Mazin sa lanmitye pros ki en zimo oubyen zimel i annan. Zot annan en relasyon spesyal. Nancy Segal, ki direkter Twin Studies Center e ki li osi i en zimel, i dir ki serten zimo oubyen zimel i menm kapab koz avek kanmarad e konpran sa ki kanmarad pe dir san ki zot bezwen donn gran leksplikasyon. En madanm i dekrir relasyon ki i annan ant li ek son ser zimel dan sa fason: “Nou konn tou keksoz lo kanmarad.”

Akoz sa i spesyal? Resers i montre ki menm si zot lanvironnman ek paran i enportan, sa ki fer zot annan sa relasyon spesyal i zot genes ki parey.

REFLESIR: Sirman, sa Enn ki’n kree nou dan sa fason merveye i konn nou pli byen ki okenn lezot dimoun. Psalmis David ti dir: “Ou ti protez [oubyen form] mwan ler mon ti dan vant mon manman. Kan mon ti ganny fer an sekre . . . mon lezo pa ti ganny kasyet devan ou. Ou ti vwar mwan kan mon ti ankor en anbriyon, e dan ou liv tou son bann parti ti’n ganny ekrir.” (Psonm 139:13, 15, 16, NWT) Zis Bondye ki konnen e konpran nou bann genes e osi keksoz ki nou’n pas ladan ki fer nou sa dimoun ki nou ete. Vi ki i konn tousala, sa i asir nou ki i konpran nou dan tou pti detay.

David ti priye: “[Zeova]! Ou’n egzamin mwan e ou konn mwan. Ou konnen ler mon asiz e ler mon leve. Ou konn tou mon lentansyon lontan avan. [Zeova!] Avan menm ki mon ouver labous, ou konnen deza ki mon pou dir.” (Psonm 139:1, 2, 4) Alor, sa i montre ki Zeova i konn byen nou bann santiman. I menm “konn tou proze e tou sa ki ou mazinen.” (1 Kronik 28:9; 1 Samyel 16:6, 7) Ki sa bann verse i montre lo Bondye?

Menm si nou pa dir tou sa ki dan nou leker ler nou fer lapriyer, nou Kreater pa zis vwar sa ki nou fer me i osi konpran akoz nou fer sa bann keksoz. Deplis, i konpran ler nou anvi fer en keksoz byen menm ler nou pa arive fer li akoz nou annan limit. Vi ki Zeova in kree nou avek sa abilite pour demontre lanmour, i anvi obzerv e konpran nou bann bon panse ek motivasyon.​—1 Zan 4:7-10.

 Labib i asir nou

• “Lizye Zeova i vey lo bann ki drwat e son zorey i ekout zot siplikasyon.”​—1 PYER 3:12.

• Bondye i promet: “Mon pou ansenny ou. Mon pou montre ou ki semen ou pou swiv. Mon pou konsey ou; mon lizye pa pou kit ou.”​—PSONM 32:8.

Ler nou konnen ki Bondye i konpran nou santiman ek sityasyon, eski sa i ed nou andir nou bann difikilte? Annou vwar sa ki ti arive avek Anna ki sorti Nizerya. I dir: “Mon ti demande si i ti vo lapenn kontinyen viv, vi ki mon ti vreman bezwen led avek sa ta problenm ki mon ti ladan. Mon ti en vev e mon ti pe okip mon pti fiy ki ti malad lopital akoz i ti annan delo dan son latet (hydrocephalus). Sa menm letan, mon ti dekouver ki mon annan kanser tete. Mon ti bezwen fer loperasyon, chemotherapy ek radiotherapy. I ti vreman difisil pour mwan ek mon pti fiy reste lopital an menm tan.”

Kwa ki ti ed Anna fer fas avek sa sityasyon? I dir: “Mon ti mazin bann verse parey Filipyen 4:6, 7 ki dir ki ‘lape Bondye ki depas tou sa ki nou kapab konpran i protez nou leker ek lespri.’ Sak fwa ki sa verse ti vin dan mon lespri, mon ti santi sa relasyon personnel avek Zeova e mon ti konnen ki i konpran mwan pli byen ki mwan menm mon konpran mon lekor. Mon ti osi ganny bokou lankourazman sorti kot mon bann frer ek ser dan kongregasyon Kretyen.

“Menm si mon lasante pa tro tro bon, mon sityasyon ek sityasyon mon pti fiy in amelyore. Avek led Zeova, nou’n aprann pour pa vin negatif ler nou fer fas avek problenm. Zak 5:11 i asir nou: ‘Ki bann ki’n andire in ganny beni. Zot in tann koz lo landirans Zob. Zot in vwar ki mannyer Zeova ti beni li e ki Zeova i annan en kantite konpasyon ek mizerikord.’” Zeova ti konpran byen sityasyon Zob. Alor, nou kapab asire ki i konpran okenn difikilte ki nou pe pas ladan.