1-2. (a) Akoz zapot Pol ti dir ki “lanmour i pli gran”? (b) Ki bann kestyon nou pou reponn?

 LER zapot Pol ti pe koz lo lafwa, lespwar ek lanmour, i ti dir ki parmi sa bann kalite “lanmour i pli gran.” (1 Kor. 13:13) Akoz Pol ti dir sa? Dan lavenir, nou pou nepli bezwen annan lafwa dan promes Bondye konsernan nouvo lemonn oubyen annan lespwar ki sa bann promes pou ganny akonplir parski zot pou’n fini ganny akonplir. Me nou pou toultan bezwen kontan Zeova ek lezot dimoun. Anfet nou lanmour pour zot pou kontinyen vin pli for pour touzour.

² Vi ki nou pou toultan bezwen demontre lanmour, annou vwar larepons sa trwa kestyon. Premyerman, akoz nou devret kontan kanmarad? Dezyenmman, ki mannyer nou demontre lanmour anver kanmarad? Trwazyenmman, ki mannyer nou kapab gard sa lanmour ki nou annan pour kanmarad for?

3. Ki bann rezon akoz nou kontan kanmarad?

³ Akoz i enportan pour nou kontan kanmarad? Enn parmi bann rezon akoz nou kontan kanmarad i akoz sa i montre ki nou bann vre Kretyen. Zezi ti dir son bann zapot: “Par sa, tou dimoun pou konnen ki zot mon disip, si zot annan lanmour antre zot.” (Zan 13:35) Osi, ler nou kontan kanmarad, sa i ed nou pour reste ini. Pol ti osi dir ki lanmour i “soud keksoz ansanm dan en fason  parfe.” (Kol. 3:14) Me i annan en lot rezon enportan akoz nou devret kontan kanmarad. Zapot Zan ti dir son bann frer ek ser: “Sa ki kontan Bondye i devret osi kontan son frer.” (1 Zan 4:21) Alor, ler nou demontre lanmour pour kanmarad, nou montre ki nou kontan Bondye.

4-5. Ki sa lanmour ki nou annan pour Bondye i annan pour fer avek sa lanmour ki nou annan pour kanmarad? Donn en egzanp.

⁴ Ki sa lanmour ki nou annan pour Bondye i annan pour fer avek sa lanmour ki nou demontre anver nou bann frer ek ser? Pour ed nou konpran sa, annou vwar ki konneksyon i annan ant nou leker ek lezot parti nou lekor. En dokter i tyek nou pou kot nou ponnyen pour konnen si nou leker pe bat dousman oubyen for. Sa pou donn li serten lenformasyon konsernan nou leker. Ki nou kapab aprann avek sa prensip?

⁵ Zis parey en dokter i kapab ganny serten lenformasyon konsernan nou leker ler i tyek nou pou, nou kapab konnen ki kantite nou kontan Bondye par tyeke ki kantite nou kontan lezot. Si nou remarke ki nou lanmour pour nou bann frer ek ser i nepli parey avan, sa i kapab pe montre nou ki nou lanmour pour Bondye osi in afebli. Me ler nou demontre lanmour pour nou bann frer ek ser regilyerman, sa i montre nou ki nou lanmour pour Bondye i for.

6. Si nou lanmour pour nou bann frer ek ser in afebli, akoz sa i en keksoz serye? (1 Zan 4:​7-9, 11)

⁶ Si nou lanmour pour nou bann frer ek ser in afebli, sa i en keksoz serye. Akoz? Parski sa pou vedir ki nou lanmitye avek Zeova nepli for parey avan. Zapot Zan i fer nou konpran sa ler i ti dir: “Sa enn ki pa kontan son frer ki i kapab vwar, pa kapab kontan Bondye ki i pa kapab vwar.” (1 Zan 4:20) Ki leson nou aprann? Ler nou “kontan kanmarad,” sa i fer Zeova plezir.—Lir 1 Zan 4:​7-9, 11.

7-8. Ki serten fason nou kapab montre ki nou kontan kanmarad?

⁷ Dan plizyer verse Labib, nou vwar sa lord pour “kontan kanmarad.” (Zan 15:​12, 17; Rom. 13:8; 1 Tesa. 4:9; 1 Pyer 1:22; 1 Zan 4:11) Me lanmour i en santiman dan nou leker ki personn pa kapab vwar. Alor ki mannyer nou kapab montre nou bann frer ek ser ki nou kontan zot? Nou fer sa par sa ki nou dir e fer.

⁸ I annan plizyer fason ki nou kapab montre nou bann frer ek ser ki nou kontan zot. Annou vwar detrwa legzanp: “Koz laverite avek kanmarad.” (Zek. 8:16) “Reste anpe avek kanmarad.” (Mark 9:50) “Zot devret touzour premye pour onor lezot.” (Rom. 12:10) “Byen resevwar kanmarad.” (Rom. 15:7) “Kontinyen . . . pardonn kanmarad.” (Kol. 3:13) “Kontinyen anmenn fardo kanmarad.” (Gal. 6:2) “Kontinyen rekonfort kanmarad.” (1 Tesa. 4:18) “Kontinyen . . . batir kanmarad.” (1 Tesa. 5:11) “Priy pour kanmarad.”—Zak 5:16.

9. Akoz ler nou rekonfort lezot, sa i montre ki nou kontan zot? (Vwar portre.)

⁹ Annou vwar en fason ki nou kapab demontre lanmour pour lezot. Pol ti dir: “Kontinyen rekonfort kanmarad.” En fason enportan ki nou kapab demontre nou lanmour pour lezot i par rekonfort zot. Akoz? En liv referans i dir ki sa mo ki Pol ti servi pour “rekonfort” i vedir  debout o bor en dimoun pour ankouraz li ler i pe pas dan en sityasyon difisil. Alor ler nou rekonfort en frer oubyen ser ki pe soufer, nou ed li pour li reste fidel avek Zeova. Sak fwa nou rekonfort en frer oubyen en ser, nou montre li ki nou kontan li.—2 Kor. 7:​6, 7, 13.

10. Ki mannyer konpasyon ek rekonfor i relye avek kanmarad?

¹⁰ Konpasyon ek rekonfor i relye avek kanmarad. Dan ki fason? En dimoun ki annan konpasyon i anvi rekonfort lezot e esey soulaz zot soufrans. Premyerman, nou annan konpasyon pour sa dimoun e apre nou rekonfort li. Remarke ki mannyer Pol ti montre ki sa konpasyon ki Zeova i annan pour bann imen i pous li pour rekonfort zot. Pol i dir ki Zeova i “en Papa ki pran lapenn e ki donn rekonfor dan tou sityasyon.” (2 Kor. 1:3) Pol i dir ki Zeova i sa “Papa ki pran lapenn.” Sa i vedir ki Zeova i sours konpasyon. Sa konpasyon i motiv li pour rekonfort “nou dan tou nou bann leprev.” (2 Kor. 1:4) Zis parey delo ki sorti dan en sours i rafresi bann ki swaf, Zeova i donn lafors ek rekonfor bann ki pe soufer. Nou osi nou kapab swiv legzanp Zeova par annan konpasyon e rekonfort lezot. Ki mannyer sa? En fason ki nou kapab fer sa, i par devlop bann kalite ki pou ed nou rekonfort lezot. Ki serten sa bann kalite?

11. Dapre Kolosyen 3:12 ek 1 Pyer 3:​8, ki lezot kalite ki nou bezwen devlope ki pou ed nou pour kontinyen kontan kanmarad e kontinyen rekonfort kanmarad?

¹¹ Kwa ki pou ed nou pour kontinyen kontan kanmarad e “kontinyen rekonfort kanmarad” toulezour? Nou bezwen esey konpran e annan menm santiman avek kanmarad e osi demontre labonte. (Lir Kolosyen 3:12; 1 Pyer 3:8.) Ki mannyer sa pou ed nou? Ler nou annan konpasyon pour nou bann frer ek ser e nou vreman enterese avek zot, nou pou vreman anvi rekonfort zot ler zot pe soufer. Zezi ti dir: “Labous i koz sa ki deborde dan leker. En bon dimoun i dir bann bon keksoz, akoz son leker i ranpli avek bann bon keksoz.” (Mat. 12:​34, 35) Ler nou rekonfort nou bann frer ek ser ki dan bezwen, sa i en fason enportan ki nou montre ki nou kontan zot.

12. (a) Akoz nou bezwen fer atansyon? (b) Ki kestyon nou pou reponn aprezan?

¹² Nou tou nou anvi “kontinyen kontan kanmarad.” (1 Zan 4:7) Me i enportan ki nou gard antet ki Zezi ti dir ki “lanmour lamazorite dimoun pou diminyen.” (Mat. 24:12) Zezi pa ti pe dir ki laplipar son bann disip ti pou arete kontan kanmarad. Vi ki laplipar dimoun dan sa lemonn pa demontre lanmour, nou bezwen fer atansyon ki sa latitid pa annan en lefe lo lafason ki nou tret kanmarad. Avek sa nide antet, aprezan annou vwar en kestyon enportan: Kwa ki pou ed nou konnen si nou lanmour pour nou bann frer ek ser i ankor for?

13. Kwa ki pou ed nou konnen si nou lanmour pour nou bann frer ek ser i ankor for?

¹³ En fason pour nou konnen si nou lanmour pour nou bann frer ek ser i ankor for, i par egzamin lafason ki nou azir dan serten sityasyon. (2 Kor. 8:8) Zapot Pyer ti mansyonn en sityasyon. I ti dir:  “Avan tou, zot devret kontan kanmarad en kantite, parski lanmour i kouver en kantite pese.” (1 Pyer 4:8) Alor sa ki nou fer ler nou frer oubyen ser i fer en fot oubyen fer en keksoz ki bles nou santiman, pou ed nou konnen si nou lanmour pour zot i ankor for.

14. Dapre 1 Pyer 4:​8, ki kalite lanmour ki nou bezwen annan pour lezot? Donn en legzanp.

¹⁴ Annou reflesir lo sa ki Pyer ti dir. Sa premye parti dan verse 8 i dir ki nou devret “kontan kanmarad en kantite.” Sa mo ki Pyer ti servi pour “en kantite” i vedir “redi pour vin pli gran.” Dezyenm parti sa verse i montre ki nou pou fer ler nou kontan kanmarad en kantite. Sa lanmour pou ed nou kouver pese nou bann frer ek ser. Annou vwar en legzanp ki pou ed nou konpran sa. Imazin en latab ki annan en kantite reye lo la. Ou kapab pran en tapi e tal li lo sa latab ziska i kouver laplipar sa bann mark reye. Pareyman si nou kontan nou bann frer ek ser en kantite, nou kapab kouver oubyen pardonn, pa zis enn oubyen de, me “en kantite pese.”

15. Ki nou pou kapab fer si nou lanmour pour nou bann frer ek ser i sitan for? (Kolosyen 3:13)

 ¹⁵ Nou lanmour pour nou bann frer ek ser i devret sitan for ki nou kapab pardonn zot menm ler i vreman difisil. (Lir Kolosyen 3:13.) Ler nou pardonn lezot, nou montre ki nou vreman kontan zot e ki nou anvi fer plezir Zeova. Ki lezot keksoz ki nou kapab fer ki pou ed nou pour pardonn lezot ler zot fer fot e pour pa ofans vitman?

16-17. Ki lezot keksoz nou kapab fer ki pou ed nou pour pardonn lezot ler zot fer fot e pour pa ofans vitman? Donn en legzanp. (Vwar portre.)

¹⁶ Konsantre lo bann bon kalite ki nou bann frer ek ser i annan e pa lo zot bann defo. Annou vwar en legzanp. Meton ou dan en rankont avek lezot frer ek ser. Ou pe pas en bon letan e a lafen sa rankont, ou tir en portre tou dimoun ansanm. Anfet, ou tir de lezot portre an ka sa premye portre pa zoli. Aprezan ou annan trwa portre me dan enn sa portre, ou remarke ki en frer i annan en lanmin lo son figir. Ki ou fer avek sa portre? Ou delete sa portre parski ou annan de lezot portre kot tou dimoun enkli sa frer pe sourir.

¹⁷ Nou kapab konpar bann portre ki nou garde avek bann souvenir ki nou garde. Normalman, nou annan bann bon souvenir konsernan bann moman ki  nou’n pase avek nou bann frer ek ser. Me petet dan enn sa bann moman, en frer oubyen en ser i dir ouswa fer en keksoz ki bles ou santiman. Ki ou devret fer avek sa souvenir? Ou devret esey oubliy sa souvenir zis parey ou ti pou delete enn sa bann portre. (Prov. 19:11; Efe. 4:32) Nou kapab oubliy sa pti fot ki nou frer oubyen nou ser in fer parski nou annan en kantite souvenir bann bon moman ki nou’n pase avek sa frer oubyen sa ser. Sa i sa bann kalite souvenir ki presye e ki nou anvi garde.

18. Ki nou’n aprann konsernan lanmour dan sa lartik?

¹⁸ Akoz nou anvi gard nou lanmour pour kanmarad for? Parey nou’n vwar dan sa lartik, ler nou demontre lanmour pour nou bann frer ek ser, nou montre ki nou kontan Zeova. Ki mannyer nou montre nou bann frer ek ser ki nou kontan zot? En fason ki nou fer sa i par rekonfort zot. Nou pou kapab “kontinyen rekonfort kanmarad” si nou annan konpasyon pour lezot. Ki mannyer nou kapab gard sa lanmour ki nou annan pour kanmarad for? Nou fer sa ler nou pardonn nou bann frer ek ser pour bann fot ki zot fer menm ler i difisil pour pardonn zot.

19. Akoz i enportan pour nou demontre lanmour pour kanmarad sirtou ozordi?

¹⁹ Akoz nou bezwen demontre lanmour pour kanmarad sirtou ozordi? Remark sa ki Pyer ti dir: “Lafen tou keksoz in vin pli pros. Alor, . . . zot devret kontan kanmarad en kantite.” (1 Pyer 4:​7, 8) Anmezir lafen sa move lemonn i vin pli pros, ki nou kapab ekspekte? Zezi ti dir sa konsernan son bann disip: “Tou nasyon pou ay zot akoz zot port mon non.” (Mat. 24:9) Pour nou kapab reste fidel avek Zeova menm si dimoun i ay nou, nou bezwen reste ini. Si nou kontan nou bann frer ek ser, Satan pa pou zanmen kapab kree divizyon parmi nou parski lanmour “i soud keksoz ansanm dan en fason parfe.”—Kol. 3:14; Fili. 2:​1, 2.