POUR BANN KOUP
3: Respe
KI I VEDIR
Bann koup ki respekte kanmarad i kontan kanmarad menm ler zot pa tonm dakor lo en keksoz. Sa liv Ten Lessons to Transform Your Marriage i dir: “Bann koup ki annan respe pour kanmarad pou evit bann sityasyon kot zot pa tonm dakor lo en desizyon. Plito, zot pou kontinyen koz lo zot bann problenm, ekout lopinyon kanmarad avek respe e esey trouv en solisyon ki bon pour tou le de.”
PRENSIP LABIB: “Lanmour . . . pa rod son prop lentere.”—1 Korentyen 13:4, 5.
“Mon demontre respe pour mon madanm ler mon montre ki mon apresye son rol dan lafanmir e mon pa anvi fer nanryen pour fer li soufer oubyen kas nou maryaz.”—Micah.
AKOZ I ENPORTAN
Si napa respe dan maryaz, ou konversasyon i kapab ranpli avek kritik ek koze mirak. Dapre resers, sa bann fason koze i kapab fer ki sa koup i divorse.
“Fer bann move remark oubyen dyok lo ou madanm pou fer ou madanm perdi konfyans dan son lekor e dan ou. I pou osi kas ou maryaz.”—Brian.
SA KI OU KAPAB FER
REFLESIR
Vey byen sa ki ou dir oubyen fer pour en semenn. Apre demann ou lekor sa bann kestyon:
-
‘Ki kantite fwa mon kritik mon konzwen e ki kantite fwa mon felisit li?’
-
‘Kan ki mon’n demontre respe pour mon konzwen?’
KOZ AVEK OU KONZWEN
-
Ki nou kapab fer oubyen dir pour ed kanmarad santi ki nou pe ganny respekte?
-
Ki aksyon ek parol ki fer sakenn ant nou santi nou pa pe ganny respekte?
SIZESYON
-
Ekri trwa fason ou ti pou kontan ou konzwen i demontre respe anver ou. Fer ou konzwen osi ekri. Apre, donn kanmarad sa lalis e fer zefor pour demontre respe dan sa bann domenn ki’n ganny mansyonnen.
-
Fer en lalis bann keksoz ki ou apresye avek ou konzwen. Apre dir li ki mannyer ou apresye sa bann kalite.
“Mon demontre respe pour mon msye ler mon montre par mon aksyon ki mon kontan li e mon anvi ki i ere. Mon pa bezwen fer en gran keksoz me zis en senp pti keksoz ki mon dir oubyen fer i kapab demontre ki mon vreman annan respe pour li.”—Megan.
A lafen, sa ki enportan se ki ou konzwen i santi ki ou respekte li.
PRENSIP LABIB: “Demontre lafeksyon avek tandres ek konpasyon, labonte, limilite, ladouser ek pasyans.”—Kolosyen 3:12.
