Son lannen answit, bann frer ti dir avek fanmir Betel ki Biro Brans Sidafrik ti bezwen bann volonter parski zot ti pe ganny en nouvo masin pour enprimen. Mon ti met mon non pour ale e mon ti eksite ler mon ti ganny swazir. Trwa lezot frer Kanadyen ti osi ganny swazir. Zot ti apel Dennis Leech, Bill McLellan ek Ken Nordin. Nou ti ganny dir ki nou pou reste Sidafrik pour en kantite letan.

Mon ti telefonn mon manman e dir li: “Manman, mon annan en keksoz pour dir ou. Mon pe al Sidafrik!” Mon manman ti en madanm trankil me i ti annan en lafwa for ek en bon lanmitye avek Zeova. I pa ti dir gran keksoz me mon ti konnen ki mon ti annan son sipor. Menm si mon manman ek mon papa ti sagren ki mon ti pou lwen avek zot, zot ti aksepte mon desizyon.

Avan nou ti al Sidafrik, mwan ansanm avek sa trwa lezot frer, nou ti al Betel Brooklyn pour trwa mwan. Laba nou ti ganny en formasyon lo ki mannyer pour travay avek en kalite masin enprimen. Apre, nou ti pran bato pour al Cape Town, Sidafrik. Mon ti’n fek ganny 20 an. Ler nou ti ariv laba, nou ti pran tren Cape Town pour al Johannesburg. Nou voyaz ti konmans aswar e son lannmen granmaten nou ti aret kot en stasyon ki dan en pti lavil ki apel Karoo ki ti napa bokou plant. I ti annan en kantite lapousyer e i ti fer so. Nou tou le kat nou ti get par lafnet e nou ti mazinen ki kalite landrwa nou ete. Nou ti enkyet konsernan nou servis dan sa pei. Pli tar, ler nou ti vin vizit sa lavil ankor, nou ti realize ki sa bann pti lavil ti bann zoli pti landrwa kot dimoun ti viv byen antre zot.

Pour detrwa lannen, mon ti travay lo en masin Linotype ki ti konplike. Mon ti prepar bann let ki ti pou ganny servi dan sa masin pour nou kapab enprim bann magazin Latour Veyer ek Veye! Biro brans ti enprim bann magazin dan en kantite langaz Afriken, pa zis pour Sidafrik me pour en kantite lezot pei Lafrik. Nou ti kontan ki sa nouvo masin enprimen ki nou ti’n vin travay lo la, ti pe byen ganny servi.

Pli tar, mon ti travay dan Factory Office ki ti responsab pour serten laspe dan sa travay pour  tradwir, enprim e transport bann piblikasyon. Mon ti bizi e mon ti kontan sa ki mon ti pe fer.

An 1968, mon ti marye avek en ser ki apel Laura Bowen, ki ti reste pre avek Betel. Laura ti en pionye e i ti osi tip bann dokiman pour Departman Tradiksyon dan Betel. Sa letan, bann koup ki fek marye pa ti reste dan Betel alor nou ti ganny demande pour fer pionye spesyal. Mon ti’n servi di-z-an dan Betel kot mon ti ganny manze ek landrwa reste. Alor mon ti en pti pe enkyet e mon ti demann mon lekor ki mannyer nou ti pou viv avek sa ptigin larzan ki bann pionye spesyal i gannyen? Tou le mwan, nou ti pou ganny sakenn 25 rand (sa letan sa ti ekivalan 35 dolar Ameriken.) Me pour nou kapab ganny sa larzan, nou ti bezwen fer en serten kantite erdtan dan predikasyon, retourn vizit e donn en serten kantite piblikasyon. Avek sa larzan, nou ti pou bezwen pey nou landrwa reste, manze, transpor, fer nou bann depans medikal e lezot depans ankor.

Nou ti ganny demande pour al servi pre avek lavil Durban, ki tonm dan Losean Endyen. Dan sa landrwa, i ti annan en kantite Endyen. Bokou parmi zot i desandans bann travayer ki ti’n vin Sidafrik ver 1875, pour travay konman labourer dan bann biznes ki fer disik. Aprezan, zot annan lezot travay me zot in gard zot kiltir ek fason kwi manze, ki enkli bann bon kari. Zot ti koz Angle e sa ti fer li fasil pour nou anons sa bon nouvel avek zot.

Bann pionye spesyal ti bezwen pas 150 erdtan par mwan dan predikasyon. Alor pour premye zour, mwan ek Laura ti plàn pour fer sis erdtan. I ti fer so. Nou ti napa retourn vizit ek letid Labib, alor nou ti bezwen anons sa bon nouvel kazankaz pour sis erdtan. En pe letan apre ki nou ti’n konmanse, mon ti get mon mont e nou ti’n fer zis 40 minit! Mon ti mazinen ki mannyer nou ti pou kapab fer pionye spesyal.

Nou pa ti tarde pour ganny en bon routin. Toulezour, nou ti prepar dipen e nou ti met lasoup ouswa kafe dan en termos. Ler nou ti fatige, nou ti park nou loto anba en pye dibwa. Parfwa bann zoli pti zanfan Endyen ti vin otour nou loto e get nou akoz nou pa ti parey zot. I pa ti pran nou bokou letan pour realize ki apre sa bann premye erdtan, larestan lazournen ti pas vitman.

Nou ti vreman kontan pour ed bann dimoun dan sa teritwar konn bann laverite ki dan Labib! Nou ti aprann ki bann Endyen i bann dimoun ki annan respe, ki zantiy e zot kontan Bondye. En kantite Endou ti aksepte sa mesaz ki nou ti pe anonse. Zot ti kontan pour aprann konsernan Zeova, Zezi, Labib, sa nouvo lemonn kot pou annan lape e sa lespwar pour bann ki’n mor. Apre enn an, nou ti annan 20 letid Labib. Toulezour, nou ti manz nou repa prensipal avek en fanmir ki nou ti etidye avek. Nou ti vreman zwaye.

Pa bokou letan apre, nou ti ganny en lot servis. Mon ti ganny demande pour vin sirveyan rezyonal dan bann landrwa ki lo lakot ki baliz avek Losean Endyen. Sak semenn nou ti vizit en kongregasyon e nou ti reste avek en fanmir. Nou ti osi travay avek bann proklanmater dan predikasyon pour ankouraz zot. Zot ti tret nou parey zot fanmir e nou ti kontan pas letan avek zot, zot zanfan e avek zot bann zannimo. De lannen merveye ti pase. Apre sa, en sel kou biro brans ti telefonn nou. Zot ti dir: “Nou ti pou kontan ki zot retourn Betel.” Mon ti dir: “Nou kontan kot nou ete.” Me byensir, nou ti pare pour aksepte nenport servis nou gannyen.

Dan Betel, mon ti travay dan Departman Servis e mon ti annan sa privilez pour travay avek en kantite frer eksperyanse. Sa letan, sak kongregasyon ti ganny en let baze lo en rapor ki sirveyan rezyonal ti fer apre ki i ti’n vizit zot. Sa bann let ti ganny anvoye pour ankouraz e donn lenstriksyon ki bann kongregasyon ti bezwen. Sa ti en gran travay pour bann sekreter parski zot ti bezwen tradwir sa bann rapor sorti dan langaz Xhosa, Zulu ek lezot langaz pour vin  Angle. Apre, zot ti bezwen tradwir bann let sorti kot Biro Brans ki ti an Angle dan plizyer langaz Afriken. Mon vreman apresye sa travay ki bann tradikter ti fer. Zot ti ed mwan konpran bann problenm ki nou bann frer ek ser Afriken nwanr ti fer fas avek.

Sa letan, Sidafrik ti anba sistenm aparted. Bann dimoun sorti dan diferan ras ti reste dan bann landrwa spesifik alor zot pa ti vreman frekant kanmarad. Bann frer ek ser Afriken nwanr ti koz, anons sa bon nouvel e asiste renyon dan zot prop langaz.

Mon pa ti konn bokou frer ek ser Afriken nwanr parski mon ti’n toultan dan teritwar ki koz Angle. Me aprezan, mon ti annan sa loportinite pour aprann konsernan bann Afriken nwanr e konsernan zot kiltir ek koutim. Mon ti aprann konsernan bann problenm ki bann frer ek ser ti pe fer fas avek akoz bann tradisyon ek krwayans relizye. Sa bann frer ek ser ti annan bokou kouraz! Zot ti rezet bann tradisyon e refize swiv bann pratik demonyak menm si zot ti pou bezwen fer fas avek bokou lopozisyon avek zot fanmir ek zot vilaz. Dan bann pti lavil, dimoun ti vreman pov. En kantite dimoun pa’n al lekol oubyen zot ti napa bokou ledikasyon. Me zot ti annan respe pour Labib.

Mon ti annan sa privilez pour travay lo serten ka legal konsernan nou liberte pour ador Zeova e pour pa pran kote dan bann zafer politik. Mon lafwa ti vin pli for ler mon ti vwar fidelite ek kouraz bann zanfan Temwen Zeova ki’n ganny pouse lekol akoz zot ti refize fer lapriyer e sant lim nasyonal.

Bann frer ek ser ki reste dan en pti pei Lafrik ki ti apel Swaziland, ti reste fidel ler zot ti fer fas avek problenm. Ler Lerwa Sobhuza II ti mor, tou dimoun dan sa pei ti bezwen partisip dan serten koutim ki ganny fer apre ki en dimoun in mor. Bann zonm ti pou bezwen raz zot latet e bann madanm ti pou bezwen koup zot seve kourt. En kantite frer ek ser ti ganny persekite parski zot pa ti swiv sa koutim ki annan pour fer avek ladorasyon zanset. Zot fidelite anver Zeova ti fer nou vreman kontan. Nou ti aprann en kantite konsernan fidelite ek pasyans  avek nou bann frer ek ser Afriken e sa ti fer nou lafwa vin pli for.

An 1981, mon ti al travay ankor dan lenprimri Sidafrik pour ede devlop en progranm konpiter ki pou ganny servi dan lenprimri. Sa ti en letan vreman eksitan! Bann fason pour enprimen ti pe sanze. En lakonpannyen ti donn Biro Brans en nouvo masin lenprimri pour nou teste pour nanryen. Sa ti fer nou ranplas sa nef Linotype ki nou ti annan avek senk nouvo masin. Nou ti osi enstal en nouvo masin enprimen e nou ti enprim bokou plis ki avan.

Bann konpiter ti osi ed nou envant bann nouvo fason pour organiz lenformasyon lo bann paz par servi MEPS (Multilanguage Electronic Publishing System.) Teknolozi ti’n avans en kantite depi ler mwan ek sa trwa frer ti’n kit Kanada pour vin Sidafrik. (Iza. 60:17, NWT) Sa letan, nou tou le kat, nou ti’n marye avek bann ser pionye ki kontan Zeova en kantite. Mwan ek Bill ti ankor pe servi dan Betel. Ken ek Dennis pa ti reste tro lwen avek Betel e zot ti annan zot fanmir.

I ti annan deplizanpli plis travay pour fer kot Biro Brans. Bann piblikasyon baze lo Labib ti pe ganny tradwi dan plis langaz. Sa bann piblikasyon ti pe ganny enprimen e anvoye dan bann lezot Biro Brans. Alor, nou ti bezwen en nouvo batiman. Bann frer ti konstri en batiman dan en zoli landrwa dan was Johannesburg e an 1987, sa batiman ti ganny dedye pour servis Zeova. Mon ti kontan pour form parti sa konstriksyon e pour servi lo Komite Biro Brans Sidafrik pour en kantite lannen.

An 2001, nou ti ganny en sirpriz ler mon ti ganny envite pour servi lo Komite Biro Brans Leta-z-ini ki ti’n fek ganny formen. Menm si nou ti sagren pour kit nou servis ek nou bann zanmi Sidafrik, nou ti eksite pour form parti lafanmir Betel Leta-z-ini.

Par kont, nou ti enkyet parski nou ti pou lwen avek manman Laura ki ti pe vin pli aze. Nou ti pe al New York alor nou pa ti pou kapab ed li, me bann ser Laura ti pare pour ed li fizikman, emosyonnelman e finansyerman. Bann ser Laura ti dir: “Nou pa kapab fer servis a plen tan me si nou pran swen avek manman, zot pou kapab kontinyen zot servis.” Nou vreman apresye sa ki zot in fer.

Zis parey bann ser Laura ti fer, mon frer ek son madanm ki reste Toronto, Kanada, ti ed nou par pran swen avek mon manman, ki ti en vev. Sa letan, mon manman ti’n reste avek zot pour plis ki 20 an. Nou vreman apresye sa lanmour ki zot ti demontre pour mon manman e lafason ki zot ti pran swen avek li ziska ki i ti mor, pa bokou letan apre ki nou ti ariv New York. Zeova in vreman beni nou par donn nou bann fanmir ki pare pour fer bann sanzman pour zot kapab pran swen avek bann paran ki pe vin aze. Zot fer sa menm si parfwa i kapab difisil.

Pour detrwa lannen, mon ti travay dan prodiksyon bann piblikasyon ki ti’n vin pli modern e senp. Tou dernyenman, mon pe travay dan Purchasing Department. Mon’n kontan ki pandan sa dernyen 20 an, mon’n form parti sa Biro Brans ki aprezan i annan apepre 5,000 Betelit e apepre 2,000 volonter.

Swasant an pase, mon pa ti mazinen ki mon ti pou kot mon ete ozordi. Pandan tou sa bann lannen, Laura in donn mwan tou son sipor. Mon’n annan en lavi vreman merveye! Nou kontan tou sa bann diferan servis ki nou’n fer e tou sa bann dimoun ki nou’n travay avek. Sa i enkli bann frer ek ser dan bann Biro Brans ki nou’n vizite en pe partou dan lemonn. Aprezan mon annan plis ki 80 an e mon annan mwens travay parski i annan bann zenn frer ki’n ganny formen pour fer sa bann travay.

En psalmis ti ekri: “I byennere sa nasyon ki annan [Zeova] koman son Bondye.” (Ps. 33:12) Sa i vre! Mon vreman kontan ki mon’n kapab servi Zeova ansanm avek son pep, ki zwaye.