Eski Obeir Pandan Lanfans I En Leson Enportan?

DAN en zournal ti annan en lartik avek sa tit “Bann Paran i Anvi Bann Zanfan Endividyel, Pa Bann Ki Obeir.” Sa rapor ti baze lo en serve ki ti ganny fer an Nouvel Zelann, ki ti revele ki selman “22 poursan bann partisipan ki krwar ki zanfan i devret ganny ansennyen lobeisans dan lakour.” Sa serve i osi fer vwar ki bann paran ozordi i krwar ki i pli enportan pour ansenny zanfan bann keksoz parey bon mannyer, lendepandans, ek responsabilite.

Dan sa lepok endividyalis e egois, i pa sirprenan ki laplipar dimoun i annan en pwenn-vi sonm lo lobeisans e lo lenportans pour ansenny li avek zot zanfan. Me eski lobeisans pandan lanfans i merit ganny konsidere senpleman konman en keksoz vye lepok ki nepli itil? Oubyen eski lobeisans i parmi bann leson enportan ki zanfan i kapab aprann e retir benefis ladan? Pli enportan, konman ki Zeova Bondye, Fondater laranzman fanmiy, i konsider lobeisans anver paran e ki serten benefis ki nou kapab retire atraver lobeisans?—Akt 17:28; Efezyen 3:14, 15.

“Sa I Byen”

Lapot Pol ti dir avek kongregasyon Kretyen dan premye syek an Efez: “Zanfan, i zot devwar obei zot paran dan Senyer, akoz sa i byen.” (Efezyen 6:1) Alor, premye rezon pour en tel lobeisans se akoz i an armoni avek standar divin pour sa ki byen. Parey Pol ti dir, “sa i byen.”

Anliny avek sa, nou remarke ki Parol Bondye i dekrir disiplin ki ganny administre avek lanmour par paran konman en zoli dekorasyon, “en girlann labote pour ou latet ek en zoli kolye pour ou lagorz,” osi konman en keksoz ki “fer plezir Senyer.” (Proverb 1:8, 9; Kolosyen 3:20) Dan lot kote, rezilta dezobeisans anver paran se dezaprouvasyon divin.—Romen 1:30, 32.

“Pour Ki Ou a Viv Ere”

Pol ti fer resorti en lot rezon pour obeir ler i ti dir: “ ‘Respekte zot papa ek zot manman’: Sa i premye konmannman avek en promes; ‘pour ki ou a viv ere e lontan lo later.’ ” (Efezyen 6:2, 3; Egzod 20:12) Dan ki fason ki lobeisans anver paran i kapab port byennet pour en dimoun?

Premyerman, eski pa i vre ki paran i annan lavantaz lo laz ek leksperyans? Menm si zot pa konn bokou konsernan konpiter oubyen serten lezot size ki ganny ansennyen dan lekol, zot konn bokou lo konman pour viv e fer fas avek bann problenm lavi. Bann zenn, lo lot kote, zot mank sa stabilite mantal ki vin avek matirite. An konsekans, zot tant pour depese pour fer bann desizyon, souvan-d-fwa soumet avek bann move lenfliyans ki anmenn zot prop ditor. Pour sa rezon, Labib i dir: “Sotiz i atase avek leker en garson.” Ki son remed? “Se roten disiplin ki pou elwanny sa avek li.”—Proverb 22:15.

 Bann benefis lobeisans i al pli lwen ki dan sa relasyon paran zanfan. Pour sosyete fonksyonn byen e avek sikse, i devret annan korporasyon, ki an retour i demann en serten degre lobeisans. Par egzanp, dan en lavi maryaz, se pare pour sede olye dominen e mank konsiderasyon pour drwa ek santiman lezot ki anmenn lape, larmoni, ek boner. Dan landrwa travay, soumisyon bann travayer i en nesesite pour nenport biznes oubyen dan zefor pour reisi. An rapor avek bann lalwa ek regilasyon gouvernmantal, lobeisans pa selman anpes en dimoun ganny pini me osi anmenn omwen en serten sekirite ek proteksyon.—Romen 13:1-7; Efezyen 5:21-25; 6:5-8.

Bann zenn ki dezobei lotorite i souvan ganny problenm pour adapte avek lasosyete. An kontras, aprann obeir pandan lanfans i en leson ki kapab port rekonpans diran lavi en dimoun. Pa i en gran lavantaz pour aprann lobeisans dan letan lanfans!

Sa Gran Rekonpans Lobeisans

Lobeisans pa zis anmenn bann relasyon ere dan fanmiy ek lezot benefis tou dilon lavi en dimoun me i osi fourni sa fondasyon lo ki sa dimoun i kapab batir en relasyon pli enportan ki tou—sa se ant li ek son Kreater. Konman sa “Gran Kreater” ki “sours lavi,” Zeova Bondye i annan tou drwa ganny nou lobeisans konplet.—Eklezyast 12:1; Psonm 36:9.

Sa mo “obeir” dan son plizyer laform i aparet plis ki 160 fwa dan Labib. Anplis, i annan plizyer santenn referans avek bann lalwa, lord, komannman, desizyon zizman, ek regilasyon, e zot tou zot demann soumisyon. I evidan ki Bondye i konsider lobeisans konman en legzizans pour rezwir son laprouvasyon. Wi, lobeisans i en eleman endispansab pour batir en relasyon avek Zeova. (1 Samyel 15:22) I regretab ki tandans natirel imen i pa pour obeir me pour dezobei. “Tandans leker zonm i move depi son zenes,” Labib i dir. (Zenez 8:21) Donk, aprann obeir i pa devret selman rezerve pandan lanfans me tou dilon lavi. An fezan sa i anmenn en gran rekonpans.

Mazinen ki, parey lapot Pol ti dir, sa komann pour obeir paran i vin avek de promes ansanm, ki “ou a viv ere e lontan lo later.” En konfirmasyon sa promes i trouve dan Proverb 3:1, 2: “Mon garson, mon lalwa pa oubliye, e ki ou leker i obzerv mon bann komannman, parski longer bann zour ek lannen lavi ek lape pou ganny azoute avek ou.” Sa gran rekonpans pour sa bann ki obeir se en relasyon personnel avek Zeova konmela menm e lavi eternel dan en nouvo monn ranpli avek lape.—Revelasyon 21:3, 4.

[Portre lo paz 31]

Lobeisans i anmenn bann relasyon ere dan fanmiy, dan landrwa travay, e avek Zeova