En dimoun responsab i en dimoun ki ou kapab depan lo la. I fer byen son travay e i fini aler.

En zanfan i kapab aprann pour vin responsab menm ler i ankor ptipti. Sa liv Parenting Without Borders i dir: “Ler en zanfan i annan 15 mwan an montan i fer sa ki son paran i dir li. Me ler i ganny 18 mwan an montan i anvi fer sa ki son paran pe fer. Dan bokou landrwa ler zanfan i annan senk an oubyen set an, zot paran i konmans montre zot ki mannyer zot kapab ede kot lakour. Menm si zot zenn, bann zanfan i kapab fer bokou keksoz.”

Dan serten landrwa, bokou zenn adilt i esey kit lakour pour al viv zot prop lavi, me zot pa kapab e zot retournen pour viv avek zot paran. Dan serten ka, sa i ariv akoz bann zenn pa’n aprann ki mannyer pour servi byen larzan, diriz en lakour oubyen fer bann keksoz dan lavi toulezour.

Alor i pli bon si ou form ou zanfan pour vin adilt. Sa liv How to Raise an Adult i dir: “Ou pa anvi ki zot kontinyen depan lo ou ziska ler zot ganny dizwit an, apre zis larg zot dan lemonn travay.”

Donn zot, zot prop louvraz kot lakour.

PRENSIP LABIB: “Tou travay i merit en lapey.”​—Proverb 14:23.

Zanfan i kontan travay ansanm avek zot paran. Vi ki zanfan i kontan travay ansanm avek zot paran, paran i kapab servi sa loportinite pour donn zot plis louvraz kot lakour.

Serten paran pa anvi fer sa. Zot dir ki zot pa anvi donn zot zanfan louvraz pour fer kot lakour akoz zot zanfan i deza annan bokou homework.

Par kont, bann zanfan ki fer louvraz kot lakour pou fer pli byen lekol akoz sa i ed zot pour aksepte e fini nenport travay ki zot ganny demande pour fer. Sa liv Parenting Without Borders, i dir: “Si nou pa les nou zanfan ed nou ler i ankor zenn, zot konmans krwar ki ed lezot pa enportan . . . Zot osi konmans ekspekte ki lezot pou fer tou keksoz pour zot.”

 Parey sa liv i dir, ler nou fer nou zanfan fer louvraz kot lakour, zot aprann ki mannyer pour ed lezot e pa mazin zis zot prop lekor. I osi ed zot santi ki zot annan zot plas dan lafanmir e ki sa i en keksoz ki zot devret pe fer.

Ed ou zanfan konpran ki i annan konsekans pour son fot.

PRENSIB LABIB: “Ekout bann konsey e aksepte lenstriksyon; koumsa, pli tar, ou ava vin en saz.”​—Proverb 19:20, NWT.

Si ou zanfan i andomaz keksoz en lot dimoun, evite kasyet son fot. Zanfan i kapab aksepte konsekans zot fot, alor si zot in andomaz keksoz en lot dimoun zot bezwen demann leskiz e menm rann oubyen aranz sa keksoz.

Ler zanfan i konpran ki zot responsab pour zot fot sa pou ed zot

• vin onnet e admet zot fot

• evite blanm lezot

• evite rod leskiz

• demann leskiz ler i neseser