Pandan bann lannen 1950, mon paran ti kit Itali e al reste dan en lavil ki apel Kindersley, dan provens Saskatchewan, Kanada. Pa bokou letan apre ki zot ti’n ariv laba, zot ti aprann laverite e sa ti vin sa keksoz pli enportan dan nou lavi. Mon rapel ki dan mon lanfans nou ti pas bann gran lazournen dan predikasyon konman en fanmir. Parfwa mon fer dyok e dir ki mon ti fer pionye asistan ler mon ti annan wit an!

Mon paran ti bann dimoun pov me kantmenm sa, zot ti kontan pour fer bann sakrifis pour Zeova. Sa ti en bon legzanp pour mwan. Par egzanp, an 1963, zot ti vann en kantite zot bann keksoz materyel pour zot ganny ase larzan pour asiste en lasanble enternasyonal ki ti ganny fer Pasadena, California, Leta-z-ini Lanmerik. An 1972, nou ti al reste Trail, British Columbia, Kanada ki ti apepre 1,000 kilomet avek kot nou ti pe reste avan. Nou ti fer sa pour nou kapab ede anons sa bon nouvel avek bann dimoun ki koz Italyen dan sa landrwa. Mon papa ti en kliner e i ti refiz bann loportinite pour ganny plis larzan pour li kapab konsantre lo bann aktivite spirityel.

Mon rekonesan pour legzanp ki mon paran in kite pour mwan ek mon bann frer ek ser. Zot legzanp ti form parti bann premye formasyon ki mon ti gannyen dan servis Zeova. Zot ti ansenny mwan en keksoz ki mon’n gard antet tou mon lavi. Sa i: Si mon rod Rwayonm premye, Zeova pou pran swen avek mwan.—Mat. 6:33.

An 1980, mon ti marye avek en zoli ser ki ti apel Debbie ki ti pe konsantre lo servi Zeova. Nou ti  anvi antre dan servis a plen tan. Alor, trwa mwan apre nou maryaz, Debbie ti konmans fer pionye. Enn an apre nou maryaz, nou ti al dan en pti kongregasyon kot i ti annan bezwen pour plis proklanmater e mwan osi mon ti pran servis pionye ansanm avek Debbie.

Avek letan, nou ti perdi nou lazwa e nou ti anvi al servi dan en lot landrwa. Me premye keksoz ki nou ti fer, nou ti koz avek sirveyan rezyonal. I ti demontre lanmour me i ti osi onnet avek nou e i ti dir: “Zot ki pe fer zot sityasyon pli difisil. Zot pe konsantre lo bann keksoz negatif. Me si zot rod bann keksoz pozitif, zot pou vwar sa ki pozitif.” Sa konsey ti sanmenm sa ki nou ti bezwen tande. (Ps. 141:5) Deswit nou ti aplik sa konsey e i pa ti pran bokou letan pour nou vwar ki i ti annan keksoz pozitif avek nou sityasyon. I ti annan en kantite frer ek ser dan kongregasyon ki ti anvi fer plis pour Zeova, par egzanp bann zenn e serten ser ki zot msye pa ti servi Zeova. Sa ti en leson vreman enportan. Nou ti aprann pour rod sa ki bon e pour esper Zeova aranz en sityasyon ki ti paret difisil. (Mik. 7:7) Nou ti reganny nou lazwa e nou sityasyon ti amelyore.

Bann formater dan nou premye lekol pionye ti’n servi dan lezot pei. Zot ti montre nou bann portre e koz lo bann problenm ek benediksyon ki zot ti’n eksperyanse pandan ki zot ti pe servi aletranze. Sa ki nou ti tande ti fer nou anvi vin bann misyonner. Alor nou ti deside ki nou ti anvi fer sa servis.

Pour nou kapab atenn sa lobzektif, nou ti deside pour al reste dan teritwar ki koz Franse dan provens Quebec an 1984. Sa teritwar ti plis ki 4,000 kilomet avek British Colombia. Sa ti vedir ki nou ti bezwen aprann en nouvo kiltir ek langaz. En lot difikilte ki nou ti fer fas avek i ki souvan nou ti napa bokou larzan. Pour en serten letan, nou ti manz zis ponmdeter. En fermye ti les nou anmas bann ponmdeter ki ti’n reste deryer apre rekolt. Debbie ti prepar sa bann ponmdeter dan diferan fason ki ti vreman bon! Menm si nou ti pas dan difikilte, nou ti fer nou mye pour andire e pour reste zwaye. Nou ti osi vwar lafason ki Zeova ti pe pran swen avek nou.—Ps. 64:10.

En zour, nou ti ganny en call ki nou pa ti pe ekspekte. Nou ti ganny envite pour al servi dan Betel Kanada. Nou ti’n fer laplikasyon pour al Lekol Gilead alor menm si nou ti kontan ki nou ti’n ganny  envite pour al servi dan Betel, nou ti dezapwente. Me nou ti aksepte sa lenvitasyon. Ler nou ti ariv Betel, nou ti demann Frer Kenneth Little, ki ti en manm lo Konmite Biro Brans, “Ki nou pou fer si nou ganny envite pour al Lekol Gilead?” I ti reponn nou, “Nou ava fer fas avek sa sityasyon si zot ganny envite.”

En semenn pli tar, nou ti bezwen fer fas avek sa sityasyon parski nou de Debbie, nou ti’n ganny envite pour al Lekol Gilead. Alor nou ti bezwen fer en desizyon. Frer Little ti dir nou: “Nenport desizyon ki zot fer, i pou annan bann zour kot zot pou santi ki plito zot ti’n swazir sa lot opsyon. I napa enn ant sa de keksoz ki pli bon ki lot, Zeova i kapab beni nenport ant sa de.” Nou ti aksepte sa lenvitasyon pour al Gilead e pandan bann lannen ki’n pase, nou’n vwar ki sa ki Frer Little ti dir, i vre. Souvan, nou’n dir sa bann menm parol avek bann frer ek ser ki’n bezwen swazir ki servis zot pou aksepte.

Nou ti kontan pour parmi sa 24 etidyan ki ti dan 83zyenm laklas Gilead, ki ti ganny fer Brooklyn, New York, an Avril 1987. Frer Ulysses Glass ek Frer Jack Redford ti nou formater prensipal. Sa senk mwan ki nou ti dan lekol ti pas vit e le 6 Septanm 1987 nou ti fini sa lekol. Nou ti ganny anvoye Ayti ansanm avek John ek Marie Goode.

I ti napa okenn misyonner Gilead ki ti’n ganny anvoye Ayti depi 1962. Sa ti ler bann misyonner ki ti ankor laba ti ganny pouse dan sa pei. Trwa semenn apre ki nou ti’n fini Lekol Gilead, nou ti konmans nou servis Ayti dan en pti kongregasyon ki ti byen lwen dan montanny. Sa kongregasyon ti annan 35 proklanmater. Nou ti zenn, napa bokou leksperyans  e nou ti pe reste nou tousel dan lakaz misyonner. Bann dimoun ti vreman pov e laplipar zot pa ti konn lir. Pandan ki nou ti laba, i ti annan vyolans akoz bann problenm politik, dimoun ti esey tir gouvernman o pouvwar, zot ti fer bann protestasyon e i ti osi annan bann siklonn.

Nou ti aprann en kantite keksoz avek bann frer ek ser Ayti. Zot ti for e zwaye. Menm si lavi ti difisil, zot ti kontan Zeova ek sa travay predikasyon. I ti annan en ser aze ki pa ti konn lir me i ti konn apepre 150 verse Labib parker. Bann problenm ki dimoun ti fer fas avek ti fer nou pli anvi anons sa mesaz ki Rwayonm Bondye i sa sel solisyon pour bann problenm ki bann dimoun ti pe fer fas avek. Nou vreman kontan ki serten nou bann etidyan Labib ti pli tar servi konman bann pionye ordiner, pionye spesyal e konman ansyen.

Ler mon ti Ayti, mon ti zwenn en zenn garson ki ti apel Trevor, ki ti en misyonner sorti dan larelizyon Mormonn. Mon ti ganny loportinite pour koz avek li konsernan Labib plizyer fwa. Plizyer lannen pli tar, mon ti ganny en let sorti kot li, san ki mon ti pe ekspekte. Dan sa let, i ti ekri: “Mon pe al batize dan sa prosenn lasanble! Mon anvi retourn Ayti pour mwan servi konman en pionye spesyal dan sa menm landrwa ki mon ti servi konman en misyonner Mormonn.” I sanmenm sa ki i ti fer pour plizyer lannen ansanm avek son madanm.

Vi ki i ti’n konmans vin pli fasil pour anons sa bon nouvel dan serten parti Lerop, nou ti ganny demande pour al servi laba. An 1992, nou ti ariv Loubyana, Lasloveni, ki ti pros avek kot mon paran ti’n grandi avan ki zot ti al reste Itali. Sa letan, i ti ankor annan lager dan serten landrwa dan ansyen Yougoslavya. Bann frer sorti Vyenn, Lotris; Zagreb, Lakroasi ek Belgrade, Laserbi ti pe organiz sa travay predikasyon ki ti pe ganny fer dan sa rezyon. Me aprezan sa kat pei ki ti form parti ansyen Yougoslavya ti pou annan zot prop Betel.

Sa ti vedir ki nou ti bezwen aprann en nouvo langaz ek kiltir. Bann dimoun ti kontan dir, “Jezik je težek,” ki vedir “Sa langaz i difisil.” Nou ti vwar ki i ti vreman difisil. Nou ti vreman enpresyonnen avek bann frer ek ser fidel ki ti pare pour aksepte bann sanzman ki lorganizasyon ti fer e nou ti vwar  lafason ki Zeova ti beni zot. Ankor enn fwa, nou ti vwar lafason ki Zeova ti aranz bann keksoz avek lanmour e dan sa bon moman. Nou ti aprann en kantite keksoz ler nou ti Lasloveni e bann keksoz ki nou ti’n aprann dan lepase ti osi ed nou pour fer fas avek bann problenm ki nou ti rankontre.

Me i ti pou annan ankor bann sanzman. An 2000, nou ti ganny demande pour al Kotdivwar ki ti dan les Lafrik. Apre, an Novanm 2002, nou ti bezwen kit sa pei e al Siera Leonn parski i ti annan lager Kotdivwar. Lager sivil ki ti’n dire pour 11 an ti’n fek fini Siera Leonn. Nou ti vreman sagren pour kit Kotdivwar sitan vitman. Me bann leson ki nou ti’n aprann ti ed nou pour kontinyen reste zwaye.

Ler nou ti Siera Leonn, nou ti konsantre lo lefet ki en kantite dimoun ti anvi aprann laverite e lo nou bann frer ek ser ki ti’n andire pandan bann lannen ki i ti’n annan lager. Zot ti vreman pov me zot ti anvi partaz sa ki zot ti annan. En ser ti donn Debbie detrwa lenz. Ler Debbie ti ezite pour aksepte, sa ser ti ensiste e i ti dir: “Pandan lager, bann frer ek ser sorti dan lezot pei ti ed nou. Aprezan i nou tour pour ede.” Nou ti fer li nou lobzektif pour swiv zot legzanp.

Pli tar, nou ti retourn Kotdivwar me i ti annan ankor problenm e sa ti fer ki i ti rekonmans annan vyolans. Alor an Novanm 2004, nou ti bezwen kit sa pei dan en elikopter avek zis en sak 10 kilo sakenn. Sa zour swar, nou ti dormi ater lo en baz militer Franse e son lannmen, avyon ti anmenn nou Laswis. Nou ti ariv Betel Laswis ver minwi e ler nou ti ariv laba, Komite Biro Brans ek bann formater Lekol Formasyon Ministeryel ek zot madanm ti la pour akeyir nou. Zot ti anmay nou e donn nou en bon repa ek en kantite sokola sorti Laswis. Sa ti fer nou vreman kontan.

Pour en serten letan nou ti servi Gana e apre ki bann problenm Kotdivwar ti’n aret en pe, nou ti retourn laba. Bann frer ek ser ti demontre labonte anver nou e sa ti ed nou andire pandan bann moman kot nou ti bezwen kit landrwa e kot nou ti bezwen al servi dan lezot landrwa tanporerman. Nou de Debbie, nou dakor ki menm si i normal ki pep Zeova i demontre lanmour anver kanmarad, nou pou toultan apresye sa lanmour ki ganny demontre anver nou. Anfet, nou ti realize ki bann moman difisil ki nou ti pas ladan ti en formasyon pour nou.

An 2006, nou ti ganny en let sorti kot biro prensipal ki ti dir nou ki nou ti pe ganny anvoye Mwayenn Oriyan. Sa ti vedir ki nou ti pou annan bann nouvo lavantir, problenm, nouvo langaz ek kiltir. I ti annan en kantite keksoz pour aprann dan sa landrwa kot i ti annan en kantite problenm akoz politik ek larelizyon. Nou kontan sa varyete langaz ki i ti annan dan bann kongregasyon e nou ti kontan pour vwar sa linite ki i annan parmi pep Bondye ler nou swiv bann lenstriksyon sorti kot lorganizasyon Zeova. Bann frer ek ser ti enpresyonn nou parski menm si laplipar zot ti pe ganny opoze par zot fanmir, kanmarad lekol, koleg travay ek vwazen, zot ti pe demontre kouraz e zot ti pe andire.

An 2012, nou ti asiste en lasanble spesyal ki ti ganny fer Tel Aviv, Izrael. Sa ti sa premye fwa ki sitan en gran kantite dimoun parmi pep Zeova ti’n rasanble ansanm depi Lapannkot lannen 33. Sa ti en lokazyon ki nou pa pou oubliye!

 Pandan sa bann lannen, nou ti ganny demande pour al vizit en pei kot sa travay predikasyon ti’n ganny enterdi. Nou ti anmenn serten bann piblikasyon, partisip dan predikasyon e asiste bann pti lasanble. I ti annan bann solda avek fizi partou. I ti osi annan bann landrwa kot bann solda ti bar semen pour kontrol dimoun ki pe pase. Me nou ti santi nou an sekirite ler nou ti ansanm avek detrwa proklanmater.

An 2013, nou ti ganny en lot servis. Nou ti ganny demande pour al servi dan Betel Kinsasa, Kongo. Kongo i en gran pei ki vreman zoli me dimoun laba i vreman pov e i souvan annan lager dan sa pei. O konmansman nou ti dir: “Nou konn Lafrik, alor nou’n pare pour sa.” Me nou ti vwar ki i ti ankor annan en kantite keksoz pour nou aprann sirtou ler nou ti bezwen al dan bann landrwa kot i ti napa semen ek pon. I ti annan en kantite bon keksoz pour nou konsantre lo la. Par egzanp, lefet ki bann frer ek ser ti kontinyen persevere e zwaye malgre problenm ekonomik, zot ti kontan predikasyon e zot ti fer zefor pour asiste renyon ek lasanble. Nou ti vwar pour nou menm ki sa travay predikasyon ti reisi zis akoz Zeova ti siport e beni sa travay. Sa bann lannen ki nou ti pase dan servis a plen tan Kongo, ti ansenny nou en kantite leson enportan e nou ti fer bann zanmi ki’n vin parey nou fanmir.

A lafen 2017, nou ti ganny anvoye Sid Afrik. Sa ti sa pli gran biro brans ki nou’n deza travay ladan e nou ti osi ganny en nouvo servis dan Betel. Ankor enn fwa, i ti annan en kantite keksoz pour nou aprann me nou ti osi aplik bann leson ki nou ti’n aprann dan lepase. Nou kontan bann frer ek ser ki’n reste fidel avek Zeova pour plizyer dizenn lannen. Nou osi kontan pour vwar ki lafanmir Betel i ini menm si zot sorti dan diferan ras ek kiltir. I fasil pour vwar lafason ki Zeova i beni son pep e fer ki zot annan lape anmezir ki zot devlop sa nouvo personnalite e aplik bann prensip Labib.

Pandan bann lannen ki’n pase, nou de Debbie, nou’n ganny bann servis ki eksitan, nou’n adapte avek bann nouvo kiltir e nou’n aprann bann nouvo langaz. I pa’n toultan fasil me nou’n vwar ki Zeova i servi son lorganizasyon ek nou bann frer ek ser pour demontre son lanmour fidel anver nou. (Ps. 144:2) Bann keksoz ki nou’n aprann dan nou servis a plen tan in fer nou bann pli bon serviter Zeova.

Mon vreman rekonesan ki mon paran in ansenny mwan, ki mon madanm in siport mwan e pour legzanp bann frer ek ser partou dan lemonn. Ler nou de mon madanm nou reflesir lo sa ki pou arive dan lavenir, nou determinen pour kontinyen les nou Gran Ansenyan ansenny nou.