1-2. Dapre Psonm 34:8, ki nou devret fer pour vwar ki Zeova i bon?

 METON en dimoun i ofer ou en manze ki ou pa’n zanmen manze. Pour ou konn serten keksoz lo sa manze, petet ou pou get sa manze, santi, rod son reset oubyen demann lezot dimoun si zot kontan sa manze. Me sel fason pour ou konnen si ou kontan sa manze, ou pou bezwen gout li ou menm.

² Nou aprann ki Zeova i bon par lir Labib ek bann piblikasyon e osi par ekout lezot ler zot koz lo bann bon keksoz ki Zeova i fer pour zot. Me pour nou konpran konman Zeova i bon, nou bezwen “goute e vwar” pour nou menm. (Lir Psonm 34:8, NWT.) Annou vwar en legzanp. Meton nou anvi servi Zeova a plen tan. Me pour atenn sa lobzektif, nou pou bezwen senplifye nou lavi. Petet nou’n lir sa promes ki Zezi ti dir, ki ler nou met Rwayonm premye, Zeova pou donn nou tou sa ki nou bezwen. Me nou pa’n zanmen eksperyans sa pour nou menm. (Mat. 6:33) Me vi ki nou annan konfyans dan promes Zezi, nou redwir nou bann depans, sanz nou ler travay e fer tou sa ki nou kapab dan predikasyon. Anmezir nou fer sa, nou pou vwar ki Zeova i donn nou tou sa ki nou bezwen. Nou menm nou pou’n “goute e vwar” ki Zeova i bon.

3. Dapre Psonm 16:1, 2, avek lekel ki Zeova i donn bann bon keksoz?

³ Zeova i “bon anver tou dimoun,” menm bann ki pa konn li. (Ps. 145:9; Mat. 5:45) Me i fer en kantite bon keksoz pour bann ki kontan li e ki fer zot mye pour servi li. (Lir Psonm 16:1, 2, NWT.) Annou vwar serten bon keksoz ki Zeova in fer pour nou.

4. Ki mannyer Zeova i demontre labonte anver bann ki konmans aprann konn li?

 ⁴ Sak fwa ki nou aplik sa ki Zeova in ansenny nou, nou vwar ki son bann lansennyman i ed nou. Par egzanp, ler nou ti aprann konn Zeova e nou ti konmans kontan li, i ti ed nou pour sanz nou fason panse e pour aret fer bann keksoz ki pa fer li plezir. (Kol. 1:21) Ler nou ti dedye nou lavi avek Zeova e batize, i ti donn nou lezot bon keksoz, parey en konsyans kler e en bon lanmitye avek li.​—1 Pyer 3:21.

5. Ki mannyer nou eksperyans labonte Zeova dan predikasyon?

⁵ Nou kontinyen eksperyans labonte Zeova anmezir ki nou anons sa bon nouvel. Eski ou en dimoun timid? En kantite serviter Zeova i timid. Petet ou pa ti zanmen mazinen ki en zour ou ti pou al devan laport en dimoun e koz avek li lo Labib. Pourtan sanmenm ki ou pe fer regilyerman. Zeova in ed ou pour kontan sa travay predikasyon. Zeova in osi ed ou dan lezot fason. I’n ed ou pour reste kalm ler en dimoun in fer brit avek ou. I’n osi ed ou pour rapel sa bon verse ki ou ti bezwen pour partaz avek en dimoun ki ti anvi ekout ou. Zeova in donn ou sa lafors pour kontinyen anons sa bon nouvel menm ler dimoun pa ti anvi ekout ou.​—Zer. 20:7-9, NWT.

6. Ki mannyer sa formasyon ki Zeova i donn nou, i montre ki i annan labonte?

⁶ Zeova in osi demontre son labonte anver nou par donn nou bann formasyon ki nou bezwen pour anons sa bon nouvel. (Zan 6:45) Dan nou bann renyon lasemenn, nou tann bann bon legzanp lo sa ki nou kapab dir ler nou pe anons sa bon nouvel avek lezot e nou kapab servi sa bann sizesyon dan predikasyon. Premye kou, nou kapab per pour esey en nouvo fason fer me ler nou fer sa, nou kapab vwar ki sa bann sizesyon i mars vreman byen. Dan bann renyon ek lasanble, nou osi ganny ankouraze pour esey diferan metod predikasyon ki nou pa’n deza fer avan. Menm si nou per, ler nou esey sa bann nouvo keksoz, Zeova pou beni nou. Aprezan nou pou vwar serten bon keksoz ki Zeova pou donn nou, ler nou rod bann nouvo fason pour donn li nou meyer malgre nenport sityasyon nou ladan. Apre nou pou vwar ki mannyer nou kapab fer plis dan predikasyon.

7. Ki benediksyon nou gannyen ler nou esey fer plis dan predikasyon?

⁷ Nou vin pli pros avek Zeova. Annou vwar legzanp en ansyen ki apel Samuel b ki sorti Kolonbi. Li avek son madanm ti pe fer pionye dan zot kongregasyon e zot ti kontan zot servis. Me zot ti anvi fer plis dan predikasyon par ed en kongregasyon ki ti annan bezwen. Zot ti bezwen fer serten sakrifis pour atenn sa lobzektif. Samuel i dir: “Nou ti aplik Matye 6:33 e nou ti aret aste bann keksoz ki nou pa ti bezwen. Me sa keksoz pli difisil ki nou ti bezwen fer, i kit nou apartman. I ti’n ganny fer zis parey nou ti anvi e nou ti napa okenn lón lakaz.” Ler zot ti al dan zot nouvo kongregasyon, zot ti bezwen mwens larzan pour viv. Samuel i dir: “Nou ti vwar ki mannyer Zeova i gid nou e i reponn nou lapriyer.  Nou’n eksperyans laprouvasyon ek lanmour Zeova dan bann fason ki nou pa’n zanmen eksperyanse oparavan.” Eski ou kapab fer plis dan predikasyon? Si wi, ou kapab asire ki ou pou vin pli pros avek Zeova e i pou pran swen avek ou.​—Ps. 18:25.

8. Ki nou kapab aprann avek sa ki Ivan ek Viktoria ti dir?

⁸ Nou ganny lazwa dan nou servis. Annou vwar sa ki Ivan ek Viktoria, en koup ki pe servi konman pionye Kyrgyzstan i dir. Zot viv en lavi senp pour ki zot kapab ede dan nenport servis, enkli proze konstriksyon. Ivan i dir: “Nou travay vreman dir dan sak servis ki nou gannyen. Menm si a lafen lazournen nou fatige, nou kontan akoz nou konnen ki nou’n servi nou lafors pour travay dir pour Zeova. Nou osi kontan akoz nou’n fer bann nouvo zanmi e nou annan bann bon souvenir.”​—Mark 10:29, 30.

9. Ki en ser ki pe fer fas avek bann difikilte in fer pour fer plis dan predikasyon e ki’n arive?

⁹ Nou kapab annan lazwa dan servis Zeova menm ler nou pe fer fas avek difikilte. Par egzanp, Mirreh, en vev ki reste Was Lafrik ti en dokter. Ler i ti pran retret, i ti konmans fer pionye. Mirreh i annan rematis e sa i fer li difisil pour li marse. Alor, i pa kapab anons sa bon nouvel kazankaz pour plis ki enn erdtan. Me i kapab pas plis letan pe fer temwannyaz an piblik. Mirreh i annan en kantite retourn vizit ek letid Labib e serten sa bann vizit ek letid Labib, i fer par telefonn. Akoz Mirreh i anvi fer plis pour Zeova? Mirreh i dir: “Mon kontan Zeova ek Zezi en kantite. Mon souvan demann Zeova pour ed mwan fer tou sa ki mon kapab dan son servis.”​—Mat. 22:36, 37.

10. Dapre 1 Pyer 5:10, ki Zeova i fer pour bann ki fer plis dan predikasyon?

¹⁰ Nou ganny lezot formasyon avek Zeova. Kenny, en pionye ki pe servi Moris ti vwar ki sa i vre. Ler i ti aprann laverite, i ti kit liniversite, batize e i ti konmans servi Zeova a plen tan. I dir: “Mon esey swiv legzanp profet Izai ki ti dir: ‘La mon la! Anvoy mwan!’” (Iza. 6:8) Kenny in travay lo plizyer proze konstriksyon e i’n osi ede pour tradwir bann piblikasyon dan son langaz. I dir: “Mon’n ganny bann formasyon ki’n ed mwan dan mon servis.” Me i pa’n zis aprann ki mannyer pour fer son servis. Kenny i dir: “Mon’n aprann konsernan mon bann limit e bann kalite ki mon bezwen devlope pour vin en pli bon serviter Zeova.” (Lir 1 Pyer 5:10.) Petet ou osi ou kapab fer bann azisteman pour ki Zeova i kapab form ou dan lezot fason.

11. Ki zefor bann ser Sid Kore ti fer pour anons sa bon nouvel e ki i ti arive? (Vwar portre lo kouvertir.)

¹¹ Menm serten frer ek ser ki’n servi Zeova pour en kantite lannen i bezwen ganny formen ler zot pe esey en nouvo form servis. Pandan pandemi COVID-19, bann ansyen dan en kongregasyon Sid Kore ti dir: “Serten ki ti krwar ki zot pa pou kapab anons sa bon nouvel akoz zot lasante, pe aprezan fer li atraver video. Trwa ser dan zot bann 80 an in aprann ki mannyer pour servi en konpiter pour fer sa e aprezan zot pe anons sa bon nouvel preski toulezour.” (Ps. 92:14, 15, NWT) Eski ou ti pou kontan fer plis dan predikasyon pour ou vwar bann lezot fason ki Zeova i demontre son labonte? Annou vwar serten keksoz ki ou kapab fer pour atenn sa lobzektif.

12. Ki Zeova i promet pour fer pour bann ki depan lo li?

¹² Aprann pour depan lo Zeova. Zeova i promet pour fer en kantite bon keksoz pour nou si nou annan konfyans dan li e nou donn li nou meyer. (Mal. 3:10) En ser ki apel Fabiola, ki reste Kolonbi ti vwar ki Zeova i akonpli sa promes. Apre ki Fabiola ti’n batize, i ti anvi fer pionye ordiner. Me i ti bezwen travay pour siport son fanmir. Alor, ler i ti kapab pran retret, i ti sipliy Zeova pour ed li. Fabiola i dir: “Normalman, dimoun i bezwen esper en kantite letan avan zot ganny zot pansyon. Me mon ti ganny mon pansyon zis en mwan pli tar. Sa ti paret en mirak!” De mwan pli tar, i ti konmans fer pionye. Aprezan, i dan son bann 70 an e i’n fer pionye pour plis ki 20 an. Pandan sa letan, i’n ed wit dimoun pour batize. Fabiola i dir: “Menm si parfwa mon santi mwan fay, toulezour Zeova i ed mwan pour kontinyen fer pionye.”

13-14. Ki legzanp ki kapab ed nou pour annan konfyans dan Zeova e pour fer plis dan nou servis?

¹³ Aprann avek legzanp bann ki ti depan lo Zeova. Dan Labib i annan legzanp bann dimoun ki ti travay dir dan servis Zeova. Laplipar ditan, Zeova ti beni sa bann serviter apre ki zot ti’n fer en keksoz pour montre ki zot annan konfyans dan li. Par egzanp, Zeova ti beni Abraam apre ki i ti’n kit son lakour “menm si i pa ti konnen kote i ti pe ale.” (Ebr.  11:8) Zeova ti beni Zakob apre ki i ti’n lalit avek en lanz. (Zen. 32:24-30) Ler nasyon Izrael ti pe al antre dan Later Promiz, Zeova ti fer Larivyer Zourden sek pour bann Izraelit kapab traverse. Zeova ti fer sa apre ki bann pret ti’n met zot lipye dan sa larivyer.​—Zoz. 3:14-16.

¹⁴ Ou osi kapab ganny bann byenfe avek legzanp bann frer ek ser dan nou letan ki’n depan lo Zeova e ki’n fer plis dan zot servis. Par egzanp, en frer ki apel Payton ek son madanm Diana ti kontan lir lo bann frer ek ser ki’n fer plis dan zot servis pour Zeova, parey bann leksperyans dan sa seri “They Offered Themselves Willingly.” c Payton i dir: “Ler nou ti lir zot leksperyans, i ti konmsi nou ti pe get en dimoun pe manz en repa ki goute. Pli nou ti gete, pli nou ti anvi ‘goute e vwar konman Zeova i bon.’” Avek letan, Payton ek Diana ti kapab al servi dan en landrwa ki annan bezwen. Eski ou’n lir sa seri lartik? Ouswa eski ou’n get sa bann video Witnessing in Isolated Territory​—Australia ek Witnessing in Isolated Territory​—Ireland ki lo jw.org? Sa bann lartik ek video pou ed ou vwar fason ki ou kapab fer plis dan ou servis pour Zeova.

15. Ki mannyer bann bon zanmi i kapab ed nou?

¹⁵ Swazir byen ou zanmi. I pli fasil pour nou manz en manze ki nou pa’n zanmen goute, si nou pas letan avek bann ki kontan sa manze. Pareyman si nou pas letan avek bann ki met Zeova premye dan zot lavi, i tre probab ki nou pou rod fason pour fer plis pour Zeova. Sanmenm sa ki ti arive avek Kent ek Veronica. Kent i dir: “Nou fanmir ek zanmi ti ankouraz nou pour esey en nouvo form servis. Nou ti realize ki ler nou pas letan avek bann ki met Rwayonm premye, nou ganny sa kouraz pour esey en nouvo servis.” Aprezan, Kent ek Veronica pe servi konman pionye spesyal Laserbi.

16. Dapre sa legzanp ki Zezi ti donnen dan Lik 12:16-21, akoz nou devret pare pour fer bann sakrifis?

¹⁶ Fer bann sakrifis pour Zeova. Nou pa bezwen kit tou keksoz deryer pour nou fer plezir Zeova. (Ekle. 5:19, 20, NWT) Me si nou pa swazir pour fer plis dan servis Zeova akoz nou pa anvi kit serten keksoz ki nou kontan, i kapab ki nou pou fer menm fot parey sa zonm dan legzanp Zezi, ki ti travay dir pour ganny en kantite keksoz me i pa ti enterese avek Bondye. (Lir Lik 12:16-21.) En frer ki apel Christian, ki reste Lafrans i dir: “Mon pa ti pe donn Zeova ek mon fanmir mon meyer, enkli mon letan ek lenerzi.” I ti deside pour fer pionye ansanm avek son madanm. Me pour atenn sa lobzektif, zot ti bezwen kit zot travay. Pour siport zot lekor, zot ti konmans en pti biznes netwaye e zot ti aprann pour kontant zot avek en ptigin larzan. Eski sa sakrifis ti vo lapenn? Christian i dir: “Aprezan nou pli kontan nou travay predikasyon e nou kontan pour vwar nou bann etidyan Labib ek retourn vizit aprann konsernan Zeova.”

17. Kwa ki ti ed en ser pour esey en nouvo keksoz dan son servis?

¹⁷ Pare pour esey bann nouvo form servis. (Akt 17:16, 17; 20:20, 21) En pionye ki apel Shirley, ki reste Leta-z-ini ti bezwen aziste son servis pandan pandemi COVID-19. Premye kou, i ti ezite pour  esey fer predikasyon par telefonn. Me kantmenm sa, apre ki i ti’n ganny formasyon pandan vizit sirveyan rezyonal, i ti konmans fer predikasyon par telefonn regilyerman. I dir: “O konmansman mon ti per me aprezan, mon vreman kontan pour fer li. Nou pe zwenn plis dimoun ki letan nou ti fer predikasyon kazankaz.”

18. Kwa ki kapab ed nou fer fas avek nou problenm ler nou pe esey fer plis dan nou servis?

¹⁸ Met en lobzektif e esey atenn sa lobzektif. Ler nou pas dan problenm, nou priye pour ganny led e nou reflesir byen lo ki mannyer nou pou fer fas avek sa problenm. (Prov. 3:21, NWT) En ser ki apel Sonia, ki pe servi konman en pionye ordiner Lerop dan en group ki koz langaz Laroumani, i dir: “Mon kontan ekri mon bann lobzektif lo en papye e gard sa papye kot i fasil pour mwan vwar. Lo mon latab, mon annan en desen de semen ki al dan diferan direksyon. Ler mon bezwen fer en desizyon, mon get sa de semen e mon reflesir lo si mon desizyon pou ed mwan atenn mon lobzektif oubyen non.” Sonia i esey vwar son bann problenm dan en fason pozitif. I dir: “Mon bezwen deside si mon pou vwar sak nouvo sirkonstans parey en miray ki pe anpes mwan atenn mon lobzektif oubyen parey en pon ki pe ed mwan pour atenn mon lobzektif.”

19. Ki mannyer nou kapab montre ki nou apresye bann bon keksoz ki Zeova in donn nou?

¹⁹ Zeova i beni nou dan en kantite fason. Nou kapab montre ki nou apresye bann keksoz ki Zeova i donn nou par fer tou sa ki nou kapab pour loue li. (Ebr. 13:15) Nou kapab fer en kantite diferan keksoz pour servi Zeova e Zeova i kapab beni nou plis ankor. Sak zour, annou rod fason pour “goute e vwar ki Zeova i bon.” Koumsa, parey Zezi nou pou kapab dir: “Mon manze se pour fer lavolonte sa enn ki’n anvoy mwan e pour fini son travay.”​—Zan 4:34.