1. Ki profet Izai ti pe dir bann Izraelit?

 PROFET Izai i dir ki Zeova i “sa Bondye laverite.” Sa mo ki’n ganny tradwir “laverite” i vedir “amenn.” (Iza. 65:16) “Amenn” i vedir “dakor” oubyen “sirman.” Dan Labib, ler sa mo “amenn” i ganny servi an konneksyon avek Zeova oubyen Zezi, sa i en garanti ki sa ki’n ganny dir i vre. Alor Izai ti pe dir bann Izraelit ki tou sa ki Zeova i dir, i diny konfyans. Anfet Zeova in toultan gard son bann promes.

2. Akoz nou kapab annan konfyans ki bann promes ki Zeova in fer konsernan lavenir pou vin vre e ki kestyon nou pou reponn?

² Eski nou kapab annan konfyans ki bann promes ki Zeova in fer konsernan lavenir pou vin vre? Preski 800 an apre lanmor Izai, zapot Pol ti eksplike akoz nou kapab toultan annan konfyans dan bann promes Bondye. I ti dir ki i “enposib pour [Bondye] koz manti.” (Ebr. 6:18) Zis parey en sours delo pa kapab prodwi delo ki nou kapab bwar e an menm tan delo sale, Zeova ki sours laverite pa kapab koz manti. Alor, nou kapab annan konfyans dan tou sa ki Zeova i dir, enkli tou son bann promes konsernan lavenir. Dan sa lartik, nou pou reponn sa bann kestyon swivan: Ki Zeova in promet  konsernan lavenir? Ki mannyer Zeova i asir nou ki son promes pou vin vre?

3. (a) Ki promes ki bann serviter Bondye i kontan? (Revelasyon 21:​3, 4) (b) Ki serten dimoun i dir ler nou koz lo sa promes avek zot?

³ Nou pou koz lo en promes ki bann serviter Bondye partou dan lemonn i kontan. (Lir Revelasyon 21:​3, 4.) Zeova i promet ki en zour i “pou nepli annan ni lanmor, ni dey, ni leokri, ni douler ankor.” En kantite parmi nou i servi sa bann verse ler nou pe koz avek dimoun konsernan ki mannyer lavi pou ete dan Paradi. Ki serten dimoun i dir ler nou koz lo sa promes avek zot? Zot kapab dir, “Sa bann keksoz i paret bon. Me mon pa krwar i pou vin vre.”

4. (a) Ki Zeova ti konnen pou arive ozordi? (b) Apard ki fer en promes, ki Zeova in fer ankor?

⁴ Ler Zeova ti enspir zapot Zan pour ekri sa promes konsernan Paradi, Zeova ti konnen ki ozordi nou ti pou koz lo sa lespwar avek lezot ler nou pe anons sa mesaz Rwayonm. Zeova ti osi konnen ki en kantite dimoun ti pou vwar li difisil pour krwar ki dan lavenir i pou annan bann “nouvo keksoz.” (Iza. 42:9; 60:2; 2 Kor. 4:​3, 4) Alor ki mannyer nou kapab ed lezot pour annan konfyans ki sa bann benediksyon ki dan Revelasyon 21:​3, 4 pou vin vre? Osi, ki mannyer nou kapab annan plis konfyans dan Zeova e dan son bann promes? Zeova pa’n zis fer sa zoli promes me i’n osi donn nou bann rezon akoz nou kapab annan konfyans ki i pou gard sa promes. Ki rezon ki i’n donnen?

5. Ki bann rezon nou annan pour met konfyans dan promes Zeova konsernan Paradi e dan ki verse nou kapab trouv sa bann rezon?

⁵ Dan bann verse ki swiv, nou trouv bann rezon akoz nou kapab annan konfyans dan promes Zeova konsernan Paradi. Dan sa bann verse, i dir: “Sa Enn ki ti pe asiz lo tronn ti dir: ‘Gete! Mon pe fer tou keksoz nef.’ I ti osi dir: ‘Ekri, parski sa bann parol i fidel e vre.’ I ti dir mwan: ‘Tou in akonpli! Mwan menm Alfa ek Omega, konmansman ek finisyon.’”—Rev. 21:​5, 6a.

6. Akoz sa ki ganny dir dan Revelasyon 21:​5, 6 i fer nou annan plis konfyans dan promes Bondye?

⁶ Ki mannyer sa bann verse i fer nou annan plis konfyans dan promes Bondye? Sa liv Revelation Climax i dir sa konsernan sa bann verse: “I konmsi Zeova in siny en garanti oubyen en dokiman pour asir bann imen ki i pou gard son promes.” b Sa promes ki Bondye in fer in ganny rikorde dan Revelasyon 21:​3, 4. Me apre dan verse 5 ek 6, i konmsi Zeova i met son sinyatir pour asir nou ki sa promes pou vin vre. Aprezan annou vwar ki mannyer Zeova i asir nou ki sa promes ki i’n fer pou vin vre.

7. Lekel ki konmans koze dan verse 5 e akoz sa i spesyal?

⁷ O konmansman verse 5 nou lir: “Sa Enn ki ti pe asiz lo tronn ti dir.” (Rev. 21:5a) Sa bann parol i spesyal parski i enn parmi sa trwa fwa ki Zeova li menm i koze dan liv Revelasyon. Alor i pa ni en lanz, ni menm Zezi ki’n donn sa  garanti me i Zeova li menm. Sa i fer ki nou kapab annan konfyans dan sa ki Zeova i dir apre. Akoz? Parski Zeova “pa kapab koz manti.” (Tit 1:2) Sa i fer nou annan konfyans dan sa ki Revelasyon 21:​5, 6 i dir.

8. Ki Zeova i dir ki montre ki nou kapab asire ki son promes pou vin vre? (Izai 46:10)

⁸ Apre Zeova i dir: “Gete!” (Rev. 21:5) Sa term Grek ki’n ganny tradwir “gete” i ganny servi plizyer fwa dan liv Revelasyon. Dapre en liv referans, sa term i ganny servi konman en fason pour fer sa lekter port byen latansyon lo sa ki pe al ganny dir apre. Ki Bondye i dir apre? I dir: “Mon pe fer tou keksoz nef.” Zeova pe koz lo bann sanzman ki i pou fer dan lavenir. Me vi ki i asire ki i pou gard son promes, i koz lo sa bann sanzman konmsi i pe fer li.—Lir Izai 46:10.

9. (a) Ler Zeova i dir ki ‘i pe fer tou keksoz nef,’ ki i pe refer avek? (b) Ki pou arive avek sa “lesyel” ek “later” ki egziste ozordi?

⁹ Ki Zeova pe esey dir ler i dir ki ‘i pe fer tou keksoz nef’? Dan Revelasyon 21, sa fraz pe refer avek de keksoz ki Zeova i fer. I ranplase e i repare. Me ki Zeova pou ranplase? Dan Revelasyon 21:​1, nou lir: “Sa lesyel avan ek sa later avan ti’n disparet.” “Sa lesyel avan” pe refer avek bann gouvernman ki anba lenfliyans Satan ek son bann demon. (Mat. 4:​8, 9; 1 Zan 5:19) Ler sa mo “later” i ganny servi dan Labib, sa pe refer avek bann dimoun. (Zen. 11:1; Ps. 96:1) Alor, “sa later avan” pe refer avek bann move dimoun. Zeova pa pou zis repar oubyen amelyor sa “lesyel” ek “later” ki egziste ozordi. Me i pou detri zot konpletman. I pou ranplas sa lesyel ek later ki egziste ozordi avek “en nouvo lesyel ek en nouvo later,” setadir en nouvo gouvernman ki pou diriz lo bann dimoun drwat.

10. Kwa ki Zeova pou fer vin nef?

¹⁰ Ki en lot fason Zeova pou fer tou keksoz nef? (Rev. 21:5) Zeova pou geri later ek bann imen e zot pou vin parfe. Parey profet Izai ti predir, Zeova pou fer later antye vin en zoli landrwa en pe parey zarden Edenn. I pou osi fer nou vin nef setadir i pou geri sakenn parmi nou konpletman. Bann ki bwete, bann ki aveg e bann ki sourd pou ganny geri e menm bann mor pou reganny lavi.—Iza. 25:8; 35:​1-7.

11. Ki lord Zeova ti donn Zan e akoz?

¹¹ Kwa ankor ki Bondye in dir ki asir nou ki nou kapab annan konfyans dan li? Zeova ti dir Zan: “Ekri, parski sa bann parol i fidel e vre.” (Rev. 21:5) Zeova pa ti zis dir Zan “ekri,” i ti osi donn li en rezon akoz i pe donn li lord pour fer sa. Zeova ti dir: “Parski sa bann parol i fidel e vre.” Sa i vedir ki Parol Bondye i diny konfyans e i egzakt. Nou rekonesan ki Zan ti obei lord Bondye e i ti “ekri.” Sa i fer ki nou kapab lir lo bann promes ki Bondye in fer konsernan en Paradi e medit lo bann benediksyon ki nou pou gannyen.

12. Akoz Zeova ti dir: “Tou in akonpli”?

¹² Ki Bondye i dir apre? I dir: “Tou in akonpli!” (Rev. 21:6) Aprezan Zeova i koz konmsi sa bann keksoz in fini arive.  Zeova i kapab koz dan sa fason parski i napa nanryen ki kapab anpes li akonpli son plan. Apre Zeova i dir en lot keksoz ki asir nou ki son promes pou vin vre. Ki i dir?

13. Akoz Zeova ti dir: “Mwan menm Alfa ek Omega”?

¹³ Parey in ganny mansyonnen pli boner, dan bann vizyon ki Zan ti gannyen, Zeova li menm ti koze trwa fwa. (Rev. 1:8; 21:​5, 6; 22:13) Sak fwa ki Zeova ti koze, i ti dir menm keksoz. I ti dir: “Mwan menm Alfa ek Omega.” Alfa i sa premye let dan alfabet Grek e Omega i sa dernyen let. Ler Zeova i dir ki i “Alfa ek Omega,” Zeova pe ed nou konpran ki ler i konmans en keksoz, i pou fini sa keksoz.

14. (a) Kan ki Zeova ti dir “Alfa” e kan i pou dir “Omega”? (b) Ki Zenez 2:​1-3 i fer nou asire?

¹⁴ Apre ki Zeova ti’n kree Adan ek Ev, i ti koz avek zot konsernan son plan pour imen e pour later. Labib i dir: “Bondye ti beni zot e Bondye ti dir: ‘Fer zanfan e vin bokou, ranpli later e pran swen avek li.’” (Zen. 1:28) Ler Zeova ti dir sa, i ti konmsi i pe dir “Alfa” oubyen konmansman. Ler son plan pou’n fini ganny akonplir, setadir ler desandans Adan ek Ev ki obeisan e parfe pou’n ranpli later e zot pou’n fer later vin en paradi, sa pou sa letan kot i pou konmsi Zeova i dir “Omega.” Apre ki Zeova ti’n fini kree “lesyel, later ek tou sa ki lo later e dan lesyel,” i ti dir en keksoz pour montre ki son plan pou ganny akonplir. Sa ki i ti dir i dan Zenez 2:​1-3. (Lir.) Zeova ti dir ki sa setyenm  zour i sakre. Ki sa i vedir? Sa i montre ki plan Zeova pour bann imen e pour later pou’n ganny akonplir a lafen sa setyenm zour.

15. Akoz i kapab ki Satan ti krwar ki i’n reisi kas plan Bondye pour bann imen?

¹⁵ Ler Adan ek Ev ti rebel kont Bondye, zot ti fer pese e sa i fer ki zot desandans in erit pese e zot mor. (Rom. 5:12) Apre sa, i ti kapab paret ki Satan ti’n kas plan ki Bondye ti annan pour bann imen parfe e obeisan ranpli later. I ti paret konmsi Satan in fer li enposib pour Zeova dir “Omega.” I kapab ki Satan ti krwar ki i ti napa bokou keksoz ki Zeova ti kapab fer. Petet Satan ti krwar ki Bondye ti pou touy Adan ek Ev e kree en lot koup parfe pour akonpli son plan pour bann imen. Me si Bondye ti’n fer sa, Dyab ti pou’n akiz li konmkwa i en manter. Akoz? Parski dan Zenez 1:​28, Zeova ti’n dir Adan ek Ev ki zot desandans ki ti pou ranpli later.

16. Akoz i kapab ki Satan ti krwar ki i pou kapab dir ki Zeova pa’n reisi akonpli son plan?

¹⁶ Petet ki en lot keksoz ki Satan ti krwar Bondye ti pou fer? Petet Satan ti krwar ki Zeova ti pou les Adan ek Ev fer zanfan me ki sa bann zanfan pa ti pou zanmen vin parfe. (Ekle. 7:20; Rom. 3:23) Si sa bann zanfan pa ti pou zanmen kapab vin parfe, Dyab ti pou kapab dir ki Zeova pa’n reisi akonpli son plan, setadir pour ranpli later avek bann desandans Adan ek Ev, ki parfe e obeisan.

17. Apre ki Satan ansanm avek Adan ek Ev ti rebele, ki Zeova ti fer pour rezourd sa problenm e ki rezilta sa pou anmennen? (Vwar portre.)

¹⁷ Menm si Satan ansanm avek Adan ek Ev ti’n rebele kont Zeova, Zeova ti trouv sa pli bon solisyon pour akonpli son plan. I tre probab ki Satan pa ti ekspekte sa ki Zeova ti fer. (Ps. 92:5) Zeova ti montre ki i pa en manter e ki i koz laverite par les Adan ek Ev fer zanfan. Zeova ti montre ki si i dir i pou fer en keksoz, nanryen pa pou kapab anpes li fer sa ki i’n dir. I ti fer sir ki son plan i ganny akonplir par donn en “desandans” ki ti pou sov bann desandans Adan ek Ev ki obeisan. (Zen. 3:15; 22:18) Satan ti’n bezwen sirprann ler Zeova ti fer laranzman pour sa desandans donn son lavi konman en ranson.  Akoz? Parski sa laranzman i baze lo lanmour, setadir en lanmour ki met lentere lezot avan. (Mat. 20:28; Zan 3:16) Satan pa koumsa. I egois. Alor, ki pou arive akoz sa laranzman? A lafen Renny Mil an Kris, bann desandans Adan ek Ev ki parfe e obeisan pou reste lo later ki pou’n vin en paradi zis parey Zeova ti anvi o konmansman. A sa moman, i pou konmsi Zeova i dir “Omega.”

18. Ki trwa rezon ki Bondye i donn nou ki fer nou asire ki son promes pou vin vre? (Vwar sa bwat “ Trwa rezon akoz nou kapab annan konfyans dan bann promes Zeova.”)

¹⁸ Dan sa lartik, nou’n vwar bann rezon akoz nou kapab asire ki later pou vin en Paradi. Ki nou kapab dir lezot pour ki zot osi zot asire ki later pou vin en Paradi? Premyerman, Zeova li menm in fer sa promes. Liv Revelasyon i dir: “Sa Enn ki ti pe asiz lo tronn ti dir: ‘Gete! Mon pe fer tou keksoz nef.’” Zeova i anvi akonpli son promes e i annan sa lasazes ek pouvwar pour fer li. Dezyenmman, nou asire ki sa promes pou vin vre parski pour Zeova i konmsi in fini arive. I pour sa rezon ki i dir: “Sa bann parol i fidel e vre. . . . Tou in akonpli!” Trwazyenmman, i napa nanryen ki kapab anpes Zeova fini en keksoz ki i’n konmanse. I pour sa rezon ki i dir: “Mwan menm Alfa ek Omega.” Zeova pou montre ki Satan i en manter e ki Satan pa kapab anpes li akonpli son plan.

19. Ki ou kapab fer ler en dimoun pa krwar ki promes Bondye konsernan Paradi pou vin vre?

¹⁹ Rapel ki sak fwa ou koz avek lezot lo sa ki Zeova i dir pour asir nou ki son bann promes pou vin vre, ou ranforsi ou prop konfyans dan li. Alor laprosenn fwa ou lir sa zoli promes konsernan Paradi ki ganny dekrir dan Revelasyon 21:4 e en dimoun i dir, “Sa bann keksoz i paret bon me mon pa tro krwar i pou vin vre,” ki ou kapab dir li? Ou kapab lir e eksplik li verse 5 ek 6. Montre ki dan sa bann verse, i konmsi Zeova in met son prop sinyatir pour asir nou ki son promes pou vin vre.—Iza. 65:16.