Salomon ti papa Reabam e i ti lerwa Izrael pour 40 an. (1 Lerwa 11:42) Apre ki i ti mor, Reabam ti vwayaze sorti Zerizalenm pour al Sekenm pour vin lerwa. (2 Kronik 10:1) Eski i ti per pour vin sa prosen lerwa? Salomon ti koni pour son gran lasazes. Pa bokou letan apre sa, Reabam ti pou bezwen prouve si i ti annan ase lasazes pour rezourd en problenm difisil.

Bann Izraelit ti santi ki zot ti pe ganny abize e zot ti anvoy bann reprezantan pour dir Reabam sa ki zot ti oule i fer: “Ou papa ti rann nou fardo lour. Alor aprezan, si ou rann nou travay leze e tir sa fardo lour ki ou papa in enpoz lo nou, nou ava servi ou.”​—2 Kronik 10:3, 4.

Reabam ti annan en desizyon difisil pour fer. Si i ti fer sa ki lepep ti oule, petet li, son fanmir ek lezot dan pale ti pou bezwen viv san serten bann keksoz deliks ki zot ti’n abitye avek. Par kont, si i pa ti fer sa ki zot ti’n demande, petet zot ti pou rebel kont li. Ki i ti fer? Premyerman, i ti koz avek bann ansyen ki ti’n ed son papa. Zot ti dir li ekout lepep. Me apre sa, Reabam ti koz avek bann dimoun son laz e i ti deside pour tret lepep dan en fason dir. I ti dir zot: “Mon papa ti rann zot fardo lour, me mwan, mon pou ogmant li ankor. Mon papa ti pini zot avek fwet, me mwan mon pou koriz zot avek [“en lot kalite fwet,” NWT].”​—2 Kronik 10:6-14.

Eski ou vwar en leson ki nou kapab aprann? Ozordi, nou annan en kantite aze parmi nou ki’n servi Zeova pour plizyer lannen e ki kapab ed nou fer bann bon desizyon. Annou demontre lasazes e ekout zot.​—Zob 12:12.

Aprezan Reabam ti rasanble son larme pour al lager kont bann tribi ki ti’n rebele. Par kont, Zeova ti anvoy profet Semaya pour dir li: “Zot pa pou monte pour al lager. Zot pa pou lager kont  zot bann frer. Sakenn retourn se zot, akoz se mwan ki’n fer sa arive.”​—1 Lerwa 12:21-24. a​—Vwar not.

Eski i ti fasil pour Reabam ekout Zeova? Ki bann dimoun ti pou mazinen lo zot nouvo lerwa? I ti’n dir zot ki i ti pou pini zot avek “en lot kalite fwet,” me la aprezan i pa ti pe al fer nanryen konsernan sa rebelyon sokan! (Konpar 2 Kronik 13:7.) Kantmenm sa, nenport kwa ki bann dimoun ti krwar lo li, sa lerwa ek son larme ti “obei parol [Zeova], e zot ti retourn se zot parey [Zeova] ti’n dir.”

Ki leson nou kapab aprann? I toultan saz pour obei Bondye, menm si dimoun i boufonn nou ler nou fer sa. Bondye pou toultan beni nou ler nou obei li.​—Deterononm 28:2.

Eski Reabam ti ganny beni pour son lobeisans? Reabam ti ankor pe diriz lo tribi Zida ek Benzamen e i ti deside pour konstri bann nouvo lavil dan sa bann teritwar. I ti osi fer serten lavil “pli for.” (2 Kronik 11:5-12) Pli enportan, pour en pe letan i ti obei bann lalwa Zeova. Vi ki dimoun dan rwayonm sa dis tribi ti konmans ador bann zidol, en kantite dimoun ti vwayaz depi laba pour al Zerizalenm pour siport Reabam ek vre ladorasyon. (2 Kronik 11:16, 17) Alor, vi ki Reabam ti obei Zeova, son rwayonm ti vin pli for.

Ler rwayonm Reabam ti vin for, i ti fer en keksoz drol. I ti aret obei lalwa Zeova e konmans ador bann fo bondye! Me akoz? Eski son manman, ki ti en Amonit, ti enfliyans son desizyon? (1 Lerwa 14:21) Nou pa konnen, me sa nasyon ti swiv son move legzanp. Alor Zeova ti permet Sisak ki ti lerwa Lezip pour kaptir plizyer lavil dan rwayonm Zida. Sa ti arive menm si Reabam ti’n fer sa bann lavil vreman for!​—1 Lerwa 14:22-24; 2 Kronik 12:1-4.

Keksoz ti vin pli pir ler Sisak ek son larme ti vin atak Zerizalenm kot Reabam ti pe dirize. Ler sa ti arive, profet Semaya ti donn Reabam ek son bann prens sa mesaz sorti kot Bondye: “Zot in abandonn mwan, mwan osi mon’n abandonn zot dan lanmen Sisak.” Ki mannyer Reabam ti reazir ler i ti ganny sa disiplin? Dan en fason vreman pozitif! Labib i dir: “Bann sef Izrael ek lerwa ti rekonnet zot tor e zot ti dir, ‘[Zeova] i zis.’” Alor, Zeova ti delivre Reabam e Zerizalenm pa ti ganny detrir.​—2 Kronik 12:5-7, 12.

Apre sa, Reabam ti kontinyen diriz rwayonm Zida. Avan i ti mor, i ti donn son bann garson en kantite kado. I tre probab ki i ti anvi fer sir ki zot pa ti pou rebel kont zot frer Abiya, ki ti pou vin sa prosen lerwa. (2 Kronik 11:21-23) Ler Reabam ti fer sa, i ti azir avek plis lasazes ki ler i ti ankor zenn.

Menm si Reabam ti fer serten bon keksoz, Labib i dir sa konsernan son dominasyon: “[I] ti fer sa ki mal.” Akoz? Parski “i pa ti servi [Zeova] avek tou son leker.” Alor Zeova pa ti kontan sa ki i ti pe fer.​—2 Kronik 12:14.

Ki nou kapab aprann avek lavi Reabam? Par ler i ti obei Bondye. Osi, i ti fer serten bon keksoz pour pep Zeova. Me i ti napa en relasyon pros avek Zeova e i ti napa en gran dezir pour fer bann keksoz ki ti pou fer Zeova kontan. Alor i ti aret fer sa ki byen e konmans ador bann fo bondye. Ou kapab pe mazinen: ‘Ler Reabam ti aksepte koreksyon Zeova, eski i akoz i ti vreman regret son bann fot e anvi fer plezir Bondye? Oubyen eski i ti zis akoz lezot ti dir li ki i devret fer sa?’ (2 Kronik 11:3, 4; 12:6) Pli tar dan son lavi i ti fer sa ki mal ankor enn fwa. I ti vreman diferan avek son granpapa Lerwa David! I vre ki David ti fer bann fot. Me i ti senserman repantir apre ki i ti’n fer bann pese grav. Deplis, i ti kontan Zeova ek vre ladorasyon tou dilon son lavi.​—1 Lerwa 14:8; Psonm 51:1, 17; 63:1.

 Nou kapab aprann en kantite leson avek sa resi Labib. I byen ler dimoun i pran swen avek zot fanmir e fer bann bon keksoz pour lezot. Me pour ganny laprouvasyon Zeova, nou bezwen ador li dan en fason ki fer li plezir e nou bezwen annan en bon relasyon avek li.

Pour arive fer sa, nou bezwen annan en profon lanmour pour Zeova. Zis parey nou met plis dibwa pour fer en dife kontinyen brile, nou gard nou lanmour pour Bondye for ler nou etidye son Parol regilyerman, medit lo la e persevere dan lapriyer. (Psonm 1:2; Romen 12:12) Sa lanmour pou pous nou pour fer plezir Zeova dan tou sa ki nou fer. I pou osi pous nou pour vreman regrete ler nou fer bann fot e demann Zeova pour pardonn nou. Apre, nou pa pou parey Reabam me nou pou reste fidel e swiv vre ladorasyon.​—Zid 20, 21.