EN KANTITE frer ek ser ki ti’n kit zot pei pour al travay aletranze in aprezan retourn dan zot pei natal. Sa lanmour ki zot annan pour Zeova e pour lezot dimoun, in motiv zot pour al reste dan bann landrwa kot i annan bezwen pour plis proklanmater. (Mat. 22:37-39) Ki bann sakrifis ki zot in fer e ki mannyer Zeova in beni zot? Pour nou konn plis, annou vwar serten legzanp dan pei Kameroun ki dan was Lafrik.

An 1998, en frer ki apel Onésime ti kit son pei natal, Kameroun. Pour 14 an i ti reste aletranze. En zour, ler i ti dan renyon, i ti tann en diskour kot en frer ti donn en legzanp konsernan predikasyon. Dan sa diskour, sa frer ti dir: “Si de zanmi pe lapes dan diferan landrwa e enn pe atrap plis pwason ki lot, eski sa enn ki pa pe ganny bokou pwason pa ti pou al kot sa enn ki pe atrap plis pwason?”

Sa legzanp ti fer Onésime mazin pour retourn Kameroun pour ed bann proklanmater laba parski bokou dimoun ti anvi etidye Labib. Me i ti enkyet. Eski i ti pou kapab reste Kameroun apre tou sa letan ki i ti’n viv aletranze? Pour konnen si i ti pou kapab reste Kameroun, Onésime ti al laba pour sis mwan. Apre sa, an 2012 i ti al reste Kameroun.

Onésime i dir: “Mon ti bezwen adapte avek lasaler ek fason viv. Dan Lasal Rwayonm, mon ti bezwen abitye avek asiz lo ban ankor.” Avek en sourir, i dir: “Me pli mon ti konsantre lo sa ki ti pe pase, pli mon ti oubliye ki i ti annan bann sez konfortab dan lezot Lasal Rwayonm.”

An 2013, Onésime ti marye avek Géraldine, en ser ki ti’n fek retourn Kameroun apre ki i ti’n reste Lafrans pour ne-v-an. Ki benediksyon zot ti gannyen ler zot ti met lavolonte Zeova premye dan zot lavi? Onésime i dir: “Nou ti asiste Lekol pour bann Predikater Rwayonm e nou ti servi dan Betel. Pandan sa dernyen lannen, 20 etidyan Labib dan nou kongregasyon ti batize. Mon santi ki aprezan mon dan sa bon landrwa pour ‘lapes.’” (Mark 1:17, 18) Géraldine i dir: “Mon’n ganny bokou plis benediksyon ki mon ti pe ekspekte.”

Judith ti al reste Leta-z-ini me i ti anvi fer plis pour Zeova. I dir: “Sak fwa nou ti kit Kameroun apre ki nou ti’n al vizit nou fanmir, mon ti plere parski mon ti bezwen kit bann dimoun ki mon ti’n konmans fer letid Labib avek.” Par kont, Judith ti ezite pour al reste Kameroun. I ti annan en bon travay ki ti permet li pey swen medikal ki son papa ti bezwen Kameroun. Me Judith ti annan  konfyans dan Zeova e i ti al reste Kameroun. I dir ki i ti mank serten keksoz ki i ti kontan ler i ti pe reste Leta-z-ini. I ti priy Zeova pour demann li led e en sirveyan rezyonal ek son madanm ti ankouraz li.

Ler Judith i mazin lafason keksoz ti ete ler i ti retourn Kameroun, i dir: “Dan trwa-z-an mon’n annan lazwa pour mon ed kat dimoun batize.” Judith ti konmans servi konman en pionye spesyal. Ozordi, Judith i akonpanny son msye Sam-Castel, dan son servis konman sirveyan rezyonal. Me ki’n arive avek papa Judith? Judith ek son fanmir ti kapab trouv en lopital dan en lot pei ki ti pare pour peye pour loperasyon ki son papa ti bezwen fer. Sa loperasyon ti en sikse.

En frer ki apel Victor ti al reste Kanada. Apre ki i ti’n lir en lartik dan en Latour Veyer konsernan letid avanse, i ti reflesir lo son ledikasyon. I ti aret al liniversite e i ti pran en formasyon ki ti pli kourt. I dir: “Sa ti permet mwan ganny en travay pli vitman e fer sa ki mon’n toultan anvi fer, setadir fer pionye.” Pli tar, Victor ti marye avek Caroline e zot ti al vizit Kameroun. Ler zot ti laba, zot ti al vizit biro brans Temwen Zeova e serten frer ti ankouraz zot pour reflesir lo sa posibilite pour vin servi Kameroun. Victor i dir: “Nou ti napa okenn rezon pour refize e vi ki nou ti annan en lavi senp, nou ti aksepte sa lenvitasyon.” Menm si Caroline ti annan serten problenm lasante, zot ti deside pour al reste Kameroun.

Victor ek Caroline ti konmans servi konman pionye ordiner pour zot kapab ed bann dimoun ki ti anvi konn plis lo Labib. Zot ti’n anmas ase larzan alor o konmansman zot pa ti bezwen travay. Apre sa, zot ti al Kanada e travay pour detrwa mwan. Sa ti permet zot pour retourn Kameroun e kontinyen fer pionye. Ki benediksyon zot ti gannyen? Zot ti al Lekol pour bann Predikater Rwayonm, servi konman pionye spesyal e aprezan zot travay lo bann proze konstriksyon. Victor i dir: “Ler nou ti kit nou lavi konfortab, nou ti bezwen depan lo Zeova e akoz sa nou ti ganny sipor Zeova.”

An 2002, en etidyan liniversite Lalmanny ki apel Alain, ti lir sa trak Zenn​—Ki ou pou fer avek ou Lavi? Sa ki i ti lir lo sa trak ti motiv li pour sanz son lobzektif. An 2006, i ti asiste Lekol Formasyon Ministeryel e i ti ganny demande pour al servi dan son pei natal, Kameroun.

Ler Alain ti ariv Kameroun, i ti ganny en travay a mitan. Pli tar, i ti ganny en pli bon travay me i ti enkyet ki i ti pou napa ase letan pour partisip dan predikasyon parey avan. Alor, ler i ti ganny demande pour servi konman pionye spesyal, san ezite i ti aksepte. Son anplwayer ti ofer li en pli bon saler me Alain ti refize e i ti vin en pionye spesyal. Pli tar, Alain ti marye avek Stéphanie, en ser ki ti’n reste Lafrans pour plizyer lannen. Ki bann difikilte Stéphanie ti fer fas avek apre ki zot ti’n al reste Kameroun?

Stéphanie i dir: “Mon ti konmans annan bann pti problenm lasante ek alerzi me mon ti toultan ganny tretman neseser e sa soulazman ki mon ti bezwen.” Zeova ti beni sa koup pour zot landirans. Alain i dir: “Ler nou ti al predikasyon dan en vilaz elwannyen ki ti apel Katé, nou ti zwenn plizyer dimoun ki ti anvi etidye Labib. Pli tar, nou ti kapab etidye  Labib avek zot par telefonn. De parmi zot ti batize e aprezan en group proklanmater ti ganny formen.” Stéphanie i dir: “I napa en pli gran lazwa ki ler ou ed dimoun dedye zot lavi avek Zeova. Depi ki nou pe servi Kameroun, nou’n eksperyans sa lazwa plizyer fwa.” Ozordi, Stéphanie pe akonpanny Alain ki servi konman sirveyan rezyonal.

Gisèle ti batize ler i ti pe etidye dan en liniversite dan domenn medikal Itali. Sa koup pionye ki ti pe fer letid Labib avek li ti annan en lavi senp, sa ti enpresyonn li e ti fer li anvi fer plis dan predikasyon. Alor, Gisèle ti servi konman en pionye ordiner anmezir ki i ti pe kontinyen son letid.

Gisèle ti anvi retourn Kameroun pour li fer plis dan servis Zeova me i ti enkyet. I dir: “Si mon ti al reste Kameroun, mon ti pou nepli annan drwa reste Itali legalman e mon ti pou lwen avek mon fanmir ek zanmi ki reste Itali.” Kantmenm sa, an Me 2016, Gisèle ti al reste Kameroun. En pe letan apre, i ti marye avek en frer ki apel Léonce e biro brans Temwen Zeova Kameroun ti sizere ki zot al reste Ayos, en lavil ki ti annan gran bezwen pour bann proklanmater.

Ki mannyer lavi ti ete Ayos? Gisèle i dir: “Souvan i ti napa kouran pour plizyer semenn e nou pa ti kapab sarz nou telefonn. Laplipar ditan nou telefonn pa ti fonksyonnen. Mon ti aprann pour kwi manze lo dibwa e nou ti al sers delo avek bouret ek tors aswar ler i ti napa bokou dimoun.” Ki mannyer sa koup ti fer fas avek zot sityasyon? Gisèle i dir: “Lespri sen Zeova ti ed nou pour andire. Nou ti siport kanmarad nou de mon msye. Osi, nou fanmir ek zanmi ti ankouraz nou e parfwa zot ti menm ed nou finansyerman.”

Eski Gisèle i kontan ki in retourn dan son pei natal? I dir: “Wi! Definitivman! O konmansman, i ti annan bann difikilte e nou ti santi nou dekouraze me enn fwa ki nou ti sirmont tousala, mwan ek mon msye ti santi ki nou ti’n fer egzakteman sa ki nou ti bezwen fer. Nou annan konfyans dan Zeova e nou santi nou pli pros avek li.” Léonce ek Gisèle ti asiste Lekol pour bann Predikater Rwayonm e aprezan zot pe servi konman bann pionye spesyal tanporer.

Parey bann peser ki demontre kouraz malgre difikilte pour zot kapab atrap bokou pwason, bann frer ek ser ki retourn dan zot pei natal i pare pour fer sakrifis pour ed bann dimoun ki aksepte sa mesaz Rwayonm. Nou kapab asire ki Zeova pa pou oubliy lanmour ki sa bann proklanmater devoue in demontre pour son non. (Nee. 5:19; Ebr. 6:10) Si ou pe reste aletranze e dan ou pei natal i annan bezwen pour plis proklanmater, eski ou ti pou kapab retournen? Si ou fer sa, Zeova pou beni ou.​—Prov. 10:22.