Batir En Fanmiy Ki For Spirityelman
Batir En Fanmiy Ki For Spirityelman
“Elve zot dan en ledikasyon ek lenstriksyon Senyer.” —EFEZYEN 6:4.
1. Ki plan Bondye ti annan pour lafanmiy, me dan plas sa ki ti arive?
“VIN fertil e miltipliye, ranpli later.” (Zenez 1:28) Par sa parol ki i dir avek Adan ek Ev, Zeova ti etablir laranzman fanmiy. (Efezyen 3:14, 15) An regardan lavenir, sa premye koup ti pou kapab vwar en later ki’n ranpli avek zot desandans—en gran fanmiy konpoze avek dimoun parfe ki pe viv ere lo en later paradi e ki pe ador zot sel Gran Kreater. Me Adan ek Ev ti tonm dan pese e later pa’n ganny ranpli avek dimoun drwat ki annan lakrent pour Bondye. (Romen 5:12) Okontrer, lavi fanmiy ti vitman deteryore, e laenn, vyolans ek “leker dir” in dominen sirtou dan “sa bann dernyen zour.”—2 Timote 3:1-5; Zenez 4:8, 23; 6:5, 11, 12.
2. Ki bann abilite desandans Adan ti annan, me kwa ki ti neseser pour batir en fanmiy ki for spirityelman?
2 Adan ek Ev ti ganny kree dan resanblans Bondye. Kantmenm Adan ti’n vin en peser, Zeova ti permet li annan zanfan. (Zenez 1:27; 5:1-4) Parey zot papa, bann desandans Adan ti kapab rekonnet sa ki byen moralman e alor zot ti pou kapab aprann disteng sa ki byen ek sa ki mal. Zot ti pou kapab ganny enstri konman pour ador zot Kreater ensi lenportans pour kontan li avek tou zot leker, nanm, lespri ek lafors. (Mark 12:30; Zan 4:24; Zak 1:27) Deplis, zot ti pou kapab ganny formen “pour pratik lazistis e pour kontan labonte e pour mars avek modesti avek . . . Bondye.” (Mika 6:8) Me etan donnen ki zot ti bann imen enparfe, zot ti pou bezwen donn bokou latansyon zot fanmiy pour zot arive batir en fanmiy ki for spirityelman.
Rod Letan
3. Konman ki paran i kapab “rod letan” pour elve bann zanfan Kretyen?
3 Dan sa letan kritik e konplike, nou devret fer bokou zefor pour ki nou zanfan i vin bann “ki kontan Zeova” e ki vreman “ay sa ki move.” (Psonm 97:10) Bann paran ki saz pou “rod letan” afen ki zot a kapab akonpli sa latas difisil. (Efezyen 5:15-17, NW ) Si ou en paran, ki mannyer ou kapab fer sa? Premyerman, etablir ou bann priyorite e donn latansyon “bann keksoz pli enportan,” ki enkli lansennyman ek formasyon ou zanfan. (Filipyen 1:10, 11, NW ) Dezyenmman, senplifye ou fason viv. Petet ou bezwen aret fer serten aktivite ki pa vreman neseser. Oubyen, petet ou bezwen debaras ou avek serten keksoz ki demann letan pour okipe. Konman en paran Kretyen, ou pa pou zanmen regret zefor ki ou’n bezwen fer afen ki ou kapab elve bann zanfan ki annan lakrent pour Bondye.—Proverb 29:15, 17.
4. Konman ki en fanmiy i kapab reste ini?
4 Pas letan avek ou zanfan, sirtou pour fer bann keksoz spirityel, i vreman vo lapenn e i enn bann pli bon fason pour fer lafanmiy reste ini ansanm. Me sa pa pou vin lo li menm. Plàn serten moman ki zot kapab pase ansanm. Sa pa vedir ki nou senpleman dan menm lakaz, me ki sakenn pe okipe avek son prop zafer. Bann zanfan i devlop pli byen si zot ganny en latansyon personnel sak zour. Touzour pare pour demontre lanmour ek en lentere dan zot. Menm avan ki bann koup marye i deside fer zanfan, zot bezwen reflesir seryezman lo sa responsabilite enportan. (Lik 14:28) Koumsa, zot pa ava konsider elve zanfan konman en travay fatigan. Plito, zot a vwar li konman en privilez sakre.—Zenez 33:5; Psonm 127:3.
Ansenny par ou Parol ek ou Legzanp
5. (a) Ansenny ou zanfan pour kontan Zeova i konmans par kwa? (b) Ki konsey bann paran i gannyen dan Deterononm 6:5-7?
5 Ansenny ou zanfan pour kontan Zeova i konmans par ou prop lanmour pour li. Si ou annan en lanmour tre profon pour Bondye, sa pou pous ou pour fidelman swiv tou son lenstriksyon. Sa i enkli lenstriksyon pour elve ou zanfan “dan en ledikasyon ek lenstriksyon Senyer.” (Efezyen 6:4) Bondye i konsey bann paran pour donn legzanp zot zanfan, pour kominik avek zot, e pour ansenny zot. Deterononm 6:5-7 i dir: “Ou devret kontan Zeova ou Bondye avek tou ou leker, avek tou ou nanm, avek tou ou lespri, e avek tou ou lafors. Sa bann parol ki mon pe konmann ou ozordi i bezwen dan ou leker; ou bezwen enkilke zot dan ou garson e koz lo la ler ou pe asize dan ou lakaz e ler ou pe marse lo semen e ler ou pe alonze e ler ou leve.” Ou kapab enkilke bann komannman Bondye dan ou zanfan par konsey zot tanzantan e repet avek zot. Alor, ou zanfan pou santi sa lanmour ki ou annan pour Zeova e an retour zot pou ganny enfliyanse pour zot osi devlop en relasyon pros avek li.—Proverb 20:7.
6. Lefe ki zanfan i aprann par legzanp, konman ki paran i kapab servi sa dan zot lavantaz?
6 Bann zanfan i touzour anvi aprann. Zot ekout atantivman, zot obzerv byen, e zot vitman imit ou legzanp. Kan zot vwar ki ou pa pe tay deryer keksoz materyel, annefe sa pe ed zot pour aprann swiv konsey Zezi. Ou pe ansenny zot pour pa trakas pour bann keksoz materyel me pour ‘rod plito Rwayonm Bondye.’ (Matye 6:25-33) Ler ou tenir bann bon konversasyon pozitif lo laverite Biblik, lo kongregasyon Bondye, e lo bann ansyen, ou pe ansenny ou zanfan pour respe Zeova e pour apresye son bann provizyon spirityel. Vi ki bann zanfan i fasilman remarke ler ou dir en keksoz e fer lekontrer, alor ou bezwen apiy ou lenstriksyon oral par en kondwit ek latitid ki demontre ki ou menm ou apresye bokou bann keksoz spirityel. Pa i vreman en benediksyon kan bann paran i vwar ki zot zanfan i kontan Zeova avek tou zot leker gras a bon legzanp ki zot in demontre!—Proverb 23:24, 25.
7, 8. Ki legzanp ki demontre lenportans pour edik nou zanfan byen boner dan zot lanfans, e lekel ki merit ganny loner kan nou reisi?
7 En legzanp sorti Venezwela i demontre lenportans pour edik nou zanfan byen boner dan zot lanfans. (2 Timote 3:15) Sa i legzanp en zenn koup marye, Félix ek Mayerlín. Zot tou le de zot pe servi konman pionye. Kan zot garson Felito ti ne, zot ti enpasyan pour fer tou sa ki zot ti kapab pour elve li konman en vre adorater Zeova. Mayerlín ti konmans lir Recueil d’histoires bibliques aotvwa avek li, en liv pibliye par bann Temwen Zeova. Byen boner dan son lanfans, i sanble ki Felito ti rekonnet Moiz ek lezot dimoun dan bann portre sa liv.
8 Menm ki i ti ankor byen zenn, Felito ti konmans donn temwannyaz li tousel. I ti akonpli son dezir pour vin proklanmater Rwayonm, e plitar i ti batize. Avek letan, Felito ti vin en pionye ordiner. Son paran i rakonte: “Ofiramezir ki nou obzerv nou garson pe progrese, nou rekonnet ki loner i al pour Zeova ek son lenstriksyon.”
Ed ou Zanfan pour grandir spirityelman
9. Akoz nou devret santi nou rekonesan pour sa lenstriksyon spirityel ki nou gannyen atraver lesklav fidel e pridan?
9 I annan en sitan kantite magazin, liv ek sit Internet ki donn konsey lo konman pour elve bann zanfan. Laplipar-di-tan “sa bann lenformasyon i kontredir kanmarad,” en edisyon spesyal Newsweek ki koz lo zanfan i dir. “Sa ki pli troublan ankor se kan ou dekouver ki en lenformasyon ki ou ti krwar ou kapab met ou konfyans ladan i konpletman fo.” Pa nou rekonesan ki Zeova in fourni bokou pour enstri e form nou fanmiy spirityelman! Eski ou profit o maksimonm tou bann provizyon spirityel ki ou gannyen atraver lesklav fidel e pridan?—Matye 24:45-47.
10. Konman ki en letid Labib an fanmiy i kapab benefisye paran ek zanfan?
10 I vreman endispansab pour annan en letid Labib regilye an fanmiy dan en latmosfer byen detann. Pour ki sa letid i edikatif, agreab, e ankourazan, i neseser fer en bon preparasyon. Bann paran i kapab konnen kwa ki dan leker ek lespri zot zanfan ler zot fer zanfan eksprim zot. En fason pour determinen si letid an fanmiy i efikas se par obzerve si tou manm lafanmiy i enpasyan pour fer li.
11. (a) Ki bann lobzektif ki paran i kapab ed zot zanfan pour etablir? (b) Ki ti arive kan en pti fiy Zaponnen ti pourswiv son lobzektif?
11 Bann lobzektif spirityel i egalman kontribye pour batir en fanmiy ki for spirityelman, e paran i devret ed zot zanfan pour etabli sa bann lobzektif. Lir Labib sak zour, vin en proklanmater ki regilye, e progrese ver dedikasyon ek batenm i ennde bann lobzektif apropriye. Lezot lobzektif i kapab enkli servi aplentan konman en pionye, en betelit oubyen konman en misyonner. Letan ki i ti lekol primer, en pti fiy Zaponnen, ki apel Ayumi, ti fer li son lobzektif pour temwanny avek tou zelev dan son laklas. Pour revey lentere son ansennyan ek son bann kanmarad laklas, i ti demann permisyon pour met diferan piblikasyon baze lo Labib dan libreri. An rezilta, Ayumi ti kondwir 13 letid Labib pandan son sis lannen lekol primer. Enn parmi sa bann ki ti etidye Labib avek li ensi ki lezot fanmiy sa etidyan ti vin bann Kretyen batize.
12. Konman ki bann zanfan i kapab pli benefisye atraver bann renyon Kretyen?
12 En lot keksoz ki neseser pour en bon lasante spirityel se asiste bann renyon regilyerman. Lapot Pol ti ankouraz bann konpanyon Kretyen pour “pa abandonn zot lasanble parey labitid serten parmi zot.” Annou pa les sa vin en labitid pour nou parski zenn konman vye i benefisye en kantite kan zot regilyerman asiste bann renyon Kretyen. (Ebre 10:24, 25; Deterononm 31:12) Bann zanfan i devret aprann ekout atantivman. Preparasyon pour renyon i osi esansyel parski pli gran benefis ki nou gannyen se kan nou pe touzour partisipe an fezan bann komanter. Byen ki en pti manrmay i kapab konmans donn son komanter an dizan de pti mo oubyen an lizan en pti bout dan paragraf, i pou pli benefisye si i ganny formen pour rod son larepons e met li dan son prop mo. Paran, eski ou menm ou montre legzanp par regilyerman fer bann komanter konstriktif? I byen osi pour sak manm lafanmiy annan son prop Labib, liv kantik, ek en kopi sa piblikasyon ki pou ganny servi pandan diskisyon dan renyon.
13, 14. (a) Akoz paran i devret travay ansanm avek zanfan dan predikasyon? (b) Kwa ki ed en zanfan pour benefisye atraver predikasyon e trouv lazwa ladan?
13 Bann paran ki saz pou konsey zot zanfan pour profite kan zot ankor zenn e for pour servi Zeova, ed zot pour fer predikasyon vin en par enportan dan zot lavi. (Ebre13:15) Se selman kan zot travay avek zot zanfan dan minister ki paran pou kapab fer sir ki zot zanfan i ganny sa formasyon ki zot bezwen pour vin bann minis “ki napa nanryen pour onte me ki anons byen mesaz laverite.” (2 Timote 2:15) Alor, ki ou pe fer? Si ou en paran, eski ou ed ou zanfan pour prepare pour predikasyon? An fezan sa, ou pou ede pour fer prediksyon vin en lazwa pour zot, en keksoz enportan e prodiktif.
14 Ki lavantaz i annan kan paran ek zanfan i travay ansanm dan minister? Dan sa fason, zanfan i kapab remark e kopye bon legzanp zot paran. Anmenmtan, paran i kapab obzerv latitid zot zanfan, lafason ki zot konport zot, ensi ki zot abilite. Fer sir ou anmenn ou zanfan avek ou dan diferan laspe minister. I bon ki sak zanfan i annan son prop sak predikasyon si i posib, e montre li konman pour kit son sak annord e byen prezantab. Atraver en formasyon ek lankourazman ki konsistan, zanfan pou devlop en vre lapresyasyon pour predikasyon, e zot pou vwar predikasyon konman en fason pour montre lanmour pour Bondye e pour zot prosen.—Matye 22:37-39; 28:19, 20.
Mentenir Spirityalite
15. Vi ki mentenir spirityalite en fanmiy i sitan enportan, nonm ennde fason ki nou fer sa?
15 Mentenir spirityalite lafanmiy i esansyel. (Psonm 119:93) En fason pour fer sa se par servi tou loportinite ki ou gannyen pour diskit lo bann keksoz spirityel avek ou fanmiy. Eski ou diskit lo teks Labib pour lazournen avek zot? “Ler ou pe marse lo semen,” eski ou annan labitid partaz bann leksperyans predikasyon avek zot oubyen bann pwen dan bann dernyen Latour Veyer ek Réveillez-vous!? Eski “ler ou pe alonze e ler ou leve” ou mazinen pour remersye Zeova dan lapriyer pour sak zour ki ou viv e pour son bann provizyon ki i fourni an abondans? (Deterononm 6:6-9) Ler ou zanfan i kapab vwar lanmour ki ou annan pour Zeova ganny reflekte dan tou sa ki ou fer, sa pou ed zot pour pran laverite aker.
16. Akoz i enportan pour ankouraz zanfan pour fer zot prop resers?
16 Parfwa, bann zanfan pou bezwen gidans afen ki zot kapab reisi fer fas avek bann problenm ek sitiasyon ki arive avek zot. Olye ki ou touzour dir zot ki pou fer, akoz ou pa montre zot konman zot kapab konn pwenn-vi Bondye lo sa size par ankouraz zot pour fer zot prop resers? Kan bann zanfan i ganny montre konman pour servi byen tou zouti ek piblikasyon ki ‘lesklav fidel’ i fourni, sa pou ed zot devlop en relasyon pros avek Zeova. (1 Samyel 2:21b) Deplis, kan zot partaz benefis ki zot in gannyen atraver zot resers Biblik avek lezot manm lafanmiy, spirityalite lafanmiy antye i ogmante.
Depan antyerman lo Zeova
17. Akoz bann paran tousel pa devret perdi lespwar an sa ki konsern elve zot zanfan pour vin bann Kretyen?
17 Ki mannyer bann paran tousel i kapab batir en fanmiy ki for spirityelman? Kot i konsern elve zanfan, sa bann paran i fer fas avek bokou plis difikilte. Me si ou en paran tousel, pa dekouraze! Ou kapab reisi, parey in leka avek plizyer paran tousel ki’n met zot konfyans dan Bondye, ki’n obeir an aplikan son konsey, e ki’n elve bann bon zanfan ki for spirityelman. (Proverb 22:6) Byensir, bann paran Kretyen ki tousel i bezwen depan antyerman lo Zeova. Zot bezwen annan lafwa ki i pou fourni led.—Psonm 121:1-3.
18. Ki bann bezwen mantal ek bezwen fizik zanfan ki bann paran i devret donn latansyon, me lanfaz i devret ganny mete lo kwa?
18 Bann paran ki saz i rekonnet ki ‘i annan en letan pour riye e en letan pour sotaye.’ (Eklezyast 3:1, 4) Letan detant ek bon rekreasyon ekilibre i esansyel pour devlop lespri ek lekor en zanfan. Bann lanmizik edifyan e sirtou sant bann kantik louanz pour Bondye, pou ed en zanfan devlop en bon latitid ki kapab zwe en rol enportan pour afermi son relasyon avek Zeova. (Kolosyen 3:16) Lazenes i osi en moman pour prepar en zanfan pour vin en adilt ki annan lakrent pour Bondye, afen ki i kapab kontinyen rezwir lavi pour touzour lo en later paradi.—Galat 6:8.
19. Akoz bann paran i kapab annan konfyans ki Zeova pou beni zot zefor ki zot fer pour elve zot zanfan?
19 Zeova i anvi ki tou fanmiy Kretyen i reste for spirityelman e ini. Si nou vreman kontan Bondye e fer nou mye pour obeir son Parol, i pou beni nou bann zefor e i pou donn nou sa kouraz ki nou bezwen pour swiv son direktiv enspire. (Izai 48:17; Filipyen 4:13) Mazinen ki sa loportinite ki ou annan la konmela pour ansenny e form ou zanfan i limite e i pa pou ganny repete. Alor, fer tou sa ki ou kapab pour aplik konsey Parol Bondye, e Zeova pou beni ou bann zefor ki ou fer pour batir en fanmiy ki for spirityelman.
Ki nou’n aprann?
• Akoz i enportan pour rod letan pour ansenny nou zanfan?
• Akoz i neseser ki paran i donn bon legzanp?
• Nonm serten fason ki esansyel pour ed zanfan grandi spirityelman?
• Ki mannyer en fanmiy i kapab mentenir son spirityalite?
[Kestyon]
[Portre lo paz 20, 21]
Bann fanmiy ki for spirityelman i regilyerman etidye Parol Bondye, asiste bann renyon Kretyen e partisip dan predikasyon ansanm