laba. Ou pou dekouver ki zot bann dimoun ordiner ki met zot konfyans dan bann promes Labib e ki demontre zot konfyans dan Bondye par esey viv dapre son bann prensip.

An obzervan bann prensip Bondye ki diny konfyans e ki pa sanze dan ou lavi personnel, sa pou sirman anmenn ou benediksyon. Port latansyon lo lenvitasyon Bondye: “Si selman ou atantif anver mon bann komannman! Alor ou lape pou vin zis parey en larivyer e ou lazistis parey bann laroul dan lanmer.”—Izai 48:18.

[Portre lo paz 5]

Ozordi, i annan en traizon konfyans dan komers, politik, larelizyon, ek relasyon fanmiy