1-2. (a) Ki en Kretyen i devret reflesir lo la avan i konmans pwente? (b) Ki i vedir ler de Kretyen i konmans “pwente”? (Vwar “Ki sa i vedir?”)

 ESKI ou ti pou kontan marye? Menm si en dimoun pa bezwen marye pour li ere, en kantite Kretyen ki selibater, ki swa zot zenn oubyen aze, ti pou vreman kontan annan en konzwen. Byensir avan ki ou konmans pwente, ou bezwen annan en bon lanmitye avek Zeova, konn ou lekor byen e kapab siport ou fanmir lo plan materyel. a (1 Kor. 7:36) Si sa i leka, i pou annan plis sans ki ou maryaz i ere.

² Me i pa toultan fasil pour trouv en bon konzwen. (Prov. 31:10) Menm si ou trouv en dimoun e ou anvi aprann konn li, i kapab pa fasil pour zot konmans pwente. b Dan sa lartik, nou pou vwar kwa ki kapab ed bann Kretyen ki selibater pour trouv en dimoun ki kapab vin en bon konzwen pour zot e konmans pwente. Nou pou osi vwar ki mannyer bann frer ek ser dan kongregasyon i kapab siport bann ki anvi marye.

KWA KI KAPAB ED OU TROUV EN BON KONZWEN?

3. Ki serten keksoz en Kretyen selibater i devret mazin lo la ler i pe rod en konzwen?

³ Si ou anvi marye, i ti pou pli byen ki ou konn bann kalite ki ou ti pou kontan ou konzwen i annan avan ki ou konmans pwente. Si non, sa i kapab fer ki ou pa remark en dimoun ki ti kapab en bon konzwen pour ou oubyen ou  kapab menm konmans pwente avek en dimoun ki pa pou en bon konzwen pour ou. Byensir sa dimoun ki ou pe mazin marye avek i devret en Kretyen ki’n batize. (1 Kor. 7:39) Me pa tou Kretyen ki’n batize ki pou vin en bon konzwen pour ou. Alor ou kapab demann ou lekor: ‘Ki bann lobzektif mon annan? Ki bann kalite ki i enportan pour mon konzwen annan? Eski sa ki mon ekspekte avek sa dimoun ki mon anvi marye avek, i rezonnab?’

4. Ki serten in koz avek Zeova lo la dan lapriyer?

⁴ Si ou ti pou kontan marye, i bezwen ki ou’n koz avek Zeova lo la dan lapriyer. (Fili. 4:6) Byensir Zeova pa’n promet ki i pou donn son bann serviter en konzwen. Me sa ki nou bezwen ek nou bann santiman i enportan pour Zeova. Alor i pou ed nou pandan ki nou pe rod en konzwen. Alor kontinyen koz avek Zeova konsernan sa ki ou anvi e konsernan ou bann santiman. (Ps. 62:8) Demann Zeova pour ed ou annan pasyans ek lasazes. (Zak 1:5) En frer selibater ki apel John, c e ki reste Leta-z-ini, i eksplike ki i dir dan son lapriyer: “Mon dir Zeova bann kalite ki mon anvi mon konzwen i annan. Mon demann Zeova pour donn mwan bann loportinite kot mon kapab trouv en dimoun ki pou vin en bon konzwen pour mwan. Mon osi demann Zeova pour ed mwan devlop bann kalite ki pou ed mwan vin en bon msye.” En ser ki reste Sri Lanka ki apel Tanya i dir: “Pandan ki mon pe rod en dimoun ki mon kapab marye avek, mon demann Zeova pour ed mwan reste fidel avek li, reste pozitif e reste zwaye.” Menm si ou bezwen esper en pe pli lontan ziska ki ou trouv en dimoun ki kapab vin en bon konzwen pour ou, Zeova i promet pour donn ou sa ki ou bezwen e donn ou  sa lanmour ek latansyon ki ou bezwen.—Ps. 55:22.

5. Ki loportinite bann Kretyen selibater i annan pour zwenn lezot Kretyen selibater ki kontan Zeova? (1 Korentyen 15:58) (Vwar portre.)

⁵ Labib i ankouraz nou pour “annan bokou keksoz pour fer dan travay Senyer.” (Lir 1 Korentyen 15:58.) Anmezir ou reste bizi dan servis Zeova e ou pas letan avek diferan frer ek ser, ou pou pas bann bon moman e ou pou osi annan loportinite pour zwenn lezot Kretyen selibater ki parey ou, pe konsantre lo zot servis pour Zeova. Anmezir ou fer ou mye pour fer plezir Zeova, ou pou annan vre lazwa.

6. Ki bann Kretyen selibater i bezwen gard antet ler zot pe rod en konzwen?

⁶ Ou bezwen fer atansyon ki ou pa les lefet ki ou pe rod en konzwen vin sa keksoz pli enportan dan ou lavi. (Fili. 1:10) Vre lazwa pa depan lo si ou’n marye oubyen non, me lo ou lanmitye avek Zeova. (Mat. 5:3) Konman en selibater, i kapab ki ou pli lib pour fer plis dan servis Zeova, alor servi byen sa letan. (1 Kor. 7:32, 33) En ser ki apel Jessica ki reste Leta-z-ini ti marye ler i ti annan apepre 40 an. Jessica i dir: “Ler mon ti selibater, mon ti reste okipe dan predikasyon e sa ti ed mwan pour annan lazwa menm si mon ti anvi marye.”

PRAN LETAN POUR OBZERV SA DIMOUN

7. Akoz i saz pour obzerv sa dimoun ki ou krwar pou vin en bon konzwen pour ou, avan ki ou dir li ki ou enterese avek li? (Proverb 13:16)

⁷ Ki ou devret fer si ou’n zwenn en dimoun ki ou krwar pou vin en bon konzwen pour ou? Eski ou devret dir sa dimoun ki mannyer ou santi deswit? Labib i dir ki en dimoun ki saz i devret rod konnesans avan ki i azir. (Lir Proverb 13:16.) Alor i ti pou saz ki ou obzerv sa dimoun pour en pe letan avan ki ou dir li ki ou enterese avek li. Aschwin ki sorti Pei Ba i dir: “Ou kapab devlop bann santiman deswit me sa bann santiman i kapab ale deswit. Alor ler ou pran letan pour obzerv en dimoun, ou pa pou fer desizyon pour konmans pwente dapre bann santiman ki kapab ale vitman.” Osi anmezir ou obzerv sa dimoun, ou kapab realize ki sa dimoun pa pou en bon konzwen pour ou.

8. Ki mannyer en Kretyen selibater i kapab obzerv en dimoun ki i krwar ti pou vin en bon konzwen pour li? (Vwar portre.)

⁸ Ki mannyer ou kapab obzerv sa dimoun ki ou enterese avek? Pandan bann renyon ek rankont, ou kapab remark serten keksoz konsernan personnalite sa dimoun, son konportman ek son lanmitye avek Zeova. Lekel son bann zanmi e ki i koz lo la? (Lik 6:45) Eski son bann lobzektif i en pe parey avek sa ki pour ou? Petet ou kapab koz avek bann ansyen dan son kongregasyon oubyen bann Kretyen matir ki konn li byen. (Prov. 20:18) Ou kapab demann zot konsernan repitasyon sa dimoun ek bann kalite ki i annan. (Rit 2:11) Anmezir ki ou obzerv sa dimoun, fer sir ki ou pa fer li enkonfortab. Fer sir ki ou respekte son santiman, ki ou pa fer li enkonfortab par toultan oule pas letan avek li oubyen par anvi konn tou keksoz lo li.

9. Ki ou devret asire avan ki ou dir en dimoun ki ou enterese avek li?

⁹ Ki kantite letan ou devret obzerv sa dimoun avan ki ou dir li ki ou enterese avek li? Si ou dir sa dimoun tro boner, i kapab krwar ki ou en dimoun ki pa reflesir avan ou fer bann desizyon. (Prov. 29:20) Me si sa dimoun i realize ki ou enterese avek li e ou pran tro bokou letan avan ler ou dir li ki ou enterese avek li, i kapab krwar ki ou en dimoun ki vwar li difisil pour fer desizyon.  (Ekle. 11:4) Rapel ki avan ou dir en dimoun ki ou enterese avek li, i pa neseser ki ou konvenki ki ou pou definitivman marye avek sa dimoun. Me ou devret konvenki ki ou’n pare pour marye e ki sa dimoun i kapab vin en bon konzwen pour ou.

10. Ki ou devret fer si ou realize ki en dimoun i enterese avek ou me ou pa enterese avek li?

¹⁰ Ki ou devret fer si ou realize ki en dimoun i enterese avek ou e i ti pou anvi aprann konn ou pli byen? Si ou pa anvi konmans pwente avek li, ou kapab montre par ou aksyon ki ou pa enterese. I ti pou mal pour les en dimoun krwar ki ou pare pour pwente avek li ler ou pa vreman anvi.—1 Kor. 10:24; Efe. 4:25.

11. Dan bann landrwa kot lezot ki fer laranzman pour de dimoun konmans pwente oubyen marye, ki sa bann dimoun i devret gard antet?

¹¹ Dan serten pei, bann paran oubyen lezot adilt ki swazir en konzwen pour en manm zot fanmir ki selibater. Dan lezot pei, bann fanmir oubyen zanmi ki rod en dimoun ki kapab vin en bon konzwen pour en selibater. Apre zot fer laranzman pour sa de dimoun zwenn pour zot vwar si zot anvi konmans pwente. Si ou ganny demande pour fer laranzman pour de dimoun vwar si zot anvi konmans pwente oubyen pour fer laranzman pour de dimoun marye, pran an konsiderasyon ki sak sa de dimoun ti ava kontan ek sa ki zot bezwen. Si ou krwar en dimoun pou vin en bon konzwen pour enn ou zanmi ouswa en manm ou fanmir, aprann konn sa dimoun byen, konn son bann kalite e pli enportan ankor, esey vwar si i annan en bon lanmitye avek Zeova. I pli enportan pour en dimoun annan en bon lanmitye avek Zeova ki pour li annan larzan, ledikasyon ouswa en bon ran sosyal. Me rapel ki i sa frer ek sa ser selibater ki devret deside si zot pou marye.—Gal. 6:5.

KI MANNYER OU KAPAB KONMANS PWENTE?

12. Ki mannyer ou kapab dir en dimoun ki ou anvi konmans pwente avek li?

¹² Ki mannyer ou pou dir en dimoun ki ou ti pou kontan konmans pwente avek li? d Ou kapab fer laranzman pour koz avek sa dimoun dan en landrwa piblik ouswa par telefonn. Dan en fason kler, dir sa  dimoun ki ou enterese avek li e ki ou ti ava kontan aprann konn li pli byen. (1 Kor. 14:9) Si i neseser, donn sa dimoun letan pour li reflesir avan ki i donn ou en larepons. (Prov. 15:28) Si sa dimoun pa enterese, respekte son santiman.

13. Ki ou kapab fer si en dimoun i dir ou ki i enterese avek ou? (Kolosyen 4:6)

¹³ Ki ou pou fer si en dimoun i dir ou ki i enterese avek ou? I tre probab ki i’n demann kouraz pour sa dimoun apros ou e dir ou ki i enterese avek ou, alor demontre labonte ek respe. (Lir Kolosyen 4:6.) Si ou bezwen letan pour deside si ou pou konmans pwente avek sa dimoun oubyen non, dir sa dimoun. Me esey donn li en larepons o pli vit posib. (Prov. 13:12) Si ou pa anvi konmans pwente avek sa dimoun, dir li dan en fason kler e avek labonte. Remark sa ki en frer ki apel Hans, ki reste Lotris ti dir ler en ser ti dir li ki i enterese avek li: “Mon ti dir li sa ki mon’n deside avek labonte e dan en fason kler. Mon ti dir li deswit parski mon pa ti anvi donn li lespwar ki en zour nou pou pwente. I pour sa menm rezon ki apre sa, mon ti osi fer atansyon ki mon pa dir oubyen fer okenn keksoz pour fer li krwar ki mon’n sanz mon nide.” De lot kote, si ou anvi konmans pwente avek sa dimoun, koz lo ou santiman e lo sa ki ou ekspekte i arive pandan ki zot pe pwente. Sa ki ou ekspekte i kapab diferan avek sa ki sa lot dimoun i ekspekte petet akoz ou kiltir i diferan oubyen akoz lezot keksoz.

KI MANNYER BANN DIMOUN DAN KONGREGASYON I KAPAB SIPORT BANN KRETYEN KI SELIBATER?

14. Ki mannyer nou kapab ankouraz e ed bann Kretyen ki selibater par nou parol?

¹⁴ Ki mannyer nou kapab ankouraz e ed bann Kretyen ki selibater ki anvi marye? En fason ki nou kapab fer sa i par fer atansyon sa ki nou dir. (Efe. 4:29) Nou kapab demann nou lekor: ‘Eski mon sikann bann ki anvi marye? Ler mon vwar en frer selibater ek en ser selibater pe koz avek kanmarad, eski mon dir ki zot enterese avek kanmarad?’ (1 Tim. 5:13) Osi nou pa devret zanmen fer bann Kretyen ki selibater santi ki i annan en keksoz mal avek zot oubyen ki zot enferyer akoz zot pa’n marye. Hans, ki’n ganny mansyonnen pli boner, i dir: “I annan serten frer ek ser ki dir ‘Akoz ou pa marye? Ou nepli zenn.’ Bann parol koumsa i fer bann selibater santi ki lezot pa apresye zot e i met presyon lo zot  pour marye.” I ti pou pli byen si nou rod loportinite pour felisit bann Kretyen ki selibater.—1 Tesa. 5:11.

15. (a) Dapre sa prensip dan Romen 15:2, ki nou devret reflesir lo la avan nou ed en dimoun trouv en konzwen? (Vwar portre.) (b) Ki leson enportan ou’n aprann dan sa video?

¹⁵ Ki nou pou fer si nou krwar ki en frer ek en ser ti pou fer en bon koup? Labib i ankouraz nou pour mazin santiman lezot. (Lir Romen 15:2.) En kantite selibater pa anvi ki lezot i entrodwir zot avek en dimoun ki zot krwar pou vin en bon konzwen pour zot. Nou devret respekte desizyon sa bann selibater. (2 Tesa. 3:11) Me i annan lezot selibater ki anvi ki lezot i ed zot me nou pa devret enterfer si zot pa’n demann nou pour ed zot. e (Prov. 3:27) Serten selibater i kontan ki keksoz i ganny fer dan en fason enformel. En ser selibater ki apel Lydia, ki reste Lalmanny i dir: “Ou kapab enkli sa frer ek sa ser dan en aktivite ki ou fer dan en gran group. Zis kree loportinite pour sa frer ek sa ser zwenn e les zot deside ki zot pou fer.”

16. Ki bann Kretyen selibater i devret gard antet?

¹⁶ Ki swa nou selibater oubyen nou’n marye, nou tou nou kapab ere! (Ps. 128:1) Alor si ou anvi marye me ou pa ankor trouv en dimoun, kontinyen konsantre lo ou servis pour Zeova. En ser ki apel Sin Yi ki reste Macao i dir: “Ler ou mazin sa letan ki ou pou pase avek ou konzwen dan paradi, sa letan ki ou selibater i vreman kourt. Apresye sa letan ki ou selibater e servi li byen.” Me ki ou pou fer si ou’n trouv en dimoun ki ou ti pou kontan marye avek e ou’n konmans pwente? Dan sa lartik ki swiv, nou pou vwar ki mannyer ou kapab servi sa letan ki ou pe pwente pour ed ou fer en desizyon ki saz.