Pour María, Raúl, Arne e plizyer lezot dimoun, lapriyer i en kado spesyal. Zot santi ki atraver lapriyer, zot kapab koz avek Bondye, remersye li e rod son led. Zot vreman krwar e asire sa ki Labib i dir konsernan priy Bondye: “Nou annan konfyans dan li, ki nenport kwa ki nou demann li ki an armoni avek son lavolonte, i pou ekout nou.”​—1 Zan 5:14.

De lot kote, bokou dimoun i vwar li difisil pour krwar sa ki Labib i dir konsernan lapriyer. Steve i rakonte ki mannyer i ti santi konsernan lapriyer: “Ler mon ti annan 17 an, trwa parmi mon bann zanmi ti mor dan de aksidan separe. Enn ti mor dan en aksidan loto e sa de lezot ti noye dan lanmer.” Ki Steve ti fer?  “Mon ti priy Bondye pour donn mwan en larepons akoz tousala in arive me mon pa ti ganny okenn larepons. Alor mon ti demann mon lekor, ‘Akfer priye?’” I paret ki bann lapriyer ki pa ganny reponn, in fer bokou dimoun demande si vreman i fer sans priye.

I osi annan lezot rezon akoz dimoun i demande si i fer sans priye. Serten i dir ki Bondye i konn tou keksoz. I deza konnen ki nou bezwen oubyen i konn nou problenm. Alor i pa fer sans pour dir li nou problenm.

Lezot i krwar ki Bondye i refize ekout zot lapriyer akoz bann keksoz mal ki zot in fer dan lepase. Jenny i dir: “Mon pli gro problenm, i ki mon santi mon pa vo nanryen. Mon’n fer keksoz ki mon regrete, alor mon esey konvenk mon lekor ki Bondye pa merit ekout mon lapriyer.”

Ki ou santiman konsernan lapriyer? Si ou’n deza annan sa menm konsern oubyen dout konsernan lapriyer, ou kapab trouv rekonfor dan Labib. Labib i kapab donn ou bann larepons satisfezan e i dir ki mannyer nou devret priye. a I kapab ed ou trouv larepons bann kestyon parey:

• Eski Bondye i vreman ekout nou lapriyer?

• Akoz serten lapriyer pa ganny reponn?

• Ki mannyer ou kapab priye pour Bondye ekout ou lapriyer?

• Ki lapriyer i kapab fer pour ou?