1. Ki byenfe nou gannyen ler nou koz lo ki mannyer nou’n vin dan “laverite”?

 “KI MANNYER ou’n konn laverite?” San dout, ou’n deza reponn sa kestyon plizyer fwa. Sa i enn bann premye kestyon ki nou demann en frer oubyen en ser ler nou anvi konn li pli byen. Nou kontan pour tande ki mannyer nou bann frer ek ser in aprann konn e kontan Zeova e nou osi kontan rakont zot akoz nou kontan laverite. (Rom. 1:11) Bann konversasyon koumsa, i fer nou rapel ki kantite laverite i presye pour nou. I osi fer nou pli determinen pour “kontinyen viv an armoni avek laverite,” setadir pour kontinyen viv dan en fason ki pou fer nou ganny benediksyon ek laprouvasyon Zeova.​—3 Zan 4.

2. Ki nou pou vwar dan sa lartik?

² Dan sa lartik, nou pou vwar serten rezon akoz nou kontan laverite. Apre, nou pou vwar ki mannyer nou kapab kontinyen montre ki nou kontan laverite. San dout, sa pou fer nou pli rekonesan anver Zeova parski in atir nou ver laverite. (Zan 6:44) I pou osi fer nou pli anvi anons laverite avek lezot.

3. Ki sa rezon pli enportan akoz nou kontan laverite?

³ Nou annan en kantite rezon pour kontan laverite. Sa rezon pli enportan i akoz nou kontan Zeova, Sours laverite. Atraver son Parol Labib, nou’n aprann ki Zeova i Tou Pwisan e ki i’n kree lesyel ek later. Nou’n osi aprann ki Zeova i nou Papa ki kontan nou e ki pran swen avek  nou. (1 Pyer 5:7) Nou konnen ki nou Bondye i “annan pitye ek konpasyon, i pa ankoler vitman e i annan en kantite lanmour fidel ek laverite.” (Egz. 34:6) Zeova i kontan lazistis. (Iza. 61:8) Son leker i fermal ler i vwar nou pe soufer. I vreman anvi met en lafen avek nou soufrans e i pe esper sa letan kot i pou kapab fer sa. (Zer. 29:11) Nou osi nou vreman anvi vwar sa arive. Pa nou annan rezon pour kontan Zeova en kantite!

4-5. Akoz zapot Pol ti konpar nou lespwar avek lank en bato?

⁴ Ki en lot rezon nou kontan laverite? Laverite i fer nou ganny en kantite byenfe. Annou vwar en legzanp. Sa laverite ki dan Labib i donn nou lespwar pour lavenir. Zapot Pol ti donn en legzanp pour montre valer ki sa lespwar i annan. I ti dir: “Sa lespwar i parey lank en bato dan nou lavi, enn ki sir e ferm.” (Ebr. 6:19) Zis parey lank en bato i anpes sa bato drive, nou lespwar i kapab ed nou reste kalm ler nou dan problenm.

⁵ Dan sa verse, zapot Pol ti pe koz konsernan sa lespwar ki bann Kretyen swazir i annan pour al dan lesyel. Me sa ki Pol ti dir i osi aplik pour bann Kretyen ki annan sa lespwar pour viv pour touzour dan en paradi lo later. (Zan 3:16) Ler nou aprann konsernan sa lespwar pour viv pour touzour, sa i fer nou lavi annan en sans.

6-7. Ki byenfe Yvonne in gannyen ler in aprann laverite konsernan lavenir?

⁶ Annou vwar leksperyans en ser ki apel Yvonne. I pa ti grandi dan laverite e ler i ti ankor zanfan i ti per lanmor. I ankor mazin en fraz ki i ti lir dan en liv ki dir: “En zour i pou napa demen.” Yvonne i dir: “Sa bann parol ti fatig mwan. Aswar mon pa ti dormi, mon ti mazin zis lavenir. Dan mon menm mon ti mazinen ki lavi i bezwen annan en bi e ki i annan en rezon akoz nou la. Mon pa ti anvi mor!”

⁷ Pli tar ler i ti en adolesan, i ti zwenn bann Temwen Zeova. I dir: “Mon ti konmans krwar ki mon kapab annan sa lespwar pour viv pour touzour dan paradi lo later.” Ki byenfe nou ser in gannyen ler in aprann konn laverite? Yvonne i dir: “Mon nepli mank sonmey aswar akoz mon enkyet lo lavenir ek lanmor.” I kler ki Yvonne i kontan laverite ki dan Labib e i kontan koz avek lezot lo son lespwar pour lavenir.​—1 Tim. 4:16.

8-9. (a) Ki kantite sa zonm dan legzanp Zezi ti apresye sa trezor ki i ti trouve? (b) Ki kantite laverite i presye pour ou?

⁸ Sa laverite ki dan Labib i osi enkli sa bon nouvel konsernan Rwayonm Bondye. Zezi ti konpar sa laverite konsernan Rwayonm avek en trezor ki’n kasyet. Dan Matye 13:44, Zezi ti dir: “Rwayonm lesyel i parey en trezor ki’n ganny kasyet dan en plantasyon. En zonm ti trouv sa trezor e i ti rekasyet li. Parski i ti dan lazwa, i ti al vann tou sa ki i ti annan e i ti aste sa plantasyon.” Remarke ki sa zonm pa ti pe rod sa trezor. Me ler i ti trouv sa trezor, i ti vann tou sa ki i ti annan pour li ganny sa trezor. Akoz i ti fer sa? I ti konnen ki sa trezor i annan en gran valer. Napa nanryen ki i ti deza annan ki ti pli presye ki sa!

⁹ Eski i koumsa ki ou santi anver laverite? Byensir! Nou konnen ki napa nanryen dan sa lemonn ki annan plis valer ki sa lazwa ki nou gannyen ler nou  pe servi Zeova la konmela e sa lespwar pour viv pour touzour dan lavenir anba Rwayonm Bondye. Nou annan sa privilez pour annan en lanmitye pros avek Zeova e i vo lapenn pour fer nenport sakrifis pour nou annan sa lanmitye. Sa ki fer nou vreman zwaye i pour ‘fer li plezir.’​—Kol. 1:10.

10-11. Kwa ki ti motiv Michael pour fer bann gran sanzman dan son lavi?

¹⁰ En kantite parmi nou in fer bann sakrifis pour nou kapab ganny laprouvasyon Zeova. Serten in kit bann gran karyer ki zot ti annan dan sa lemonn. Lezot in aret rod fason pour vin ris. I annan lezot ki’n sanz zot fason viv ler zot in aprann konsernan Zeova. I sanmenm sa ki Michael ti fer. I pa’n grandi dan laverite. Ler i ti ankor zenn, i ti fer karate. I dir: “I ti vreman enportan pour mwan reste an form fizikman. Parfwa mon ti santi ki personn pa kapab fer mwan nanryen.” Me ler Michael ti konmans etidye Labib, i ti aprann ki mannyer Zeova i santi konsernan vyolans. (Ps. 11:5) Michael i dir sa konsernan sa koup Temwen Zeova ki ti etidye Labib avek li: “Zot pa’n zanmen dir mwan aret fer karate. Zot ti zis kontinyen ansenny mwan laverite ki dan Labib.”

¹¹ Pli Michael ti aprann konsernan Zeova, pli i ti kontan Zeova plis. I ti vreman apresye lafason ki Zeova i demontre konpasyon anver son bann serviter. Avek letan, Michael ti realize ki i ti bezwen sanz son lavi. I dir: “Mon ti konnen ki pour mwan aret fer karate ti pou sa keksoz pli difisil ki mon’n deza fer. Me mon ti osi konnen ki sa ti pou fer plezir Zeova e mon ti asire ki servi Zeova ti vo plis ki nenport sakrifis.” Michael ti konnen ki sa laverite ki i ti’n trouve, ti annan bokou valer e i pour sa rezon ki i ti pare pour fer bann gran sanzman dan son lavi.​—Zak 1:25.

12-13. Ki mannyer laverite ki dan Labib in ed Mayli?

¹² Labib i montre valer ki sa laverite i annan ler i konpar laverite avek en lalanp ki pe klere dan fernwanr. (Ps. 119:105; Efe. 5:8) Mayli ki sorti Azerbaijan, i vreman apresye lafason ki Parol Bondye in ed li. Son paran ti annan diferan larelizyon. Son papa ti en Mizilman e son manman ti en Zwif. Mayli i dir: “Menm si mon ti konnen ki Bondye i egziste, mon ti annan en kantite kestyon. Mon ti demann mon lekor, ‘Akoz Bondye in kree bann imen e akoz dimoun i bezwen soufer tou son lavi e apre pour li al soufer ankor dan lanfer pour touzour?’ Vi ki dimoun i dir ki tou sa ki arive i lavolonte Bondye, mon ti mazinen, ‘Eski Bondye i kontrol bann imen e apre i kontan ler i vwar zot pe soufer?’”

¹³ Mayli ti kontinyen rod larepons pour son bann kestyon. Avek letan, i ti aksepte en letid Labib e i ti vin en Temwen Zeova. I dir: “Ler mon’n aksepte sa bann lansennyman ki dan Labib, sa in ed mwan pour vin pli zwaye. Sa lansennyman ki dan Labib i rezonnab e in donn mwan lape lespri.” Parey Mayli, nou loue Zeova, “sa Enn ki’n tir [nou] dan fernwanr pour anmenn [nou] dan son lalimyer merveye.”​—1 Pyer 2:9.

14. Ki nou kapab fer pour nou kontan laverite plis? (Vwar osi sa bwat “ Lezot konparezon.”)

¹⁴ Sa ti zis detrwa konparezon ki  montre valer ki laverite i annan. San dout, ou kapab mazin lezot konparezon. Petet dan ou letid personnel, ou kapab fer resers lo lezot rezon akoz nou devret kontan laverite. Pli nou kontan laverite, pli nou pou rod fason pour montre ki nou kontan laverite.

15. Ki en fason ki nou kapab montre ki nou kontan laverite?

¹⁵ Nou montre ki nou kontan laverite ler nou regilyerman etidye Labib ek bann piblikasyon ki baze lo Labib. Apre tou, nenport ki kantite letan nou dan laverite, i toultan annan keksoz pour nou aprann. Sa premye nimero Latour Veyer ti dir: “Laverite i parey en pti fler ki’n kasyet parmi en kantite move zerb. Pour ou kapab trouv li, ou bezwen pe veye. . . . Ou pou bezwen fer zefor pour ganny li. Ou pa devret satisfe avek zis en fler. . . . Toultan esey rod plis laverite.” I demann zefor pour etidye me ou zefor i vo lapenn.

16. Ki fason etidye ki ou’n vwar i ed ou plis? (Proverb 2:4-6)

¹⁶ Pa nou tou ki kontan lir e etidye.  Me Zeova i demann nou pour “kontinyen rod” fason pour konpran laverite pli byen. (Lir Proverb 2:4-6.) Ler nou fer sa, nou pou toultan ganny bann byenfe. En frer ki apel Corey i dir ki i konsantre lo en verse alafwa, ler i lir Labib. I dir: “Mon lir tou not, tou bann verse ki ganny donnen konman referans e mon fer lezot resers. . . . Sa fason fer i ed mwan pour aprann en kantite keksoz.” Ki swa nou fer parey Corey oubyen nou annan en lot fason fer, nou montre ki nou apresye laverite ler nou pran letan e nou fer zefor pour etidye Labib.​—Ps. 1:1-3.

17. Ki savedir viv laverite? (Zak 1:25)

¹⁷ I pa ase pour zis etidye laverite. Pour nou ganny bann byenfe, nou bezwen viv laverite, setadir aplik sa ki nou pe aprann dan nou lavi. Sa i sa sel fason ki nou pou kapab vreman ere. (Lir Zak 1:25.) Ki mannyer nou kapab fer sir ki nou pe viv laverite? En frer ti sizere ki nou egzamin byen nou fason viv pour vwar si nou pe aplik sa ki nou pe aprann e pour vwar kote ki nou bezwen amelyore. Zapot Pol ti dir: “Nenport ki progre ki nou’n fer, annou kontinyen al annavan dan sa menm direksyon e dan en fason annord.”​—Fili. 3:16.

18. Akoz nou fer nou mye pour nou “kontinyen viv an armoni avek laverite”?

¹⁸ Mazin bann byenfe ki nou gannyen ler nou fer nou mye pour “kontinyen viv an armoni avek laverite.” Nou pa zis viv en pli bon lavi la konmela me nou osi fer Zeova ek nou bann frer ek ser kontan. (Prov. 27:11; 3 Zan 4) Sa i bann pli bon rezon pour nou kontan laverite e pour viv laverite.