Zeova ti servi profet Ezekyel pour predir ki pep Bondye ti pou retourn dan Later Promiz e zot ti pou ini konman en sel nasyon. Sa profesi ti osi predir ki bann ki ador Bondye ti pou ini konman en sel pep dan bann dernyen zour.

Zeova ti dir profet Ezekyel pour ekri lo de morso dibwa. Lo en morso dibwa i ti ganny dir pour ekri, “Pour Zida ek bann Izraelit ki asosye avek li” e lo lot morso dibwa, “Pour Zozef, dibwa Efraim e pour pep Izrael antye.” Sa de morso dibwa ti pou vin “en sel morso” dibwa dan lanmen Ezekyel.​—Ezekyel 37:15-17.

 Ki sa mo “Efraim” i vedir? Tribi Efraim ti sa tribi pli enportan parmi sa dis tribi ki ti dan rwayonm Izrael dan nor. Anfet, sa premye lerwa sa rwayonm, Zeroboam, ti sorti dan tribi Efraim. (Deterononm 33:13, 17; 1 Lerwa 11:26) Sa tribi ti bann desandans Efraim, en garson Zozef. (Nonm 1:32, 33) Zozef ti’n ganny en benediksyon spesyal avek son papa Zakob. Alor, i apropriye ki “dibwa Efraim” i reprezant sa dis tribi dan rwayonm Izrael dan nor. Lannen 740 avan Kris, menm avan ki Ezekyel ti profetize, rwayonm Izrael dan nor ti’n ganny konkerir par bann Asiryen e ganny anmennen an egzil. (2 Lerwa 17:6) Plizyer lannen pli tar, bann Babilonnyen ti defet bann Asiryen. Alor, ler Ezekyel ti ekri sa profesi konsernan sa de morso dibwa, preski tou bann Izraelit ti’n ganny eparpiye dan Lanpir Babilonnyen.

Lannen 607 avan Kris, bann Babilonnyen ti konkerir sa de tribi dan rwayonm Zida dan sid e anmenn bann dimoun Babilonn. I posib ki bann Babilonnyen ti osi anmenn bann dimoun ki ti dan rwayonm nor. Bann lerwa dan rwayonm sid ti sorti dan tribi Zida. Bann pret osi ti viv an Zida parski zot ti pe servi dan tanp Zerizalenm. (2 Kronik 11:13, 14; 34:30) Alor, i ti apropriye ki sa morso dibwa ki ti “pour Zida” ti reprezant sa de tribi dan rwayonm sid.

Kan ki sa de morso dibwa ti zwenn ansanm? Sa ti arive lannen 537 avan Kris ler rwayonm sid ek rwayonm nor ti retourn Zerizalenm apre legzil pour rekonstri tanp. Aprezan, nasyon Izrael ti nepli divize. Ankor enn fwa, bann Izraelit ti pe ador Zeova ansanm. (Ezekyel 37:21, 22) Sa linite parmi sa pep ti’n osi ganny predir par profet Izai ek Zeremi.​—Izai 11:12, 13; Zeremi 31:1, 6, 31.

Ki profesi Ezekyel ti predir konsernan vre ladorasyon? I ti predir ki Zeova ti pou fer tou bann ki ador li “zwenn ansanm.” (Ezekyel 37:18, 19) Eski sa promes in vin vre dan nou letan? Wi. Sa profesi ti konmans ganny akonplir an 1919. Avan sa, Satan ti’n esey diviz pep Bondye enn fwa pour tou. Me an 1919, zot ti reorganize ptitapti e revin ini konman en sel troupo.

Sa letan, laplipar parmi pep Bondye ti annan sa lespwar pour vin bann lerwa ek pret ansanm avek Zezi dan lesyel. (Revelasyon 20:6) Zot ti parey sa morso dibwa pour Zida. Par kont, i ti annan en ptigin dimoun ki ti annan lespwar pour viv pour touzour lo later. Avek letan, lakantite bann ki ti annan sa lespwar ti ogmante. (Zekarya 8:23) Zot ti parey sa morso dibwa pour Zozef.

Ozordi, sa de group pe servi Zeova ansanm. Zot annan en sel Lerwa, Zezi Kri. Dan sa profesi Ezekyel, Zezi i ganny refer konman “mon serviter David.” (Ezekyel 37:24, 25) Zezi ti priy avek son Papa konsernan son bann disip: “Ki zot tou zot kapab vin en sel, parey ou, Papa, ou ini avek mwan e mwan mon ini avek ou.” a (Vwar not.) (Zan 17:20, 21, NW) Zezi ti osi predir ki son pti troupo disip swazir ek “lezot mouton” ti pou ‘vin en sel troupo.’ Zot tou zot ti pou swiv “en sel berze.” (Zan 10:16, NW) Zis parey Zezi ti dekrir, tou pep Bondye ozordi zot ini, ki swa bann ki annan lespwar pour viv pour touzour dan lesyel ouswa viv pour touzour lo later!