1-2. Dapre Matye 5:11, ki mannyer nou devret vwar nou bann leprev?

 ZEZI ti promet son bann disip ki zot pou vreman ere. I ti osi averti tou bann ki kontan li ki zot pou fer fas avek problenm. (Mat. 10:22, 23; Lik 6:20-23) Nou kontan ki nou bann disip Kris. Me ki mannyer nou ti pou santi si nou fanmir i esey anpes nou servi Zeova, si gouvernman i persekit nou oubyen si nou bann koleg travay ouswa kanmarad lekol i esey fer nou fer en keksoz mal? Ler nou mazin sa bann keksoz, sa i kapab fer nou enkyet.

² Normalman, dimoun pa vwar persekisyon konman en rezon pour zwaye. Me sanmenm sa ki Parol Bondye i dir nou fer. Par egzanp, disip Zak ti ekri ki nou devret zwaye olye enkyet ler nou pas dan leprev. (Zak 1:2, 12) Zezi ti dir ki nou devret ere menm ler nou ganny persekite. (Lir Matye 5:11.) Ki mannyer nou kapab reste zwaye menm ler nou fer fas avek leprev? Nou kapab aprann en kantite avek serten keksoz ki Zak ti ekri pour bann Kretyen dan premye syek. Aprezan, annou vwar serten difikilte ki sa bann Kretyen ti fer fas avek.

3. Ki ti arive pa bokou letan apre ki Zak ti vin en disip Zezi?

³ Pa bokou letan apre ki Zak, demi frer Zezi ti’n vin en disip, bann Kretyen Zerizalenm ti ganny persekite. (Akt 1:14; 5:17, 18) Ler disip Etyenn ti ganny touye, en kantite Kretyen ti kit lavil. Zot ti “disperse partou dan bann rezyon Zide ek Samari” e zot ti menm ariv Sip ek Antyos. (Akt 7:58–8:1; 11:19) Bann disip ti fer fas avek bokou problenm. Kantmenm  sa, zot ti anons sa bon nouvel partou kot zot ti ale e zot ti form bann kongregasyon dan plizyer sa bann landrwa. (1 Pyer 1:1) Me i ti pou annan bokou plis problenm ki zot ti pou fer fas avek.

4. Ki lezot problenm bann Kretyen dan premye syek ti fer fas avek?

⁴ Bann Kretyen dan premye syek ti pas dan bokou problenm. Par egzanp, ver lannen 50, Lanperer Klod ti donn lord tou bann Zwif pour kit Ronm. Alor, bann Zwif ki ti’n vin Kretyen ti bezwen kit zot lakour e al reste en lot landrwa. (Akt 18:1-3) Ver lannen 61, zapot Pol ti ekri ki serten Kretyen ti’n ganny ensilte e maltrete an piblik, ganny met dan prizon e dimoun ti’n vol zot bann keksoz. (Ebr. 10:32-34) Osi, zis parey lezot dimoun, serten Kretyen ti malad e serten ti pov.​—Rom. 15:26; Fili. 2:25-27.

5. Ki kestyon nou pou reponn?

⁵ Ler Zak ti ekri son let avan lannen 62, i ti konn tre byen bann problenm ki son bann frer ek ser pe pas ladan. Zeova ti enspir Zak pour ekri en let pour sa bann Kretyen, pour donn zot konsey pratik ki pou ed zot reste zwaye malgre leprev. Annou vwar serten pwen dan let Zak e reponn sa bann kestyon swivan: Ki sa lazwa ki Zak ti koz lo la? Kwa ki kapab fer en Kretyen perdi sa lazwa? Osi, ki mannyer bann kalite parey lasazes, lazwa ek kouraz, i kapab ed nou reste zwaye malgre nenport ki leprev nou pas ladan?

6. Dapre Lik 6:22, 23, akoz en Kretyen i kapab zwaye ler i fer fas avek leprev?

⁶ Dimoun i kapab krwar ki zot pou ere si zot annan en bon lasante, en kantite  larzan ek en fanmir ere. Me sa kalite lazwa ki Zak i koz lo la, i form parti fri lespri sen Bondye e i pa depan lo sirkonstans en dimoun. (Gal. 5:22) En Kretyen i kapab zwaye ler i konnen ki i pe fer plezir Zeova e i pe swiv legzanp Zezi. (Lir Lik 6:22, 23; Kol. 1:10, 11) Nou lazwa i kapab ganny konpare avek en dife ki pe brile dan en lalanp. Sa lalanp i protez sa dife kont divan ek lapli e i fer li kontinyen brile. Pareyman, nou osi nou kapab kontinyen zwaye malgre nenport kwa ki arive dan nou lavi. Menm ler nou malad oubyen nou napa ase larzan, nou pa pou perdi nou lazwa. Nou osi pa pou perdi nou lazwa, ler dimoun i sikann nou oubyen ler nou fanmir ouswa lezot dimoun i opoz nou. Sak fwa dimoun i opoz nou, olye ki nou lazwa i diminyen, nou vin pli zwaye. Bann leprev ki nou fer fas avek akoz nou lafwa, i montre ki nou bann vre disip Kris. (Mat. 10:22; 24:9; Zan 15:20) I pour sa rezon ki Zak ti dir: “Mon bann frer, zot devret vreman zwaye ler zot fer fas avek diferan leprev.”​—Zak 1:2.

7-8. Ki lefe nou bann problenm i annan lo nou lafwa?

⁷ Zak ti donn en lot rezon akoz bann Kretyen i pare pour fer fas avek bann gro problenm. I dir: “Ler zot lafwa in ganny teste, sa i fer zot devlop landirans.” (Zak 1:3) Nou bann problenm i kapab parey dife ki sof feray pour form en lepe. Ler sa lepe in ganny sofe e apre refrwadir dan delo, sa metal i vin pli for. Pareyman, ler nou fer fas avek nou bann problenm e andire, nou lafwa i vin pli for. I pour sa rezon ki Zak ti dir: “Kontinyen andire parski sa pou form zot konpletman, zot pou san defo dan tou laspe.” (Zak 1:4) Ler nou vwar lafason ki nou bann problenm i fer nou lafwa vin pli for, nou kapab andire avek lazwa.

⁸ Dan sa let ki Zak ti ekri, i ti koz lo bann keksoz ki kapab fer nou perdi nou lazwa. Kwa ki kapab fer nou perdi nou lazwa e ki mannyer nou kapab sirmont zot?

9. Akoz nou bezwen lasazes?

⁹ Kwa ki kapab fer ou perdi ou lazwa? Ler ou pa konnen ki pour fer. Ler nou pas dan problenm, nou anvi rod led Zeova pour nou fer bann desizyon ki fer li plezir, pour ed nou bann frer ek ser e pour ed nou kontinyen servi li fidelman. (Zer. 10:23, NWT) Nou bezwen lasazes pour nou konnen ki pour fer e ki pour dir avek bann ki opoz nou. Ler nou pa konnen ki nou pou fer, nou kapab dekouraze e perdi nou lazwa.

10. Dapre Zak 1:5, ki nou bezwen fer pour ganny lasazes?

 ¹⁰ Ki ou kapab fer pour reste zwaye? Demann Zeova pour donn ou lasazes. Pour nou kapab reste zwaye ler nou pas dan problenm, nou bezwen priy Zeova e demann li sa lasazes ki nou bezwen pour fer bann bon desizyon. (Lir Zak 1:5.) Ki nou devret fer si nou santi ki Zeova pa pe reponn nou lapriyer deswit? Zak i dir ki nou devret “kontinyen demann” Bondye lasazes. Zeova pa pou ankoler ler nou kontinyen demann li lasazes. O kontrer ler nou demann nou Papa ki dan lesyel, lasazes pour andir nou bann problenm, i pou donn nou lasazes “avek zenerozite.” (Ps. 25:12, 13) I vwar nou bann problenm, i pa kontan vwar nou pe soufer e i vreman anvi ed nou. Sa i fer nou vreman zwaye! Me ki mannyer Zeova i donn nou lasazes?

11. Ki en lot keksoz nou bezwen fer pour ganny lasazes?

¹¹ Zeova i donn nou lasazes atraver son Parol. (Prov. 2:6) Pour ganny sa lasazes, nou bezwen etidye Parol Bondye ek bann piblikasyon baze lo Labib. Me nou pa devret zis etidye Labib, nou devret fer sa ki Bondye i demann nou pour fer. Zak ti ekri: “Pa zis ekout parol Bondye me met li an pratik osi.” (Zak 1:22) Ler nou aplik bann konsey Bondye, nou vin bann dimoun ki kontan fer lape, ki rezonnab e ki annan bokou pitye. (Zak 3:17) Sa bann kalite i ed nou fer fas avek nou bann problenm, san ki nou perdi nou lazwa.

12. Akoz i enportan ki nou konn byen sa ki Labib i dir?

¹² Parol Bondye i parey en laglas. I ed nou vwar kwa ki nou kapab amelyore e ki mannyer nou kapab fer li. (Zak 1:23-25) Par egzanp, apre ki nou’n etidye  Parol Bondye nou kapab realize ki nou bezwen kontrol nou lakoler. Avek led Zeova, nou aprann pour demontre ladouser ler dimoun i fer nou ankoler oubyen ler nou fer fas avek en problenm ki fer nou ankoler. Vi ki nou en dimoun dous, nou kapab reazir pli byen ler nou annan problenm. Nou kapab reflesir pli byen e fer bann pli bon desizyon. (Zak 3:13) Alor i vreman enportan ki nou konn byen sa ki Labib i dir.

13. Akoz ou devret etidye legzanp bann dimoun dan Labib?

¹³ Parfwa nou aprann kwa ki nou pa devret fer, apre ki nou’n fini fer en fot. Me sa i pa en bon fason pour aprann. En bon fason pour vin saz, i ler nou aprann avek sa ki lezot in fer byen e avek sa ki zot in fer mal. I pour sa rezon ki Zak i ankouraz nou pour etidye legzanp bann dimoun dan Labib, parey Abraam, Raab, Zob ek Eliya. (Zak 2:21-26; 5:10, 11, 17, 18) Sa bann serviter fidel Zeova ti fer fas avek bann problenm ki ti’n kapab fer zot perdi zot lazwa. Zot legzanp i montre ki avek led Zeova zot ti kapab andire e nou osi nou kapab fer parey.

14-15. Akoz nou pa devret inyor nou bann dout?

¹⁴ Kwa ki kapab fer ou perdi ou lazwa? Ler ou annan bann dout konsernan ou lafwa. Parfwa nou kapab vwar li difisil pour konpran sa ki Labib i dir. Oubyen i kapab ki Zeova pa reponn nou lapriyer parey nou ti ava kontan. Sa i kapab fer nou konmans annou dout. Si nou inyor nou bann dout, sa i kapab afebli nou lafwa e gat nou lanmitye avek Zeova. (Zak 1:7, 8) Zot menm kapab fer nou perdi nou lespwar pour lavenir.

¹⁵ Zapot Pol ti dir ki nou lespwar i parey lank en bato. (Ebr. 6:19) Pandan en tanpet, lank en bato i anpes sa bato fer nofraz. Me sa lank i itil si sa lasenn ki atas avek bato pa kase. Zis parey larouy i fer lasenn en lank fay, nou bann dout i kapab afebli nou lafwa. Ler en dimoun ki annan dout i pas dan problenm, i kapab aret krwar ki Zeova pou akonpli Son bann promes. Si nou napa lafwa, nou napa lespwar. Zak ti dir ki en dimoun ki annan dout “i parey laroul dan lanmer ki divan i pous dan tou sort direksyon.” (Zak 1:6) I tre probab ki en dimoun koumsa, pa pou zanmen ere!

16. Ki nou devret fer si nou annan dout?

¹⁶ Ki ou kapab fer pour reste zwaye? Retir sa bann dout e ranforsi ou lafwa. Azir vitman. Dan letan profet Eliya, pep Zeova ti annan dout konsernan zot krwayans. Eliya ti dir zot: “Ziska kan zot pou bwete lo de lopinyon diferan? Si Zeova i sa vre Bondye, ale swiv li; me si i Baal, ale swiv li.” (1 Rwa. 18:21, NWT) Ozordi, nou osi nou bezwen azir vitman. Nou bezwen fer resers pour fer sir lo nou menm ki Zeova i Bondye, ki Labib i son Parol e ki Temwen Zeova i son pep. (1 Tesa. 5:21) Si nou fer sa, nou pou nepli annan dout e nou pou ranforsi nou lafwa. Nou kapab demann bann ansyen pour ed nou fer sa. Nou bezwen azir vitman si nou anvi kontinyen servi Zeova dan lazwa.

17. Ki pou arive si nou napa kouraz?

¹⁷ Kwa ki kapab fer ou perdi ou lazwa? Ler ou dekouraze. Parol Bondye i dir: “Si ou dekouraze dan letan ladetres, ou lafors pou ptigin.” (Prov. 24:10, NWT) Sa mo Ebre ki’n ganny tradwir “dekouraze” i kapab vedir “napa kouraz.” Si ou napa kouraz, ou pou perdi ou lazwa vitman.

18. Ki savedir landirans?

¹⁸ Ki ou kapab fer pour reste zwaye? Depan lo Zeova pour donn ou kouraz pour  andire. Nou bezwen annan kouraz si nou anvi andire e fer fas avek nou bann problenm. (Zak 5:11) Sa mo ki Zak i servi, ki ganny tradwir konman “landirans” i fer nou mazin en dimoun ki reste ferm e ki pa bouze dan son pozisyon. I fer nou mazin en solda ki annan kouraz, ki pe debout dan son pozisyon e ki pa taye ler bann lennmi i atake.

19. Ki nou kapab aprann avek legzanp zapot Pol?

¹⁹ Zapot Pol in kit en zoli legzanp konsernan kouraz ek landirans. Parfwa, i ti santi li feb. Me i ti kapab andire parski i ti depan lo Zeova pour li kapab ganny sa lafors ki i ti bezwen. (2 Kor. 12:8-10; Fili. 4:13) Nou tou nou kapab annan sa kalite lafors ek kouraz si nou demontre limilite e rekonnet ki nou bezwen led Zeova.​—Zak 4:10.

20-21. Kwa ki nou kapab asire?

²⁰ Nou kapab asire ki bann problenm ki nou pas ladan, i pa en pinisyon sorti kot Zeova. Zak ti dir: “Personn pa devret dir ler i pas dan leprev: ‘Bondye ki pe teste mwan.’ Parski Bondye pa kapab ganny teste par sa ki mal e li menm i pa teste personn par sa ki mal.” (Zak 1:13) Ler nou asire ki sa i vre, nou pou vin pli pros avek nou Papa ki dan lesyel, ki kontan nou.​—Zak 4:8.

²¹ Zeova “pa sanze.” (Zak 1:17) I ti ed bann Kretyen dan premye syek ler zot ti pas dan problenm e i pou osi ed sakenn ant nou ozordi. Senserman, demann Zeova pou ed ou annan lasazes, lafwa ek kouraz. I pou reponn ou lapriyer. Si nou fer sa, nou kapab asire ki Zeova pou ed nou gard nou lazwa ler nou pas dan problenm!