Serten dimoun ki’n lir sa resi in demann sa kestyon. Me sa bann verse i koz lo de zonm ki tou le de ti apel Mefiboset. Nou kapab aprann en keksoz ler nou vwar sa ki ti arive.

Sail lerwa Izrael ti annan set garson ek de fiy. Premye garson Sail ti apel Zonatan. Pli tar, Sail ti ganny en lot garson avek son lot madanm Rizpa e i ti apel li Mefiboset. Zonatan ti osi annan en garson ki ti apel Mefiboset. Alor Lerwa Sail ti annan en garson ki ti apel Mefiboset e osi en pti zanfan ki ti apel Mefiboset.

Pli tar, Lerwa Sail ti konmans ay bann Gibeonnit ki ti pe reste parmi bann Izraelit e i ti esey touy zot tou. Aparaman, i ti touy serten parmi zot. I kler ki sa ti mal. Akoz? Dan letan Zozye, bann sef pep Izrael ti fer en lalyans lape avek bann Gibeonnit.​—Zoz. 9:3-27.

Sa lalyans ti ankor valid dan letan Lerwa Sail. Me kantmenm sa, Sail ti esey touy tou bann Gibeonnit. Sa ti fer ‘Sail ek son fanmir koupab.’ (2 Sam. 21:1, NWT) Finalman, David ti vin lerwa. Bann Gibeonnit ki ti ankor vivan, ti koz avek David konsernan sa ki Sail ti’n fer. David ti demann zot ki i kapab fer pour repar sa ki Sail ti’n fer pour ki Zeova i beni zot pei. Dan plas demann larzan, bann Gibeonnit ti demann David pour donn zot set zonm sorti dan desandans sa zonm ki ti’n “fer plan pour detri” zot, pour zot kapab touy sa bann zonm. (Nom. 35:30, 31) David ti livre sa bann zonm dan lanmen bann Gibeonnit.​—2 Sam. 21:2-6, NWT.

Sa letan, Sail ek Zonatan ti’n mor dan lager me Mefiboset, garson Zonatan ti ankor vivan. Mefiboset ti’n ganny en aksidan ler i ti ankor zanfan e i ti’n paralize. Alor i pa kapab ki Mefiboset ti’n donn lanmen son granpapa atak bann Gibeonnit. David ti’n fer en lalyans avek Zonatan e zot ti’n promet ki zot ti pou toultan reste zanmi. Sa ti pou enplik zot bann desandans, enkli Mefiboset garson Zonatan. (1 Sam. 18:1; 20:42) Labib i dir: “Lerwa [David] ti demontre konpasyon anver Mefiboset garson Zonatan ki ti garson Sail akoz sa serman ki i ti’n fer avek Zonatan garson Sail devan Zeova.”​—2 Sam. 21:7, NWT.

David ti fer sa ki bann Gibeonnit ti dir. I ti donn bann Gibeonnit de garson Sail, enn parmi ti apel Mefiboset e osi senk pti zanfan Sail. (2 Sam. 21:8, 9, NWT) Sa ti fer ki sa nasyon ti nepli koupab.

Nou aprann en lot keksoz avek sa moman dan listwar bann Izraelit. Lalwa Bondye ti kler. Labib i dir: “Bann zanfan pa devret mor akoz sa ki zot papa in fer.” (Det. 24:16, NWT) Si sa de garson Sail ek son senk pti zanfan ti inosan, Zeova pa ti pou’n aksepte ki sa bann zonm i ganny touye. Sa lalwa i osi dir: “Sakenn i devret mor pour son prop pese.” I paret ki sa de garson ek sa senk pti zanfan Sail ki ti ganny touye, ti’n partisip dan sa latak ki Sail ti’n fer pour detri tou bann Gibeonnit. Alor sa set zonm ti peye pour sa ki zot ti’n fer.

Sa resi i montre ki ler en dimoun i fer en keksoz mal, i pa kapab zistifye son lekor par mazinen oubyen dir ki i ti pe zis swiv lenstriksyon. En proverb i dir: “Aplati sa semen ki ou pou mars lo la e tou keksoz i ava al byen pour ou.”​—Prov. 4:24-27, NWT; Efe. 5:15.