EN SER ki apel Lisa i dir kwa ki ti fer li vin dan laverite. a I dir: “Sa labonte ki bann frer ek ser ti demontre anver mwan ki ti atir mwan dan laverite.” En lot ser ki apel Anne ti eksperyans en keksoz en pe parey. I dir: “O konmansman, mon ti pli apresye sa labonte ki bann frer ek ser ti demontre ki sa ki mon ti pe aprann.” Aprezan, sa de ser i kontan lir Labib e medit lo la me sa ki’n vreman tous zot i lafason ki bann frer ek ser ti demontre labonte anver zot.

Ki mannyer nou kapab demontre labonte dan en fason ki pou ankouraz lezot? Annou vwar de fason nou kapab fer sa. Premyerman, atraver sa ki nou dir e dezyenmman, atraver sa ki nou fer. Apre nou pou vwar anver lekel nou devret demontre labonte.

Dan Proverb sapit 31 i dir ki en bon madanm i “koz avek labonte.” (Prov. 31:26) I demontre labonte atraver son ton lavwa e atraver sa ki i dir. Bann papa osi i devret koz avek labonte. Laplipar paran i konnen ki si zot koz dan en fason ki brit, sa i kapab annan en move lefe lo zot zanfan e i tre probab ki zot zanfan pa pou ekout sa ki zot pe dir. Alor ler paran i koz dan en bon fason, i pou pli fasil pour zot zanfan ekoute e obei.

Ki swa ou en paran oubyen non, ki mannyer ou kapab aprann pour koz avek labonte? Premye bout dan Proverb 31:26 i kapab ed nou. Sa verse i dir: “I dir bann parol saz.” Sa i enplik swazir nou bann parol byen e osi vey nou ton lavwa. Avan nou dir en keksoz, i ti pou bon si nou demann nou lekor, ‘Eski sa ki mon pe al dir pou fer sa dimoun ankoler oubyen pou kalme sityasyon?’ (Prov. 15:1) Alor i saz pour nou reflesir byen avan nou koze.

En lot proverb i dir: “Bann parol san reflesir i parey bann kou lepe.” (Prov. 12:18) Ler nou reflesir lo lefe ki nou parol ek ton lavwa i annan lo lezot, nou pou pli byen kapab kontrol sa ki nou dir. Alor ler nou koz avek labonte, nou pa pou dir bann parol ki bles lezot e nou pa pou koz dan en fason ki brit. (Efe. 4:31, 32) O kontrer nou pou dir bann bon keksoz dan en bon fason. Zeova in kit en bon legzanp pour nou dan lafason ki i ti koz avek Eliya ler Eliya ti per. Sa lanz ki ti pe reprezant Zeova ti koz avek “en lavwa kalm e dous.” (1 Rwa. 19:12) Byensir, nou pa zis koz avek labonte me nou osi demontre labonte. Ki mannyer nou fer sa?

Nou swiv legzanp Zeova ler nou koz avek labonte e ler nou demontre labonte. (Efe. 4:32; 5:1, 2) Lisa, ki’n ganny mansyonnen pli boner, i dekrir lafason ki Temwen Zeova ti demontre labonte anver li. I dir: “Ler nou fanmir ti bezwen al reste dan en lot landrwa san ekspekte, de koup dan kongregasyon ti pran konze dan zot travay pour zot vin ed nou anmas nou bann zafer. Sa letan mon pa ti ni menm pe etidye Labib!” Sa ki sa de koup ti fer ti motiv Lisa pour etidye Labib.

 Anne, ki’n ganny mansyonnen pli boner, ti vreman apresye labonte ki Temwen Zeova ti demontre anver li. I dir: “Lafason ki dimoun dan lemonn ti tret mwan ti fer li difisil pour mwan annan konfyans dan lezot. Ler mon ti zwenn Temwen Zeova, mon ti napa konfyans dan zot. Mon ti demann mon lekor, ‘Ki sa bann dimoun pe rode avek mwan?’ Me lafason ki mon ansenyan Labib ti demontre labonte anver mwan, ti fer mwan met konfyans dan li.” Ki ti arive apre sa? Anne i dir: “Pli tar, mon ti konmans reflesir byen lo sa ki mon ti pe aprann.”

Sa labonte ki bann frer ek ser dan kongregasyon ti demontre anver Lisa ek Anne ti vreman tous zot e sa ti fer zot anvi aprann konn Zeova e pour met konfyans dan li ek son pep.

Serten dimoun i koz dan en bon fason e i kontan sourir parski sa i lafason ki i’n grandi. Sa i en bon keksoz. Me sa pa vedir ki nou pe swiv legzanp Bondye.​—Konpar Akt 28:2.

 Sa labonte ki en Kretyen i devret demontre i form parti fri lespri sen Bondye. (Gal. 5:22, 23) Alor pour nou devlop sa kalite labonte, nou bezwen les lespri sen Bondye enfliyans nou fason panse ek nou aksyon. Ler nou fer sa, nou swiv legzanp Zeova ek Zezi. Parey Zezi, nou enterese avek lezot. Alor nou demontre labonte parski nou kontan Zeova e nou kontan lezot. Sa kalite labonte i sorti dan nou leker e Zeova i kontan ler nou demontre sa kalite labonte.

I normal pour demontre labonte anver bann dimoun ki’n demontre labonte anver nou oubyen anver bann ki nou konnen. (2 Sam. 2:6) En fason ki nou fer sa i ler nou remersye zot. (Kol. 3:15) Me ki nou pou fer si nou santi ki en dimoun pa merite ganny trete avek labonte?

Reflesir lo sa: Zeova in kit sa pli bon legzanp atraver lafason ki i demontre labonte ekstraordiner anver tou dimoun ki swa i merite oubyen non. Son Parol Labib i ansenny nou en leson enportan lo lafason ki Zeova i demontre sa kalite. Sa lekspresyon “labonte ekstraordiner” i ganny servi en kantite fwa dan Lekritir Grek Kretyen. Sa lekspresyon i kapab refer avek en keksoz ki ganny donnen akoz sa enn ki pe donn sa keksoz i zenere e pa akoz sa dimoun ki pe ganny sa keksoz i merite. Ki mannyer Bondye i demontre labonte anver nou?

Tou dilon listwar imen, Zeova in demontre labonte anver bann imen par donn zot sa ki zot bezwen pour viv. (Mat. 5:45) Anfet, Zeova in demontre labonte anver bann imen, menm avan zot konn li. (Efe. 2:4, 5, 8) Par egzanp, in donn son sel Garson konman ranson pour bann imen. Zapot Pol i dir ki Zeova ti donn sa ranson “dapre son gran labonte ekstraordiner.” (Efe. 1:7) An plis, menm si nou fer pese e nou dezapwent Zeova, Zeova i kontinyen gid nou e ansenny nou. Son bann lansennyman ek parol i parey “grenas lapli.” (Det. 32:2) Nou pa pou zanmen kapab repey Zeova pour tou sa bann bon keksoz ki i’n fer pour nou. Nou konnen ki si Zeova pa ti’n demontre labonte ekstraordiner anver nou, nou ti pou napa okenn lespwar pour lavenir.​—Konpar 1 Pyer 1:13.

San dout, sa labonte ki Zeova i demontre anver nou i fer nou vin pli pros avek li e i motiv nou pour demontre labonte anver lezot. Alor, olye demontre labonte anver zis en serten group dimoun, nou devret fer zefor pour swiv legzanp Zeova e demontre labonte anver lezot tou le zour. (1 Tesa. 5:15) Ler nou kontinyen demontre labonte, nou pou parey en dife ki donn lasaler ler i fer fre. Nou pou vin en sours rekonfor pour nou fanmir, bann frer ek ser dan kongregasyon, bann koleg travay, kanmarad lekol ek nou bann vwazen.

Mazin en dimoun dan ou fanmir oubyen dan ou kongregasyon ki pou apresye ler ou koz avek labonte e ler ou demontre labonte. I kapab annan en dimoun dan ou kongregasyon ki bezwen led kot son lakour e dan son zarden oubyen ki bezwen led pour fer bann lezot keksoz parey fer konmisyon. Si ler ou dan predikasyon ou zwenn en dimoun ki bezwen led, eski ou kapab ed sa dimoun?

Parey Zeova, annou fer sir ki nou demontre labonte atraver sa ki nou dir e atraver sa ki nou fer.