1. Kwa ki fer nou vreman zwaye?

 ZEOVA i anvi ki nou zwaye. Nou konn sa parski lazwa i en kalite ki son lespri sen i ed nou devlope. (Gal. 5:22) Vi ki i annan plis lazwa pour donnen ki pour resevwar, nou vreman zwaye ler nou travay dir dan predikasyon e nou ed bann frer ek ser dan diferan fason.​—Akt 20:35.

2-3. (a) Dapre Galat 6:4, ki sa de keksoz ki pou ed nou reste zwaye dan servis Zeova? (b) Ki nou pou vwar dan sa lartik?

² Dan Galat 6:4, zapot Pol ti koz lo de keksoz ki pou ed nou reste zwaye. (Lir.) Sa verse i montre ki premyerman, nou lobzektif i pour donn Zeova nou meyer. Si nou pe donn Zeova nou meyer, nou pou zwaye. (Mat. 22:36-38) Dezyenmman, nou pa devret konpar nou avek lezot. Zeova ki’n donn nou tou sa ki nou annan. Alor, nou devret rekonesan anver Zeova pour nenport keksoz ki nou kapab fer akoz nou lasante, formasyon ouswa abilite. De lot kote, i kapab ki serten frer oubyen ser pe fer pli byen dan predikasyon ki nou. Nou devret kontan ki zot pe servi zot abilite pour loue Zeova olye pour fer vantar ouswa pour zot lentere personnel. Alor, dan plas fer konpetisyon avek zot, nou devret aprann avek zot.

³ Dan sa lartik, nou pou vwar kwa ki kapab ed nou ler nou dekouraze akoz nou pa kapab fer tou sa ki nou anvi dan servis Zeova. Nou pou osi vwar ki mannyer nou kapab pli byen servi nenport abilite ki nou annan e ki nou kapab aprann avek legzanp lezot.

4. Kwa ki kapab fer serten parmi nou dekouraze? Donn en legzanp.

⁴ Serten serviter Zeova i vwar li difisil pour adapte ler zot nepli kapab fer sa ki zot ti ava kontan dan servis Zeova akoz zot nepli zenn parey avan ouswa akoz zot malad. Sanmenm sa ki ti arive avek Carol. Oparavan, i ti servi dan en landrwa kot ti annan bezwen pour plis proklanmater. Pandan sa letan, i ti kondwir 35 letid Labib e i’n ed plizyer dimoun pour dedye zot lavi avek Zeova e batize. Carol ti ganny bann bon rezilta dan predikasyon! Me apre i ti malad e depi sa zour, i nepli kapab kit son lakour. Carol i dir: “Mon konnen ki akoz mon malad, mon pa kapab fer sa ki lezot i kapab fer. Sa i fer mwan santi ki mon pa sitan fidel parey zot. Mon pa kapab fer tou sa ki mon ti ava kontan fer e sa i fer mwan dekouraze.” Carol i anvi fer tou sa ki i kapab pour Zeova e akoz sa i merit ganny felisite. Nou kapab asire ki nou Bondye ki annan en kantite konpasyon i kontan ki Carol i anvi donn son meyer.

5. (a) Ki nou devret rapel si nou dekouraze akoz nou pa kapab fer sa ki nou ti ava kontan? (b) Parey nou vwar dan sa bann portre, ki mannyer en frer in kontinyen donn Zeova son meyer?

⁵ Si parfwa ou dekouraze akoz ou pa kapab fer sa ki ou ti ava kontan, demann ou lekor: ‘Ki Zeova i ekspekte avek mwan?’ Zeova i anvi ki ou donn ou meyer dapre ou sirkonstans. Annou vwar en legzanp. En ser ki annan 80 an i dekouraze parski i pa kapab fer sitan bokou dan predikasyon parey i ti fer ler i ti annan 40 an. I krwar ki menm si i pe donn son meyer, sa pa fer plezir Zeova. Me eski sa i vre? Zis mazin sa. Si sa ser ti donn son meyer ler i ti annan 40 an e i ankor pe donn son meyer ler i annan 80 an, sa i vedir ki i pa’n zanmen aret donn Zeova son meyer. Si nou santi ki sa ki nou pe fer pa ase pour fer plezir Zeova, nou bezwen rapel ki Zeova i sa enn ki deside kwa ki ase pour fer li plezir. Si nou donn nou meyer, Zeova pou kontan e i pou konmsi i pe dir nou: “Ou’n byen fer.”​—Konpar Matye 25:20-23.

6. Ki nou aprann avek legzanp Maria?

⁶ Nou pou zwaye si nou konsantre lo sa ki nou kapab fer olye lo sa ki nou pa kapab fer. Annou vwar legzanp en ser ki apel Maria. Maria i annan en maladi ki anpes li fer sa ki i ti ava kontan dan predikasyon. O konmansman, i ti dekouraze e i ti santi ki i pa vo nanryen. Me apre i ti mazin en ser dan kongregasyon ki pa kapab marse e i ti deside pour ed sa ser. Maria i dir: “Mon ti fer laranzman pour fer predikasyon avek li atraver telefonn e atraver let. Sak fwa nou ti travay ansanm, mon ti vreman kontan ler mon ti retourn dan lakour akoz mon ti’n kapab ed mon ser.” Nou osi nou kapab pli zwaye ler nou konsantre lo sa ki nou kapab fer olye lo sa ki nou pa kapab fer. Me ki nou pou fer si nou kapab fer plis dan servis Zeova ouswa nou pe fer pli byen dan serten form servis?

7. Ki konsey ki zapot Pyer ti donn bann Kretyen?

⁷ Dan sa premye let ki zapot Pyer ti ekri, i ti ankouraz son bann frer ek ser pour servi nenport abilite ki zot annan pour ankouraz lezot. Pyer ti ekri: “Parey bann bon administrater labonte ekstraordiner Bondye ki ganny demontre dan diferan fason, sakenn i devret servi sa  abilite ki i’n gannyen pour servi lezot.” (1 Pyer 4:10) Nou devret fer nou mye pour servi nou abilite e pa enkyet ki lezot pou zalou ouswa dekouraze akoz sa ki nou pe fer. Si nou ezite pour servi nou abilite, nou pa ti pou pe donn Zeova nou meyer.

8. Dapre 1 Korentyen 4:6, 7, akoz nou pa devret fer vantar konsernan nou bann abilite?

⁸ Nou bezwen servi nou bann abilite me nou bezwen fer atansyon ki nou pa fer vantar akoz sa bann abilite. (Lir 1 Korentyen 4:6, 7.) Par egzanp, petet ou kapab konmans letid Labib fasilman. Ou pa devret ezite pour servi sa abilite me i enportan ki ou pa fer vantar konsernan sa. Meton, ou’n ganny en zoli leksperyans resaman dan predikasyon. Ou’n reisi konmans en letid Labib. Ou vreman anvi koz lo sa leksperyans avek ou group predikasyon. Ler ou zwenn ou group, en ser pe rakont en leksperyans kot i’n kapab donn en magazin. Zis mazin sa. Ou, ou’n konmans en letid Labib me sa ser in donn en magazin. Ki ou pou fer? Ou konnen ki ou leksperyans pou ankouraz ou group me ou esper en lot zour pour koz lo ou leksperyans pour ki ou pa dekouraz sa ser. Dan sa fason, ou pou pe demontre labonte anver sa ser. Me pa aret ofer letid Labib. Servi sa abilite ki ou annan!

9. Ki mannyer nou devret servi nou bann abilite?

⁹ Nou bezwen gard antet ki okenn abilite ki nou annan i en kado sorti kot Bondye. Nou devret servi sa bann kado pour ankouraz bann frer ek ser me pa pour fer vantar. (Fili. 2:3) Ler nou servi nou lafors ek abilite pour fer lavolonte Bondye, nou pou annan rezon pour zwaye, pa akoz nou pe fer plis ki lezot ouswa nou pe esey montre ki nou pli siperyer ki lezot me akoz nou pe servi nou bann abilite pour loue Zeova.

10. Akoz i pa rezonnab pour konpar nou avek lezot?

¹⁰ Si en dimoun pa fer atansyon, i kapab konmans konpar son pwen for avek pwen feb en lot dimoun. Par egzanp, petet en frer i fer bann zoli diskour e sa i son pwen for. Me petet i kapab ki i krwar i pli siperyer ki en lot frer ki vwar li difisil pour fer diskour. Me i kapab ki sa frer i fer byen dan lezot keksoz. Par egzanp, i kontan demontre lospitalite, i pe byen donn son bann zanfan formasyon e i devoue  dan predikasyon. Nou rekonesan ki nou annan en kantite frer ek ser ki pe servi zot bann abilite pour servi Zeova e ed lezot!

11. Akoz nou devret esey swiv legzanp Zezi?

¹¹ Menm si nou pa devret konpar nou avek lezot, nou kapab aprann en kantite keksoz avek lezot serviter Zeova. Par egzanp, annou vwar legzanp Zezi. Menm si i ti parfe, nou kapab aprann avek son bann zoli kalite ek bann keksoz ki i ti fer. (1 Pyer 2:21) Ler nou fer nou mye pour swiv son legzanp, nou vin en pli bon serviter Zeova e nou fer pli byen dan predikasyon.

12-13. Ki nou kapab aprann avek legzanp Lerwa David?

¹² Dan Parol Bondye, i annan legzanp en kantite zonm ek madanm fidel ki menm si zot ti enparfe, nou kapab swiv zot legzanp. (Ebr. 6:12) Annou vwar legzanp Lerwa David. Zeova ti dir ki David ti “en zonm ki fer [Li] plezir.” (Akt 13:22) Me David ti enparfe. Anfet, i ti fer bann fot grav. Kantmenm sa, i en bon legzanp pour nou. Akoz sa? Parski ler i ti ganny disiplinen, i pa ti esey rod leskiz. O kontrer, i ti aksepte konsey e i ti regrete pour sa ki i ti’n fer. Sa ti fer ki Zeova ti pardonn li.​—Ps. 51:3, 4, 10-12.

¹³ Nou kapab aprann avek legzanp David par demann nou lekor sa bann kestyon swivan: ‘Ki mannyer mon reazir ler mon ganny konsey? Eski mon aksepte mon fot deswit? Eski mon esey rod leskiz? Eski mon kontan blanm lezot? Eski mon fer zefor pour pa fer menm fot?’ Ou kapab demann ou lekor bann kestyon en pe parey ler ou lir konsernan lezot madanm ek zonm fidel dan Labib. Eski zot ti fer fas avek bann problenm ki en pe parey avek sa ki pour ou? Ki bann bon kalite ki zot ti demontre? Sak fwa ki ou lir konsernan sa bann serviter, demann ou lekor: ‘Ki mannyer mon kapab swiv son legzanp pli byen?’

14. Ki nou aprann avek legzanp bann frer ek ser?

¹⁴ Nou kapab osi aprann avek legzanp lezot frer ek ser ki swa zot zenn ouswa aze. Par egzanp, eski i annan en dimoun dan ou kongregasyon ki pe fer fas avek en problenm me i pe reste fidel? Petet lezot pe met presyon lo li pour fer en move keksoz, son fanmir pe opoz li ouswa i malad? Eski ou vwar bann bon kalite ki  sa dimoun i annan ki ou ti ava kontan demontre? Ler ou medit lo son bon legzanp petet ou pou aprann ki mannyer pour fer fas avek ou problenm. Nou vreman zwaye e rekonesan ki sa bann frer ek ser fidel in donn nou bann bon legzanp lo ki mannyer pour demontre lafwa.​—Ebr. 13:7; Zak 1:2, 3.

15. Ki konsey ki zapot Pol ti donnen ki kapab ed nou kontinyen trouv lazwa dan nou servis pour Zeova?

¹⁵ Pour annan lape ek linite dan kongregasyon, nou tou nou bezwen donn Zeova nou meyer. Annou vwar legzanp bann Kretyen dan premye syek. Zot ti annan diferan abilite ek responsabilite. (1 Kor. 12:4, 7-11) Me sa pa ti kree divizyon parmi zot e fer zot fer konpetisyon. Plito Pol ti ankouraz sakenn parmi zot pour fer sa ki neseser “pour batir lekor Kris.” Pol ti dir bann Kretyen Efez: “Ler sak parti lekor i travay konman fodre, alor sa i kontribye pour ki lekor antye i kontinyen grandi e devlope dan lanmour.” (Efe. 4:1-3, 11, 12, 16) Sa bann ki ti aksepte konsey Pol ti fer ki i annan lape ek linite dan kongregasyon. Sanmenm sa ki nou vwar dan nou bann kongregasyon ozordi.

16. Ki nou devret determinen pour fer? (Ebre 6:10)

¹⁶ Annou determinen pour pa konpar nou avek lezot. O kontrer, aprann avek legzanp Zezi e esey demontre bann kalite ki i ti demontre. Aprann avek bann legzanp dan Labib ek legzanp bann serviter Zeova dan nou letan ki’n demontre lafwa. Anmezir ki ou kontinyen donn Zeova ou meyer, ou kapab asire ki Zeova “pa enzis pour oubliy sa ki [ou’n] fer.” (Lir Ebre 6:10.) Kontinyen trouv lazwa dan ou servis pour Zeova e asire ki i kontan ler i vwar ou pe fer ou mye pour fer li plezir.