1. Ki nou bezwen fer pour nou vreman zwaye e akoz? (Izai 48:17, 18)

 NOU Papa ki dan lesyel i kontan nou en kantite e i anvi ki nou annan en lavi ki zwaye la konmela e dan lavenir. (Ekle. 3:12, 13) I’n kree nou avek sa abilite pour fer serten keksoz remarkab me i pa’n kree nou avek sa abilite pour diriz nou prop lekor oubyen pour deside pour nou menm kwa ki byen e kwa ki mal. (Ekle. 8:9; Zer. 10:23) I konnen ki pour nou vreman zwaye, nou bezwen servi li e viv dapre son bann standar.—Lir Izai 48:17, 18.

2. Ki Satan i anvi nou krwar me ki Zeova in fer?

² Satan i anvi nou krwar ki nou pa bezwen Zeova pour nou zwaye e ki bann imen i kapab diriz zot prop lekor dan sa bon fason. (Zen. 3:4, 5) Pour montre ki Satan i en manter, Zeova in les bann imen diriz zot prop lekor pour en serten letan. Nou pa bezwen get lwen pour vwar ki fason dirize bann imen in anmenn bann move rezilta. De lot kote, dan Labib i annan legzanp en kantite msye ek madanm ki ti zwaye parski zot ti servi Zeova. Parmi zot tou, Zezi Kri i sa enn ki ti pli zwaye. Dan sa lartik, nou pou vwar akoz Zezi ti swazir pour servi Zeova. Apre nou pou vwar akoz nou Papa ki dan lesyel i merite ki nou ador li. Finalman, nou pou vwar serten rezon akoz nou swazir pour servi Zeova.

AKOZ ZEZI TI SWAZIR POUR SERVI ZEOVA?

3. Ki Satan ti ofer Zezi e ki desizyon Zezi ti fer?

³ Ler Zezi ti lo later, i ti bezwen swazir lekel ki i ti pou adore. Pa bokou letan apre ki Zezi ti’n batize, Satan ti dir Zezi ki i ti pou donn li tou bann rwayonm dan sa lemonn si i zis ador li en fwa. Zezi ti dir: “Sorti la ale Satan! Parski i’n ganny ekrir: ‘I Zeova ou Bondye ki ou devret adore e zis li tousel ki ou devret servi.’” (Mat. 4: 8-10) Akoz Zezi ti fer sa desizyon? Annou vwar detrwa rezon.

4-5. Ki serten rezon akoz Zezi ti swazir pour servi Zeova?

⁴ Sa rezon prensipal akoz Zezi ti swazir pour servi Zeova, i akoz i kontan son Papa en kantite e i annan lafeksyon pour li. (Zan 14:31) Osi, Zezi ti servi Zeova parski sa ti sa pli bon keksoz pour fer. (Zan 8:28, 29; Rev. 4:11) I ti konnen ki Zeova i sa Enn ki donn lavi, ki diny konfyans e ki zenere. (Ps. 33:4; 36:9; Zak 1:17) Zeova in toultan koz laverite avek Zezi e li ki’n donn Zezi tou sa ki Zezi i annan. (Zan 1:14) Me Satan i konpletman diferan avek Zeova. I ti tant bann imen pour fer pese e akoz sa, bann imen i mor. Satan i en manter ki egois e ki mazin zis son lekor. (Zan 8:44) Alor vi ki Zezi i konn tou sa lenformasyon lo Zeova e osi lo Satan, Zezi pa ti ni menm mazinen pour vin parey Satan e rebel kont Zeova.—Fili. 2:5-8.

⁵ En lot rezon akoz Zezi ti swazir pour servi Zeova, i akoz i ti konnen ki si i ti reste fidel avek Zeova, sa ti pou akonpli en kantite bon keksoz. (Ebr. 12:2) I ti konnen ki si i ti reste fidel, i ti pou sanktifye non son Papa e i ti pou fer li posib pour retir tou bann soufrans ki Dyab in anmennen.

AKOZ ZEOVA I MERITE KI NOU ADOR LI?

6-7. Akoz ozordi en kantite dimoun pa servi Zeova me akoz Zeova i merite ki nou ador li?

⁶ Ozordi en kantite dimoun pa servi Zeova parski zot pa ankor aprann konsernan son bann zoli kalite e zot pa konn tou bann bon keksoz ki i’n fer pour zot. Sa ti le ka pour bann dimoun ki Pol ti anons sa bon nouvel avek dan lavil Atenn. Zot osi zot pa ti konn Bondye.—Akt 17:19, 20, 30, 34.

⁷ Pol ti eksplik bann dimoun dan lavil Atenn ki sa vre Bondye ki “donn tou dimoun lavi, i fer zot tou respire e i donn zot tou keksoz.” I ti osi dir: “I gras a li ki nou vivan, ki nou mouvmante e egziste.” Bondye i Kreater e “in servi en sel zonm pour fer tou nasyon.” Alor i merite ki nou ador li.—Akt 17:25, 26, 28.

8. Ki Zeova pa pou zanmen fer? Eksplike.

⁸ Zeova i Kreater e Souvren liniver. Alor i ti’n kapab fors dimoun pour servi li. Me Zeova pa pou zanmen fer sa. O kontrer i donn nou en kantite levidans ki montre ki i egziste e ki i kontan sakenn parmi nou en kantite. I anvi ki lamazorite dimoun i vin son zanmi pour touzour. (1 Tim. 2:3, 4) I pour sa rezon ki Zeova i donn nou formasyon pour nou kapab ansenny lezot konsernan bann bon keksoz ki i pou fer pour bann imen e lafason ki i pou fer sa. (Mat. 10:11-13; 28:19, 20) I’n organiz nou dan bann kongregasyon kot nou kapab ador li e kot nou kapab ganny led avek bann ansyen ki kontan nou.—Akt 20:28.

9. Ki mannyer Zeova i montre ki i kontan tou imen?

⁹ Nou kapab vwar sa gran lanmour ki Zeova i annan pour bann imen par lafason ki i tret bann dimoun ki pa krwar ki i egziste. Reflesir lo sa: Tou dilon listwar, plizyer bilyon dimoun in swazir pour viv dapre zot prop standar konsernan sa ki byen e sa ki mal. Kantmenm sa, Zeova in demontre labonte anver zot e in donn zot sa ki zot bezwen pour kontinyen viv e pour annan en lavi ki zwaye.  (Mat. 5:44, 45; Akt 14:16, 17) Gras a Zeova, zot kapab annan fanmir ek zanmi ki kontan zot, zot kapab annan zanfan, travay e annan en lavi ki gou. (Ps. 127:3; Ekle. 2:24) Levidans i montre ki nou Papa ki dan lesyel i kontan tou bann imen. (Egz. 34:6) Aprezan annou vwar serten rezon akoz nou swazir pour servi Zeova e ki mannyer i beni bann ki swazir pour servi li.

AKOZ NOU SWAZIR POUR SERVI ZEOVA?

10. (a) Ki sa rezon prensipal ki nou servi Zeova? (Matye 22:37) (b) Dan ki fason Zeova in demontre pasyans anver ou? (Psonm 103:13, 14)

¹⁰ Parey Zezi, sa rezon prensipal akoz nou servi Zeova, i akoz nou vreman kontan li e annan lafeksyon pour li. (Lir Matye 22:37.) Ler nou aprann konsernan son bann kalite, sa i fer nou vin pli pros avek li. Par egzanp, reflesir lo lafason ki Zeova i demontre pasyans anver nou. Ler bann Izraelit ti dezobei li, i ti sipliy zot: “Silvouple, aret fer bann move keksoz ki zot pe fer.” (Zer. 18:11) Zeova pa oubliye ki nou enparfe e ki nou’n ganny fer avek lapousyer. (Lir Psonm 103:13, 14.) Ler ou reflesir lo lafason ki Zeova in demontre pasyans e lo son bann lezot zoli kalite, pa sa i fer ou anvi servi pour touzour?

11. Ki lezot rezon nou swazir pour servi Zeova?

¹¹ Nou osi anvi servi Zeova parski sa, i sa pli bon keksoz pour fer. (Mat. 4:10) Osi, nou konnen ki si nou reste fidel avek Zeova, sa pou anmenn en kantite byenfe. Ler nou reste fidel avek Zeova, nou ede sanktifye son non, nou montre ki Dyab i en manter e nou fer nou Papa kontan. Si nou swazir pour servi Zeova depi la konmela, nou annan sa loportinite pour servi li pour touzour.—Zan 17:3.

12-13. Ki nou aprann avek leksperyans Jane ek Pam?

¹² Depi ki nou ankor byen zenn, nou kapab devlop en gran lanmour pour Zeova. Sa lanmour pou vin pli for anmezir nou vin pli vye. Annou vwar sa ki ti arive avek de ser ki sorti dan menm fanmir. Enn ti apel Jane e lot ti apel Pam. a Jane ti annan 11 an e Pam ti annan 10 an ler zot ti konmans etidye Labib. Menm si zot paran pa ti anvi etidye Labib, zot ti donn Jane ek Pam permisyon pour etidye Labib avek Temwen Zeova. Zot ti dir ki Jane ek Pam ti kapab fer sa, si zot ti al lanmes avek zot fanmir dan wikenn. Jane i dir: “Bann Temwen Zeova ti ansenny mwan sa ki Labib i dir e sa ti ed mwan reziste presyon mon bann kanmarad lekol pour servi drog e pour komet imoralite seksyel.”

¹³ Detrwa lannen pli tar, Jane ek Pam ti vin proklanmater. Pli tar, zot ti konmans fer pionye e an menm tan pran swen avek zot paran aze. Ler Jane i mazin tou sa ki Zeova in fer pour zot, i dir: “Mon’n aprann pour mwan menm ki Zeova i fidel e i pran swen avek son bann zanmi. Parey 2 Timote 2:19 i dir, ‘Zeova i konn sa bann ki pour li.’” I kler ki Zeova i toultan pran swen avek bann ki swazir pour kontan li e pour servi li.

14. Ki mannyer nou kapab defann repitasyon Zeova? (Vwar portre.)

¹⁴ Nou anvi ki dimoun i konn laverite konsernan Zeova. Reflesir lo sa: Meton ou annan en bon zanmi ki zenere, ki demontre  labonte e ki pare pour pardonnen. En zour, ou tande ki dimoun in dir ki ou zanmi i kriyel e i pa onnet. Ki mannyer ou pou reakte? Ou pou defann repitasyon ou zanmi. Dan menm fason, ler Satan ek bann ki ganny enfliyanse par Satan i fann bann mansonz pour esey gat repitasyon Zeova, nou defann Zeova par dir laverite lo Li. (Ps. 34:1; Iza. 43:10) Par sa ki nou dir e fer, nou montre ki nou anvi servi Zeova avek tou nou leker.

15. Ki byenfe zapot Pol ti gannyen ler i ti fer bann sanzman? (Filipyen 3:7, 8)

¹⁵ Nou pare pour fer bann sanzman pour nou kapab fer Zeova plezir oubyen pour nou kapab fer plis dan son servis. Annou vwar legzanp zapot Pol. Pol ti annan en pozisyon enportan dan larelizyon Zwif me i ti swazir pour kit tousala deryer pour li kapab vin en disip Kris e pour servi Zeova. (Gal. 1:14) Sa ti fer ki i ti annan bann zoli leksperyans dan son servis pour Zeova e i ti ganny loportinite pour dirize ansanm avek Zezi dan lesyel. Pol pa ti zanmen regrete ki i ti’n fer sa desizyon pour servi Zeova e si nou osi nou fer parey, nou pa pou dezapwente.—Lir Filipyen 3:7, 8.

16. Ki nou aprann avek leksperyans Julia? (Vwar portre.)

¹⁶ Si nou fer nou servis pour Zeova vin sa keksoz pli enportan dan nou lavi, Zeova pou beni nou la konmela e dan lavenir. Annou vwar leksperyans en ser ki apel Julia. Ler Julia ti ankor pti, i ti sante dan lakoral legliz. I ti sant sitan byen ki i ti ganny formasyon avek en santer  profesyonnel ki sant opera. I pa ti pran bokou letan pour Julia vin renonmen e i ti konmans sant dan bann landrwa renonmen. Pandan ki i ti pe lekol dan en lekol lanmizik ki renonmen, en kanmarad lekol ti konmans koz avek li konsernan Bondye e i ti eksplik li ki Bondye i annan en non e sa i Zeova. Pa bokou letan apre, Julia ti konmans etidye Labib de fwa par semenn. Avek letan, i ti deside pour servi son letan ek lenerzi pour servi Zeova dan plas vin en santer opera. I pa ti fasil pour li fer sa desizyon. Julia i dir: “En kantite dimoun ti dir ki mon ti pe gaspiy sa kado ki mon ti’n gannyen. Me mwan mon ti anvi servi mon lavi pour servi Zeova.” Ki mannyer Julia i santi konsernan sa desizyon ki i ti fer plis ki 30 an pase? I dir: “Mon annan lape lespri e mon annan konfyans ki dan lavenir, Zeova pou donn mwan tou sa ki mon anvi.”—Ps. 145:16.

KONTINYEN SERVI ZEOVA

17. Lefet ki lafen sa lemonn i pros, ki lefe sa i annan lo bann ki’n swazir pour servi Zeova e lo bann ki pa ankor fer li?

¹⁷ Lafen sa lemonn i vreman pros. Zapot Pol ti dir: “Parski dan ankor ‘en pti pe letan,’ ‘sa enn ki pe vini pou arive e i pa pou tarde.’” (Ebr. 10:37) Ki lefe sa i annan lo nou? Premyerman, i pa reste  bokou letan pour dimoun swazir pour servi Zeova. (1 Kor. 7:29) Si nou’n deza fer sa desizyon pour servi Bondye, nou konnen ki menm si nou pou bezwen fer fas avek problenm, sa pou zis “en pti pe letan.”

18. Ki Zezi ek Zeova i anvi nou fer?

¹⁸ Zezi ti ankouraz dimoun pour vin son disip me i ti osi ankouraz zot pour kontinyen swiv li. (Mat. 16:24) Si nou deza pe servi Zeova pour plizyer lannen, annou determinen pour kontinyen fer li. Nou bezwen fer en kantite zefor pour nou kapab kontinyen fer sa. I pa toultan fasil me depi la konmela nou kapab zwaye e ganny en kantite benediksyon.—Ps. 35:27.

19. Ki nou aprann avek leksperyans Gene?

¹⁹ Serten dimoun i krwar ki si zot servi Zeova, zot pa pou annan en lavi ki gou. Si ou en zenn, eski ou santi ki si ou servi Zeova, ou pou mank serten keksoz? En zenn frer ki apel Gene i dir: “Mon ti santi ki konman en Temwen Zeova, mon ti pe ganny prive bann keksoz ki gou. En kantite zenn ki mon ti’n grandir avek ti pe al parti, pwente e zwe bann zwe video ki vyolan e i paret ki sa ti gou. Tandis ki mwan, mon ti pe asiste renyon e al predikasyon.” Ki lefe sa fason panse ti annan lo Gene? I dir: “An sekre, mon ti konmans fer serten move keksoz ki sa bann zenn ti pe fer e pour en serten letan, i ti gou. Me mon pa ti vreman zwaye. Mon ti konmans mazin bann laverite dan Labib ki mon ti’n swazir pour dezobei e mon ti deside pour servi Zeova avek tou mon leker. Depi sa zour, mon santi ki Zeova in reponn tou mon bann lapriyer.”

20. Ki nou devret determinen pour fer?

²⁰ Dan en sanson, en psalmis ti dir Zeova: “Ere sa enn ki ou swazir e ki ou fer vin reste dan bann lakour ou tanp.” (Ps. 65:4) Alor annou determinen pour kontinyen servi Zeova e parey Zozye, nou anvi dir: “Mwan ek mon fanmir, nou pou ador Zeova.”—Zoz. 24:15.